Matewu 15

Jesu ni sihena sa Vajudha

(Marku 7:1-13)

1Sekoko, Vafarisi ni vabhali va Jerusalema va to tshuketela Jesu, va txi kha vona kwakwe: 2“Vagondiswa vako va ndakela txani sihena sa vakale, kani? Nguko kha va sambi manza mbimo yi va dyako sakudya.” 3Aniko ene a to va xamula, a txi khene:

“Nananu mi ndakela txani Mlayo wa Txizimu ngu mhaka ya sihena sanu kani? 4Nguko Txizimu txi layile txi txi kha txona: ‘Thava tate wako ni mame wako’ ni tito: ‘Awu a ruketelako tate mwendo mame wakwe, a nafe ngu kudawa.’ 5Aniko anu mi khanu: ‘Awu a gelako tate wakwe mwendo mame wakwe ti to asiya a nga ti fanete ku mu vhunetela ngu sona, si ningetwe ka Txizimu, 6khaswi a txi kurumetwa kuvhuna tate wakwe mwendo mame wakwe.’ Ngu toneto, mi onhile Mlayo wa Txizimu, ngu sihena sanu. 7Vaxengetelinu, Isaya a profetile kwati ngu nganu, a txi khene:

8‘Avava vathu va ni dhumisa ngu sisofu sawe;

aniko mbilu yawe yi kule ni nani.

9Va ni khizamela walo,

nguko tigondo ti va gondisako nzileleto sa vathu dwe.’ ”

Jesu e womba-womba ngu kwa mbi sawuleka

(Marku 7:14-23)

10Sekoko, ene a to dhana dibutho, a txi khene kwawe:

“Engisani, mi ti pima! 11Hi nga sona si si wulelako mkanani si bihisako m'thu; aniko asiya si humako ngu mkanani ka m'thu ngu sona si mu bihisako.” 12Sekoko vagondiswa va to mtshuketela va txi kha vona kwakwe:

“Ina wa tiziva ti to Vafarisi va khuvekile, ngako va di engisile dipswi diya dako kani?”

13Ene a to va xamula a txi khene:

“Sotshe so phaywa, asiya si nga mbi phaywa ngu Tate wangu wa nzumani, si na dulwa. 14#Wona ni ka: Luk. 6:39. Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”

15Se Pedro a to xamula a txi khene:

“Hi txhamusele txidinganiso txiya.” 16Aniko Jesu a to khene:

“Kasi na nanu mi ngadi mi pwata kupima kani? 17Kha mi tizivi ti taku sotshe si si wulelako mkanani sa pinda siya mndani, se si humiswa hahanze kani? 18#Wona ni ka: Mat. 12:34. Aniko asi si humako ngu mkanani, si khukhela mbiluni, eso ngu sona si bihisako m'thu. 19Nguko mbiluni, ngu kona kuhumako mialakanyo yo biha, kudaya, wugelegele, wugango, wukhamba, kusingeta ni kuruketela. 20Asiya ngu sona si bihisako m'thu; kasi kudya u sa samba manza kha ku bihisi m'thu.”

Likholo la wamsikati wa Kanana

(Marku 7:24-30)

21Jesu a to khukha konaho e tsula madhawani ka Tiro ni Sidhoni. 22Se mmweyo wamsikati, wa mu Kanana, a nga ti tile ngu Kanana, a to kwangula a txi khene:

“Mkoma Mwana Dhavhidha, ni pfele wusiwana. Mwanana wangu wa txihoranana wa xupheka ngutu ngu madhimoni.”

23Aniko ene kha mu angula txilo. Vagondiswa va to ta kwakwe ve ta mkombela, va txi kha vona:

“Mtshumete, nguko wa hi londetela, na a txi hi kulumela.”

24Jesu a to xamula a txi khene:

“Ani kha na rumelwa vamwani hahanze ka tinvuta ti ti nga mwalala ta nyumba ya ka Israyeli.”

25Sekoko awule wamsikati a to ta hafuhi kwakwe, e ta mu khizamela, a txi khene:

“Mkoma ni vhune!”

26Se ene a txi mu angula, a ti khene:

“Hi nga ta tinene kuteka sakudya sa vanana si tshotshwa ka timbwa.”

27Se nene a nje khene: “Ina, Mkoma nditshuri; aniko siwana ni sona sa dya maruru ale ma wako ngu ha mezani ka vanyamne va sona.”

28Sekoko Jesu a to mxamula a txi khene: “Wamsikati, kukholwa kwako nga hombe! Ti na maheke nga ti u ti lavisako tona.”

Se kukhukhela ka yona yile mbimo, mwanana wakwe wa muhorana a to kalamuka.

Jesu e hanyisa vathu vavangi

29Jesu a di khukhile konaho, a to ya lineneni ka Galileya, se a di kwete mmango a to ya khalahatsha konaho. 30Se dibutho da vathu votala, va to mtshuketela, va txi neha silima, mabhofu, sidiya, siduma ni vamwani vavangi, se veya va veka minengeni kwakwe. Ene a to va hanyisa. 31Ahawa ka kuva mabutho ma txi xamala ngu kuwona siduma si txi womba-womba, mabhofu ma txi wona. Se ve dhumisa Txizimu txa Israyeli.

Jesu e dyisa dimwani dibutho

(Marku 8:1-10)

32Jesu, a di dhani vagondiswa vakwe, a to va gela a txi khene:

“Na di pfela wusiwana dibutho diya, nguko va zumbile ni nani masiku mararu, na va si dyi txilo. Anani kha ni ti lavi ku va tshumeta ni nzala, nguko ni thava ti to va nga thuka ve jiyela ha nzila.” 33Vagondiswa va to kha vona kwakwe:

“Hi na ma mana hani mapawu txiwulani muwa o dingana kukhurisa vathu vo talisa tiya kani?”

34Jesu a to khene kwawe: “Mapawu mangahi mi ku nawo kani?” Se vona va to kha vona:

“Mtxhanu wa mapawu ni mambidi, ni sihakanyana sa sidotho.”

35Sekoko a to gela vathu ti to ve khalahatshela hahatshi. 36Ngako a di tekile mapawu yale ya mtxhanu ni mabidi ni sihaka sa kona, a to bonga a txi si bhandelela, a txi si ningela ka vagondiswa, se vona va to avela dibutho. 37Votshelele va dyite ve khura, se ve tata mtxhanu wa sirundu ni simbidi ngu sile si nga sala. 38Aniko ava va nga dya i ti mune wa magumi a mazana a vavamna, ku si balwi vavasikati ni vanana.

39Se msana ka kuva a di tshumetile dibutho, a to wulela ngalavani eya ditikoni ka Magadhani.

Currently Selected:

Matewu 15: BEC2016

Highlight

Copy