YOHANES 5

Yesus, jipic cowok, Betesda bwi asan ajaworomtewef

1Bare. E Yahudi ow pokbwi aemfes. Yesusam Yerusalem ajisosef. 2E Yerusalem ara, e jimasap juwas “Domba” sotop, bwi asan awut aemseef. Ibrani atakam ara, e bwi asan juwas Betesda. E bwi asan fumiam puk cem awut lima ajiwar aemaptotoref. 3E cem aman, ow arke apakayamesfes. Er dam owam, manmok kapi owam, jine kamwis owam, japow owam, inima. [Ar malaikat, e bwi bawu bafafasim, manmok afefes. 4Tuhan malaikat, e bwi bawu bafafasim, aneya ajimep. Aram bar cowok apneya, inim aea ajimep. Ar e bwi bawu afafasima ajimep ara, e bwi bap a takam neysea ajimep jipicnew, cowocnew, e damas takas ajaworema ajimep.] 5Bare, erasan aemamesef ipic cowok, tahun tiga puluh delapan ajiwar asan pwicak aemamesawiri. 6Yesusam e ipic erasan aemamesef aporef. Aram erasan tareynakut aemamesawiri aporef. Aramat ipic masirin, “Or dam bakokoyem akat open?” Inim aeef.

7E dam ipic masirin, “Tuan. E bwi bawu afafasicow ara, bwi, do baneytewsem ow opok. Dor e bwi baneyse aemapcey, wun ow e bwi atakamneysecemes.” Inim aeef. 8Yesus masirin, “Basitey. E otepenam batewey, wunam bajareney.” Inim aeef. 9Bare, e ipic dam asarimjaworemef. Aram e atepen atewef, wunam ajarenef.

Bare, e aemfesas, Ses Ban Jo afayamesef ara. 10Inimas ara, e Yahudi ow atakam e dam ajaworemef ipic aotawfes. “Wow Ses Ban Jo fayamesor. Inimas or e otepen batew arapok. Or daragama jirmec aopowmem.” Inim aefes. 11E ipic masirin, “E dodam ajaworoman ipic atakam dor aotawan. ‘E otepen batewey, wunam bajareney.’ Inim aean.” E ipic inim aeef. 12E ow masirin, jonow e ipic atowfes. “E otepen batew wunam bajaren jirmec or ajiriman ipic cam?” Inim aefes. 13E Yesus nat, erasan ow arke aporef, wunam aotasiemef. Inimas e dam ajaworemef ipic inim jirmec ajirimef ipic amsom opok.

14Bare. Yesus e ipic e Allah cem aman, biamnuk aemamtewef. Aram atakam e ipic aotawef. “Bare, or dam akokoyemamem. Inimas or e dosa bakoremey. Or asan pwicaknakut bemapasin.” Inim aeef. 15E ipicam e Yahudi owpu aapenef, wunam atakam e ow aotawef. “E dam ajaworomtewan ipic, bare Yesus ara.” Inim aeef. 16Inimas ara, e Yahudi ow e Yesus ajurusumfes. Ar Yesus eras e Ses Ban Jo aemef aporfes.

17E Yesus nat, atep e ow ajitef. “Wow ajiwaram e doricipic kerja aatamemawarma. Inimas doram kerja aemamin.” Inim aeef.

18Bare, e Yahudi ow, e aramat ipic, e Yahudi agama Ses Ban Jo jirmec aopowef aporfes. Wunam, aramat ipic atakam, “Allah doricipic ara.” Inim aeef. Inim atakam, ar Allah awcawor aememef atakam ara. Inimas e Yahudi ow, e aramat ipic bacatiw, jec awutnakut awufes.

Allah atiw fakas

19Yesus atakam e ow aotawef. “Atakamnak ara, e Allah atiw pok arma bwemem asan opok. Atiw e aricipic aemamaras aporma, wunam aram inimas cowok aemama. E atiw e aricipic aemamaras jipu aemama. 20E aricipic e atiw damos ajiomama. Aram e aemamaras takas e atiw aporomtamama. E nat, e wow aporomtamamaras kanim inim. Asep jofay ar awutnakutas e atiw aporomtamcema. Eras car junum bweas ara. 21Aricipic, damir ow ajaworomsumutumama, wunam jiwneas e ow atetamama. Inimasam ara, atiw jiwnenakas, e aereremtawmar ow atatamtotorma. 22Aricipicam ow e adosa atakam basakamtiw opok cowok aemama. E nat, ar, ow e adosa atakam basakamtiw fakas, e atiw atetamef. 23Ar ow takas e atiw basicim akat ara— e ow e aricipic asicimames inim cimina. Inimas ar e fakas e atiw atetamef. E atiw basicim opok ow, e aricipicam basicim opok aemames. E aricipic, bare e atiw atewenamef ipic ara.”

24“Atakamnak ara, ow e doratakam jen ajices, wunam ar e dor atewenamfan ipic asicimces, aram jiwnenak aatamemawarcemes. Doram e ow e aemfes dosa siksa bwem opok aemcimin. E owam damir baf opok aemcemes. E nat, ar jiwnenak ow aememcemes. 25Atakamnak ara, e aenawcow jofay, damir aaffes ow, e Allah atiw e atakam atawcowas, jen ajicemes. E atakam jen ajices ow, jiwnenak ow aememcemes. E jofayam, bare emcaenawef. 26Aricipic, bare jiwnenak batatamawar ipic ara. Inimas ar e jiwnenak batatam fakas e atiw atetamef. 27E atiw, bare e Asmat Anakat Ajaworemef Ipic ara. Aricipicam, dosa atakam basakamtiw fakas, e atiw atetamef. 28Car a atakam junum bwe arapok. E aenawcow jofay e awerem ow takas, e atiw atakam atawcowas, jen ajicemes. 29Wunam e ow e awerem ajisemtotorcemes. E akatas aemfes ow, aojaworsitcemes, wunam jiwnenak ow aememcemes. E pwicakas aemfes owam aojaworsitcemes. Ar masirin, e siksa asan aemapcemes.”

Yesus, Allah atiw ara, inim baporomtamas

30“Doram pok dorma bwemem asan opok. E nat, dor ow e adosa atakam asakamtiwcey, dor e doricipic atakam jen ajiceyas jipu atakam asakamtiwcimin. Dor e akat aporceyas jipu bwem opok. E nat, dor e atewenamfan ipic akat apormaras jipu aemcimin. Inimas e atakam asakamtiwceyas bare, akatas ara.”

31“Dor e aemaminas, atemen dorma aatamcey, ow e atemen aatamceyas jen bwemji asan opok. 32E nat, wun ipic doratemen aatamomatma. E ipic, e doratemen aatamomatmaras, bare atakamnak ara. Inimas nomsom. 33Car ow e Yohanespu atewosomfokom. E Yohanes masirin, atemennak aatamef. 34Bare, dor asmat atemen batamas janim manim opok. E nat, dor e Yohanes atemen aatamefas, atakam car aotawmin. Eras, car do basicimas ara. Caram dor asicimcenokom, ajoremcomokom. 35E Yohanes, atereyapef lampu cimin atereyapef. E atawef atakam, lampu cimin ara. E aratakam jen baji, jak akat bemapomas ara. Caram jirow opok inim, e aratakam jen baji akat aefokom. 36E Yohanes e doratemen aatamefas, bare fak opoknakap inim. E atemen aatamaminas nat, faknakut ara. Doricipic, dor junum bweas bwem, atewenamfan. Doram e junum bweas aemamin. E junum bweas ara, doricipic dor atewenamfan, inimas aporomtamama. Inimas ara, ow doricipic dor atewenamfan apormes. 37E doricipic atewenamfan. Aramat ipicam doratemen aatamef. Ca nat, e aratakam jen baji opok cowok. Caram abi bapor opok cowok. 38Car e aramat ipic atewenamef ipic basicim opok. Inimas e doricipic atakamam e cajak aman batamemapawar opok. 39Cabi binip ara, ‘E Alkitab, jiwnenak batamemawaras atakam ara,’ inim aemokom. Inimas car e Alkitab aoworporawarmokom. Bare, e Alkitabam doratakamut atawmar araman. 40Car dor ajamkawicenokom, car jiwnenak aatamemawarcomokom. E nat, car do mamkawi pwicak aemokom.”

41“Doram asmat ow, ‘E Yesus akat ara,’ inim baji, jak baseremem opok. 42E nat, e cajak aman, car Allah damos bajiom opokut apormin ara. 43Doricipic atewenamfan. E nat, car do basicim opokut. Wun ipic nat, mami aenawcow, car e ipic asicimcomokom. 44Car caramaman, ‘A ow akat ara,’ inim mamji, jak aserememamokom. Allah, bare cowokut ara. E nat, car Allah, ‘A ow akat ara,’ inim baji, jak baseremem opokut. Inimas car do bwemsicim asan opok. 45Dor car doricipic bipu batewatam, inim bi binip bacecerem arapok. Dor inimas bwem opok. Ca nat, e Musa jirey aeawirukum. Bare, aramat ipic car atewatamaman. 46E Musa, doratakam, surat aeapomef. Inimas car e Musa surat aeapomef atakam basicim ayaw, caram dor asicimamenokom. 47Ca nat, e Musa atakam basicim opok aemokomnew, caram e atawmin atakam bwemsicim asan opok.” Yesus inim aeef.

Currently Selected:

YOHANES 5: LAICNS

Highlight

Copy