Mithumo 2

Kuta ka Moya wo Sawuleka

1Ku di hokile ditshiku da Pentekoste, vagondiswa va ti ti maneka votshe va di tshanganile wukhalo wumwewo. 2Ngu txidhukisa, ku to pfala txiwuta, txi txi ta ngu nzumani, txo fana ni kufuteta ka diphuho da txihuhuri txa mtamo, txi nga tata yotshe nyumba yi, va nga ti ka yona. 3Konaho va to wona so nga tidimi ta mndilo, ti nga huma ti txi abaneka, limwelo ni limwelo li txi ya khandama txitimwi ka mmweyo ni mmweyo wawe. 4Votshe va to tala ngu Moya wo Sawuleka, se va to khata kuwombawomba tidimi ta tiphya, nga tiya Moya wu nga txi va ninga kuwombawombisa tona.

5Aniko va ti ti ho Vajudha va va nga ti akile Jerusalema, i nga ti vathu va kukholwa, va kuta ngu ka yotshe mifumo, ayi yi kuho hahatshi ka nzuma. 6Txikhati txile va nga engisa diguwa dileya da txihuhuri, vathu va to sengeletana wukhalo wumwewo, ve tala ngu kuxamala, nguko mmwani ni mmwani a ti ti va engisa va txi womba-womba ngu lidimi la ka kwawe. 7Se votshe ve diwuka ni kuxamala, va txi kha vona: “Vona vathu va va wombawombako, ina hi nga va Galileya votshe kani? 8Se ti mahisa kutxani ti to mmwani ni mmwani wa ka kwathu e va engisa va txi womba-womba ngu lidimi li hi nga velekwa ka lona kani? 9Vaparta, Vamedhi, Vaelamita, vaaki va Mesopotamiya va kuhuma Judheya ni Kapadhokiya, va Ponto ni Aziya, 10va kuhuma Frigiya ni Panfiliya ni Egipta, ni va matiko a Libhiya, hafuhi ni Kirene, vawuyi va Roma, 11Vajudha ni Valondeteli vawe mlayoni ka txijudha, va Kreta ni va Arabhiya, hotshe ha va engisa va txi huwelela ngu tidimi tathu, sixamaliso sa Txizimu!” 12Votshe va to dhuka ve tshumela ve xamala, ve wotisana, va txi kha vona: “Ti womba txani tiya kani?” 13Aniko vamwani va to va seka, va txi kha vona: “Va levile ngu vhinya yo lombela.”

Kugondisa ka Pedro ngu ditshiku da Pentekoste

14Kambe Pedro a to ema ni va va Digumi ni mmweyo, e guleta dipswi, e va gela, a txi khene: “Vavamna va Judheya, ni nanu motshenu vaaki va Jerusalema, ti ziveni ta tinene timhaka tiya, mi engisa kha kwati mapswi angu: 15Vathu vava kha va leva, nga ti mi pimisako tona, nguko i ngadi txikhati txa wutxhanu ni mune txa mixo, 16kambe i mhaka yi, yi nga wombwa ngu mprofeti Joyeli, a txi khene:

17‘Ngu masiku a magwito, kha Txizimu,

ni na thela txitimwi ka votshe vathu, Moya wangu;

vanana vanu va mazambi ni vamahorana va na profeta,

vavaphya vanu va na wona siwoniso; ni sikosana

sanu si na lora miloro.

18Ina, ka ona masiku ale,

ni na thela Moya wangu txitimwi ka sithumi sangu sa

vavamna ni vavasikati, se va na profeta.

19Ni na maha sixamaliso txitimwi, nzumani ni sikombiso hahatshi mafuni;

mnoha, mndilo ni kutuvika ka wutshi.

20Ditambo di na hinduka di maha txidema,

mtxima wu na hinduka wu maha mnoha

di sinzi kuhoka ditshiku da Mkoma, ditshiku da hombe do tala ngu wudhumo.

21Se wuhi ni wuhi a no khongela ngu ditina da Mkoma, a na huluka.’ ”

22“Anu vavamna va ka Israyeli, engisani mapswi awa: Jesu wa Nazareta, i ku m'thu wu a nga fakazelwa ngu Txizimu hagari kwanu ngu mithumo ya mtamo ni sidiwukiso ni sikombiso si Txizimu txi nga si maha hagari kwanu ngu ngene, kota nga ti mi ti zivako. 23#Wona ni ka: Mat. 27:35; Mar. 15:24; Luk. 23:33; Joh. 19:18. Ngene wu a nga ningelwa mtamoni kwanu ngu txikungo txa kutsana ni wuzivi wa Txizimu. Se anu mi mu date ngu ku mu gogotela ha txihambanoni ngu manza a vathu va i ku sindaka-milayo. 24Aniko Txizimu txi mwusile ngu ka vo fa, txi txi m'hulukisa ka sixaniso sa lifo, ngako ti nga ti si koteki ti to e zumba a di ñotwe ngu lifo. 25#Wona ni ka: Mas. 16:8-11 (LXX). Dhavhidha a wombawombile ngu ngene, a txi khene:

‘Ani ni ti mu wona Mkoma yotshe mbimo masoni kwangu,

nguko ene a ti txineneni kwangu, kasiku ni si

dekadekiswi ngu txilo.

26Ngu kota yeto, mbilu yangu ya tsaka ni lidimi langu la nengela

hambi mmidi wangu ni wona wu na zumba wu di ni txithembo,

27nguko khu na mbi tshotsha moya wangu wukhaloni ka vafi,

kambe khu na mbi tumetisa msawuleki wako e wona kusina.

28Awe u ni ningile kuziva tinzila ta wutomi,

u na ni khurisa ngu litsako masoni kwako.’ ”

29“Vanathu, ni nga tsanisa ni mi gela ti to nyampande Dhavhidha a fite e tshotshwa, se diyiva dakwe di maneka hagari kwathu ni kona nyamsi. 30Kambe aku i nga ti mprofeti, a ti tiziva ti to Txizimu txi mu thembisile ngu kuxambanya, ku a na fumisa ha txikhaloni kwakwe ka wukoma, mmweyo wa lixaka lakwe. 31Ngu konaho, ene a songolete ku ti wona e va e zivisa ta kuwuka ka Kristu, a txi khene: ‘Moya wakwe kha wa lekwa amu wukhaloni ka vafi, hambi mmidi wakwe kha wa ziva kusina.’ 32Se ngene Jesu wu Txizimu txi nga mu wusa; hotshethu hi tifakazi ta mhaka yiya. 33Se ngako a di guletilwe ngu diwoko da txinene da Txizimu, Jesu a amukete ka Tate txithembiso txa Moya wo Sawuleka, awu a nga wu rumela, nga ti mi ti wonako ni ku tiengisa. 34#Wona ni ka: Mas. 110:1. Nguko Dhavhidha kha kwela nzumani, aniko ngene a nga womba ku khene:

‘Mkoma a wombile ka Mkoma wangu, a txi khene:

Khalahatsha ngu txineneni kwangu,

35kala kuza ni khozisa valala vako

ni va maha txikhigelo txa mikondo yako.’ ”

36“Ngu konaho, ta laveka ti to yotshe nyumba ya Israyeli yi tiziva ngu ditshuri da kutsana timhaka tiya: Txizimu txi mwusile Mkoma ni Mesiya, ene Jesu Kristu wu anu mi nga mu gogotela ha txihambanoni.”

37Ngako vona va di engisile mapswi awa, va to pfa kutholwa timbiluni kwawe. Se ve wotisa ka Pedro ni ka vamwanyani Vapostoli, va txi kha vona: “Vanathu, nji txani hi fanelako kumaha kani?” 38Pedro a to va xamula, a txi khene: “Hundulukani, se mmwani ni mmwani a na kombele kubhabhatiswa ngu ditina da Jesu Kristu, kasiku e mana kudivalelwa sionho. Ti di mahile eto, mi na amukela txihiwa i ku Moya wo Sawuleka. 39Nguko awule a nga thembiswa a lumba anu ni vanana vanu, ni vale va ku kule, votshe vale va no dhanwa ngu Mkoma, Txizimu txathu.” 40Pedro a to tsanisa wufakazi wakwe ngu mamwani mapswi amangi, a txi va laya, a txi khene: “Hambanani ni liveleko liya lo gombonyeka.” 41Se avale va nga amukela mapswi akwe, va to bhabhatiswa ka dona ditshiku dile, ve amukelwa ngu vagondiswa mndani ka Dibanza, 3.000 wa vathu.

Mahanyelo a msengeletano wo khata wa Makristu

42Vona va ti ti khutalela kugondiswa ngu Vapostoli, ni mitshangano ya wukholwa ni kubhandelana ka dipawu ni kumaha mikombelo. 43Votshe vathu va txi telwa ngu kuthava ngu kuwona sidiwukiso ni sixamaliso si si nga txi mahwa ngu Vapostoli. 44#Wona ni ka: Mith. 4:32-35. Otshe makholwa ma ti hanya ngu kuengisana, va txi patana ka sotshe simaha si va nga ti naso. 45Va ti xavisa mipeto yawe ni simaha sawe, ve teka male va txi avela sisiwana, kota nga kupwata ka m'thu ni m'thu. 46Ditshiku ni ditshiku va txi khutala kuya tshangana ngu mbilu yimweyo Dithepeleni, va txi bhandelana dipawu mitini kwawe, va txi dya sakudya ngu kutsaka ni kubasa ka mbilu. 47Va txi dhumisa Txizimu, na va txi thembeka ka votshe vathu. Se ditshiku ni ditshiku, Mkoma a ti ti engetela mtengo wa vale va nga txi wulela nzilani ka kuhanyiswa.

Currently Selected:

Mithumo 2: BEC2016

Highlight

Copy