MATIUS 16

Ow Yesus junam bweas bwem janim aanimfes

(Mrk. 8:11-13; Luk. 12:54-56)

1Bare. E Parisi owam, e Saduki owam, Yesuspu aenawomfes. Ar aramat ipic bwemporen. Inimas ar Yesus onam op junum bweas ar baporomtam janim aanimfes. 2Yesus nat, [“Jo asapineycow, car atakam aotawcomokom, ‘E joas esakam ducur ara. Inimas to jo akat aemapcomom.’ Inim aecomokom. 3Wunam tamnakap ara, caram, ‘E joas esakam ducur ara. Inimas wow jo pwicak aemapcomom.’ Inim aecomokom. Bare, car e onam opas camsom ara. Ca nat, e Allah a wow jofay aporomtamamaras camsom opok.] 4A awaniemames ow, bare fasi ow ara. Aram Allah aotpemames. Inimas ar junum bweas bapor janim aanimames. Allah nat, wun junum bweas, awapes ow baporomtam opok aemcema. Ar e Yunus e aemefas inim cimin junum bweas cowok aporomtamcema.” Yesus inim aeef. Bare, aramat ipic e ow bakan ajiosef. Ar masirin, e wun asan aojisosef.

Caram manmok faka

(Mrk. 8:14-21)

5Bare, e Yesus mamkawi ow poman ajirfes. E nat, ar amos pok batowomuw binip aanimfes. 6Yesusam atakam e ow aotawef. “Caram manmok faka. Car e Parisi owam e Saduki owam, e abibit roti pimicima.” Inim aeef. 7E amamkawi ow masirin, atakam aamtawfes. “Aramat ipic dar amos pok batowomuw opok apormar ara openow.” Inim aefes. 8Yesusam e ow aratakam aporef. “Car do basicim kanimnakap aemamenokom. E car amos pok opok atakam aamtawmokom, ucimaram? 9Car wow ajiwar camsom opoknew? Caram binip emeanimfokomnew? Car e amos bokor ban cowok takas, e ow lima ribu ajiwar sey aseyetamfokom, e amos aotawanimfokom, ese ucim ajiwararam? 10Wunam, car e amos bokor tujuh ajiwar, e ow empat ribu ajiwar sey aseyetamfokom, e amos aotawfokom, ese ucim ajiwararam? 11E atawmin atakam, amos poknak atakam opok. Ca nat, inimas bapor opok ucimaram? Bare, car e Parisi owam, e Saduki owam, abibit roti pimicima.” Inim aeef 12E ow masirin, Yesus bibit rotinak atakam opok aporfes. Yesus nat, e Parisi owam, e Saduki owam, e atakam amememtamfesas, atakam atawef. E ow masirin, inimas aporfes.

“Or e Allah Aeremtewef Ipic ara”

(Mrk. 8:27-30; Luk. 9:18-21)

13Bare. Yesus e Kaisarea Filipi capinmi ajarapef. Ajarapef masirin, jonow e mamkawi ow atowporef. “A Asmat Anakat Ajaworemef Ipic ca ipicam? Ow ucim atakam atawmes?” Inim aeef. 14E ow masirin, “Wun ow atakam, Ar Yohanes Bwi Babwim Ipic ara. Wun masirin, ‘Ar Elia.’ Wun masirin, ‘Ar Yeremia aranew, wun Allah atakam botaw ipic aranew.’ Inim aemes.” E ow inim aefes. 15E Yesus masirin, “Ca nat, ucim bi binipam? Do ca ipicam?” Inim aeef. 16Simon Petrus araw, “Or e Allah Aeremtewef Ipic ara. Or e jiwne Allah atiw ara.” Inim aeef. 17E Yesus masirin, “Simon. Or Yunus atiw ara. Asmat ow e atawmem atakam or batetam opok. E onam op doricipic e bi binip or atetamfan. Inimas or asan akat aemapmem ara. 18Doram atakam or aotawmin. Or Petrus ara. E do basicim barewsi ow, cem cimin ara. Doram e cem a ek ducur ton aeapomtamcimin. E damir ow asan fak dat takas, e ow bwemkumimosom asan opok. 19Dor e Onam Op Pemerintah Asan kunci or atetamcimin. Or awames capinmi acuw aatcemas, bare Allaham eras e onam op acuw aatcema. Or awames capinmi e akat aporcemas, bare, Allaham eras e onam op akat aporcema.” Yesus inim aeef. 20Aramat ipic masirin, jirmec fak e amamkawi ow ajirimef. “Dor e Allah Aeremtewef Ipic ara. Ca nat, inim atakam kawey ow botaw arapok.” Inim aeef.

Yesus e ajurusemcowas atakam aotawef

(Mrk. 8:31–9:1; Luk. 9:22-27)

21Bare. E jofay ajiwar, Yesus e aemcowas, atakam umuton cowok e amamkawi ow aotawa aeef. “Dor Yerusalem ajisoscimin. E ownucur owam, e Allah atakam mamtaw tugas ow awutam, e Allah Jirmec mamememtam owam, dor bajurusum awutnakut aemcemenes. Ar dor acatiwcemenes. Bar mamincop masirin, Allah dor aojaworomsumutumceman.” Inim aea aeef. 22Bare, Petrus, Yesus, e adam sotoppu, ban acajimtewef. Aram Yesus jiman aafef. “Tuhan. Allah or inimas bwem batetam opok!” Inim aeef. 23Yesus masirin, asamanam ajiomef. Asamanam ajiomef masirin, atakam Petrus aotawef. “Iblis. Oram cey! E dobipu memem arapok. Or dor akekemamenem. E bi binip aceceremamemas, bare asmat desen bi binipas ara. Er Allah bi binip aceceremamaras jipu opok.” Inim aeef.

24Wunam, Yesus atakam e amamkawi ow aotawef. “Ow dor mamkawi akat aemcenes, ar aropas bi binip bacecerem arapok. Aram arop salib batawtotorces, wunam bajamkawicenes. 25Ow, bajorem jak aserememces, aram bajorem opokut aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes. 26Ow awames capinmi pok takas atatkurumcesnew, e nat, aram bajorem opok aemcesnew, bare ar asan akat bwememap asan opok. Ow, e ajiwne batamemawaras, pok bwemjitit asan opok. 27Bare, e Asmat Anakat Ajaworemef Ipic, e aricipic arakatnakutas epcom aneycema. E amalaikatam akac aneycemes. Aramat ipic masirin, e owin owin e aemawirisas jipu, amatam ajicema. 28Atakamnak ara, asep jofay, e Asmat Anakat Ajaworemef Ipic, jirmec, ow takas ajirimkurumcema. Bare, wun awamces ow, e jofay ajiwar, damir baf opok aemcemes.” Yesus inim aeef.

Currently Selected:

MATIUS 16: LAICNS

Highlight

Copy