1 SAMUEL 3
3
Nappaitanna aléna Puwangnge ri Samuél
1Wettuéro, Samuél iya ana'-ana'é muparo tumaningiwi Puwangnge ri yawa anganrowangenna Eli. Iyaro wettué majarang senna engka paseng sibawa pakkitang polé ri Puwangnge. 2Riséuwaé wenni, Eli iya macowa senna'énna sibawa mawé'ni butaro, mattengngang matinro ri bili'na, 3na Samuél matinroi ri seddéna Petti Assijancinna Puwangnge, ri laleng Kéma Mapaccingngé. Wettunna dé'pa naompo essoé sibawa malluwa mupa lampué, 4Puwangnge mobbii Samuél, namappébali Samuél, “Iyyé, Pa'!” 5Nainappa lari lao sita Eli sibawa makkeda, “Engka aga Pa'? Magi nariyobbika?” Iyakiya mappébaliwi Eli, “Dé' uwobbiko, atinrono paimeng.” Nainappa lao matinro paimeng Samuél.
6-7Nainappa Puwangnge mobbisi Samuél, iyakiya dé' naissengngi Samuél makkedaé iya mobbiéngngiro Puwangnge, nasaba dé'pa naengka Puwangnge nabbicara sibawa aléna. Rimakkuwannanaro moto'ni, nainappa naéwa sita Eli sibawa makkutana, “Engka aga Pa'? Magi taobbika Bapa'?” Nappébali Eli, “Dé' uwobbiko, ana'ku; atinrono paimeng.”
8Untu' mabbékkatellunna Puwangnge mobbii Samuél; nanaoto'na Samuél nalao sita Eli sibawa makkeda, “Engka aga Pa'? Magi namangobbi Bapa'?” Iyatoro wettué namaingekiwi Eli makkedaé Puwangnge ritu mobbii iyaro ana'é. 9Rimakkuwannanaro makkedani lao ri Samuél, “Atinrono paimeng, narékko riyobbiko paimeng akkedano, ‘Abbicarani, Puwang, maréngkalingai atam-Mu.’ ” Nanalaona Samuél ri onrong atinronna paimeng.
10Nanapoléna Puwangnge, sibawa tettong ri onrongngéro namangobbi paimeng, “Samuél, Samuél!” Namappébali Samuél, “Abbicarani, Puwang, maréngkalingai atam-Mu.”
11Namakkedana Puwangnge lao ri aléna, “Maélo-Ka pogau'i séuwaé iya maseroé lao ri tau Israélié, angkanna tungke' tau iya méngkalingaéngngi malippui matu. 12Iyaro essoé maélo-Ka pogau'i sininna iya puraé Uwangancangeng lao ri kaluwargana Eli polé ri pammulanna lettu ri paccappurenna. 13Purani Upaissengi aléna#Séddi bettuwang mariyoloé: Purani Upaissengi aléna; bettuwang Ibraninna: Upaissengiwi matu. makkedaé Uhukkungngi matu kaluwargana untu' mannennungeng nasaba ana'-ana'na purai napakatuna-Ka. Naisseng Eli dosa-dosana mennanro, iyakiya dé' mennang nacairiwi. 14Rimakkuwannanaro mattanroka passalenna kaluwargana Eli, makkedaé dosana mennang iya battowa senna'éro dé' nawedding riledda sibawa muwi akkarobangeng iyaré'ga pakkasuwiyang aga untu' mannennungeng.”
15Purairo matinroni paimeng Samuél, na ri élénana moto'ni sibawa timpa'i sining tange'na Bolana Puwangnge. Métauni paissengiwi Eli iyaro pakkitangngé, 16iyakiya riyobbii ri Eli, adanna, “Samuél, ana'ku.” Nappébali Samuél, “Iyyé Pa'.”
17Nakkutana Eli, “Aga napowadakko Puwangnge? Curitangeng manekka. Rékko engka séuwa iya murahasiyakangngé, pasti nahukkukko Allataala.” 18Nainappa Samuél paissengi manengngi iyaro Eli. Dé' gaga muwi séddi iya narahasiyakangngé. Nainappa makkedani Eli, “Aléna Puwang, leppessanni Napogau' aga iya Naangga'é makessing.”
19Tattamba battowani Samuél. Puwangnge sibawangngi sibawa mébbui sininna iya napowadaé Samuél kajajiyang tongeng. 20-21Iyanaro saba'na sininna umma Israélié polé ri sininna wanuwaéro mangakuiwi makkedaé Samuél iyanaritu nabinna Puwangnge. Sises-siseng mabbicara Samuél, sininna bangsa Israélié méngkalingai.
Matteru mupi Puwangnge mappaitangngi Aléna ri Silo, kégi untu' pammulanna mappaitang alé lao ri Samuél Namabbicara sibawa aléna.
Currently Selected:
1 SAMUEL 3: LAIBUG
Highlight
Share
Copy
Want to have your highlights saved across all your devices? Sign up or sign in
