ELONG MARAJA 6
6
Makkunrai-makkunraié
1Kégi lao canrimmu,
éh ana'dara iya kaminang magelloé?
Kégai lao canrimmu,
kuwammengngi tamaccowé sappai?
Makkunraié
2Laowi canrikku ri palla'na,
ri palla rampa-rampaé
untu' mampii sining bimbala'na ri palla'é,
sibawa céppu bunga-bunga bakung.
3Appunnangennaka canrikku, sibawa aléna appunnangekku,
mampi bimbala-bimbala
ri tengngana bunga-bunga bakungngé.
Elong Malimaé
Worowané
4Makessikko, macennikku,
sikkessikko kota Yérusalém,
siggello kota Tirza.
Mappabengnga senna'ko,
pada-pada pasukang tentaraé sibawa bandéra-bandérana.
5Pagilinni tappamu polé ri iyya,
saba' pakkitammu nalippuika.
Gemme'mu pada-padai bémbé makkonrongngé
iya turungiyéngngi bulu-bulu Giléad.
6Maputé isimmu pada-pada bimbala makkonrongngé
iya silalonaé ricukkuru sibawa ricemméi;
mappasangeng pada-pada ana'-ana' bimbala dénrué,
dé' muwi séddi iya teddéngngé.
7Rupammu pada-padai buwa dalima sipuwé'é,
massubbu ri lalenna bowommu.
8Namuni engka enneng pulona permaisuri,
sibawa aruwa pulona gundi,
enrengngé maéga senna ana'dara,
9iyakiya banna séddi jangang-jangakku, usénge'é,
ana' tungke' napojiyé indo'na.
Naitai ana'-ana'daraé sibawa pojiwi,
sining permaisurié sibawa gundi'é bengngariwi.
10Niga iya polé samanna élé masiya'é,
siggello kéteng tépué, siccakka mata essoé?
Mappamennye senna,
pada-pada pasukang tentaraé sibawa bandéra-bandérana.
11Laoka ri palla kenarié,
mitai bunga-bunga dé'éppa natabbakka ri lompo'é;
naullé pong anggoro'é engkana uce'na,
sibawa pong dalimaé engkana unganna.
12Uwuddaningi senna'i cintamu,
pada-pada uwuddaninginna ménré'é karéta musu
silaong sining arungngé.
Makkunrai-makkunraié
13Séré-séréno, éh ana'dara Sulam,
accenné-cennéno, kuwammengngi bengngaki.
Makkunraié
Magi mumacinna mitaka,
naséré-séréka ri tengngana barisi'na pakkita-itaé?
Currently Selected:
ELONG MARAJA 6: LAIBUG
Highlight
Share
Copy
Want to have your highlights saved across all your devices? Sign up or sign in
