MARKUS 1

Yohanes Bwi Babwim Ipic atakam

(Mat. 3:1-12; Luk. 3:1-18; Yoh. 1:19-28)

1Awames atakam e Yesus Kristus Atakam Akat ara. Aramat ipic, bare Allah atiw ara. 2E Atakam Akat e Allah atakam botaw ipic juwas Yesaya atakam jipu ara. Ametnak ara, aramat ipic a atakam inim tulis aeefen:

“Allah atakam atawef, ‘Dor e doratemen batam ipic bap atewosomcimin. Or masirin, asep aenawcemen. Aramat ipic e aenawcemes, atakam aotawcema. Aram ow e apwicakas biwosom, wunam or bwenaw manmok bafe, inim atakam aotawcema.’ Allah inim aeefen.

3Jipic cowok cem opok asan atakam afakaytawcema. ‘E Tuhan ajarcow bokotpu mamkenemtiwey. E bokotpuam, tarowata.’ Inim aecema.”

Yesaya inim tulis aeefen.

4Bare, jipic juwas Yohanes Bwi Babwim Ipic arawen. Ar e Yesaya tulis aeefas jipu aemefen. Ar e cem opok asan ajisefen. Aram acacapiomefen. “Caram e cadosa takas bak bapayemtotorey. Ow masirin, bwi car mambwimtotorcan. Inimas Allah e cadosa akokoromosomtamceman.” Inim aeefen. 5E Yudea capinmi ow takasam, e kota Yerusalem ow takasam, e Yohanespu aapenfesen. Aram e adosa, atakam afafasitotorfesen. E Yohanes masirin, e ow, jo juwas Yordan bwi abwimefen.

6E Yohanes ajimjaref pakaian, unta fin picin arawen. E ase manam pok, binatang picin arawen. Aramos pok masirin, pikamam, emor bwiam, arawen. 7Aram acacapiomefen. “Jipic cowok dofa asoromceman. Aramat ipic ow awut ara. Do kanim ara. Inimas do bi fop baneyjiap, wunam e asandal somen basurumtam, dor inimas bwemem asan opok. 8Dor bwi car emcabwimen. Aramat ipic nat, e Roh Kudus e cajak aman afimimtamtotorcemen.” Inim aeefen.

Yohanes, Yesus bwi abwimef

(Mat. 3:13-17; Luk. 3:1-22)

9Bare, Yesusam Galilea capinmi kota juwas Nasaret ewenawefen. E Yohanes masirin, e Yesus, Yordan jo bwi abwimefen. 10Yesusam e bwi aewsowkunawefen. Bwi aewsowkunawef masirin, aramat ipic e onam op atereytepef asarimporefen. E Allah Roham pari cimin aneyef, wunam ar e Yesus dam ton aneyapefen. 11Atakamam e onam op ewneyefen. “Or dotiw ara. Dor damos or ajiomamin. Dor or akat ara.” Inim aeefen.

Iblis, Yesus dosa bwem acajijimtawporef

(Mat. 4:1-11; Luk. 4:1-13)

12E Allah Roh masirin, e Yesus, cem opok asan baysos, jirmec asarimjirimefen. 13Yesus e cem opok asan isi empat puluh ajiwar aemapawirien. Iblisam, Yesus dosa bwem acajijimtawporefen. E wasan binatang arkeam erasan aememawirisen. Malaikatam Yesus akac aemapawirisen.

Yesus jim bapi ow a mamkawi jirmec ajirimef

(Mat. 4:12-22; Luk. 4:14-15, 5:1-11)

14Barewen. Ow Yohanes penjara cem aman ajiwtewapomfesen. Penjara cem aman ajiwtewapomfes masirin, Yesus Galilea capinmi ajisosefen. Aram e Allah Atakam Akat acacapiomefen. 15“E Allah atakam atawef jofay, bare emcaenawef. E Allah Pemerintah aenawcow jofayam, sotopnakap asisienawma. Caram e cadosa takas bak bapayemkurumey! E Atakam Akat basicimey.!” Inim aeefen.

16Barewen, Yesus e bwi juwas Galilea e jopir ajarefen. E jopir ajaref ara, ar Simonam, arewec juwas Andreasam, aporefen. E ipic jamnuk jim bapi cescuw ow arawen. Inimas ar jim apifesen. 17Yesusam atakam e ow aotawefen. “Deyo! Mamkawicano! Dor, car asmat ow, enam inim bapitaw, amememtamcimin.” Inim aeefen. 18E ipic jamnuk masirin, e ajim bakan asarimjifesen. Aram aramat ipic ajamkawifesen.

19Yesusam aojarefen. Yesus aojaref ara, ar Yakobusam, arewec juwas Yohanesam, aporefen. E ipic jamnuk Sebedeus atiperes arawen. Ar e ajim jof bakekem ci aman aemapfesen. 20Yesusam e ipic jamnuk asarimjateefen. Aramat ow masirin, e aricipic Sebedeusam, e kerja bwemtam owam, ci aman bakan ajiosfesen. Aram Yesus ajamkawifesen.

Yesus, jipic cowok jak aman aemapawiri dat, aotewerisimef

(Luk. 4:31-37)

21Barewen. Yesusam, amamkawi owam, kota Kapernaum ajaremfesen. E ses Ban Jo aenawef ara, Yesus sembahyang cem afiwef, wunam atakam amememtamefen. 22E atakam jen ajifes owam junum awut aefesen. Ar Yesus e Allah Jirmec mamememtam ow inim cimin atakam mamememtam opok aporfesen. E nat, aramat ipic atakam amememtamef ara, aram atakam faknakut aotawefen. 23Wun ipic cowokam e sembahyang cem afiwemefen. E ipic jak aman, dat arawen. Aram atakam afakaytawefen. 24“Yesus. Or Nasaret ipic ara. Or ucim pok emcarowem. Or da bafakamkurum arapen? Oram nomsom. Or e Allah atewnemef tarowat ipic ara.” Inim aeefen.

25Tesus masirin, jirmec e dat ajirimefen. “Jokona. Oram e ipic jak aman ewfisey.” Inim aeefen.

26Barewen. E dat e ipic jis apimefen. Aram jen awut ajief, wunam e ipic jak aman ewfisefen. 27E ow takasam junum awut aefesen. Aram atakam aramaman aamtawfesen. “A ucimasam? Aramat ipic ay atakam amememtamama! Aram atakam faknakut atawma. Ar jirmec dat ajirimama. E datam aratakam ji aemes.” Inim aefesen.

28Bare, Yesus, e Galilea jamam takas an asarimfufuosefen.

Yesus dam ow arke ajaworomtawef

(Mat. 8:14-17; Luk. 4:38-41)

29Barewen. Yesusam, amamkawi owam, e sembahyang cem afisfesen. Afisfes masirin, ar Petrusam, Andreasam, acem akan aakosfesen. Yakobusam, Yohanesam, akac ajarfesen. 30Bare, Simon anapwec dam aemamesefen. Yesus erasan ajaremef, owam inim atakam Yesus asarimotawfesen. 31Yesus masirin, e cowoc sotop ameromefen. Aram e cowoc ban ajimtewef, wunam asumutumapomefen. E cowoc masirin, dam asarimjufamapefen. Aram amos pok e ow atetamefen.

32Porow ara, jo asapineyefen. Jo asapineyef masirin, e ow samat, dam owam, jak aman dat owam. Yesuspu atowotnawfesen. 33E kota ow takasam e cem jimasappu ajarewsiemfesen. 34Aramat ipicam dam ow arke ajaworomtewa aeefen. E damas, cīncīn damas arawen. Aram dat arke, ow ajak aman aotewerisima aeefen. E datam Yesus amsom. Inimas Yesus, e dat, atakam botaw, acuw aatefen.

Yesus, Galilea capinmi acacapiomef

(Luk. 4:42-44)

35Barewen. Ajofay iram fak, Yesus ajitefen. Aram e cem afisef, wunam cem opok asan ajisosefen. Erasan ara, aram janim Allah aanimefen. 36E nat, Simonam, arakac owam, Yesus apowporfesen. 37Aram Yesus apowtewfes ara, atakam aotawfesen. “Ow takas or apowmenes.” Inim aeefen.

38E Yesus masirin, “Dar ajawosmar samatin samatin jisosmoc. Dor e asanin asanin bacacapiom. Bare, dor inimas cowok bwem aenawof.” Inim aeefen. 39Bare, aramat ipic e Galilea capinmi samatin samatin asembahyang cem aman acacapioma aeefen. Aram ow jak aman dat aotewerisima aeefen.

Yesus penyakit kusta ipic ajaworomtewef

(Mat. 8:1-4; Luk. 5:12-16)

40Barewen. Penyakit kusta ipic Yesus aenawomef, wunam ar aramat ipic bipu jine onok aneyotapefen. Aram janim fak Yesus aanimefen. “Or faknakut ara. Oram akat aporcem, or dam akat do batetam araman.” Inim aeefen.

41Yesusam e ipic saw akat aoworporefen. Aram ban ajoromef, wunam e ipic dam ton atatiwefen. “Dor inimas akat ara. Or dam akat ememey.” Inim aeefen. 42Yesus inim atakam atawef cowok masirin, e penyakit kusta e ipic bakan asarimjiosefen. E ipicam dam akat aememefen. 43-44Yesusam jirmec fak e ipic ajirimefen. “Or aras atakam e wun ow botaw arapok. O nat, e Allah atakam mamtaw tugas ipic akan mamakosey. Aramat ipic or baoworporcan. Or masirin, e Musa jirmec ajirimef pok, Allah mamtetamey. Eras or dam akat aememamem baporomtamas ara.” Inim aeefen. Inim aeef masirin, Yesus e ipic asarimtewosomefen.

45E ipic ajisosefen. E nat, ar eras atakam e asanin asanin aotawefen. Ow arkenakut e Yesus aemefas jen ajifesen. Inimas Yesus e kotain kotain umuton bwemfiw asan opoken. E nat, ar e cem opok asan aemapefen. E asanin asanin owam aramat ipicpu aenawomfesen.

Currently Selected:

MARKUS 1: LAICNS

Highlight

Copy