1 SAMUEL 18

1-2Puranana Saul sibawa Daud mabbicara-bicara, riyakkani Daud mancaji pegawénna sibawa mappammulai wettuéro dé'na naripalalo lisu ri bolana tomatowanna. Yonatan ana' worowanéna Saul, naéngkalingani assipabbicarangngéro. Tattaré toni ri Daud, sibawa mamaséiwi pada-pada aléna muto. 3Rimakkuwannanaro mattanroni Yonatan maélo massellao sibawa Daud mannennungeng. 4Naludunni Yonatan jumbana nanawéréngngi Daud, makkuwatoro pakéyang musuna enrengngé peddanna, panana sibawa babbanna.

5Napogau'ni Daud sininna tugasna sibawa makessing iya riwéréngngéngngi ri Saul. Rimakkuwannanaro riyakkani ri Saul mancaji parawira ri laleng tentarana, naripojina Daud ri sininna prajuri'é nenniya risining atanna Saul.

Mangémpurunna Saul ri Daud

6Wettunna Daud lisu puranana nacau Goliat tau Filistingngéro, sibawa sining prajuri'é mabbarisi muttama ri laleng kota, massuni sining makkunraié polé ri sininna kotaé ri Israél untu' duppaiwi Arung Saul. Makkélonni mennang élokkélong marennu, nenniya séré-séré sibawa macculéyang rabana sibawa kacapi. 7Ri laleng séré-séréna makkélongngi sining makkunraié makkuwaé, “Naunoi Saul massebbu-sebbu balié, iyakiya Daud mappulo-pulo sebbu.” 8Naéngkalinganaro, macai senna'ni Saul. Saba' pikkiri'na, “Riyangga'ni Daud pura mpunoi mappulo-pulo sebbu, na iyya banna massebbu-sebbu bawang. Dé'na namaitta tentu aléna ripancaji arung ri mennang!” 9Mappammulai wettuéro mangémpuruni lao ri Daud.

10Pappa bajanana engkai Saul ri lalempolana makkatenningngi bessinna na tappa ripoléini ri roh maja iya nasuroé Allataala, angkanna majjallo pada-pada tau jangengngé. Iyaro wettué makkacapiwi Daud pada-pada biyasaé. 11Nappikkiri Saul, “Uwaddincekengngi iyaé bessié lao ri Daud gangka maddince ri renringngé!”, nainappa naddawukeng iyaro bessié narapi wékkaduwa lao ri Daud, iyakiya naulléi Daud léssé.

12Namaingekini Saul makkedaé rilinrungiwi Daud ri Puwangnge na aléna risalaini ri Puwangnge. Rimakkuwannanaro métauni lao ri Daud. 13Nanapalétté'ni Daud polé ri saorajaé, sibawa makkai mancaji komandang sisebbué tau prajuri. Nanallalengiwi Daud pimpingngi pasukangngé ri laleng tungke' ammusureng. 14Naulléi pogau'i sininna tugasna, saba' Puwangnge tulungngi. 15Wettunna naita Saul makkedaé tuli mallolongengngi Daud, pédé métauni. 16Iyakiya sininna Israél sibawa Yéhuda napojiwi Daud nasaba aléna pamimping iya maégaé appalanna.

Kawinna Daud sibawa ana' makkunrainna Saul

17Narancanani Saul kuwammengngi nariyuno Daud ri tau Filistingngé ri laleng ammusurengngé kuwammengngi natenniya aléna mpunoi. Jaji riséuwaé esso makkedai Saul lao ri Daud, “Mérab ana' makkunraikku macowaé, upasiyalako matu, assaleng muwappaitangngi abaraningemmu ri laleng mammusu untu' Puwangnge.”

18Nappébali Daud, “Niga atattaé, sibawa aga bettuwanna kaluwargana atatta ri Israélié, angkanna atatta mancaji ménéttunna Arungngé?” 19Iyakiya narapina wettunna Mérab maélo ripasiyala sibawa Daud, padahal iyaro ana' daraé napakawingngi sibawa Adriél polé ri Méhola.

20Mikhal ana' makkunrainna Saul iya laingngé, napojiwi Daud. Wettunna naéngkalinga Saul gau'éro, nasitujui towi. 21Pikkiranna, “Makessingengngi uwappéddarang Mikhal ri Daud, kuwammengngi natajjebba Daud sibawa weddingngi riyunu ri tau Filistingngé.” Jaji untu' mabbékkaduwanna makkedani Saul lao ri Daud, “Makkekkuwangngé weddikko mancaji ménéttukku.” 22Nainappa nasuro sininna pegawénna kuwammengngi napowadangngi Daud sibawa mammekko-mekko, makkuwaé, “Naéloriko Datu sibawa makkuwatoro sininna pegawénna; jaji makkekkuwangngénna wettu teppa'é untu' pubainéwi ana'na.”

23Iyakiya wettunna mennang palettu'i iyaro tangngaé ri Daud, mappébaliwi, “Muwasengngiga magampang untu' mancaji ménéttunna arungngé? Na iyya'é tau kasiyasika sibawa dé' bettuwanna!”

24Iyaro sining pegawé napaissengini Saul pappébalinna Daudro, 25nanasuroni Saul mennang powadangngi Daud, makkuwaé, “Iya napowéloriyé datu selaku sompana banna 100 assunnarenna tau Filistingngé, selaku pakkabale lao ri balinna Datu.” (Iyanaé narancana Saul untu' mpunoi Daud naolai tau Filistingngé.) 26-27Iyaro sining pegawénna Saul napalettu'ni iyaro pasengngé lao ri Daud, sibawa Daud natarimani pattawana arungngé. Rimakkuwannanaro, ri wettu dé'napa nacappu wettu natte'é, joppani sibawa ana' buwana lao ri daéra Filistingngé. Naunoi 200 tau Filistin, nainappa nala oli assunnakenna mennang, nanabbéréyangngi lao ri Saul dé'gaga kuranna muwi séddi. Purairo napasiyalani Saul Mikhal sibawa Daud.

28Makkuwaniro Saul maingekiwi makkedaé rilinrungiwi Daud ri Puwangnge sibawa ripoji towi ri Mikhal ana'na. 29Napédé métauna ri Daud sibawa nabencinna gangka tuwona.

30Sises-siseng rékko poléi tentara Filistingngé maggasa, lebbi mallolongengngi Daud paccappui mennang naiya sining parawirana Saul iya laingngé. Napédé kalabbana Daud.

Currently Selected:

1 SAMUEL 18: LAIBUG

Highlight

Copy