Johani 11

Kufa ka Lazaro

1 # Wona ni ka: Luk. 10:38-39. A ti ti ho m'thu wokari wa kulwala, a nga ti dhanwa ku i Lazaro, wa Bhetaniya, mkhokholani ka Mariya ni Marta, mwanawe. 2Mariya ngu wule a nga tota mafura Mkoma, e tshumela e bahulela mikondo yakwe ngu misisi yakwe. Lazaro, awu a nga ti lwala, i ti ndiyakwe. 3Tindiyakwe tiya, ngu tona ti nga rumela kuya gela Jesu, va txi kha vona: “Mkoma, awule u mu randako wa lwala.” 4Jesu a di engisile eto, a to khene: “Ewo wulwati hi nga wa kuyisa kufani, aniko mbwa ku na pfalisa Txizimu, kasiku Mwanana wa Txizimu e mana kudhumiswa ngu wona.”

5Jesu a ti ti mu randa Mariya ni mwanawe ni Lazaro. 6Hambi keto, mbimo yi a nga engisa ti to Lazaro wa lwala, a zumbile masiku mambidi ka wukhalo wule a nga ti ka wona. 7Ngu msana, a to khene ka vagondiswa vakwe: “A hi tsimbileni hi ya Judheya.” 8Vagondiswa va mgete va txi kha vona: “M'gondisi, konkuwa Vajudha va ti ti lava ku kubalisela ngu marigwi, se awe u lava kutshumela kambe u txi ya konkheyo, kani?” 9Jesu a to xamula, a txi khene: “Kasi ngu ditshiku kha ku nga ho digumi da sikhati ni simbidi, kani? Ngako m'thu a txi tsimbila ni mitshikari, kha humbwi, nguko wa wona liwoningo la ditikoni muwa. 10Aniko, ngako a txi tsimbila ni wusiku, wa humbwa, nguko kha nga ni liwoningo.”

11Msana ka kuva a di wombile eto, a to va gela, a txi khene: “Lazaro mngana wathu a otete: Ani ni yela kuya mu wusa.” 12Vagondiswa vakwe va nje kha vona: “Mkoma, i di kuotela a nga otela, a na hanya.” 13Kasi Jesu ngu ditshuri a ti ti womba ngu kufa ka Lazaro, aniko vona va to pimisa ti to a womba ngu kuotela wukohe wunene. 14Sekoko Jesu a to va gela ha kubasani, a txi khene: “Lazaro a fite. 15Aniko ngu kota yanu, ni tsakile akuwa ti nga maheka eto, ni si nga ho, kasiku anu mi txi ya kholwa. Kambe ahi tsuleni kwakwe.” 16Sekoko, Tomasi, awu a dhanwako ku i Dhidhimo, a to womba ka vagondiswa kulowe, a txi khene: “He tsimbileni nathu, hi na ya fa kumweko nayo!”

Jesu i kuwuka ni wutomi

17Mbimo yi a nga hoka, Jesu a to ya mana ti to Lazaro ana ni mune wa masiku a di diyivani. 18Bhetaniya i ti hafuhi ni Jerusalema txipimo txa mnava wa makilometru mararu. 19Vajudha vavangi va tile ka Marta ni Mariya, kasi kuya va thavelela, ngu mhaka ya kufa ka ndiyawe.

20A di engisile Marta ti to Jesu wata, a to mu hingeta; aniko Mariya a to sala a di khalahatshile nyumbani. 21Marta a to womba ka Jesu, a txi khene: “Mkoma, idiku awe u ti ti ho ahawa, ndiyangu nga a sa fa. 22Kambe na tiziva ni konkuwa ti to txihi ni txihi u no kombela ka Txizimu, txona Txizimu txi na kuninga.” 23Jesu a to khene: “Ndiyako a na wuka.” 24Marta e xamula a txi khene: “Na tiziva ti to a na wuka ka vafi ngu ditshiku do gwitisa.” 25Se Jesu a txi khene: “Ani ngani Kuwuka ni Wutomi; awule a kholwako kwangu, hambi a di fite, a na hanya. 26Ni wule a hanyako, na a txi kholwa kwangu, txima kha na mbi fa. Wa kholwa ka tona tiya kani?” 27Ene a to khene: “Ina, Mkoma, na kholwa ti to awe ngawe Mesiya, Mwanana wa Txizimu, awu a nga ti fanekela kuta ha ditikoni.”

28A di wombile tiya, a to khukha eya dhana mwanawe Mariya, a txi mu gela ngu malengo a txi khene: “M'gondisi a bwakile, wa kudhana.” 29A di engisile eto, a to kuluveta kukhukha, e tsula kwakwe. 30Jesu, a sanzi kuhoka m'tini, kambe a ti ngadi hale Marta a nga mu manela kona. 31Se Vajudha vale va nga ti tshanganile m'tini kwakwe Mariya, ku tela ku ta mu thavelela, mbimo yi va nga wona Mariya kukhukha ngu kukuluveta, a txi huma, va to mu londeta, va txi pimisa ti to a ya diyivani, kuya dilela kona ndiyakwe. 32Mbimo yi a nga hoka ahawa Jesu a nga ti kona, a txi mu wona, Mariya a to khizama minengeni kwakwe, a txi khene: “Mkoma, idiku awe u ti ti ho hawa, ndiyangu, nga a sa fa!” 33Se mbimo yi Jesu a nga wona Mariya kudila, kumweko ni Vajudha, va nga txi mlondisa, va txi dila ni vona, a to pfa kupandiseka ka hombe moyani kwakwe e karateka, se e va wotisa, 34a txi khene: “Ngu hani mi nga mu veka kona?” Vona va to mu xamula, va txi kha vona: “Mkoma, ngono u ta wona.” 35Jesu e dila. 36Konaho Vajudha va to womba, va txi kha vona: “Wonani ati a nga txi mu randisa tona!” 37Aniko vamwani va to womba, va txi kha vona: “Ene a nga tula maso a dibhofu, njani a nga mba sikota kuthindekisa lifo ka wuwa m'thu kani?”

38Jesu a to engeta kambe, e karateka mu mbiluni, se e tshuketela hafuhi ka diyiva. I ti diphala di nga ti fenengetilwe ngu dirigwi. 39Jesu a to khene: “Thavisani dirigwi.” Marta, ndiya mufi, a to angula, a txi khene: “Mkoma, ene se wa nunga, nguko i mune wa masiku na a di fite.” 40Jesu a to mu xamula, a txi khene: “Kasi kha na kugela tito, ku nga ti u txi kholwa, u na wona lidhumo la Txizimu, kani?” 41Ngu msana va to thavisa dirigwi da diyiva, se Jesu e gula maso akwe, e wona nzumani, a txi khene: “Tata, na ku bonga, nguko u ni engisile. 42Ani na tiziva ti to yotshe mbimo wa ni engisa, aniko ni wombile tiya, ngu mhaka ya dibutho di di nga tshangana hawa, kasiku ve kholwa ti to ngawe u nga ni ruma.” 43A di wombile tiya, a to kwangula ngu dipswi da hombe, a txi khene: “Lazaro, huma hahanze!” 44Se mufi a to huma, na a di tombetetwe manza akwe ni mikondo ngu tinguwo, ani khohe yakwe yi ti fenengetilwe ngu difadhuko. Jesu a to womba, a txi khene: “Mu thukunyuleni, mi mu leka e tsimbila.”

Txikungo txa kudaya Jesu

(Matewu 26:1-5; Marku 14:1-2; Luka 22:1-2)

45Konaho, Vajudha vavangi, va nga ti tile ka Mariya, ngako va di woni ati Jesu a nga ti maha, va to kholwa kwakwe. 46Aniko vamwani va to ya ka Vafarisi, veya va gela ti Jesu a nga ti maha.

47Se vaphaxeli va hombe ni Vafarisi va to tshangana, va txi kha vona: “Hi na maha txani ngu m'thu wuwa, eko a mahako sidiwukiso so tala, kani? 48Ngako hi txi mu lekisa toneto, votshe va na kholwa kwakwe, se varoma va na fuvisa Wukhalo wathu wo Sawuleka ni ditiko dathu.” 49Aniko mmweyo wawe, Kayifasi, awu i nga ti mphaxeli wa hombe dilembedo, a txi khene kwawe: “Anu kha mi zivi txilo. 50Kha mi ti woni ti to i mhaka yi yi vhunako anu, ngako m'thu mmweyo a txi fela ditiko, kupinda ti to ditiko dotshe di lova.” 51Ene kha womba tiya, na ti txi khukhela kwakwe apune, aniko, ngako i nga ti mphaxeli wa hombe ka dilembedo, a to profeta ti to Jesu a fanete kufela ditiko; 52Na i si nga kufela ditiko donari, aniko kumweko ni kusengeleta mpatanoni vanana va Txizimu, va nga hangalaka. 53Kukhukhela donedo ditshiku vona va to langana marindi kasiku m'daya. 54Ngu konaho, Jesu kha engeta e tsimbila kuwonekani hagari ka Vajudha. Kambe a to khukha koneho a tsula ka ditiko di di ku hafuhi ni txiwula, ka didhoropa di di dhanwako ku i Efrayime, eya zumba kona ni vagondiswa vakwe.

55Pasika ya Vajudha yi ti hafuhi, se vathu votala va to kwela veya Jerusalema, kuya ti basisa, na Pasika yi sanzi kuhoka. 56Va ti ti lava Jesu, ve wotisana, va di emile Dithepeleni, va txi kha vona: “Anu mi pimisa txani kani? Ina ene a nata m'busoni kani?” 57Aniko, vaphaxeli va hombe ni Vafarisi va ti leletile tito, awu a ku zivako mu a ku kona, e va zivisa, kasiku veya mu ñola.

Currently Selected:

Johani 11: BEC2016

Highlight

Copy