MATIUS 18

Ow awutnak ca owaram?

(Mrk. 9:33-37; Luk. 9:46-48)

1Bare. E jofayam ara, e mamkawi ow Yesus aenawomfes. “E Onam Op Ipic Pemerintah Asan, ow awutnak ca owaram?” Inim aefes. 2Aramat ipic masirin, jiwi cowok ajateef. Aram e jiwi e ow wasec atewemef. 3Yesus masirin, “Atakamnak ara, car pwicakas bak bapayem opok aemcokom, wunam jiwi inim cimin memem opok aemcokom, car e Onam Op Pemerintah Asan bwemfiw asan opok. 4Inimas ara, a jiwi inim cimin arma batawsicim opok ow, e Onam Op Pemerintah Asan, ow awutnak aememcemes. 5Ow damos dor ajiomcenes, wunam inim jiwi cowok dor atowomiwtamcenes, bare e owam dor atowomiwcemenes.”

Ow dosa bwem bajijimtaw

(Mrk. 9:42-48; Luk. 17:1-2)

6“Wun jiwi kanim dor asicimamenes. Ow inim jiwi cowoknakap dosa bwem ajijimtawces, e ow asan pwicaknakut aemapcemes. Wun ow, ek awut e ow afomak bap takam bajikapom, wunam e ow e jicupum bwi bajupum, bare akat ara. 7Awames capinmi, ow dosa bwem bajijimtawas awapes. Inimas e ow asan pwicak ara. E dosa bwemas aenawcemes araman. E nat, ow wun ow dosa bwem ajijimtawces, bare asan pwicak aemapcemes. 8E cabannew, e cabweynew, car dosa bwem aomcan, bare eras mamsakamosomey. Car ban patar emcomnew, bwey patar emcomnew, wunam e jiwnenak aatamemawarcokom, bare, car asan akat ara. E nat, Allah, car ban jamnuk emcomam, bwey jamnuk emcomam, e basapi opokut jismak aman ajiwimcan, bare car asan pwicak ara. 9Wunam, e camanmok, dosa bwem aomcan, e manmok mamweremtewey. Car manmok patar e jiwnenak aatamemawarcokom, bare car asan akat ara. E nat, Allah, car manmok jamnuk takas emcom, e neraka jismak aman ajiwimcan, bare car asan pwicak ara.”

E apakapiosef domba baposomtew atakam

(Luk. 15:3-7)

10“Caram a jiwi kanim cowoknakapam bifan arapok. Jakaperey. E jiwi amalaikat aporsipor, onam op awapes. E malaikat e onam op doricipic bipu aememawarmes. [ 11Bare, e Asmat Anakat Ajaworemef Ipic, a apakapiapmes ow, bapowtewam, bajortewam, aenawef.]

12Jipic cowok, domba seratus ajiwar aomomcow, wunam e domba cowoknakap apakapioscow, e ipic e domba sembilan puluh sembilan ajiwar, e sikon op bakan ajioscema, wunam e apakapioscow domba apowcema, inim aranew? Car ucim bi binip aceceremamokom? 13Atakamnak ara, ar e domba cowok apowtewcow, jak akatnakut aememcema. Ar e bapakapios opok domba, sembilan puluh sembilan ajiwar aporcow, jak akat kanim inim aememcema. 14Inimasam ara, Allah, a jiwi kanim cowoknakapam bapakapios pwicaken.”

E ojowow ipic dosa or aomcannew

15“E ojowow ipic dosa or aomcannew, or e ipic mamapeney. Wunam e ipic jiman orop mamafey. Ar e oratakam jen ajicannew, bare or e ojowow ipiccin damos aamjiomcomokom. 16Ar oratakam aopowcannew, or wun ow cowoknew, jamnuknew, e ipicpu or akac mamtowoceney. Inimas atemen bwe ow jamnuknew, mamincopnew, e atakam aamtawcokomas jen ajicemes. 17E ipic, e ow atakamam aopowcownew, atakam e do basicim ajarewsimes ow mamotawey. E ipic e owam atakam aopowcownew, or e ipic Allah amsom opok ipic inim cimin mamomey. Oram, e ipic, pemerintah uang batawanimtam kerja ipic, inim cimin mamomey.”

E acuw aatcokomasam, e akat aporcokomasam, atakam

18“Atakamnak ara, awames capinmi acuw aatcokomas, bare Allaham eras e onam op acuw aatcema. Awames capinmi akat aporcokomas, bare, Allaham eras e onam op akat aporcema.

19-20Atakamnak ara, ow jamnuknew, mamincopnew, dojirmec jipu ajarewsiapces, dor e ow wasec aememcimin. Bare, awames capinmi ara, car ow jamnuk, e janim Allah aanimcokomas atakam aamsakamcokom, e onam op doricipic, eras car aemtamceman.” Yesus inim aeef.

Bi binip pwicak kerja bwemtam ipic baposomtew atakam

21Petrusam Yesuspu aenawomef. “Tuhan. E dojowow ipic dosa arke dor aomcannew, dor e ipic aomcanas, bi binip biwosomtam bar ucim inim ajiwaram? Dor, e aomcanas, bi binip biwosomtam bar mamincop ajiwar open?” Inim aeef. 22Yesus masirin, “Dor, mamincopnakas atakam opok. E ipic or dosa arke aomcannew, e aomcanas, bi binip biwosomtamam arkea.” Inim aeef. 23E Onam Op Pemerintah, bare awames baposomtew atakam inim cimin ara: Bare raja ipic cowok aememefen. E raja, e akerja bwemtam ow e pok tewetfes, bon tutup bwem atakam atawefen. 24Ar e bon tutup bwem aemef ara, ow, jipic cowok, e aramat ipic bipu atowocenfesen. E ipic bon, bare rupiah juta arkenakut arawen. 25E ipic nat, e bon tutup bwem, uang arke opoken. E raja ipic masirin, jirmec e wun kerja bwemtam ow ajirimefen. ‘Car e ipicam, e aremam, e atiperesam, e apok takasam, kawey ow tetamey, wunam uang buwumtewey. Bare, e uang, e bon tutup bwemas ara.’ Inim aeefen. 26Bare, e kerja bwemtam ipic, e raja ipic bipu bi fop aneyjiapefen. ‘Ema. Dor e bon uang takas or aotetamcimin.’ Inim aeefen. 27E raja ipic masirin, e ipic saw akat aoworporefen. Ar e ipic asurumefen. Wunam ar e abon akokoromosomtamefen.

28“Bare, e kerja bwemtam ipic ajisefen. Aram wun arakac kerja bwemtam ipic apowtewefen. Bap ara, ar e ipic rupiah ribu arke opoknakap bon atetamefen. Bare, ar e ipic ban akimopefen. Wunam e afomak ajeremopefen. ‘E bon uang tetamcan.’ Inim aeefen. 29E arakac kerja bwemtam ipic, e ipic bipu bi fop aneyjiapefen. Aram janim fak aanimefen. ‘Ema. Dor e uang or aotetamcimin.’ Inim aeefen. 30E ipic nat, jen opok aememefen. Ar e arakac kerja bwemtam ipic, penjara cem aman afimimefen— e uang aotetamcow jofay ajiwara. 31E wun arakac kerja bwemtam owam inimas aporfesen. Ar masirin, jak pwicak aememfesen. Aram e raja ipic aapenfesen. Wunam eras takas atakam e aramat ipic aotawfesen. 32E raja ipic masirin, e ipic ajateefen. ‘Or kerja bwemtam ipic fasi awamcem ara. Or janim dor aaniman. Dor masirin, e obon takas emekokoromosomtamey. 33Dor serow or ajiomey. Oram inim serow e orakac kerja bwemtam ipic bojiomcerey.’ Inim aeefen. 34E raja ipicam jak amop aememefen. Ar e ipic e bwemsokom ow aotasimemtamef— e ipic e bon uang takas aotetamcow jofay ajiwar arawen. 35Bare, e onam op doricipic, inimas cowok car aemceman— car e cajowow e pwicakas car aomfanas, bi binip biwosomtamnak opok aemcokom ara.” Yesus inim aeef.

Currently Selected:

MATIUS 18: LAICNS

Highlight

Copy