Luka 5

Vagondiswa vo khata va mune

(Matewu 4:18-22; Marku 1:16-20)

1 # Wona ni ka: Mat. 13:1-2; Mar. 3:9-10; 4:1. Ngako dibutho da vathu di di tshanganile di ranganyeta Jesu, kasiku ve engisa dipswi da Txizimu, mabambe ka digova da Genezareta, 2ene a to wona tingalavana timbidi ti di emile likasani ka digova; vakoki va sihaka va ti humile, va txi ya kuwula tikoka. 3Jesu a to kwela ka ngalava yimweyo ya Simoni, a txi mkombela ti to a txi yi susumetela matini; ngu msana a to khalahatsha a txi gondisa mabutho, a di ngalavani.

4Mbimo yi a nga gwita kuwombawomba, a to gela Simoni, a txi khene: “Txungela ngalava yi txi ya hagari ka Digova, mi na beta tikoka tanu mi koka sihaka.” 5#Wona ni ka: Joh. 21:3. Simoni a to angula a txi khene: “M'gondisi, hi thumile wotshe wusiku, kambe kha ha mana txilo; aniko ngako u rumako, ni na rinza tikoka.” 6#Wona ni ka: Joh. 21:6. Ngako va di mahile toneto, va to mana sihaka so tala ngutu; ahawa koza tikoka tawe ti lava kuvharuka. 7Se va to kweseta vangana, va nga ti ka yimwani ngalava, kasiku ve ta va vhuneta. Vona va tile va ta tata tingalava ngu wumbidi wa tona, ahawa ka kuza tona ti lava kubhwabhwamela. 8Simoni a di woni tiya, a to ti wisa minengeni ka Jesu, a txi khene: “Mkoma, khukha hawa kwangu, nguko ani ni muonhi!” 9Nguko a ti tate ngutu ngu kuthava, kumweko ni votshelele va a nga ti navo, ngu mhaka ya sihaka sile va nga daya. 10A tetwe ngu kuthava nene Jakobe ni Johani, vanana va Zebhedhewu, i nga ti vakoki kulowe ni Simoni. Aniko Jesu a to gela Simoni a txi khene: “U nga thave. Kukhukhela ka nyamsi, u na va u di mkoki wa vathu.” 11Konaho, ngako va di humisile tingalava tawe likasani, va to leka sotshe ve mu londisa.

Jesu a txi basisa m'thu wa tshekela

(Matewu 8:1-4; Marku 1:40-45)

12Ngako Jesu a di ka dimwani didhoropa, ku to maneka koneyo wamwamna, wu a nga ti tate ngu tshekela. Ahawa a nga wona Jesu, a to ti wisa hahatshi ngu khohe, a txi kombela a txi khene: “Mkoma, ngako u txi ti lava, u nga ni basisa.” 13Jesu a to nawuluta diwoko a txi mu gwesa, a txi khene: “Na ti lava, basiswa.” Konako tshekela yi to thaveka kwakwe. 14Se a to mu leleta a txi khene: “U nga thuke u txi gela m'thu, kambe tsula u ya ti kombisa ka mphaxeli, u txi maha mningelo wa kubasiswa kwako, nga ti Mosi a nga leletisa tona, kasi wu na va wufakazi kwawe.” 15Se nduma yakwe yi to engeteleka kuhangalaka; mabutho a hombe ma to ta ku ta mu engisa ni ku ta hanyiswa ngu ngene ka malwati awe. 16Kambe ene a ti tolovela kuya txiwulani eya khongela.

Kuhanyiswa ka m'thu wa kuoma sihango

(Matewu 9:1-8; Marku 2:1-12)

17Ka dinwane ditshiku, Jesu a ti gondisa; Vafarisi ni vagondisi va Mlayo, va kuta ngu ka otshe madhoropa a Galileya ni Judheya ni Jerusalema, va ti ti ho konaho. Se mtamo wa Mkoma wu ti ni nene kasi kuhanyisa. 18Vavamna vokari, va di rwate ngu didhando m'thu wa kuoma sihango, va ti ti zama ku mu wuletisa nyumbani, kasi kuya mu veka masoni ka Jesu. 19Ku ti ngako va si mani ko mu wuletisa, ngu mhaka ya dibutho, va to kwela txitimwi ka nyumba, ve hasula liangwa, ve mu txhikisa hagari, masoni ka Jesu, na a di didhandoni kwakwe. 20Jesu, ngako a txi wona likholo lawe, a to womba a txi khene: “Mwanathu, u divaletwe sionho sako.” 21Se vabhali ni Vafarisi va to khata kuwombawomba timbiluni kwawe, va txi kha vona: “I mani wuwa a ruketelako kani? I mani a sikotako kudivalela sionho, i si nga Txizimu kani?” 22Kambe Jesu, ngu kuziva mialakanyo yawe, a va xamute a txi khene: “Mi ngungurukelela txani timbiluni kwanu kani? 23Ku hehuka tihi kani, kuwomba taku: ‘U divaletwe sionho sako’, mwendo kuwomba ku: ‘Khukha u tsimbila kani’? 24Ngu toneto, ani ni na mi kombisa ti to Mwanana wa M'thu ana ni mtamo, ha mafuni, wa kudivalela sionho.” Se a to gela wu wa kuoma sihango, a txi khene: “Na kugela ku khani: Khukha u teka ditaho dako, u tsula m'tini kwako.” 25Se kunukunuko a to khukha masoni kwawe, e teka ditaho di a nga ti otete ka dona e tsula m'tini kwakwe, na a txi dhumisa Txizimu. 26Konaho va to xamala votshe, ve dhumisa Txizimu, ve tala ngu kuthava, va txi kha vona: “Nyamsi hi woni txixamaliso.”

Ta kudhanwa ka Levhi

(Matewu 9:9-13; Marku 2:13-17)

27Msana keto, Jesu a to huma, e wona mkhupisi a dhanwako ku i Levhi, a di khalahatshile nyumbani ka kukhupisa, a txi khene kwakwe: “Ni londise.” 28Se ene a to leka sotshe, a txi khukha e mu londisa.

29Se Levhi a to mmahela m'buso wa hombe nyumbani kwakwe; kambe ku ti ni dibutho da hombe da vakhupisi ni vamwani va nga ti navo ha mezani. 30#Wona ni ka: Luk. 15:1-2. Se vabhali ni Vafarisi va to ngurangura, va txi kha vona ka vagondiswa vakwe: “Ngu kutxani mi txi dya ni kusela ni vakhupisi ni vaonhi, kani?” 31Jesu a to va xamula a txi khene: “Ava va hanyako kha va lavi ñanga, kambe yi lawa ngu va va lwalako. 32Ani kha na tela ku ta dhana ava vo lulama, aniko ni tete ku ta dhana vaonhi kuhundulukani.”

Kutitona sakudya

(Matewu 9:14-17; Marku 2:18-22)

33Se va txi kha vona kwakwe:

“Vagondiswa va Johani va ti tona sakudya sikhati sasingi, va txi maha ni mikombelo; vagondiswa va Vafarisi ni vona va mahisa toneto. Kasi vagondiswa vako vadya ve sela.” 34Jesu a txi khene kwawe:

“Ina ta koteka kukurumeta tipheleketi ta mteki kutitona sakudya, na mteki a di ngadi nato kani? 35Kambe ya ta mbimo, ayi mteki a no thaviswa kwawe; keyo mbimo ngu kona va no sikota kutitona sakudya.”

36A to engeta e va gela txidinganiso, a txi khene:

“Kha ku na m'thu wu a vharulako txiziva ka nguwo ya yiphya e txi rungela ka ya kale; ngako a txi mahisa eto, a na va a di vharute nguwo ya yiphya, kuve txiziva txi txa txiphya kha txi yelani ni nguwo ya kale. 37Kha ku na m'thu wu a thelako vhinya ya yiphya misavani ka kale; nguko vhinya ya yiphya yi nga phuxuta misava, se vhinya yi thekela, misava ni yona yi onheka; 38Se vhinya ya yiphya yi thelwa ka misava ya yiphya. 39Kha ku na m'thu wu, ngako a di sete vhinya ya kale, a navelako yi ya yiphya, nguko a khene: ‘Vhinya yo tshamba ngu yi ya kale.’ ”

Currently Selected:

Luka 5: BEC2016

Highlight

Copy