Johani 14

Jesu i nzila ya kuya ka Tate

1“Timbilu tanu ti nga karateke:

Kholwani ka Txizimu, mi txi kholwa ni kwangu. 2Mtini ka Tata ku ni makhalo amangi. Idiku i si nga toneto, nga ni di mi gete. Na tsula kuya mi lulamisela wukhalo. 3Se ni di tsute, ni txi ya mi lulamisela wukhalo, ni na wuya kambe, ni ta mi teka, mi ya zumba kumweko ni nani, kasiku, ahawa ni ku kona ani, mi txi va mi di konaho nanu. 4Se anu ma yi ziva nzila ya kuya hawa ni yako kona.”

5Tomasi a to womba kwakwe, a txi khene:

“Mkoma, athu kha hi kuzivi emo uyako kona; hi nga yi zivisa kutxani nzila kani?”

6Jesu a to mu gela a txi khene:

“Ani ngani Nzila, Ditshuri ni Wutomi. Kha nga ho awule a tako ka Tata, i si nga ngu ngani. 7Idiku anu mo ni ziva, nga mi ndi na m'ziva ni Tate wangu; kukhukhela ka konkuwa, ma m'ziva, kambe mi mu woni.”

8Filipi a to khene kwakwe:

“Mkoma, hi kombe Tate, ta hi dingana!”

9Jesu a to khene kwakwe:

“I kale ni di zumbile ni nanu, se khu se ni ziva kani Filipi?” Awule a ni wonako, a woni Tate. Se nji txani u txi khawe: “Hi kombe Tate kani?” 10Khu kholwi ti to ani ni ka Tata, ni ti to Tate a kwangu, kani?

Mapswi awa ni mi gelako, kha ni ma wombi ngu txangu dwe, aniko Tate a ku ni nani ngene a mahako mithumo yotshe. 11“Kholwani ti to ani ni ka Tata, ni Tate a kwangu. Ngako mi si kholwi ka dipswi dangu, kholwani ngu mhaka ya yona mithumo.” 12“Ngu ditshuri, ngu ditshuri na mi gela ku khani: Awule a kholwako kwangu, a na maha nene mithumo yi ani ni yi mahako, kambe a na maha mithumo ya hombe yo pinda yiya, nguko ani se na tsula ka Tata. 13Se sotshe si mi no kombela ngu ditina dangu, ni na si maha, kasiku Tate e dhumiswa ka Mwanana. 14Kungako mi txi kombela txo maha ngu ditina dangu, ni na txi maha.”

Jesu a thembisa Moya wo Sawuleka

15“Ngako mi txi ni randa, mi na veketa milayo yangu. 16Se ani ni na kombela ka Tata, ti to ene e mi rumela mmwani Mthaveleli, kasi e ta zumba ni nanu yotshe mbimo, 17i ku Moya wa ditshuri, awu ditiko di si sikotiko ku wu amukela, nguko kha di wu woni, kambe kha di wu zivi. Anu ma wu ziva, nguko wu zumba ni nanu, kambe wu mndani kwanu.”

18“Kha ni na mbi mi siya wusiwanani, ni na wuya ni ta zumba ni nanu. 19Msana ka txikhatianyana, ditiko kha di na mbi ni wona kambe, aniko anu mi na ni wona, nguko ani na hanya, ni nanu mi na hanya. 20Ka donedo ditshiku mi nata tiziva ti to ni ka Tate wangu, ni ti to anu mi kwangu, ani nani ni kwanu.

21Awule a nga amukela milayo yangu a txi yi veketa, eyo ngene a ni randako; se awule a ni randako, a na randwa ngu Tate wangu. Se nani ni na mu randa, kambe ni na ti wonekisa kwakwe.”

22Judha (i si nga ene Iskariyoti), a to khene:

“Mkoma, ti na mahisa kutxani kutiwonekisa kwathu, u si ti wonekisi ka ditiko, kani?”

23Jesu a to mu xamula, a txi khene:

“Ngako m'thu a txi ni randa, a na vekisa dipswi dangu. Tate wangu a na mu randa, se hi nata kwakwe, hi ta maha wugovelo wathu. 24Awule asi ni randiko, kha vekisi mapswi angu; kambe mapswi awa mi nga ma engisa, hi nga angu, nga Tate wu a nga ni ruma.”

25“Ni mi gete timhaka tiya, ni di ngadi kumweko ni nanu. 26Kambe Mthaveleli, i ku Moya wo Sawuleka, awu Tate a no mi rumela ngu ditina dangu, ene a nata mi gondisa sotshe simaha ni ku mi alakanyisa totshe ti ni khalako ku mi gela.”

27“Kudikha na kusiya kwanu, na mi ninga kudikha kwangu. Kha ni mi ningi kufana ni ti ditiko di ningisako tona. Mbilu yanu yi nga karateke, hambi ni kuthava. 28Mi ti engisile ati ni nga mi gela, ni txi khani: ‘Na tsula, aniko ni na wuya kwanu.’ Idiku ma ni randa, mi ndi na tsaka ngu kuwa ani ni tsulako ka Tata, nguko Tate mbwa hombe kupinda ani. 29Ni mi gete konkuwa, ti sanzi kumaheka, kasiku mi nata kholwa mbimo yi ti no maheka. 30Kha ni na mbi womba-womba to tala ni nanu, nguko awu a fumako, wa mafu awa wata. Kambe kha nga ni mtamo wa txilo txitimwi kwangu. 31Aniko ti maheka tiya, kasiku ditiko di txi tiziva ti to na mranda Tate, ni ti to ni mahisa ti ene Tate a nga ni leletisa tona.

Wukani, he khukheni hawa!”

Currently Selected:

Johani 14: BEC2016

Highlight

Copy