Genesisi 21

Kuvelekwa ka Isaake

1 Mkoma a to alakanya Sara, nga ti a nga womba, se e maha kwakwe ati a nga ti thembisile tona. 2#Wona ni ka: Vaheb. 11:11. Sara a to mana txirumbu ka Abrahamu na a ti kumbile, e veleka mwanana wa m'zambi, ka mbimo yi Txizimu txi nga ti thembisile. 3Mwanana wu a nga velekwa ngu Sara, Abrahamu a mrayile ditina daku i Isaake. 4#Wona ni ka: Gen. 17:12; Mith. 7:8. Abrahamu a to yisa wukwera mwanana wakwe Isaake mbimo yi a nga va ni mtxhanu wa masiku ni mararu, nga ti ti nga leletiswa tona ngu Txizimu. 5Abrahamu a ti ni tanga ya 100 wa malembe, mbimo yi Isaake mwanana wakwe a nga velekwa ngu Sara. 6Se Sara a to womba, a txi khene:

“Txizimu txi ni ningile kuseka, se votshe va va no yi engisa mhaka yiya, va na seka ni nani.”

7Sara a to ya masoni ngu kuwomba, a txi khene:

“I mani a nga ti womba ka Abrahamu ti to Sara a na mamisa mwanana kani? Aniko ni m'velekete mwanana wa m'zambi, kukumbani kwakwe.”

8Se mwanana a to kula, e lekiswa kumama; sekoko Abrahamu a to maha m'buso wa hombe, ka ditshiku di Isaake a nga lekiswa kumama.

Kututumiswa ka Hagari ni Ismayeli

9Ngako Sara a txi wona Ismayeli, mwana Hagari, Muegipta, awu a nga veleka ni Abrahamu, na a txi sakana ni Isaake mwanakwe 10#Wona ni ka: Vag. 4:29-30. a to womba ka Abrahamu, a txi khene:

“Tutumisa khumbiyo ni mwanana wa yona, nguko mwanana wa khumbi kha na kusikota kudya thomba ni Isaake, mwanana wangu.”

11Dipswi diya di to khuvekisa Abrahamu ngu mhaka ya Ismayeli, mwanana wakwe. 12#Wona ni ka: Var. 9:7; Vaheb. 11:18. Aniko Txizimu txi to kha txona ka Abrahamu:

“U nga pandiseke ngu mhaka ya mwanana wako, i mhaka ya txithumi txako: Awe maha totshe ti Sara a ku kombelako, nguko ka Isaake ku na huma liveleko li li no kulisa ditina dako. 13Aniko ngu ka mwanana wa txithumi, ani ni na tumbulukisa mfumo wa hombe, nguko nene mwanana wako.”

14Sekoko Abrahamu a to wuka ni mixo, e teka sakudya ni txibhembe txa mati e rweka Hagari, se a to m'belekisa mwanana, ngu msana a to mu humisa. Hagari a to huma e pepeseka mu txiwulani ka Bherisebha. 15Mbimo yi mati ma nga guma mu ka txibhembe, a to otelisa mwanana hahatshi ka dikhukhu. 16A to siya mwanana wakwe e tsimbila mnava wa mpimo wa kukhwinzwa ka lingove, a txi ya khalahatsha, nguko a ti ti khene: “Kha ni lavi kuwona mwanana wangu a txi fa.”

17Txizimu txi to engisa kudila ka mwanana, se Ngelozi ya Txizimu, yi di nzumani, yi to dhana Hagari yi txi kha yona:

“Njitxani u ku natxo awe Hagari kani? U nga thave, nguko Txizimu txi engisile kudila ka mwanana, txi di ka wukhalo wa txona. 18Khukha u txi ya teka txifanyana, u txi ñoleta ngu dianza dako, nguko ani ni na tumbulukisa ngu ka txona, ditiko da hombe.”

19Txizimu txi to tula maso a Hagari, se ene e wona txisima txa mati. A to ya reka mati e tata txibhembe, a txi ya ninga txifanyana txi sela.

20Txizimu txi ti kumweko ni mfana wule, ene a to kula a txi aka txiwulani, ahawa a nga ziva kufula ngu wulaho. 21Ene a to zumba txiwulani ka Parani, se mame wakwe a to mtekela msikati wa ditikoni ka Egipta.

Txitumelelano txa Abrahamu ni Abhimeleki

22 # Wona ni ka: Gen. 26:26. Se ku to maheka taku, ka yona yile mbimo, Abhimeleki ni Fikoli,#21:22 Mwendo: kmthangeli wa hombe wa yimbi. mthangeli wa dibutho dakwe da yimbi, e womba-womba ni Abrahamu, a txi khene:

“Txizimu txi ni nawe, ka totshe ti u ti mahako. 23Konkuwa, xambanya ngu Txizimu kwangu kona hawa, ti to khu na mbi womba makuhu, hambi ni mwanana wangu, mwendo mtukulu wangu; aniko u na thembeka kwangu ni ka dona ditiko diya u ku muwuyi ka dona, nga kule nani ni nga wona kuthembeka kwako.”

24Abrahamu a to khene: “Na xambanya.”

25Abrahamu a to sola Abhimeleki ngu mhaka ya txisima txiya sithumi Abhimeleki si nga ti m'honyote ngu txieyiso.

26Sekoko Abhimeleki a to mxamula, a txi khene:

“Ani kha ni tizivi ti to i mani a nga maha toneto; awe khwa ni gela timhaketo, hambi ku tipfa va txi womba, kha na tipfa kala nyamsi.”

27Abrahamu a to teka tinvuta ni tihomu e ninga Abhimeleki, se ngu wumbidi wawe va to maha txitumelelano. 28Abrahamu a to phawusa mtxhanu wa sinvutana ni simbidi sa mikati sa mtxhambi, e si veka ngu phuho. 29Abhimeleki a to wotisa ka Abrahamu, a txi khene:

“U phawusela txani sinvutana siya sa mtxhanu ni simbidi kani?”

30Abrahamu a to xamula a txi khene:

“Amukela sinvutana siya sa mtxhanu ni simbidi ni ku ningako ngu manza angu, kasiku si maha txikombiso txa ku ni fakazela ku ngani ni nga kela txisima txiya.”

31Ngu mhaka yeto wukhalo wule#21:31 Vaheb. Bheyeri-Sebha, ti wombako ku txisima txa txixambanyo. va to wu dhana ku i Bherisebha, nguko va xambanyile koneho ngu wumbidi wawe.

32Va to maha txitumelelano kona Bherisebha; Abhimeleki a to khukha, kumweko ni Fikoli, mthangeli ya dibutho dakwe da yimbi, ve tshumelela ditikoni ka Vafilista. 33Abrahamu a to phaya mndonga wa mtamargera, kona Bherisebha, se koneho a to dhumisa ditina da Mkoma Txizimu txo mbi na magwito. 34Abrahamu a zumbile malembe amangi ditikoni ka Vafilista.

Currently Selected:

Genesisi 21: BEC2016

Highlight

Copy