LUKAS 23

Yesus, Pilatus bipu aememef

(Mat. 27:1-2,11-14; Mrk. 15:1-5; Yoh. 18:28-38)

1Barewen. E ow takas asitfesen. Ar Yesus, Pilatus bipu atowomfesen. 2Aram Yesus asalah atakam aotawfesen. “Dar awamec ipic, pemerintah atakam bopow, atjen e dasamat aowforow aporfom. Aram ow, e pemerintah jirmec ajirimfes uang, Kaisar batetam, acuw aatef. Aram atakam aotawef, ‘Dor e Allah Aeremtewef Ipic ara. Inimas dor raja ipic ara.’ Inim aeef.” E ow inim aefesen. 3Pilatus masirin, jonow Yesus atowporefen. “Or e Yahudi ow araja ipic open?” Inim aeefen. Aramat ipic masirin, “Bare, oram inim atakam orma atawmem ara.” Inim aeefen. 4Pilatus masirin, atakam e Allah atakam mamtaw tugas ow awutam, e ow arkeam, aotawefen. “Awamec ipic salah opok apormin ara.” Inim aeefen. 5E ow nat, atakam fak aotawfesen. “Aramat ipic atakam a Yudea capinmi ow takas amememtamama. Inimas ar e ow, awutut aototomerma. Bap ara, ar Galilea capinmi ow aototomeref. Jepen ara masirin, arasan owam aototomeref.” Inim aefesen. 6Pilatus inim atakam jen ajief ara, ar jonow atowporefen. “Awamec ipic Galilea ipic open?” Inim aeefen. 7Bare, Yesus e Herodes omomef capinmi ipic arawen. Pilatusam inimas aporefen. Inimas aporef masirin, ar Yesus e Herodespu atewosomefen. E jofay Herodesam Yerusalem aemapef arawen.

Yesus, Herodes bipu aememef

8E Herodes e Yesus bi aporef ara, jak akatnakut aememefen. Ar e Yesus aemawirias, jen emcajiefen. Inimas ara, ar e Yesus bi bapor, jak tarey aseremomawirien. Aram e Yesus junum bweas bapor jak aseremomawirien. 9Inimas ara, aramat ipic Yesus jonow awutut atowporefen. Yesus nat, atep bajit opok cowok arawen. 10E Allah atakam mamtaw tugas ow awutam, e Allah Jirmec mamememtam owam, erasan aememfesen. Aram Yesus salah, atakam awutut aotawfesen. 11E Herodesam, e atentara owam, e Yesus bifan afayomfesen. Aram aramat ipic uc aomocfesen. Aram raja baju, aramat ipic ajimomtamfesen. E Herodes masirin, e Yesus e Pilatuspu afasimosomefen. 12Bare, e jofay cowok Herodesam, Pilatusam, damos aamjiemfesen. Bap ara nat, ar bifan aamfayomfesen.

Pilatus, Yesus damir baf atakam asakamtiwef

(Mat. 27:15-26; Mrk. 15:6-15; Yoh. 18:39–19:16)

13Barewen. E Pilatus e Allah atakam mamtaw tugas ow awutam, e kepala owam, e mami owam, ajanimapomefen. 14Aram atakam e ow aotawefen. “Car awamec ipic dobipu atowotnawtamenokom. Caram atakam aotawenokom, ‘Awamec ipic ow aototomerma.’ Inim aeenokom. Doram aramat ipic e caratakam aotawenokom salah takas e ca bipu jonow atowporkurumey. Do nat, e ipic inim salah opok cowok aporey. 15Herodesam inim cowok aemor. Ar aramat ipic aofasimtamorow. Jakaperey. Aramat ipic damir baf siksa, inim salah bwem opok cowok. 16Dor ow aramat ipic desen omop baf jirmec ajirimcimin, wunam afimisimtamcimin.” Inim aeefen.

[ 17Barewen. E tahunin tahunin, e pokbwi jofay ara, ow, Pilatus, penjara cem aman bemap ipic cowok bafimisimtam, janim aanima ajimpesen. Aramat ipic masirin, e ipic cowok afimisimtama ajimepen.] 18E ow takas nat, atakam akac afakaytawfesen. “Awamec ipic bacatiwey. E Barabas bafimisimtamcarowey.” Inim aefesen. 19Bap ara, e kota ow e pemerintah owec aamofesen. Barabasam e owec akac aemefen. Aram ow acatiwefen. E pemerintah inimas aporfes, wunam e Barabas penjara cem aman afimimfesen. 20Pilatus nat, e Yesus bafimisim, jak aseremomefen. Inimas ar atakam awut e ow aootawefen. 21E ow nat, atakam aofakaytawfesen. “E ipic salib os op bacatopomey! E ipic salib os op bacatopomey!” Inim aefesen. 22Wunam e Pilatus atakam e ow aootawefen. “E ipic nat, ucim salah aemef? Dor e ipic damir baf siksa, inim salah bwem opok apormin ara. Inimas ara, dor ow aramat ipic omop desen baj jirmec ajirimcimin, wunam afimisimcimin.” Inim aeefen. 23E ow nat, janim faknakut e Pilatus aanima aefesen. Aram atakam afakaytawfesen. “E ipic salib os op bacatopomey!” Inim aefesen. Bare, e Pilatusam e ow atakam ji aeefen. 24Ar e ow janim fak aanimfesas bwemtam, atakam asakamtiwefen. 25Ametnak ara, e Barabas e pemerintah owec aamoef, wunam ow acatiwefen. E pemerintah inimas aporfes, wunam e ipic penjara cem aman afimimfesen. Bare, e ow arke Pilatus e ipic bafimisimtam janim aanimfesen. Pilatus masirin, e janim aanimfes ipic afimisimtamefen. Aram e Yesus e ow aotasimemtamefen. Ar e ow e abi binip jipuas bwem, inim aotasimemtamefen.

Ow Yesus salib os op atewtopomfes

(Mat. 27:32-44; Mrk. 15:21-32; Yoh. 19:17-27)

26E ow Yesus atowosfes ara, aram kota Kirene ipic juwas Simon ban akimomfesen. E ipic e kebun asan jepen aewenawefen. Ow e salib e ipic sop atatiwfesen. Aram jirmec ajirimfesen. “Or e salib batewey. E Yesus fa basatey.” Inim aefesen. 27Owam arkenakut Yesus fa asatfesen. Cepesam arawen. E cepes, aramat ipic bwec awutut abwecfesen. 28Yesus nat, e cepes bin aofiromefen. “Car Yerusalem cepes awamcokom ara. Caram dobwec babwec arapok. Ca nat, cadam bwec abwecey. E cajiwiam bwec abwecey. 29Jakaperey. Aenawces jofay ara, ow inim atakam aotawcemes. ‘E ema cepes ara, e jiwi bapeap opok cowok cepes ara, e jiwi aw manam opok cowok cepes ara, bare asan akat!’ Inim aecemes. 30E jofayam ow atakam sikon awut aotawcemes. ‘Basakayneyey. Bakamimopcarowey.’ Inim aecemes. Aram atakam sikon kanim aotawcemes. ‘Baneypwirimopcarowey.’ Inim aecemes. 31Bare, dor daci os inim awcawor ara. A owam inim ajurusumamenes. Ca nat, sa os inim awcawor ara. Inimas ow car bajurusum awutnakut aemceman.” Yesus inim aeefen.

32Ow, wun ipic jamnuk, e Yesus cowkon bacatiw, atowomesfesen. E ipic jamnuk, salah awut ow arawen.

33Barewen. Ar asan juwas Damir Kus Asan ajaremfes ara, aram Yesus salib os erasan apowtiwfesen. Aram e salah awut ow, salib os op atewtopomfesen. Ar wun ipic Yesus bopim jamam arop salib os op atewtopomfesen. Aram e wun ipic Yesus tamopim jamam atewtopomfesen. 34Yesusam atakam aotawefen. “Diwi. A ow aemamesas amsom opok. Inimas e adosa bakokoromosomey.” Inim aeefen. Bare, e owam ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, sey aseyamatfesen. 35Owam arke erasan aememfesen. Aram manmok atiwfesen. E kepala ow nat, Yesus pwicak atakam aotawfesen. “E ipic kawey ow ajortewef. Ar e Allah Aeremtewef Ipic aranew, bare aram arma bajoremerec.” Inim aefesen. 36E tentara owam, aramat ipic uc aomocfesen. Ar Yesus aenawomfes, wunam asesak anggur bwi ajuromomtamfesen. 37Aram atakam aotawfesen. “Or Yahudi ow araja ipic aranew, bare oram orma joremey.” Inim aefesen. 38Owam atakam tulis aeapomfes, wunam e atakam Yesus kuspu atomettewapomfes. “A ipic Yahudi ow araja ipic arawen.” Inim atakam tulis aeapomfesen.

39E ow salib os op atewtopomfes salah ipic cowok, pwicak atakam e Yesus aotawefen. “Or e Allah Aeremtewef Ipic aranew? Bare, oram orma joremey! Oram dar ajortewcarowey!” Inim aeefen. 40E wun ipic nat, e ipic jiman aafefen. “Or Allah omar opoknew? Ow oram, aramat ipicam, siksa awcawor, atakam asakamtiweres. 41E dasiksa nat, akat ara. Ar e salah aemfomas pomatam aemamarowos. A ipic nat, salah bwem opok.” Inim aeefen. 42E ipic masirin, “Yesus. Or raja ipic ememcem, wunam aoenawcem, do binip mampwimcan.” Innim aeefen. 43Yesus masirin, “Atakamnak ara, or wow e jiwne batamemawar asan dor akac aemapcomom.” Inim aeefen.

Yesus damir aafef

(Mat. 27:45-56; Mrk. 15:33-41; Yoh. 19:28-30)

44Barewen. Jok ara, jam duabelasnew aememfesen. E capinmiam jiwic acamtiwefen. Jiwic acamtiwef, jam tiga ajiwar arawen. 45E jopokam batewemapom opok arawen. E Allah cem jimasap kainam jeteren jamnuk akaytepefen. 46Wunam Yesus atakam awut afakaytawefen. “Diwi. Dor e doranakat ipic or atetamamin.” Inim aeefen. Ar inim atakam aotawef masirin, damir aafefen. 47E tentara komandan ipic eras aporef ara, ar Allah asicimefen. “A ipic, tarowat ipic araman!” Inim aeefen. 48E eras bapor ajarewsiemfes ow arke, e aemfesas aporfesen. Aporfes masirin, jak pwicak awut epcom cem ajisostotorfesen. 49Bap ara, Yesus, Galilea capinmi ewenawef ara, wun cepesam ajamkawifesen. Bare, e cepesam, e Yesus amsom ow takasam, eras takas manmok batiw damasan opok aememfesen.

Ow Yesus ek jip aman ajiwtatiwfes

(Mat. 27:57-61; Mrk. 15:42-47; Yoh. 19:38-42)

50Barewen. Jipic juwas Yusuf arawen. Aramat ipic, e Yahudi atakam mamsakam ow wun ipic cowok arawen. Ar jipic atakam, tarowatam, arawen. 51Ar e Yahudi atakam mamsakam ow e atakam aamsakamfesasam, e aemfesasam, pwicaken. Aramat ipic kota Arimatea ipic arawen. E kota, Yudea capinmi kota arawen. Aram e Allah Pemerintah aenawcowas, manmok afeawirien. 52Aramat ipic e Pilatus bipu ameromefen. Ar e Yesus sumu ipic batew janim aanimefen. 53Aram e sumu ipic asurumnemef, wunam kain akat biram ajiktiwefen. Ametnak ara, ar sikon ek jip awerem asiefen. Owam sumu ow e ek jip aman bajiwtatiwpor opoken. Bare, e Yusuf e Yesus sumu ipic e ek jip aman ajiwtatiwefen. 54E jofay, e Ses Ban Jo pok bafafayapom jofay arawen. E Ses Ban Jo, bare sotopnakap arawen. 55E Yesus e Galilea capinmi akac ewenawfes cepesam e Yusuf fa asoromfesen. Aram e awerem aporfesen. Aram Yusuf e sumu ipic ajiwtatiwefas aporfesen. 56Ar masirin, e acem ajisosfesen. Cem ajisosfes masirin, pinim akat pokam, minyak wangiam, afafayapomfesen. Ses Ban Jo ara masirin, ar Allah Jirmec jipu ses aanfesen.

Currently Selected:

LUKAS 23: LAICNS

Highlight

Copy