Matewu 17

Kuphatima ka Jesu mmangoni

(Marku 9:2-13; Luka 9:28-36)

1Sekoko, ku di pindile mtxhanu wa masiku ni dimwedo, Jesu a to teka Pedro ni Jakobe ni Johani, mwanawe Jakobe, e tsula navo, vona vokha, ka mmango wo lapha. 2Se konaho a to phinduka masoni kwawe: Khohe yakwe yi phatima kufana ni ditambo, ni tinguwo takwe ti hinduka ti txi basa kufana ni liwoningo. 3Koneko va to woneka Mosi ni Elija, va nga ti bhula nayo. 4Se Pedro a to womba ka Jesu a txi khene: “Mkoma ndinene ku hi zumba konahawa. Ngako u txi ti lava, hi na aka kona hawa midhuti yiraru, wumwewo mbwako, wumwani mbwa Mosi ni wumwani mbwa Elija.” 5Ene a di ngadi a txi womba tiya, ku to humelela direfu do woninga, di nga va fenengeta, se direfuni mule ku to pfala dipswi, di di nga womba tiya: “Awuwa i Mwanana wangu wo randeka ngutu, awu ni tsakiswako ngutu ngu ngene. Mu engiseni!” 6Mbimo yi va nga engisa mapswi awa, vagondiswa va to wa hahatshi ngu timbanza, va txi telwa ngu dizowa da hombe ngutu. 7Sekoko, Jesu a to va tshuketela, e va wusa, a txi khene: “Khukhani mi txi ema, mi nga thaveni txilo!” 8Mbimo yi va nga gula maso, kha va wona mmwani, hahanze kwakwe ene Jesu.

9Se mbimo yi va nga ti relela ngu mmangoni niya, Jesu a va layile, a txi khene: “Mi nga wombeni ni ka wammweyo txidiwukiso txi mi nga txi wona, kala mbimo yi Mwanana wa M'thu a no wuka ngu ka vafi.” 10#Wona ni ka: Mal. 4:5. Vagondiswa vakwe va mu wotisile va txi kha vona: “Ngu kutxani vabhali va wombako ti to Elija a fanela kuthanga ene a txi ta, kani?” 11Se ene a txi angula, a to khene kwawe: “Kha ditshuri, Elija a fanela kuta, a ta longisela sotshe. 12Aniko ani na mi gela ku khani: Elija a tile, kambe kha va m'ziva; va mmahile totshe ti va nga ti lava. Ngu toneto, Mwanana wa M'thu nene a na xaniswa ngu vona.” 13Sekoko vagondiswa vakwe va ti mani tito, a womba-womba ngu Johani Mubhabhatisi.

Kuhanyiswa ka mfana wokari

(Marku 9:14-29; Luka 9:37-43a)

14Ngako va di hokile ka dibutho, mmweyo wa mwamna a to mtshuketela hafuhi kwakwe, a txi mu khizamela, a txi khene kwakwe: 15“Mkoma pfela wuxinji mwanana wangu, a lwalako ngu txitshanuka; wa xaniseka ngutu. Sikhati so tala a wela ha mndiloni ni matini. 16Ni mu nehile ka vagondiswa vako, aniko va mu tandi ku mu hanyisa.” 17Jesu a to xamula a txi khene: “Liveleko la vathu va ku ambi kholwa ni vo soholoka, ni na va ni nanu kala txikhati muni kani? Ni na timisela ngu nganu kala ditshiku muni kani? Mu tiseni hawa kwangu.” 18Jesu a to dhusa didhimoni, se didhimoni di huma ngu ka mfana wule, se ene e hanyiswa ka yoneyo mbimo.

19Sekoko, vagondiswa va to tshuketela Jesu, va txi mu gela ngu phuho va txi kha vona: “Hi tandekisile kutxani athu kutovela didhimoni diya kani.” 20Jesu a va xamute a txi khene: “Ngu mhaka ya kutumela kwanu ka kudotho, nguko kha ditshuri ni khani kwanu: Ngako mi di ni kukholwa ko fana ni mbewu ya txinapi, mi na womba ka mmango wuwa, mi txi khanu: ‘Khukha hawa u txi ya haleya’, wona wu na khukha. Txi walo ni tximwetxo mi no txi tanda. 21[Aniko lixaka liya la madhimoni kha li tovelwi, hahanze ka kukombela ni kutitona sakudya.”]

Jesu a txi engeta e zivisa ta kufa ni kuwuka kwakwe

(Marku 9:30-32; Luka 9:43b-45)

22Ngako va di sengeletanile Galileya, Jesu a to va gela vagondiswa vakwe a txi khene: “Mwanana wa M'thu a na ningelwa manzani ka vathu; 23vona va na m'daya, aniko ngu ditshiku da wuraru a na wuka.” Konako, vona va to telwa ngu dikhodho ngutu.

Male ya msengo wa Dithepele

24 # Wona ni ka: Eks. 30:13; 38:26. Ngako va di hokile Kapernawume, vasengisi va mkhupo wa Dithepele va to ta ka Pedro, va txi ta kha vona: “M'gondisi wanu kha humisi mkhupo wa Dithepele kani?” 25Ene a va xamute a txi khene: “Ina, wa humisa.” Mbimo yi a nga wulela nyumbani, Jesu a to thanga ene a txi khene ka Pedro: “U wona txani ngu mhaka yiya, awe Simoni, kani? Vafumeli va ha mafuni va sengisa ni kukhupisa vamani kani? Va khupisa vanana vawe, mwendo va khupisa vamatiko kani?” 26Ene a xamute a txi khene: “Va khupisa vamatiko.” Jesu a nje khene kwakwe: “Ngu toneto, vanana vawe va va leka. 27Aniko, kasiku hi si va khuvekisi, tsula lineneni u txi ya dota, teka txihaka txo khata txi no ñolwa ngu ndowo. Txi tule txisofu, u na mana male ya txitateri; yi teke u txi dihela ngu ngani ni nawe.”

Currently Selected:

Matewu 17: BEC2016

Highlight

Copy