Mithumo 12

Kudawa ka Jakobe ni kukhotelwa ka Pedro

1Ka yona yile mbimo, mfumeli Herodha a to khata kuxanisa vathu vokari va Dibanza. 2Se a to daya Jakobe, mwanawe Johani, ngu ditxhari. 3Ngako a txi wona ti to ti tsakisile Vajudha, a to engeta e ñola ni Pedro; i ti masiku a mapawu o mbi na mtshumbelo. 4#Wona ni ka: Eks. 12:1-27. Ngako a di mu ñote e mu beta mkorani, a to mningela e woneletwa ngu mune wa mitxawa, ayiya wumwewo ni wumwewo ka yona wu nga ti ni mune wa masotxhwa. A ti navela ku mu humisa masoni ka vathu, ngako Pasika yi di pindile. 5Mbimo yi Pedro a nga ti seketwe mkorani, Dibanza di ti si humuli ku mu khongelela ka Txizimu.

Pedro ngako a txi humiswa mkorani

6Ku ti ngako Herodha a txi pimisa ku mu humisa masoni ka vathu, ni wusiku wa kona Pedro a ti otete hagari ka masotxhwa mambidi, na a di sungilwe ngu titxhini timbidi, na kambe ha txikeni ka mkora ku ti ni vawoneleti. 7Kunukunuko Ngelozi ya Mkoma yi to woneka, se kukhanya ku txi woninga nyumbani. Se ngelozi yi to gwesa Pedro, ha didhawa, yi mu wusa yi txi kha yona: “Kuluveta u txi khukha!” Se titxhini ti nje kuwa ngu manzani kwakwe.

8Ngelozi yi to m'gela, yi txi kha yona:

“Ti sunge libhande txiwununi, u txi ambala masandazi ako.”

Se ene a to maha toneto. Ngelozi yi to engeta yi txi kha yona:

“Fenengela nguwo yako, u txi ni londisa.”

9Pedro a to huma e yi londisa, na asi ti pimi ti to mwendo hakunene ditshuri ati ti mahwako ngu ngelozi; a ti alakanya ti to txi nga va i di txiwoniso. 10Se va to pinda mtxawa wo khata wa vawoneleti, ni wa wumbidi, ve hoka ka txike txa ditimba da simbi, atxi txi yisako didhoropani. Ditimba da kona di to tuleka dipune. Va to huma ve tsimbila mnavanyana wa nzila, se kunukunuko ngelozi yi to khukha yi mu siya Pedro. 11Se ene, ngako a di ambulukile, a to khene: “Konkuwa se na tiziva ngu ditshuri ti to Mkoma a rumete ngelozi yakwe yi ta ni hulukisa manzani ka Herodha ni kuwonelelani ka dibutho da Vajudha.”

12Se ngako ma di wuyile mapimo akwe, Pedro a to ya m'tini ka Mariya, mame wa Johani, awu a dhanwako ku i Marku, ahawa makholwa o talanyana ma nga ti sengeletani kona, ma txi khongela. 13Ngako Pedro a txi gogota ditimba da diguma, kutota txithumi txa dihorana, atxi va ku i Rodha, txi ta mu engisa. 14Rodha a to di ziva dipswi da Pedro, se ngu kutsaka, a to leka kutula ditimba e tutumela kuya va gela ti to Pedro waho hahanze, ha txikeni. 15Aniko vona va ti kha vona kwakwe:

“Awe u ni mawudi, mwananawe!”

Kambe ene a to tsanisa a txi nditshuri.

Se va txi mu gela ku kha vona:

“I ngelozi yakwe!”

16Pedro ene a ti ya masoni ngu kugogota ditimba. Se va di tute, va to mu vona ti to ngene, ve xamala ngutu. 17Kambe ene a to maha txikombiso ngu diwoko, kasiku ve malala; msana keto, a to va txhamusela ati Mkoma a nga m'humisisa tona ngu mkorani, e engeta, a txi khene:

“Zivisani Jakobe ni vanathu timhaketo.” Se a to huma e tsula ka wumwani wukhalo.

18Ngako di di txite, dizunga da hombe di to humelela hagari ka masotxhwa, ti to Pedro a mahisile kutxani. 19Herodha a di rumete ku mu lava, va to mu pwata. Se a di rumete kuthethisa masotxhwa a kuwoneleta, a to leleta kumana dawe.

Se Herodha a to khukha Judheya e kwitima Khezareya eya zumba kona.

Kufa ka Herodha

20Herodha a ti ni txiviti ni vathu va Tiro ni Sidhoni, kambe vona va to langana ve ta kwakwe. Se ku ti ngako va di engisani ni Blasto mthangeli wa hombe wa mfumeli, va to kombela kudikha ka ditiko, nguko ditiko dawe di ti tshunzela ditikoni ka mfumeli. 21Se ngu ditshiku di di nga sawulwa, Herodha a to ambala dibhaji da wukoma, e khalahatsha ha txikhaloni kwakwe ka wukoma, e womba-womba navo. 22Se vathu ve kwangula, va txi kha vona:

“Dipswi diya nda Txizimu, hi nga da m'thu!”

23Kambe kunukunuko, Ngelozi ya Mkoma yi to peka Herodha, nguko kha dhumisa Txizimu. Se a to dyiwa ngu timbungu, efa.

24Kambe dipswi da Mkoma di ti anda di hangalaka ngutu.

25Se Bharnabhasi ni Sawule, ngako va di hetile mthumo wawe, va to khukha Jerusalema, na va di ni Johani, awu a dhanwako ku i Marku.

Currently Selected:

Mithumo 12: BEC2016

Highlight

Copy