LUKAS 19

Sakeus

1Barewen. Yesus kota Yeriko afiwefen. Ar e kota capinmi takan batiwtakay aememefen. 2Erasan ara, jipic juwas Sakeus aemapefen. Ar pemerintah uang batawanimtam kerja ow akepala ipic arawen. Aram pok awut ipic arawen. 3Ar Yesus ca ipicamnew bapor, emporef opoken. Ar ow jipinnakap arawen. 4Inimas ara, ar bap je kukuefen. Ar, Yesus erasan aofecow bi bapor, os op aaptometefen. 5Yesusam erasan ameremef, wunam manmok op apemtometemefen. Aram atakam e ipic aotawefen. “Sakeus. Basarimkorneyey. Dor wow e ocem jaki bajit aemin ara.” Inim aeefen. 6Bare, aramat ipic asarimkorneyefen. Aram jak akat aememef, wunam ar Yesus e acem atowomiwefen. 7Inimas aporfes ow takas masirin, atakam atawfesen. “E Yesus dosa ipic cem jaki ajitma.” Inim aefesen. 8E Sakeus, bare asitef, wunam atakam Tuhan aotawefen. “Tuhan. Jakaperey. Dor e dowun pok arke, e pok opok ow batetam aemin. Wunam, dor kawey pok osom tewetofnew, bare dor inim pok empat ajiwar e ow atetamcimin.” Inim aeefen. 9Yesus masirin, atakam aramat ipic aotawefen. “Or Abraham urpis ara. Inimas dor wow a cem ow ajortewmin. 10Bare, e Asmat Anakat Ajaworemef Ipic e apakapiosmes ow, bapowporam, bajortewam, aenawef.” Inim aeefen.

Yesus uang baposomtew atakam aotawef

(Mat. 25:14-30)

11E ow inim atakam jen ajifesen. E ow abi binip ara, “E Allah Pemerintah asarimenawcema.” Inim bi binip aceceremfesen. Yesusam e ow abi binip aporefen. Aram Yerusalem sotop aporefen. Inimas ar baposomtew atakam aotawefen. 12“Kepala awut urpis ipic, damasan opok capinmi baysos ememefen. E damasan opok capinmi ow, e ipic, raja ipic batewemen. E ipic atakam, ‘Dor raja ipic ememcey, aofasicimin.’ Inim aeefen. 13Aramat ipicam akerja bwemtam ow sepuluh ajiwar ajateefen. Aram uang juwas mina cowok, aporsipor atetamefen. ‘Car a uang pok mamjititey. E pok masirin mamuwumtawa inim mamjiawarey— e aofasicey jofay ajiwara.’ Inim aeefen. Ar masirin, e damasan opok capinmi ajisosefen. 14E arop capinmi ow nat, e ipic bifan afayomfesen. Ar masirin, ow e damasan opok capinmi atewosomfesen. ‘Caram atakam e capinmi ow mamotawey. Dar e ipic jirmec da bajirim pwicak.’ Inim mameey. Inim aefesen. 15E ipic nat, raja ipic aememefen. Ar masirin, arop capinmi aofasiefen. Aram jirmec ajirimefen. ‘E uang tetamof kerja bwemtam ow bayte.’ Inim aeefen. Aram e uang akakayimfesnew, bakakayim opoknew, inimas baporen. 16Bare, e bap kerja bwemtam ipic e aramat ipic bipu aenawomefen. Aram atakam aotawefen. ‘Tuan. E tetamfenem uang mina cowok, bare sepuluh ajiwar aokakayimof.’ Inim aeefen. 17E aramat ipic masirin, atakam aotawefen. ‘Or kerja bwemtam ipic akat awamcem ara. E aemfemas akatipic. Or pok kanim, tarowat cowok aomomfem. Inimas or kota sepuluh ajiwar aomomcemem.’ Inim aeefen. 18E asep kerja bwemtam ipicam aenawefen. ‘Tuan. E tetamfenem uang mina cowok, bare lima ajiwar aokakayimof.’ Inim aeefen. 19E aramat ipic masirin, ‘Bare. Or kota lima ajiwar aomomcemem.’ Inim aeefen. 20Bare, e wun kerja bwemtam ipicam aenawefen. ‘Tuan. E tetamfin uang mina cowok jirew. Dor e uang sapu tangan aman desen tewapomof. 21Or atakam fak ipic aporof. Or, e o batewapom opok pok, atewetcemem. Oram, e o batewapom opok pok akan anakatas, atewencemem. Inimas dor or omar aeof.’ Inim aeefen. 22Aramat ipic masirin, atakam e kerja bwemtam ipic aotawefen. ‘Or kerja bwemtam ipic pwicak awamcem ara. Or dor atakam fak ipic apormem ara. Dor e do batewapom opok pok atewetcimin apormem ara. Doram e do batewapom opok pok akan anakatas atewencimin apormem ara. Inimas ara, dor e osalah, e atawmem atakam jipu, atakam asakamtiwmin. 23E uang manmok batiw ow, kawey ow uang ateweta aecemes. Asep ara masirin, inim uangam, bokayim uangam, e ow aofasimtama aecemes. O nat, e doruang inim ow batetam opok emfem ucimaram? Or inimas em ayaw, aofasienawof ara, dor e tetamfin uangam, e bokayim uangam aotewof.’ Inim aeefen. 24Aramat ipic masirin, atakam erasan aememfes ow aotawefen. ‘E awomec uang mina cowok botew, wunam e uang, e uang mina sepuluh ajiwar awomec ipic tetamey.’ Inim aeefen. 25E ow masirin, ‘Tuan. E ipic, bare uang mina sepuluh ajiwar tayir!’ Inim aefesen. 26Aramat ipic masirin, ‘Jakaperey. Pok epcom ow, wun pok aotewetcemes. E nat, ow, e pok opok ow apoknakas aotewcemes. 27E do bifan ow, dor jirmec a bajirim pwicaken. E ow arasan batowotnaw, wunam e dobipu bacatiwtotorey.’ ” Inim aeefen. Yesus inim atakam aotawefen.

Yesus, Yerusalem afiwemef

(Mat. 21:1-11; Mrk. 11:1-11; Yoh. 12:12-19)

28Barewen. Yesus inim atakam atawkurumef masirin, e Yerusalem bap ajarefen. 29Aramat ipic, kota Betfageam, kota Betaniaam, sotop asisienawefen. E kota sikon asan juwas Saitun aemamesefen. Yesusam jirmec e amamkawi ipic jamnuk ajirimefen. 30“Car e bap ewames cemsanpu bajarey. E cemsan ajaremcokom, ay keledai manmok apematamcomokom. E keledai cum pok epcom ara. Wow ajiwar, ow e keledai bak ton batometapporji opok. Caram e cum pok mamsurumey, wunam e keledai arasan mamtowotnawey. 31Owam jonow car atowporcannew, ‘Car e keledai cumpok ucimas asurumamokom?’ inim aecan, car masirin, ‘Tuhan e keledai bak ton bajaren,’ inim mameey.” Yesus inim aeefen. 32Bare, e jirmec ajirimef ipic jamnuk, eras e Yesus atawef atakam jipu cowok aporfesen. 33Aram e ay keledai cum pok basurum ememfes ara, e keledai aramat ow, atakam aotawfesen. “Car e ay keledai cum pok ucimas asurumamokom.” Inim aefesen. 34Ar masirin, “Tuhan e keledai bak ton bajaren.” Inim aefesen. 35Bare, ar e keledai Yesuspu atowocenfesen. Aram e abaju mamincop e keledai bak ton atometmuwtiwfesen. Ar masirin, Yesus e keledai bak ton ban asomtomettewapomfesen. 36Yesus e keledai bak ton acowojaref ara, ow e apakaian e bokotpu amuwtiwa aefesen. 37Bare, e Yesus, e Yerusalem sotop ajarefen. E ajaref asan, ow e sikon Saitun ewneycemes asan arawen. Erasan ara, e amamkawi ow takas jak akat aememfesen. Aram atakam awutnakut Allah asicimfesen. Ar e Yesus aemawiri junum bweas aporfesen. 38“Tuhan, asan akat, e atewenamamar ipic baomcow! Ar raja ipic ara! E onam op capinmi, bare asan akat ara! Daram e opnakut Allah asicimamom.” Inim aefesen.

39E ow arke aman, wun ow Parisi ow arawen. E wun Parisi owam atakam aramat ipic aotawfesen. “Guru. E omamkawi ow, jiman afey.” Inim aefesen. 40Aramat ipic masirin, “Jakaperey. Awamces ow jokon ajiemames ayaw, bare awamses ek atakam afakaytawcemes araman.” Inim aeefen.

41Barewen. Yesus, e Yerusalem sotop ajarefen. Ar e kota aporef ara, ar e kota bwec abwecefen. 42Aram atakam aotawefen. “Allah asan akat car batetam akat arawen. Car wow eras camsom ayaw, bare asan akatipic aemaporokom. Ca nat, eras bwempor asan opok. 43-44Car Allah e cabajortew jofay camsom opok ara. Inimas asep jofay, e cajewew ow, a kota fumi, capinmi op atawanimapomcemes. Aram car fumi aamwicirimomceman. Aram cīram e asanin asanin asiomceman. E cem os acajimirtiwceman. Aram a cacem ajumkurumtiwcemes. E cem os cowoknakapam boeremem opok aemcemes.” Inim aeefen.

Yesus e Allah cem aman pok buwumamtaw ow aotewerisimef

(Mat. 21:12-17; Mrk. 11:15-19; Yoh. 2:13-22)

45Barewen. Yesus, Allah cem afiwemefen. Ar masirin, e pok juw buwumamtaw ow aotewerisimefen. 46Aram atakam e ow aotawefen. “E Alkitab atakam ara, ‘E docem, janim do manim cem aemamescema. Ca nat, a cem, osom ow barewsiap asan aemapomfokom.’ Inim aema.” Yesus inim aeefen.

47Barewen. Yesus e join atamfafayef, e Allah cem aman, atakam amememtamefen. E Allah atakam mamtaw tugas ow awutam, e Allah Jirmec mamememtam owam, e kepala owam, aramat ipic bacatiw aemporfesen. 48E nat, ar aramat ipic bwemcatiw asan opoken. E mami ow takas, aramat ipic atakam jen baji akat cowok aporfesen. Inimas e wun ow, aramat ipic bwemcatiw asan opoken.

Currently Selected:

LUKAS 19: LAICNS

Highlight

Copy