MARKUS 11
11
Yesus Yerusalem ajisosef
(Mat. 21:1-11; Luk. 19:28-40; Yoh. 12:12-19)
1Barewen. Aramat ow Yerusalem sotop asisiatfes ara, ar kota Betfageam, kota Betaniaam, ajaremfesen. E kota jamnuk e sikon asan juwas Saitun aemamesefen. Er Yerusalem sotop arawen. Yesusam jirmec e amamkawi ipic jamnuk ajirimefen. 2“Car e bap ewames cemsanpu bajarey. E cemsan ajaremcokom, ay keledai manmok apematamcomokom. E keledai cum pok epcom ara. Wow ajiwaram, ow e keledai bak ton batometapporji opok. Caram e cum pok mamsurumey, wunam e keledai arasan mamtowotnawey. 3Owam jonow car atowporcannew, ‘Car e keledai cum pok ucimas asurumamokom?’ inim aecannew, car masirin, ‘Tuhan e keledai bak ton bajaren. Aramat ipicam e keledai sarim aofasimtamcema.’ Inim mameey.” Yesus inim aeefen.
4Bare, e ipic jamnuk ajisosfesen. Aram e ay keledai apowtewfesen. E keledai e bokotpu aememefen. Ar cem jimasappu cum pok epcom, aememefen. E ipic jamnuk e cum pok basurum aememfes ara, 5wun erasan aememfes ow jonow atowporfesen. “Car e keledai cum pok ucimas asurumamokom?” Inim aefesen.
6E ipic jamnuk masirin, e Yesus atawef atakam jipu cowok e ow aotawfesen. E ow masirin, “Bare. Poknak opok. Inim atewey.” Inim aefesen. 7Aram e ay keledai Yesuspu atowocenfesen. Wunam ar e abaju mamincop e keledai bak ton atometmuwtiwfesen. Yesus masirin, e keledai bak ton atometapefen. 8Ow arkeam e abaju e bokotpu amuwtiwtotorfesen. Wun ow masirin, os ef asesakamtawa aefes, wunam e pok e bokotpu amuwtiwa aefesen. 9Yesusam e ay keledai bak ton ajarefen. Wun owam e bap ajarfesen. Wun ow masirin, e fa asoromfesen. E ow takasam si asifesen. “Dormomo! Tuhan asan akat a atewenamamar ipic baomcow! 10E darafas Daud, bare pemerintah akat aemawirien. Awap ipic inim awcawor pemerintah aoemcema. Bare, Allah asan akat awap ipic baomcow. Allah dormomo!” Inim aefesen.
11Bare, Yesus e Yerusalem ajaremefen. Aram e Allah cem ajiwemefen. Ajiwemef masirin, ar e pok takas manmok apepemefen. Aram jo atief aporefen. Inimas aram, e amamkawi ow dua belas ajiwaram, e Betani ajisosfesen.
E eke opok os atakam
(Mat. 21:18-19)
12Ajofay ara masirin, ar e Betani ewjisosfesen. Yesusam amosto aememefen. 13Aramat ipic, os juwas “arā” damasan opok inim aporefen. Ar e os, e epcom aporefen. Aramat ipic masirin, e os, eke epen bapor, aapenefen. Aram e os, eke opok cowok aporefen. Ar os e cowokin aporefen. Er arā os eke bapetep bwi opok arawen. 14Yesusam atakam e arā os aotawefen. “Ow e oreke boemen opok cowoka.” Inim aeefen. E amamkawi owam inim atakam jen ajifesen.
Yesus Allah cem afiwef
(Mat. 21:12-17; Luk. 19:45-48; Yoh. 2:13-22)
15Barewen. Ar Yerusalem ajaremfesen. Yesusam e Allah cem afiwemefen. Afiwemef masirin, ar e cem aman pok juw buwumamtaw ow aotewerisimefen. Aram e uang juw buwumcicirimtaw ow ameja takas bipar ajimirsasamefen. Aram pari juw buwumamtaw ow akursi takas ajimirsasamefen. 16Aram ow, pok e Allah cem batowomiwam, batowomisam, acuw aatefen. 17Aram atakam e erasan aememfes ow amememtamefen. “E Alkitab atakam, ‘E docem, e samatin samatin janim do manim cem aemamescema.’ Inim aema. Ca nat, a cem osom ow barewsiap asan aemapomfokom.” Yesus inim aeefen.
18E ow arke e Yesus amememtamef atakam jen ajifesen. Inimas ar junum awut aefesen. E Allah atakam mamtaw tugas ow awutam, e Allah Jirmec mamememtam owam, e ow junum awut aefesas aporfesen. Inimas aram omar aefesen. Aram Yesus bacatiw at aetiwfesen.
19Barewen. Joam atiefen. Inimas Yesusam, amamkawi owam, e kota afisfesen.
Yesus e eke opok os atakam atawef
(Mat. 21:20-22)
20Ajofay tam ara masirin, aram ajarfesen. Ar e os juwas “arā” aoporfesen. Bare, e os sanakut aporfesen. 21Petrusam e Yesus bap aemefas bi binip acomomefen. Aram atakam Yesus aotawefen. “Guru. Or e arā os bajursum jirmec ajirimfem. Bare, e os sanakut ara.” Inim aeefen. 22Yesusam atakam e ow aotawefen. “Bare, Allah basicim faka. 23Atakamnak ara, ow atakam e sikon aotawces, ‘Bare, oram baysosey. E jicupum bwi orma jupuey,’ inim aeces, bare e sikon e aratakam jipu cowok aemcema— e ow bi binip arke opok aememces ara. Aram, ‘E sikon e daratakam jipu cowok aemcema,’ inim atakam asicimtotorces, bare e sikon e jicupum bwi ajupucema. 24Car janim Allah aanimcokom, caram, ‘Bare, Allah e janim aanimamomas aemtamcemarow,’ inim atakam mamsicimkurumey. Allah masirin, e janim aanimcokomas car aemtamceman. 25Car janim Allah aanimcokom, e nat car wun ow bifan afayomcokom, bare car e ow e pwicakas aemfanas, binip mamtakamjiwosomey. Allah masirin, e aemfokom dosa, binip ajiwosomcema.” [ 26Car, ow e pwicakas aemfanas, binip biwosom opok aemcokom, Allah e cadosa, binip biwosom opok aemcema.]
E aemamemas, jirmec ca jirimfan?
(Mat. 21:23-27; Luk. 20:1-8)
27Barewen. Ar Yerusalem aofasifesen. Yesusam e Allah cem aman acowojarefen. Acowojaref ara, e Allah atakam mamtaw tugas ow awutam, e Allah Jirmec mamememtam owam, e Yahudi ownucur owam, aramat ipic ameromfesen. 28Aram jonow Yesus atowporfesen. “E aemamemas nat, jirmec ca jirimfan?” Inim aefesen.
29E Yesus masirin, “Doram jonow cowoknakap car botowpormin. Caram atep bajitcan. Dor masirin, e aemaminas jirmec ajirimfan ipic, atakam car aotawcimin. 30E Yohanes bwi abwimefas, jirmec ca jirimef? Allah aranew? Asmat ow aranew? Bare atakam dor aotawcan.” Inim aeefen.
31Bare, e ow eras aramaman atakam aamtawfesen. “Dar atakam aotawcom, ‘Allah eras jirmec ajirimef,’ inim aecom, aramat ipic masirin, ‘Ca nat, e Yohanes basicim opok ucimaram?’ inim aecema. 32Da nat, ‘Asmat ow eras jirmec ajirimef.’ Inim aecom, a ow arke atakam dar aotawcemarowos.” Inim aefesen. Bare, ow arke abi binip ara, “E Yohanes, Allah atakam botaw ipic ara,” inim bi binip aceceremfes. Inimas ar e ow arke omar aefesen. 33Inimas aram atakam Yesus aotawfesen. “E Yohanes bwi abwimefas jirmec ajirimef camnew? Daram namsom opok.” Inim aefesen.
E Yesus masirin, “Bare, doram e aemaminas jirmec ajirimfan ipic, atakam ca bwemotaw asan opok.” Inim aeefen.
Currently Selected:
MARKUS 11: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
