ELONG MARAJA 8
8
1Ah, ébara'na iko silessurekku,
iya puraé susu ri indo'ku,
pasti ubauko rékko uruntu'ko ri lalengngé,
dé'gaga matu pakatunaka.
2Utiwiko matu ri bolana indo'ku,
kuwammengngi mulléi pagguruka.
Upainukko matu anggoro mabau,
sibawa uwai buwa dalima.
3Lima abéyomu tula'ka,
lima ataummu kaddaoka.
4Ajjancino, éh ana'-ana'dara Yérusalém,
makkedaé dé' mumaélo ganggui cintaé,
narapi ripésennangi.
Elong Maennengngé
Makkunrai-makkunraié
5Niga iyaro polé ri padang kessi'é,
sanré ri canrinna?
Makkunraié
Utedduko ri yawana pong apel-é,
onrommu ritampu sibawa rijajiyang.
6Pancajika buwa atimmu,
aja' mukaddaowi muwi niga ri lainnaé iyya;
nasaba iyaro cintaé padai watanna amaténgngé,
sibawa makuwasai napessué pada-pada amaténgngé.
Luwa'na pada-padai luwa apié
iya mallalatungngé sibawa masero.
7Uwai iya maégaé dé' naulléi peddéiwi cintaé,
sibawa lémpe'é dé' naulléi malirengngi.
Rékko séddié tau mabbéréyangngi sininna waramparanna
untu' melliwi cinta,
pasti banna pappakatuna iya nalolongengngé.
Ana'-ana'buranéna makkunraié
8Mappunnaiki séddi anri makkunrai
iya baiccu'é mupa susunna.
Aga harusu' tapogau' untu' aléna
rékko engka polé lettukiwi?
9Ebara'na séddiwi témbo',
patettokki matu manara péra' ri tompo'na.
Ebara'na séddiwi pintu gerbang,
maéloki cala'i sibawa aju camara.
Makkunraié
10Iyya'é séddika témbo',
sibawa susukku manarana.
Naisseng canrikku makkedaé ri aléna
masennakka.
Worowané
11Mappunnaiwi Salomo palla anggoro ri Baal-Hamon;
iyaro palla'é nabbéréyanni lao risining panganrowangngé.
Tungke'-tungke' mpajai sisebbu dowi péra' untu' wassélé'na,
12sibawa lolongeng duwaratu untu' turuppuse'na.
Leppessanni iyaro dowié untu' alému, Salomo,
sibawa untu' sining panganrowang palla'mu.
Iyakiya palla anggoro'ku, appunnangeng ri aléku,
engkai ri yoloku.
13Eh, monroiyéngngi palla'é,
macinnai silao-silaongngé méngkalingai saddammu;
paréngkalinganni iyaro ri aléku!
Makkunraié
14Canrikku, poléno pada-pada jongaé,
pada-pada ana' jongaé ri buluna Béter.
Currently Selected:
ELONG MARAJA 8: LAIBUG
Highlight
Share
Copy
Want to have your highlights saved across all your devices? Sign up or sign in
