YOHANES 3

Yesusam, Nikodemusam, atakam

1Bare. Parisi ipic juwas Nikodemus ara. Ar Yahudi ow kepala ipic ara. 2E ipic iram Yesuspu aapenef. Aram atakam Yesus aotawef. “Guru! Or Allah jirmec ajirimenamfan guru apormom ara. Allaham or akac aomomaman apormom ara. Allah or akac momom opok ayaw, or e aemfem junum bweas bwemem asan opok.” Inim aeef.

3Yesusam atakam e ipic aotawef. “Atakamnak ara, ow bar jamnuk bajisames opok aemces, ar Allah Pemerintah Asan bwempor asan opok.” Inim aeef.

4Nikodemus masirin, “Ownucur ipic bar jamnuk bajisames nat, ucimaram? Ar e arosowoc jak aman bojiwames, wunam bojisames aranew?” Inim aeef.

5Yesus masirin, “Atakamnak ara, ow bar jamnuk bajisames opok aemces, aram Allah Pemerintah Asan bwemfiw asan opok. E bar jamnuk bajisamesas, aram bwi epcomas ara. Eram Allah Roh epcomas ara. 6Asmat ow asmat jiwiin ajispetiwcemes. E nat, Allah Roh, ay jak, e bar jamnuk bajisames ow atatamtotorma. 7Bare, ow bar jamnuk bajisamestotorces. Oram e atawmin atakam junum bwe arapok. 8Fo e asanin asanin afufuomosma. Car e fo awumamar, jen ajimokom. E nat, e fo ocenak asan ewenawmarnew, wunam ocenak asan jisosmarnew, caram camsom opok. Bare, Allah Roh, ay jak, e bar jamnuk bajisames ow atatamtotorcow, aram inim cowok ara. Caram eras manmok bwemtiwkurum asan opok.” Yesus inim aeef.

9E Nikodemus masirin, “Eras nat, ucim inimaram?” Inim aeef.

10E Yesusam, “Or Israel ow aguru ara. E nat, or eras omsom opoknew? 11Atakamnak ara, dar e namsomas atakam atawmom. Dar e manmok atiwmomas atemen aatamamom. E nat, car e atemen aatamamom atakam basicim opok. 12Dor awames capinmias atakam car aotawmin. Ca nat, e atakam basicim opok. Dor masirin, e onam opas atakam car aotawceynew, car e atakam basicim ucim inimaram? 13E onam op aaptometfes ow, bare opok cowok. E nat, e Asmat Anakat Ajaworemef Ipic, e onam op ewneyef.”

14“Bare, ametnak ara, Musa, amer e cem opok asan os op afirtimtopomef. Owam e Asmat Anakat Ajaworemef Ipic inim cowok op atomettewtopomcemes. 15Inimas e aramat ipic asicimces ow takas, jiwnenak aatamemawarcemes. 16Allah Asmat damos awutnakut ajiemef. Inimas aram atiw cowokut atetamef. Bare, e atiw asicimames ow daniwis bemap opok aemcemes. Aram jiwnenak aatamemawarcemes. 17Allah, e atiw awames capinmi atewnemef ara, er ‘Asmat ow fasi ara,’ inim atakam basakamtiwas opok. Er e atiw asmat bajortewas ara.

18Allah e atiw asicimames ow, ‘Car ow fasi ara,’ inim atakam basakamtiw opok aemcema. E nat, wun ow, e Allah atiw cowokut basicim opok ara. Inimas Allah, ‘E ow, ow fasi ara,’ inim atakam emcasakamtiwef. 19Bare, sereas awames capinmi emcaneyef. E nat, ow e aemamesas, bare jursumec ara. Inimas ar e jiwicas damos ajiomames. Aram e sereas damos bajiom opok aemames. Inimas Allah, ‘E ow, ow fasi ara,’ inim atakam asakamtiwef. 20E pwicakas aemames ow takas, e sereas bifan afayomames. Aram e sereaspu bwenawom opok aemames. E pwicak aemamesas umuton bwemasin. 21E nat, e atakamnak jipu aemames ow e aemamesas, bare Allah atakam ji bweas ara. Ar e aemamesas umuton baporomtam akat aemames. Inimas ar e sereaspu aenawomames.” Yesus inim aeef.

Yesusam, Yohanes Bwi Babwim Ipicam, atakam

22Bare, Yesusam, e amamkawi owam, e Yudea capinmi ajisosfes. Aram tarey pwiciri erasan akac aememfes. Erasan, Yesus, ow, bwi abwima aeef. 23-24E jofayam, ow e Yohanes e penjara cem aman bajiwtewapom opok aemfes ara. E Yohanesam, e asan juwas Ainon, bwi awut aporfes. Inimas ar ow bwi abwima aeef. Erasan Salim sotop ara. Owam e Yohanespu aapena aefes. Aramat ipic masirin, e ow bwi abwima aeef.

25Bare. E wun Yohanes mamkawi ow mamincopam, Yahudi ipic cowokam, atakam aamtawfes. Ar e agama Yahudi, pok, bwi bacicikim aturan atakam aamtawfes. 26E owam Yohanespu aapenfes, wunam atakam aotawfes. “Guru! E Yordan poman capinmi akac aememfem ipic, ow bwi abwimama. Er e atemen aatamfem ipic ara. Bare, ow takas aramat ipicpu aapenmes.” Inim aefes. 27E Yohanes masirin, “Allah, fakas, asmat ow batetam opok aecow, asmat ow e fakas bwemomom asan opok. 28Doram atakam emcaotawof. ‘Dor e Allah Aeremtewef Ipic arapok. Allah nat, dor bap atewenamfan. E aramat ipic masirin asep ara.’ Inim aeof. Caram e atakam jen emcajifokom. 29Jipic cepes atewetcow, ar e cowoc armipic aememcema. Wunam e ipic ajowow ipic, e ipic atakam jen ajicow, aram jak akatnakut aememcema. Doram inim ara. Dor wow jak akatnakut aememamin. 30Bare, e Yesus, ow awut baememcow. Dor masirin, ow kanim memem.” Yohanes inim aeef.

E op aewneyef ipic

31E op aewneyef ipic awut ara. Wun ow takas masirin, kanim ara. Asmat ow nat, awames capinmi ow ara. Aram awames capinmi atakam atawmes. E onam op aewneyef ipic nat, awut ara. Wun ow takas kanim ara. 32Aramat ipic, e aporefasam, e jen ajiefasam, atemen aatamama. Ow nat, e atemen atakam basicim opokut aemames. 33E aratemen atakam asicimames ow nat, atakam atawmes. “E Allah, bare anakat ara.” Inim aemes. 34Bare, Allah, e aRoh, epcom, e atewnemef ipic atetamama. Inimas e ipic, e Allah atakam atawma. 35E aricipic e atiw damos ajiomama. Aram pok takas e atiw ban ton momomkurum atetamef. 36E atiw asicimames ow, jiwnenak aatamemawarcemes. E nat, e atiw atakam ji bwe opok ow, e jiwnenak batowom opokut aemcemes. Allaham e ow jokmen aomomcema.

Currently Selected:

YOHANES 3: LAICNS

Highlight

Copy