Mateus 7
7
Tersèngèt menghukum kalak
(Luk. 6:37-38, 41-42)
1“Ulang kènè menghukumi kalak sidèban, asa ulang ihukumi Dèbata kènè. 2#Mrk. 4:24 Kerna bakunè kènè menghukum taba sidèbaan, bagi ma ngo Dèbata menghukumi kènè. Bakunè sukaten sinibaing ndènè taba sidèbaan, idi ma ngo sukaten ibaing Dèbata bai ndènè. 3Kasa mo pukpuk iperèso-rèso si ni mata ndèba nasa pellèmen, keppèken nasa pungur i mata ndènè idi oda iperdatèken kè? 4Bakunè mo kè mendokken taba denganmu, ‘Dikè kuagoi pellèmen si ni matami,’ keppèken i matamu sendiri lot nasa pu- ngur belgahna? 5Ee, kènè perbuah ringadar! Lebbèen mo agoi pungur ni matami, ipè asa ntangkas idah ko, janah agoi nasa pellèmen si ni mata dengnganmu.
6Ulang berrèken harta simbadia i taba biang, asa ulang merbhalik biang i janah menarut ko nola. Ulang berrèken buradda bai babi, asa ulang gabè ideddohi nola idi.”
Pengido, tulusi, janah tuktuki
(Luk. 11:9-13)
7“Pengido kènè mo, nai jaloon ndènè mo, tulusi mo, nai dapet kènè mo, tuktuki kènè mo, nai bukaenna mo bai ndènè. 8Ai dapetten ngo sidak tong mengido, kenaan ngo ngo si dak tong menulusi, janah ibuka ngo kalak si dak tong menuktuki. 9Isè kènè merrèken batu taba dukakna ukum roti ngo ipido? 10Barang nipè iberrèken, ukum ikan ngo ipido? 11Barang bakunè pè jahat ndènè, ibettoh kènè ngo memerrèken simendè taba dukak-dukak ndènè, makinsa nola mo Bapa ndènè si ni sorga i, tentu iberrèken simende taba kalak simengido tabasa!
12 #
Luk. 6:31
Bakin kènè mo lebbèen taba sidèbaan, barang kadè ipergeddo kènè naing bakinenna taba kènè. I ngo pemusaten hatoren agama sinipeddahken si Musa dekket nabi-nabina.”
Pèntu sempit
(Luk. 13:24)
13“Mbengket mo kènè arap pèntu sempit, kerna ukum arap pèntu mbellang janah dalan mbellen, mi narakka ngo puasna! Nterrem ngo kalak merdalan arap idi. 14Tapi ukum pèntu sempit janah pècet, mi kenggeluhen ngo puasna. Oda piga kalak soh mi sidi.”
Kayu dekket buahna
(Luk. 6:43-44)
15“Mermanat mo kènè meradepken nabi-nabi palsu. Roh ngo kalak idi mendahi kènè bagè biri-biri, tapi ukum ukurna tosè bagè biahat menjerngem ngo. 16Tandaan ndènè mo kalak idi merkitè-kitè hasil perulaenna. Oda terbuahken kopi-kopi buah anggur, janah oda terbuahken cipako, buah kayu ara. 17Nasa Kayu merandal merbuahken mendè, tapi ukum kayu siso mendè nggodo ngo buahna. 18Kayu merandal, oda nè merbuahken nggodo, janah ukum kayu nggodo oda ndorok merbuahken buah merandal. 19#Mat. 3:10; Luk. 3:9 Nasa kayu siso merbuahken merandal, itabah ngo janah itutung. 20#Mat. 12:33 Asa bagi ngo bang nabi-nabi palsu idi pè. Itandai kènè ngo kalak i merkitè- kitè perulanna.”
Perulaen ngo, oda kata-kata
(Luk. 13:25-27)
21“Oda ngo karina kalak simendiloi Aku, ‘Tuhan, Tuhan!’ gabè ginemgem i Kerajaen Dèbata, tapi pellin kalak simengulaken lemmo atè BapangKu si ni sorga i ngo. 22Tikan Ari Kiamat, mbuè ngo kalak mendokken bangKu, ‘Tuhan, Tuhan,’ otang enggo kupe- soh kami sukuten bai Dèbata nai merkitè-kitè Gerarmu! Janah otang merkitè-kitè Gerarmu pè enggo kupelaus kami nasa bolis, janah memaing matcam bagè tanda kelengangen? 23#Ps. 6:9 Tapi ningku mo, ‘Oda kutandai kènè! Laus mo kènè i sèn nai, kènè simengulaken jahat!’ ”
Memajek bages
(Luk. 6:47-49)
24“Barang isè simendengkoh kata èn, janah iulaken, codi mo ia bagè kalak si mpantas pekadèken bagesna i babo batu mpihir. 25Tukasi pè roh udan janah mbelgah laè idi bagi ma angin sapa-sipu mi bages i, oda nggèut merumpak bages i, kerna ipajek merdanganen batu mpihir.
26Tapi kalak simemegèken ranangKu, keppè oda iulaken, codi mo ia bagè kalak simoto, simemajek bagesna i babo kersik. 27Sinderrang roh udan, mengeraja mo laè janah sapa-sipu angin menerpa bages i, nai merumpak mo bages i!”
Kuasa Jesus
28 #
Mrk. 1:22; Luk. 4:32 Enggo kessa pul Jesus mengajari, le- ngang mo jelma nterrem ni sidi mendengkoh peddahNa i. 29Ai meheji kalohon ngo peddahNa i, oda bagè guru-guru agama Jahudi i.
Currently Selected:
Mateus 7: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)