KAJAJIYANG 28
28
1Nainappa naobbini Ishak Yakub, nanabarakkakiwi sibawa makkeda, “Aja' mukawing sibawa ana'dara Kanaangngé. 2Laono ri Mésopotamia, ri kaluwargana Bétuél, nénému enrengngé kawinno sibawa sala séddinna ana' makkunrainna amaurému Laban. 3Tennapodo Allataala Iya Pommakuwasaé barakkakiwi akawingemmu sibawa mpérékko ana' eppo iya maégaé, angkammu mancaji wija-wijanna maéga bangsa! 4Tennapodo Puwangnge barakkakiko sibawa wija-wijammu pada-pada purana nabarakkaki Abraham, sibawa tennapodo muwappunnaiwi tana iya muwonroiyéwé, iya puraé nabbéréyang Allataala lao ri Abraham!” 5Makkuwaniro Ishak leppessangngi Yakub lao ri Mésopotamia, ri Laban, ana'na Bétuél tau Arangngéro. Laban iyanaritu kakana Ribka indo'na Yakub sibawa Esau.
Kawinnasi Esau
6Naéngkalingana Esau makkedaé purani ribarakkaki Yakub ri Ishak sibawa naleppessanna lao ri Mésopotamia untu' sappa bainé kuwaro. Makkuwatoro makkedaé wettunna Ishak barakkakiwi Yakub, nattéyangngi Yakub mabbainé tau Kanaan. 7Rilainnaéro naissengngi Esau makkedaé naturusiwi Yakub ada-adanna ambo' sibawa indo'na sibawa joppani lao ri Mésopotamia. 8Napahanni Esau makkedaé Ishak, ambo'na, dé' napojiwi makkunrai Kanaangngé, 9rimakkuwannanaro laoni Esau ri Ismaél, ana'na Abraham, nanakawing sibawa ana'na Ismaél iya riyasengngé Mahalat, anrinna Nébayot.
Nippinna Yakub ri Bétel
10Nasalaini Yakub Bersyéba nalao ri Haran. 11Wettunna labu essoé, lettu'ni riséddié onrong,#ri … onrong iyaré'ga ri … onrong iya mapaccingngé. nanabbenni kuwaro. Léwuni maélo matinro, mangkalungui séddi batu. 12Nanannippina samanna mita séddi addénéng iya tettongngé ri tanaé na cappa'na narapi langié na malaéka-malaéka'é noté ri addénéngngéro. 13Na ri seddéna#ri seddéna iyaré'ga ri yasé'na addénéngngéro. tettongngi Puwangnge sibawa makkeda, “Iyya'na Puwang, Allataala iya nasompaé Abraham sibawa Ishak. Maéloka mabbéréyangngi lao ri iko sibawa lao ri wija-wijammu tana onrommu léwué. 14Wija-wijammu singngégai matu awué ri tanaé. Nalowangiwi matu daérana mennang lao tulili, nanaolako sibawa wija-wijammu, maélo-Ka barakkakiwi sininna bangsaé#Iyya … sininna bangsaé iyaré'ga sininna bangsaé naéllauwi matu ri Iyya kuwammengngi Ubarakkakiwi mennang pada-pada pura Ubarakkakiko sibawa wija-wijammu. ri linoé. 15Engngerangngi, maélo-Ka tulukko sibawa linrungiko, kégi-kégiko lao, sibawa maélo-Ka tiwiko lisu ri wanuwaéwé. Dé' Umaélo salaiko narapi pura Upogau' sininna aga iya Uwajjanciyangngé lao ri iko.”
16Nanaoto'na Yakub polé ritinrona sibawa makkeda, “Engkai Puwangnge kuwaé, ri onrongngéwé, iyakiya nappai uwisseng makkekkuwangngé!” 17Métauni nainappa makkeda, “Temmaka makarame'na iyaé onrongngé! Pastini iyaé bolana Allataala, pintu gerbanna surugaé.”
18Pappa bajanana maéléni Yakub moto, nainappa nala batu iya napaké selaku angkalungung nanapatettongngi selaku batu papparéngngerang. Natirikini minnya zaitun iyaro batué untu' ripallaing untu' Allataala. 19Nasenni Bétel#Bétel: Iyaé asengngé ri laleng basa Ibrani bettuwanna “Bolana Allataala”. iyaro onrongngé. (Riyolo asenna Lus.) 20Nainappa mattanroni Yakub, “Rékko natulukka sibawa nalinrungika Puwangnge ri allalengengngéwé enrengngé nawérékka inanré sibawa pakéyang 21angkakku lisu ri bolana ambo'ku sibawa salama, Puwangnge matu mancaji Allataalaku. 22Sibawa maéloka mabbéréyangngi lao ri Puwangnge tawa seppulona sininna iya nawéréngngékka Puwangnge. Batu papparéngngerang iya upatettongngéwé mancajiwi matu onrong assompang untu' Puwangnge.”
Currently Selected:
KAJAJIYANG 28: LAIBUG
Highlight
Share
Copy
Want to have your highlights saved across all your devices? Sign up or sign in
