Luka 3

Kutxhumayela ka Johani Mubhabhatisi

(Matewu 3:1-12; Marku 1:1-8; Johani 1:19-28)

1Ngu dilembe da wugumi ni mtxhanu da kufuma ka Tibheriyo Khezari, na Ponsio Pilato i di mfumeli wa Judheya, Herodha i di mfumeli wa Galileya, Filipi mnanda wakwe i di mfumeli wa Itureya, ni wa ditiko da Trakonita, Lisaniya i di mfumeli wa Abhileni; 2se Anasi ni Kayifasi i di Vaphaxeli va hombe, Txizimu txi wombawombile ka Johani, mwana Zakariya, a nga ti txiwulani. 3Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasi kuve mana divalelo ya sionho; 4Nga ti ti nga bhaliswa tona dibhukuni ka mapswi a Mprofeti Isaya, a nga khene: “Dipswi da wule a kwangulako txiwulani di kha dona: Longisani nzila ya Mkoma, lulametani maphango akwe. 5Yotshe mikova yi na tatiselwa, ani yotshe mimango ni situnga si na khundumuselwa; se tinzila ta majikwa ti na lulametwa, ani tinzila ta sikhele ti na lulama; 6Votshe vathu va na wona kuhanyisa ka Txizimu.”

7 # Wona ni ka: Mat. 12:34; 23:33. Se a to gela mabutho a vathu va nga txi ta ku ta bhabhatiswa ngene, a txi khene: “Lixaka la timamba, mi layilwe ngu mani kuthava kuhenya ku kutako kani? 8#Wona ni ka: Joh. 8:33. Ngako i di toneto, humisani mihando yi yi kombisako kuhunduluka; mi nga thukeni mi alakanya mi txi khanu: ‘Hi ni tate, wathu Abrahamu’; nguko ni khani kwanu: Txizimu txi nga sikota kuhindula marigwi awa me maha vanana va Abrahamu. 9#Wona ni ka: Mat. 7:19. Kambe nzanga yi vekilwe ha mikolotini ka mindonga; mndonga wuhi ni wuhi wu si velekiko mihando ya yinene, wu na wilwa wu rinzwa mndiloni.”

10Mabutho a vathu ma ti mu wotisa ma txi khene: “Se nji txani hi fanelako ku txi maha kani?” 11Ene a to va xamula a txi khene: “Awule a ku ni mabhaji mambidi, a na abane ni wule a ku si nga ni da dimwedo; awule a ku ni sakudya a na mahe toneto nene.” 12#Wona ni ka: Luk. 7:29. Vasengisi ni vona va tile kasi ku ta bhabhatiswa, va ta mu gela ku kha vona: “M'gondisi, nji txani hi fanelako ku txi maha, kani?” 13Ene a to va xamula a txi khene: “Mi nga sengiseni simwani, hahanze ka sile mi nga sikelwa sona ngu mthetho.” 14Masotxhwa ni ona ma to mu wotisa ma txi kha ona: “Athu-ko, hi fanete kumaha txani, kani?” Ene a to xamula a txi khene: “Mi nga thumiseni wurena ka si i ku sa vane, mi nga mangaleleni m'thu hahanze ka mnandu, kambe tumelani kuenelelwa dwe ngu muholo wanu.”

15Ngako vathu va nga ti zumbile va txi rinzela ngu kuthemba timbiluni kwawe, ti to Johani i nga va i di ene Mesiya, 16ene Johani a to va gela votshe a txi khene: “Ani ni mi bhabhatisa ngu mati, aniko a na bwaka awule a ku ni mtamo kupinda ani, awule ani ni ku si nga ni fanelo ya kuthukunyula tingoti ta tikathula takwe; eyo a nata mi bhabhatisa ngu Moya wo Sawuleka ni mndilo. 17Manzani kwakwe ana ni txiselo txa kusangaya, a na hehera fulaho ya txithatheni kwakwe, e yi sengeleta mu txisangalani kwakwe. Se a na hisa maphumbu ngu mndilo wo mbi timeka.”

18Ngu sona siya ni simwani silayelo, Johani a ti txhumayela ka vathu Evhangeli. 19#Wona ni ka: Mat. 14:3-4; Mar. 6:17-18. Kambe, ngako mfumeli Herodha a di kawukilwe ngu Johani ngu timhaka ta Herodhiya, msikati wa Filipi, mwanawe, ni konaho ka totshe timwani to biha a nga ti maha, 20a to engetela, txitimwi ka totshe tiya, mhaka ya kusekela Johani mkorani.

Kubhabhatiswa ka Jesu

(Matewu 3:13-17; Marku 1:9-11)

21Mbimo yi vathu votshe va nga gwita kubhabhatiswa, ni mbimo yi Jesu a nga ti kukhongelani, ngu msana ka kuva a di bhabhatisilwe nene, nzuma yi to tuleka. 22Se Moya wo Sawuleka wu to txhika txitimwi kwakwe ngu txifaniso txa txituvane. Se dipswi da kuta ngu nzumani di to pfala, di txi kha dona:

“Awe u Mwanana wangu wo randeka ngutu; ni vekile kwako kotshe kutsaka kwangu.”

Lihunzu la Jesu

(Matewu 1:1-17)

23Jesu a ti lava kuva ni magumi mararu a malembe, mbimo yi a nga khata kugondisa; se ngu kudinganisa ka vathu, i ti mwana Josefa; mwana Heli; 24mwana Matate, mwana Levhi, mwana Meliki, mwana Janayi, mwana Josefa, 25mwana Matatiya, mwana Amosi, mwana Nahume, mwana Esili, mwana Nagayi, 26mwana Mahate, mwana Matatiya, mwana Semeyi, mwana Joseke, mwana Joda, 27mwana Jowanani, mwana Resa, mwana Zorobhabheli, mwana Salatieli, mwana Neri, 28mwana Meliki, mwana Adhi, mwana Kosana, mwana Elimadhana, mwana Heri, 29mwana Joxuwa, mwana Eleyazari, mwana Jorimu, mwana Matate, mwana Levhi, 30mwana Simiyoni, mwana Judha, mwana Josefa, mwana Jonamu, mwana Eliakimi, 31mwana Meleya, mwana Mena, mwana Matate, mwana Nathani, mwana Dhavhidha, 32mwana Jese, mwana Obhedhi, mwana Bhowazi, mwana Sala, mwana Naasoni, 33mwana Aminadhabhe, mwana Admini, mwana Arni, mwana Esroni, mwana Farezi, mwana Judha, 34mwana Jakobe, mwana Isaake, mwana Abrahamu, mwana Tara, mwana Nakori, 35mwana Serugi, mwana Ragawu, mwana Faleke mwana Ebheri, mwana Sala, 36mwana Kayinana, mwana Arifaxadhe, mwana Semi, mwana Nowa, mwana Lameki, 37mwana Metusela, mwana Enoki, mwana Jaredhi, mwana Mahalaleli, mwana Kayinana, 38mwana Enosi, mwana Sete, mwana Adhamu, mwana Txizimu.

Currently Selected:

Luka 3: BEC2016

Highlight

Copy