KAJAJIYANG 30

1Iyakiya Rahél dé'pa nalolongeng ana'. Rimakkuwannanaro mangémpuruni lao ri kakana, nainappa makkeda lao ri Yakub, “Wérékka ana', rékko dé', matéka matu.”

2Macaini Yakub lao ri Rahél sibawa makkeda, “Tenniyaka Allataala. Aléna ritu mébbuko dé' mulolongeng ana'.”

3Nanakkeda Rahél, “Iyaé atakku Bilha; lusérenni kuwammengngi namémmana. Nanallalengiwi weddikka mancaji indo' naolai aléna.” 4Nanabbéréyanni Bilha lao ri lakkainna, na Yakub nalusérenni iyaro ataé. 5Mattampu'ni Bilha nanajajiyang séddi ana' worowané. 6Makkedani Rahél, “Purani mangadélé Allataala untu' apentingekku. Naéngkalingai sempajakku nanawérékka séddi ana' worowané.” Nanasenni iyaro ana'é Dan.#Dan: Iyaé asengngé oninna pada-pada ada Ibrani iya bettuwanna “mangadéléki”. 7Mattampu'si Bilha nanajajiyang séddi ana' worowané. 8Adanna Rahél, “Purana' mattonget-tongeng méwai kakaku, naupakala,” rimakkuwannanaro nasenni iyaro ana'é Naftali.#Naftali: Iyaé asengngé oninna pada-pada ada Ibrani iya bettuwanna “méwa”. 9Wettunna namaingeki Léa makkedaé dé'na naulléi lolongeng ana'na, nabbéréyanni atanna, iyanaritu Zilpa, lao ri Yakub untu' mancaji bainéna. 10Jajiyanni Zilpa séddi ana' worowané. 11Nakkeda Léa, “Maupe'na,” nanasenni iyaro ana'é Gad.#Gad: Iyaé asengngé ri laleng basa Ibrani bettuwanna “maupe”. 12Jajiyassi Zilpa séddi ana' worowané, 13nakkeda Léa, “Temmaka sennakku! Makkekkuwangngé sininna makkunraié makkedai matu masennakka.” Rimakkuwannanaro nasenni iyaro ana'é Asyer.#Asyer: Iyaé asengngé ri laleng basa Ibrani bettuwanna “masennang”.

14Ri wettu éngngalang gandongngé, laoni Rubén ri padangngé nanaruntu'na kuwaro sinrupa tanet-taneng pabbura,#Sinrupa tanet-taneng pabbura: Ri laleng basa Ibrani “dodayim”. Iyaé tanet-tanengngé riyangga'i mappunnai kasiya' naulléi pakacommokiwi parémmanangngé. nanatiwii lao ri Léa, indo'na. Makkedani Rahél lao ri Léa, “Wérékka céddé polé ri tanet-taneng pabbura iya naruntu'é ana'muro.”

15Nappébali Léa, “Dé'paga nagenne muwala lakkaikku? Makkekkuwangngé mala mucobasi malai tanet-taneng pabbura iya naruntu'é ana'ku.”

Nakkeda Rahél, “Rékko maéloko mabbéréyangngi tanet-taneng pabburana ana'muro lao ri iyya, weddikko matinro sibawa Yakub iya wenniéwé.”

16Wettunna Yakub lisu ri bolaé polé ri padangngé iyaro arawéngngé, riduppaini ri Léa sibawa makkeda, “Atinrono sibawa iyya iyaé wennié nasaba purani uwaja untu' iyaro sibawa tanet-taneng pabbura polé ri ana'ku.” Nanalusérenni Yakub iyaro wennié.

17Natarimai Allataala sempajanna Léa, namattampu nanajajiyang ana' iya malimaé. 18Nakkeda Léa, “Allataala pura mpérékka saro saba' purani uwabbéréyang Zilpa lao ri lakkaikku,” rimakkuwannanaro nasenni iyaro ana'é Isakhar.#Isakhar: Iyaé asengngé oninna pada-pada ada Ibrani iya bettuwanna “ata riséwa”, “engka saro”. 19Mattampu'si Léa nanajajiyangngi ana'na iya maennengngé. 20Adanna, “Nawérénna' Allataala hadiya iya makessing senna'é. Makkekkuwangngé napakalebbina' matu lakkaikku, saba' purani ujajiyang enneng ana' worowané,” rimakkuwannanaro nasenni iyaro ana'é Zébulon.#Zébulon: Iyaé asengngé oninna pada-pada ada Ibrani iya bettuwanna “mangke'i” sibawa “hadiya”. 21Purairo jajiyanni Léa séddi ana' makkunrai iya nasengngé Dina.

22Nariyéngngeranna Rahél ri Allataala; natarimai Allataala sempajanna nanapakkulléi jajiyang ana'. 23Namattampu'na Rahél nanajajiyang séddi ana' worowané. Nakkeda Rahél, “Napatteddénnni Allataala atunakku. 24Tennapodo Puwangnge mpérékka ana' worowané séddipa.” Rimakkuwannanaro nasenni iyaro ana'é Yusuf.#Yusuf: Iyaé asengngé oninna pada-pada ada Ibrani iya bettuwanna “mabbérési paimeng” sibawa “mappateddéngngi”.

Sitawa-tawana Yakub sibawa Laban

25Puranana Rahél najajiyang Yusuf, makkedani Yakub lao ri Laban, “Palalona lisu ri wanuwakku. 26Leppessanna lao tiwii iya duwa bainéku sibawa ana'-ana'ku. Ulolongengngi mennang sibawa majjama ri Uwwa. Naisseng Uwwa, purana majjama marejjing senna.”

27Nakkeda Laban lao ri aléna, “Engkalingai riyolo: Lolongekka pirasa' makkedaé nabarakkakika Puwangnge nasaba iko. 28Pau bawanni siyaga muwéllau.”

29Nappébali Yakub, “Aléta Uwwa missengngi purana majjama marejjing senna, natattamba maéga senna olokolo'na Uwwa nasaba pappiyaraku. 30Ri wettu dé'napa uwengka, waramparang appunnangenna Uwwa dé'pa nasiyaga, iyakiya makkekkuwangngé sugini Uwwa. Puwangnge barakkakiwi Uwwa nasaba iyya.#nasaba iyya iyaré'ga kégi-kégika lao.

Makkekkuwangngé wettunnana majjamaka untu' kaluwargaku muto.”

31Nakkeda Laban, “Jaji aga harusu uwérékko?”

Nappébali Yakub, “Aja'na Uwwa tabbéréyang aga-aga. Tette'ka maélo piyarai olokolo'na Uwwa, assaleng nasitujuiwi Uwwa tangngakué: 32Palaloka iya essoéwé joppa ri tengnga-tengngana sining bémbé bimbala'na Uwwa, sibawa malai tungke' ana' bimbala iya mabolongngé,#Séddi bettuwang mariyoloé tungke' ana' bimbala iya mabolongngé. Ibrani: tungke' ana' bimbala iya bellangngé sibawa betti-betti'é sibawa tungke' ana' bimbala iya mabolongngé. sibawato tungke' bémbé lolo iya bellangngé iyaré'ga betti-betti'é. Iyaro bawang saro uwacinnai. 33Magampannitu matu naisseng Uwwa rimunri malempuka'ga. Rékko poléi Uwwa untu' paréssai saroku, sibawa mitai engka bémbé iya dé'é nabbetti-betti iyaré'ga bellang, iyaré'ga bimbala iya dé'é namabolong, naissennitu Uwwa makkedaé uwénnauwi iyaro olokolo'é.”

34Nappébali Laban, “Situju! Tapogau'ni aga iya muwappétangngarengngéro!” 35Iyakiya iyaro essoé napassaranni Laban sininna bémbé lai iya mabbaloé iyaré'ga bellangngé sibawa sininna bémbé komba iya bellangngé, betti-betti'é, iyaré'ga iya engkaé puté-puténa; napassarang towi sininna bimbala iya mabolongngé. Nainappa nasuro ana'-ana'na parakaiwi iyaro olokolo'é, 36nanalaona mennang sibawa sining iyaro olokolo'é mabélaiwi Yakub, bélana tellungngesso allalengeng.

Lebbinna polé ri bémbé bimbala appunnangenna Laban napiyarani Yakub.

37Nanalana Yakub takké-takké iya manyilaé polé ri aju hawar-é, aju badangngé sibawa aju bérangngé, nanalopéi saisa olina angkanna mancaji bellab-bellang. 38Napaléssoni iyaro takké-takké ri yolona sining bémbé'éro, ri laleng onrong énungenna, nasaba iyaro sining olokolo'é napoji mallai wettunna maélo ménung. 39Jaji rékko iyaro sining bémbé'é mallaiwi ri yolona takké-takkéro, mabbaloi ana'na iyaré'ga bellangngi iyaré'ga mabbetti-betti'i.

40Nainappa mala Yakub bimbala nanapangoloi risining bémbé iya mabbaloé sibawa mabolongngé. Nasibawang caraéro nalolongengngi olokolo'na aléna sibawa napassarangngi polé ri olokolo'na Laban.

41Rékko sining olokolo iya mawatangngé mattengngangngi mallai, napalénne'i Yakub takké-takké iya nalopééro ri yolona mennang, ri laleng onrong énungenna. 42Iyakiya iyaro takké-takké dé' napalénne'i ri yolona olokolo iya malemmaé. Jaji, sininna olokolo iya maputéro malemmai, na iyanaro appunnangenna Laban, nasininna olokolo iya mabolongngé, bellang sibawa mabbetti-betti'éro mawatangngi, na iyanaro appunnangenna Yakub. 43Nanallalengiro nasugi senna'na Yakub. Mappunnaiwi maéga bémbé bimbala, unta, kaleddé sibawa ata-ata.

Currently Selected:

KAJAJIYANG 30: LAIBUG

Highlight

Copy