Mithumo 10

Pedro ni Korneliyo

1A ti ti ho didhoropani ka Khezareya m'thu wu a nga ti dhanwa ku i Korneliyo, awu i nga ti mthangeli wa dizana, ka txikwata txi txi dhanwako ku i “Italiya.” 2I ti m'thu wa wukhongeli ni txithavo ka Txizimu kumweko ni wotshe mwaya wakwe. A ti vhuna ngutu sisiwana sa ditiko, a txi khongela ka Txizimu yotshe mbimo. 3Ka ditshiku dokari a to wona txiwoniso ngu txikhati txo lava kuva txa wutxhanu ni mune; a to wona ta tinene Ngelozi ya Txizimu, yi txi mu tela, yi ta mu gela, yi txi kha yona:

“Korneliyo!”

4Ene ngako a di yi woni a to dhuka ngu kuthava, a txi khene:

“Nji txani txi kuho, kani Mkoma kani?”

Ngelozi yi txi kwakwe:

“Mikombelo yako ni wuha wako si hokile ka Txizimu, se txona txi ku alakanyile. 5Konkuwa rumela vavamna aniya Jopa, veya dhana Simoni, awu dimwani ditina i ku Pedro. 6Ene a endete ka nyumba ya wu va ku i Simoni mtxhuki wa madhowo, awu nyumba yakwe yi ku hafuhi ni linene.”

7Ku ti ngako yi di khukhile ngelozi yi yi nga womba-womba nayo, Korneliyo a to dhana sithumi sakwe sa simbidi, kumweko ni disotxhwa di i nga ti mkhongeli hagari ka mamwani masotxhwa awa ma mu thumelako; 8a to va leleta votshe timhaka, e va ruma kuya Jopa.

9Mangwanani ka kona, ngako va di ngadi hanzila, na va di hafuhi ni didhoropa, Pedro a to kwela txitimwi ka nyumba eya khongela kona; kutilava kuva txikhati txa dhina.#10:9 Dhina: Mitshikari ya kuva ditambo di ti hagari. 10Se a to pfa nzala e lava kudya, ku ti ngako va di ngadi va txi mu longisela sakudya, a to wona txiwoniso. 11A to wona nzuma yi di tulekile, ni txiya txo fana ni nguwo ya hombe, txi di sungilwe ngu ka mune wa misulo, txi txhikela ha mafuni. 12Mndani ka txona ku ti ni sotshe sihari sa mune wa minenge, ni so tsimbila ngu mrumbu ni sinyana sa nzuma. 13Se ku to pfala dipswi kwakwe, di txi kha dona:

“Pedro, khukha u txi ema! Daya u txi dya!”

14Kambe Pedro a txi khene:

“Txima kha ni na mbi dya, Mkoma! Nguko kukhukhela wutomini kwangu, kha ni dyi txilo txi txi yilako ni txi txi nga mbi basa.”

15Dipswi di to engeta di txi womba kwakwe, di txi kha dona:

“Silo si Txizimu txi nga si basisa, u nga wombe ti to sa yila.”

16Toneto ti wuyetilwe kuraru, se txiya txile txi tshumela txi kwetwa nzumani.

17Pedro a di ngadi a txi alakanyela mapimoni kwakwe ti to txi womba txani txiwoniso txiya, ku to bwaka vavamna va va nga rumwa ngu Korneliyo, ve wotisa nyumba ya Simoni, va di emile ha txikeni. 18Vona va to dhana vathu, ve va wotisa tito:

Ina Simoni wu va ku i Pedro a endete kona hale kani?

19Pedro a ti ngadi e alakanyela txiwoniso txile, se Moya wu txi kwakwe:

“Wona, vavamna va vavararu va kulava. 20Khukha u txi ema, u txhika u txi tsula navo, u nga kanakane, nguko ngani ni nga va ruma.”

21Se Pedro a to txhika e va yela, a txi ya khene:

“Ngani awu mi mlavako. Nji txani txi mi tisako kani?”

22Vona va to xamula, va txi kha vona:

“Korneliyo, mthangeli wa dizana, awu i ku wamwamna wo lulama, a di ni txithavo ka Txizimu, awu a dhumiswako ngu dotshe ditiko da Judha, a leletilwe ngu ngelozi ya kusawuleka ya Txizimu, ku ta kudhana u ya m'tini kwakwe, kasi kuya engisa ti u no ya mu gela tona.”

23Sekoko Pedro a to va dhana ve wulela nyumbani e va ninga wukhalo. Ni mixo, Pedro a to khukha e tsula navo, kumweko ni vanawe vokari va Jopa. 24Ka ditshiku di di londetako, a to wulela Khezareya. Korneliyo a ti va rinzete, a di dhani maxaka akwe ni vangana vakwe vo randeka. 25Ngu mbimo yi Pedro a nga ti ti wulela m'tini ka Korneliyo, ene a to mu hingeta, a txi bwaka a txi khizama masoni kwakwe, a txi mu khozela. 26Pedro a to mkhukhisa, a txi khene kwakwe:

“Khukha u txi ema, nguko nanani ni m'thu wo fana ni nawe.”

27Se a to wulela nayo, na va txi bhula votshe; se eya mana vathu vo tala na va di sengeletani nyumbani. 28Se a txi khene kwawe:

“Ma tiziva ti to ta yila ngutu ka Mujudha kutshangana ni vamatiko hambi ku va endela. Kambe Txizimu txi ni kombisile ti to ni si thuki ni womba ku m'thu wa yila, hambi ku ana ni nzambwa. 29Ngu konaho, neti ni nga dhanwa, ni tile, ni si kanakani; se konkuwa, na mi wotisa mhaka yi mi nga ni dhanela yona.”

30Se Korneliyo a to xamula, a txi khene:

“Kupindile masiku mararu kala konkuwa, ni ti maneka ni txi khongela nyumbani kwangu, ngu txikhati txa wutxhanu ni mune. Konako ni to wona m'thu a di emile masoni kwangu, na a di ambate tinguwo to phatima, a txi khene: 31‘Korneliyo, mikombelo yako yi engisilwe, ni wuha wako wu hokile masoni ka Txizimu, wu ya maha txikhumbukiso ka txona. 32Rumela vathu Jopa, veya dhana Simoni, awu dimwani ditina i ku Pedro, a endete nyumbani ka Simoni, mtxhuki wa madhowo, hafuhi ni linene.’ 33Ngu konaho ni nga kuluveta kuruma vathu va ta kudhana. Se u tshambisile u nga ta. Konkuwa hi maneka hawa hotshethu masoni kwako, kasi kuengisa totshe ti Txizimu txi nga kuleleta tona.”

Kutxhamusela ka Pedro

34 # Wona ni ka: Dhewut. 10:17. Konaho Pedro a to khata kuwombawomba, a txi khene: “Kha ditshuri se na ti wona ti to Txizimu kha txi khedhi m'thu. 35Kambe ka dihi ni dihi ditiko, awule a txi thavako ni kumaha to lulama wa sikota kuamukelwa ngu txona. 36Ngu yoneyo mhaka Txizimu txi nga yi rumela ka vanana va ka Israyeli, txi nga va txhumayela mahungu a maphya a kuthutha, ngu Jesu Kristu, i ku Mkoma wa votshelele. 37Anu ma tiziva ti ti nga maheka ka dotshe ditiko da Judheya, kukhukhela Galileya, msana ka kubhabhatiswa kuwa ku nga txhumayelwa ngu Johani; 38ti to Txizimu txi totile ngu Moya wo Sawuleka ni kutsanisa Jesu wa Nazareta; awu a nga tsimbila a txi maha ta tinene, e hanyisa votshe vale va nga ti xaniswa ngu Sathani, nguko Txizimu txi ti ni nene. 39Athu hi tifakazi ta yotshe mithumo yi a nga yi maha ditikoni ka Vajudha, didhoropani ka Jerusalema. Vona kambe va mu date ngu ku mu hayeka ha phandeni. 40Se Txizimu txi mwusile ka vakufa, txi txi mninga mtamo wa kutiwonekisa, 41i si nga ka votshe vathu, aniko ka tifakazi ti ti nga sawulwa ngu kale ngu txona Txizimu: I ku athu hi nga dya, hi txi sela kumweko nayo, msana ka kuva a di wukile ngu ka vofa. 42Ene kambe a hi rumete kutxhumayela ka votshe vathu ni kufakaza ti to ene a vekilwe ngu Txizimu kumaha mlamuli wa vohanya ni vakufa. 43Ngene wu va mu fakazelako votshe vaprofeti, ti to wuhi ni wuhi a kholwako kwakwe, a na amukela divalelo ya sionho ngu mtamo wa ditina dakwe.”

Vamatiko va txi amukela Moya wo Sawuleka

44Na Pedro a di ngadi a txi womba-womba, Moya wo Sawuleka wu to txhika txitimwi ka vale va nga txi engisa mapswi awa. 45Se otshe makholwa a lixaka la vale va nga ti londetela mlayo wa wukwera, va nga ti tile kumweko ni Pedro, va to xamala ngu kuwona Moya wo Sawuleka wu txi amukelwa ngu vamatiko ni vona. 46Kha ditshuri, va ti va engisa va txi womba-womba tidimi to tala, na va txi dhumisa Txizimu. 47Konaho Pedro a to khene: “I mani a no sikota kulambela mati a txibhabhatiso ava va nga amukela Moya wo Sawuleka, kufana ni nathu, kani?” 48Ti di mahile-to, Pedro a to rumela ti to ve bhabhatiswa ngu ditina da Jesu Kristu. Se vona va to kombela ti to e zumba navo masiku okari.

Currently Selected:

Mithumo 10: BEC2016

Highlight

Copy