Matewu 27

Jesu a txi yiswa ka Pilato

(Marku 15:1; Luka 23:1-2; Johani 18:28-32)

1Ngako di di txite, votshe vaphaxeli va hombe ni madhota a ditiko, va to tshangana ve maha txikungo txa kulenga Jesu, kasiku ve m'daya. 2Se va di mu sungile mawoko, va to mu heleketa veya mningela ka mfumeli Pilato.

Kufa ka Judha

(Mithumo 1:18-19)

3Sekoko, Judha, awu a nga mningela, a di woni ti to Jesu a abanisetwe kufa, a to ti laya se e tshumeta male yile ya magumi mararu, ya silivhela, ka vaphaxeli va hombe ni madhota a ditiko, 4a txi khene: “Ni onhile ni nga ningela mnoha wo mbi na mnandu!” Vona va to kha vona: “Ti womba txani eto kwathu kani? Eto ndako wekhelela!”

5Se a di vinzile male hahatshi, mu Dithepeleni, ene a to huma e tsula eya ti tshongisa.

6Vaphaxeli va hombe, va di rolete male, va to kha vona: “Kha ti laveki ti to yi vekwa mkwamani ka miningelo, nguko i male yi yi nga xava mnoha.”

7Msana ka kuva va di sungile txikungo, va to xava ngu yona “Thembwe ya Muwumbi,” kasi kutshotshela kona vathu va matiko. 8Ngu kota yeto, thembweyo kala ditshiku da nyamsi yi dhanwa ku i “Thembwe ya Mnoha.” 9Ngu toneto, ku tatisekile ati ti nga wombwa ngu mprofeti Jeremiya, a nga khene: “Va to teka magumi mararu a male ya silivhela, a nga xawa ngu yona m'thu, male yi a nga pimelwa ngu vanana va Israyeli. 10Va xavile ngu yona thembwe ya muwumbi, kota nga ti Mkoma a nga ni rumisa tona.”

Jesu masoni ka Pilato

(Marku 15:2-5; Luka 23:3-5; Johani 18:33-38)

11Jesu a to yiswa masoni ka mfumeli Pilato, awu a nga mu wotisa a txi khene: “Ngawe mfumeli wa Vajudha kani?” Jesu a to xamula a txi khene: “U womba tona.”

12Kambe mbimo yi a nga ti mangalelwa ngu vaphaxeli va hombe ni madhota a ditiko, kha xamula txilo. 13Sekoko, Pilato a to khene kwakwe: “Khu engisi totshe ti va wombako ngu ngawe, kani?”

14Aniko ene kha xamula dipswi ni da dimwedo, se ngu kota yeto mfumeli a to xamala ngutu.

Jesu ngako a txi konelwa kudawa

(Marku 15:6-15; Luka 23:13-25; Johani 18:39--19:16)

15Se ngu mbimo ya m'buso wa Pasika, mfumeli a ti ni toloveto ya kuthukunyula mmweyo wa vale vo sungwa, awu vathu va nga ti mu lava. 16Ka yoneyo mbimo, a ti ti ho mmweyo wa kusungwa, wa nduma yo biha, a nga ti dhanwa ku i Bharabhasi. 17Pilato a to womba ka vathu va nga ti tshanganile a txi khene: “Ngu wuhi mi ti lavako ti to e thukunyulwa, Bharabhasi mwendo Jesu wu a dhanwako ku i Kristu kani?”

18Nguko a tiziva ti to va mu ningete ngu livengo.

19Na ene a di khalahatshile ha txikhaloni ka kulamula, msikati wakwe a to rumela kuya mu gela tiya: “U nga thuke u txi ti wuleta ka mhaka ya m'thu wuwa wo lulama, nguko ni pandisekile ngutu hamnova ngu miloro ngu mhaka yakwe.”

20Aniko vaphaxeli va hombe ni madhota a ditiko va to kujetela dibutho ti to ve thusa Bharabhasi, ve leka Jesu e dawa.

21Mfumeli a to tshumela a txi wotisa a txi khene: “Ngu wuhi ka va vavambidi mi lavako ti to ni mu thukunyula kani?” Se vona va nje kha vona: “Bharabhasi!”

22Pilato a txi khene kwawe: “Sekoko ni na maha txani ngu Jesu, awu a dhanwako ku i Mesiya, kani?” Va to xamula votshe va txi kha vona: “A na bethelwe ha txihambanoni!”

23Ene a tshumete kambe a txi khene: “Njionho muni a nga txi maha kani?” Aniko vona va to phikiza. Va txi kwangula ngu mtamo va txi kha vona: “A na bethelwe ha txihambanoni!”

24Sekoko Pilato, a di woni ti to kha koti txilo, ni ti to dizunga da engeteleka ngutu, a to ruma kuve mu tisela mati, e samba manza masoni ka dibutho, na, a txi khene: “Kha ni na mnandu ka mnoha wa m'thu wuwa wo lulama! Ati ndanu mokha.”

25Se votshe va to angula va txi kha vona: “Mnoha wakwe wu na thekele txitimwi kwathu ni txitimwi ka vanana vathu!”

26Sekoko Pilato a to thukunyula Bharabhasi, e rumela ti to Jesu a na kwapelwe ngu sisepu, ngu msana e mningela kasiku eya bethelwa ha txihambanoni.

Masotxhwa me tseketsela Jesu

(Marku 15:16-20; Johani 19:2-3)

27Konaho masotxhwa a mfumeli ma to teka Jesu me mu yisa dibanzani veya tshanganisa dotshe dibutho masoni kwakwe; 28se va txi mtshambula syambalo sakwe, ve mu ambalisa nguwo yo bhilivila. 29Se va di lukile tshimbo ya mipa, va to msanzeka ha msungo kwakwe, ngu msana ve mñolisa litshava ngu dianza da txinene. Se va txi khizama masoni kwakwe na va txi mtseketsela va txi kha vona:

“Xeweni, mfumeli wa Vajudha!”

30Na va txi mu thurela lure khoheni, ve teka litshava ve mu peka ngu lona ha msungo. 31Ngako va di mu tseketsete, va to mtshambula dibhaji dile do bhilivila, ve mu ambalisa syambalo sakwe, ve tsula nayo kuya mu bethela ha txihambanoni.

Kubethelwa ka Jesu

(Marku 15:21-32; Luka 23:26-43; Johani 19:17-27)

32Se va di humile, va to mana m'thu wa mwamna, wa Kirene, a nga ti dhanwa ku i Simoni, ve mu kurumeta kupakata txihambano txa Jesu. 33Se mbimo yi va nga hoka ka wukhalo wu wu dhanwako ku i Golgota, ati ti wombako ku “mmango wa txikwakwa,” 34va to mninga vhinya yo patwa ni vhinagre, kasiku e sela; aniko, mbimo yi a nga yi danza, kha tumela ku yi sela.

35 # Wona ni ka: Mas. 22:18. Msana ka ku mu bethela va to teka tinguwo takwe va txi abanela, va di thangile ngu kuxaxuva tixolo. 36#27:36 Mwendo: va txi wonelela. Se ve khalahatsha konaho, ve mu woneleta. 37Se ve nameketa ngu txitimwi ka msungo wakwe, m'bhalo wa mhaka ya kufa kwakwe, va txi kha vona: “Awu i Jesu Mfumeli wa Vajudha.” 38Kumweko ni Jesu, si ti ti bethetwe sigevenga simbidi, tximwetxo ngu didhawa da txinene, tximwani ngu didhawa da txibhabha kwakwe.

39Se ava va nga ti pinda, va txi mu ruketela, va txi zinginika misungo yawe, va txi kha vona:

40“Awe u khundumuselako Dithepele da Txizimu, u txi di aketa ngu masiku mararu, ti hanyise ko! Ngako u di Mwanana wa Txizimu, txhika ngu ha txihambanoni!”

41Konaho vaphaxeli va hombe, ni vabhali, ni madhota a ditiko, va txi mtseketsela ni vona, va txi kha vona:

42“A hanyisile vamwani, kambe ene kha sikoti ku ti hanyisa apune. Ngako i di mfumeli wa Israyeli, a na txhike konkuwa ngu ha txihambanoni, kufela ku hi mtumela!” 43A thembile Txizimu, inna ko, txi na mu hulukise konakuwa, ngako txi txi m'dhunda, nguko a ti khene: “Ani ni Mwanana wa Txizimu!”

44Hambi vale va sigevenga, va nga ti bethetwe kumweko nayo, va ti ti mu ruketela ni vona.

Kufa ka Jesu

(Marku 15:33-41; Luka 23:44-49; Johani 19:28-30)

45Se kukhukhela ka txikhati txa wutxhanu ni tximwetxo kala ka txa wutxhanu ni mune, txidema txi to fenengeta dotshe ditiko. 46Kambe ngu txikhati txa wutxhanu ni mune, Jesu a to kwangula ngu dipswi da hombe, a txi khene: “Eli, Eli, lama sabaktani, kani?” Ati ti wombako ku: “Txizimu txangu, Txizimu txangu, u ni lekete txani kani?”

47Vamwani ka vale va nga ti ti ho konaho, ngako va di mu engisile, va to womba va txi kha vona: “A dhana Elija!”

48 # Wona ni ka: Mas. 69:21. Konaho mmweyo wa vona a to tutuma eya teka txiponja e txi beta mu ka vhinagre, e txi zomeka aha ka litshava, se e mninga kasiku e sela. 49Aniko vamwanyani va to womba va txi kha vona: “Leka, hi lava kuwona ti to mwendo a nata Elija a ta mu hanyisa.”

50Kambe Jesu a to engeta e kwangula ngu dipswi da hombe, se e ningela moya.

51 # Wona ni ka: Eks. 26:31-33. Se ti di mahile eto, nguwo ya Dithepele yi to vharuka ngu hagari, kukhukhela txitimwi kala hahatshi; mafu ma txi zinginikela, marigwi ma txi fayekela. 52Mathuna me tulekela, se mimidi ya vafi votala va kusawuleka, yi to wuka. 53Se va di wukile ngu mathunani, msana ka kuwuka ka Jesu, va to wulela ka Dithoropa do sawuleka, ve vonwa ngu vathu vavangi.

54Sekoko, mthangeli wa dizana, ni vale yi nga ti navo ve woneleta Jesu, ngako va di woni kuzinginikela ka mafu ni timwani ti nga humelela, va to dhuka, va txi kha vona: “Kha ditshuri awu i ti Mwanana wa Txizimu!”

55 # Wona ni ka: Luk. 8:2-3. Konaho kambe ku ti ti ho vavasikati votala, va txi wonetela tiya va di kule, avava, kukhukhela Galileya, va nga ti londetela Jesu, na va txi mu thumela. 56Hagari ka vona, a ti ti ho Mariya wa Magdhala, ni mmwani Mariya, mame wa Jakobe ni Josefa, ni mame wa vanana va Zebhedhewu.

Kukelelwa ka Jesu

(Marku 15:42-47; Luka 23:50-56; Johani 19:38-42)

57Se ni minova a tile m'thu wokari wa Arimateya, i nga ti nyatithombe, awu a nga ti dhanwa ku i Josefa, awu nene i nga ti mgondiswa wa Jesu. 58Se a to tsula ka Pilato, eya kombela mmidi wa Jesu. Sekoko Pilato e rumela ti to mmidi wule wu ningelwa kwakwe. 59Josefa a to teka mmidi, e wu phutela ngu nguwo yo basa, 60e wu veka diyivani kwakwe, kakuphya, di nga ti mahilwe ha dirigwini. Ngu msana a to wumbuluta dirigwi da hombe e khubhunyeta ngu dona diyiva, e khukha e tsula. 61Se a ti tiho kona hale Mariya wa Magdhala ni mmwani Mariya, na va di khalahatshile masoni ka diyiva.

Vawoneleti va diyiva da Jesu

62Mangwanani ka kona, i ku mixo ya ditshiku di di londetelako ditshiku da kulongisela, vaphaxeli va hombe ni Vafarisi va to tsula ka Pilato, 63#Wona ni ka: Mat. 16:21; 17:23; 20:19; Mar. 8:31; 9:31; 10:33-34; Luk. 9:22; 18:31-33. veya mu gela tiya: “Awe mfumeli, ha khumbula ti to mxengeteli wule a wombile, a di ngadi a txi hanya, a txi khene: ‘Ni na wuka ngu ditshiku da wuraru.’ 64Ngu toneto, rumela vathu veya woneleta diyiva ta tinene, kala ka ditshiku da wuraru, va nga thuka va txi ta vagondiswa vakwe ve ta pa txirumbi, se va txi womba ka vathu tito: ‘A wukile ngu ka vo fa!’ Makuhu awa ma nga va i di o biha ngutu kupinda o thanga.”

65Se Pilato a ti khene kwawe: “Vawoneleti mi navo, tsulani mi ya woneleta nga ti mi ti lavisako tona.”

66Sekoko vona va to veka vawoneleti ha diyivani, ve tsanisa dirigwi ngu txixambanyo.

Currently Selected:

Matewu 27: BEC2016

Highlight

Copy