MATIUS 24

Allah cem daniwis aemamescema

(Mrk. 13:1-2; Luk. 21:5-6)

1Bare. Yesus e Allah cem awut afisef. Aramat ipic cowocemsowmepaw, e amamkawi ow, aenawomfes. Ar e Allah cem takas, e Yesus aporomtamfes. 2Aramat ipic masirin, atakam e ow aotawef. “Car aras takas apormokomnew? Atakamnak ara, asep jofay a cem ek amanapor tonapor memames opok cowok aemcemes. Jewew ow nat, e ek takas ajumnemkurumcemes.” Inim aeef.

Ow ajurusemcemes

(Mrk. 13:3-13; Luk. 21:7-19)

3Bare. Aramat ipic e sikon juwas Saitun op cowocemapmepaw, e amamkawi ow arop, aramat ipic aenawomfes. “Atakam otawcarowey. E atakam ataweremas ucim jofay emcow? E aofasicem jofayam, e asepnak jofayam, sotop enawcow, Allah ucim junum bweas aporomtamcow?” Inim aefes. 4Yesus masirin, atakam e ow aotawef. “Caram pimicima. Ow tot ca botasin. 5Ow arke aenawcemes, wunam, ‘E Allah Aeremtewef Ipic, bare dor ara,’ inim aetotorcemes. Aram tot ow arke aotcemes. 6Caram jewew bamo aporcomokom. Jewew bamo atakamam jen ajicomokom. Ca nat, omar arapok. Bare, ow jewew aamocemes araman. E nat, e asepnak jofay sotopnak opok aemamescema. 7Wun samat arke jewew e wun samat arke aamoa aecemes. Wun pemerintah arke jewew e wun pemerintah arke aamoa aecemes. Asan arkeam, ow amosto damir aafa aecemes. Asan arkeam ayow asisimtawa aecema. 8Eras takas nat, e bap bajurusemas ara. Wun bajurusemas masirin, asep ara.”

9“Er masirin, ow ban car akimomceman. Aram kawey ow, car bajurusum aotasimemtamceman. Aram car acajimirceman. E samatin takas, car do mamkawi ow aporceman. Ar masirin, bifan car afayomceman. 10Ow arkeam do mamkawi akorompimcemes. E ow arkeam aramaman aamotasimemtamcemes. Aram bifan aramaman aamfayomcemes. 11Allah atakam botaw suw ow arkeam asitcemes. Ar ow arke tot aotcemes. 12Ow e Allah atakam bopow kayimin aameskakayiawarcemes. Inimas ow, damos kawey ow bajiom, akorompimcemes. 13E nat, ow e asepnak jofay ajiwar do mamkawi bakorompim opok aeces, aram ajoremcemes. 14Ow, a Allah Pemerintah Atakam Akat e capinmiin capinmiin takas acacapiomcemes. E atemen atakam e samatin samatin takas jen bajias ara. Er masirin, e asepnak jofay aenawcema.” Yesus inim aeef.

E Pwicak Awutnakutas

(Mrk. 13:14-23; Luk. 21:20-24)

15-16“E Allah atakam botaw ipic juwas Daniel, ‘Pwicak Awutnakutas’ bwenaw, atakam atawefen. Caram e Pwicak Awutnakutas e karow asan memem aporcokom, bare e Yudea capinmi aememames ow, e sikon asanpu omar bajisosces. (Bare, a atakam baca bwem ow, a atakam jen bajikurumces.) 17E aporsipor cemko aemapces ow, e apok e acem batakamjiwtew arapok. 18E kebun kerja aemces owam, e abaju bofasitew arapok. 19Bare e jofay e jak epcom cepesam, e jiwi aw anamces cepesam, asan pwicaknakut aememcemes. 20Caram janim Allah mamanimey. E omar jisoscokom jofay, e jufu bwi enemtepcow jofay arapok. Eram Ses Ban Jo arapok. Inim janim mamanimey. 21Bare, e jofay, ow bajurusem awutnakut aemcemes. Allah a capinmi akenemtiwef jofayam, wow ajiwaram, inim awutnakut bojurusem opok aemcemes. Eram boenaw opok cowok aemcema. 22Allah nat, atakam asakamtiwef. ‘E ow ajurusemcesas, jirow arapok.’ Inim aeef. Ar inim atakam basakamtiw opok ayaw, ow takas damir aafcemes. E nat, Allah e ar aereremtawef ow sawes akat aoworporef. Inimas ar e ow ajurusemcesas, jirow arapok, inim atakam asakamtiwef.”

23“Ow atakam car aotawcan, ‘Jakaperey. E Allah Aeremtewef Ipic arasan ara,’ wunam, ‘E Allah Aeremtewef Ipic erasan ara,’ inim aecannew, car e atakam jen baji arapok. 24Bare, wun ow, ‘Dor e Allah Aeremtewef Ipic awamcey ara,’ inim suw atakam atawtotorcemes. Suw Allah atakam botaw owam aememcemes. E ow tot e Allah aereremtawef owam aotporcemes. Inimas ar junum bweas aemcemes. 25Jakaperey. Dor a atakam bap car aotawfin.”

26“Inimas ara, ow atakam car aotawcan, ‘Jakaperey. Aramat ipic e cem opok asan awamec,’ inim aecan, car erasan baysos arapok. Wunam, ‘Aramat ipic e cem aman awap,’ inim aecan, car e atakam jen baji arapok. 27Bwer aran ewparaycema, wunam piri aneyparaytepcema. Bare, e Asamat Anakat Ajaworemef Ipic inim umuton aenawcema. 28E sok cīncin, e damir pok asan aakopsiawarma.”

E Asmat Anakat Ajaworemef Ipic aofasicowas

(Mrk. 13:24-27; Luk. 21:25-28)

29“E jofay ara, ow ajurusemcemes. Ajurusemces masirin, e jopok jiwic asarimcamtiwcema. E piram baneyseremtiw opok aemcema. E bayitam, bayaram, akokoysayneycema. Allaham e onam op sereas akokoromcema. 30Er masirin, ow e Asmat Anakat Ajaworemef Ipic bwenaw baporomas, e onam op aporcemes. Awames capinmi samatin samatin masirin, bwec awutnakut abweccemes. E Asmat Anakat Ajaworemef Ipic, e onam op jak ton memem aneycema. Aramat ipic, fakas epcomam, akatnakutas epcomam, aneycema. E samatin samatin inimas aporcemes. 31E aramat ipicam fwi awutut aamcema. Er e amalaikat batawosomas ara. E malaikat masirin, e Allah e asanin asanin aereremtawef ow, aaramsimapomcemes.”

E os aemamaras bi binip mamceceremey.

(Mrk. 13:28-31; Luk. 21:29-33)

32“E os juwas ‘arā’ aemamaras, bi binip mamceceremey. E os e jinfas acokoemcow aporcokom, ‘E jusuw bwi sotop ara,’ inim aecomokom. 33Caram ara. Car e atakam atawminas takas aporcokom, car e Asmat Anakat Ajaworemef Ipic aenawcow jofay sotopnakap aporcomokom. Aramat ipic sarim inim bwenaw aporcomokom. 34Atakamnak ara, a capinmi awamces ow damir baf opok ara, e atakam atawminas takas bap a takam aemkurumcema. 35E onam opam, a capinmiam, aanioscema. Doratakam nat, inim aatamemamesawarcema.”

Asmat ow e Yesus aoenawcow jofay amsom opok

(Mrk. 13:32-37; Luk. 17:26-30,34-36)

36“Asmat ow nat, e aramat ipic aoenawcow jofayam, jamam, amsom opok. E onam op malaikatam amsom opok. E Allah atiwam amsom opok. E aricipic cowok amsom ara. 37E Asmat Anakat Ajaworemef Ipic aenawcowas, e Nuh e ametnak aemawiri jofayas awcawor aemcema. 38E jofay, e bwi awut bwenaw opok ara, ow amosam, bwiam, anawiris. Owerowam cepes atatawiris. Cepesam ower ajuwutawiris. Ar e Nuh e ci awut cem emcom afiwef jofay ajiwar, inimas aemawiris. 39E ow e aenawcowas amsom opok— e bwi awut aenawef jofay ajiwar ara. E bwi je awut nat, e ow takas asoromomosef. Bare, e Asmat Anakat Ajaworemef Ipic aenawcowasam, inim cimin aemcema. 40E jofay, ow jamnuk kebun asan aememcemes. Malaikat masirin, ow cowok atewcemes. E wun cowok masirin, bakan ajiemcemes. 41Cepes jamnukam, wasan, amos akac ajowcemes. Malaikat masirin, cowok atewcemes. E wun cowok masirin, bakan ajiemcemes. 42Inimas ara, manmok mamtiwawarey. Car e caTuhan aenawcow jofay camsom opok. 43Jakaperey. Cem aramat ipic e osom ipic aenawef jam amsom ayaw, aram manmok atiwapef. E osom ipic e cem jiwi bajumtiwasin. 44Inimas ara, caram manmok inim sirimapey. Car, ‘E Asmat Anakat Ajaworemef Ipic wow bwenaw opok,’ inim bi binip aceceremcokom jofay, bare e jofay aramat ipic aenawcema.”

Asan akatipicam, bi binip epcomam, kerja bwemtam ipic

(Luk. 12:41-48)

45“E anakat kerja bwemtam ipicam, e bi binip epcom kerja bwemtam ipicam, ucim ipicam? E akerja aramat ipic, e ipic, e acem mandor ipic atewemcema. E wun kerja bwemtam ow, amos memen aemapa aeces, e ipicam, amos pok, e ow sey aseyetama aecema. 46E kerja aramat ipic aenawcow, wunam ar e akerja bwemtam ipic inimas bwem aporcow, bare e kerja bwemtam ipic asan akat aemapcema. 47Atakamnak ara, e kerja aramat ipic, e ipic, e apok takas, manmok batiw atewemcema. 48E nat, e ipic, kerja bwemtam ipic pwicak aememcow, wunam, ‘E dokerja aramat ipic bofasienaw sarim opok aemcema,’ inim bi binip aceceremcow, 49wunam ar e ar akac kerja bwemtam ow omop aafcow, wunam ar e jokmen bwi jayic ow amosam, bwiam, akac aancow, 50bare, e jofay e kerja aramat ipic aofasicema. E kerja bwemtam ipicam, ‘E kerja aramat ipic, wow bofasi opok openow.’ Inim aecema. E nat, e jofay cowok e kerja aramat ipic aofasicema. 51Aram e kerja bwemtam ipic acatiwcema. Aram e ipic e pir bwe ow asan atewapomcema. Erasan w bwec abweccemes. Aram dam jen ajicemes.”

Currently Selected:

MATIUS 24: LAICNS

Highlight

Copy