Zakariya 8
8
Sithembiso sa Txizimu
1Msana keto, di to ta kwangu dipswi da Mkoma wa Mabutho a Tiyimbi, di txi ta kha dona:
2A womba tiya Mkoma wa Mabutho a Tiyimbi: Ni wonelete Siyoni, ngu kuwonelela ka hombe, kambe ngu kuhenya ka hombe, ni kuhiseka. 3A womba tiya Mkoma: Ni na tshumela ni ya Siyoni, se ni na ya zumba hagari ka Jerusalema; se Jerusalema a na dhanwa ku didhoropa da ditshuri, ni mmango wa Mkoma wa Mabutho a Tiyimbi, wu na dhanwa ku mmango wo sawuleka. 4A womba tiya Mkoma wa Mabutho a Tiyimbi: Ka mitendela ya Jerusalema, ku na zumba vo kumba, va txiwamna ni va txisikati, mmwani ni mmwani a na teka mtxheketelo wakwe, ngu mhaka ya tanga yakwe ya hombe. 5Se tinzila ta didhoropa ti na tala ngu mazambi ni mahorana, ale ma no sakana ka tona. 6A womba tiya Mkoma wa Mabutho a Tiyimbi: Ngako eto ti txi tsakisa masoni ka votshe vathu ka masiku oneyo, ina ti na tsakisa kambe masoni kwangu kani? Kuwomba Mkoma wa Mabutho a Tiyimbi. 7A womba tiya Mkoma wa Mabutho a Tiyimbi: Wona taku ni na hanyisa vathu vangu, va ditiko da Wutxani ni va ditiko da mswa ditambo; 8se ni na va wuyisa ve ta zumba hagari ka Jerusalema; va na va vathu vangu, aniko ani ni na va Txizimu txawe, ngu ditshuri ni kululama.
9A womba tiya Mkoma wa Mabutho a Tiyimbi:
Ma na ti karate manza anu motshenu, mi nga engisa masikwanano mapswi awa a vaprofeti, vale va nga ti tiho, ka ditshiku dile ku nga vekwa makhato a Nyumba ya Mkoma wa Mabutho a Tiyimbi, kasi ku dithepele di mana kuakwa. 10Nguko ma sinzi kuhoka masiku awa, ku si nga ni kuholelwa ka vathu, hambi ni kudihelwa ka sifuyo; kambe ku ti si nga ni kudikha ka wule a nga ti ti wulela, ni ka wule a nga ti ti huma, ngu mhaka ya mlala, nguko ani ni kujetete votshe vathu, ti to mmweyo ni mmweyo e wukela mmwani m'thu. 11Kambe konkuwa, na mbi ngadi ni xanisa miboti ya vathu vava kufana ni masiku o khata, kuwomba Mkoma wa Mabutho a Tiyimbi. 12Nguko mbewu yi na humelela, se m'vhinya wu na veka mihando ya wona, mafu ma na ninga sasiphya, nzuma yi na nisa hunguva ya yona; se ni na maha taku miboti ya vathu vava, yi mana yotshe thomba yiya. 13Se ku na maheka awe nyumba ya ka Judha, ni nawe nyumba ya ka Israyeli tito, nga kule anu mi nga ruketelwa hagari ka matiko, ni na mi hanyisisa toneto, mi va txikateko; mi nga thaveni, ma na ti karate manza anu.
14Nguko a womba tiya Mkoma wa Mabutho a Tiyimbi:
Ku nga kule ni nga pimisa ku mi mahela kubiha, mbimo yile vatate vanu va nga ni wusela kuhenya, kha na nga ti laya, kuwomba Mkoma wa Mabutho a Tiyimbi, 15ngu kumaha keto, ni pimisile kambe kumaha wunene ka Jerusalema, ni ka nyumba ya ka Judha, ka masiku awa, mi nga thaveni. 16#Wona ni ka: Vaef. 4:25. Ati mi dinganako kumaha tona ngu tiya: Wombawombani ditshuri mmwani ni mmwani ka mkwawe, lamulani ngu ditshuri ni kudikha sikenini kwanu. 17Kambe ni wammweyo kwanu, a nga pimisele wubihi mbiluni kwakwe, wo wukela mkwawe, hambi kudhunda kuxambanya makuhu, nguko totshe tiya ani na ti nyenya, kuwomba Mkoma.
18Se dipswi da Mkoma wa Mabutho a Tiyimbi di to ta kwangu, di txi ta kha dona:
19A womba tiya Mkoma wa Mabutho a Tiyimbi: Kutitona ka mtxima wa wumune, ni kutitona ka mtxima wa wutxhanu, ni kutitona ka wa wutxhanu ni yimbidi, ni kutitona ka mtxima wa wugumi, ku nava kunengela ni kutsaka, ni mibuso ka nyumba ya ka Judha, ngu toneto dhundani ditshuri ni kudikha.
20A womba tiya Mkoma wa Mabutho a Tiyimbi:
Kambe ku na maheka taku, ku txi ta vathu, ni vale va zumbako ka madhoropa amangi; 21se vale va zumbako ka didhoropa dimwedo, va na ya ka dimwani, va txi ya kha vona: He tsuleni ngu txikuluveta hi ya kombela kuvhunwa ngu Mkoma, ni kuya lava Mkoma wa Mabutho a Tiyimbi; nanani na tsula. 22Ngu kumaha keto, ku nata vathu vavangi, ni matiko a mitamo ngutu, ve ta lava Mkoma wa Mabutho a Tiyimbi kona Jerusalema, ni kukombela makatekwa ka Mkoma. 23A womba tiya Mkoma wa Mabutho a Tiyimbi: Ka ditshiku donedo, ku na maheka taku, digumi da vavamna, va totshe tidimi ta matiko, ve ñola ha ka mrungo wa txyambalo txa M'judha, va txi kha vona: Hi na tsula ni nanu, nguko ha tolovela kupfa taku, Txizimu txi ni nanu.
Currently Selected:
Zakariya 8: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
