Lukas 13
13
Mula oda tobat ibas dosa nai, binasa ngo
1Tikanna i, roh mo kalak memagahken mendahi Jesus terrèngèt kalak Galilea sinibunuh si Latus, nderrang memèlè Dèbata kalak idi. 2Mendengkoh berrita idi, idokken Jesus mo, “Idokdok kènè ngo merdosaan sinibunuh idi ulang pada kalak Galilea sidèbanna? 3O Oda! Tapi èngèt kènè mo, mula oda mertobat kènè ibas dosa-dosa ndènè nai bagè kalak i, matè ngo kènè karina. 4Bagi ma ngo sisipuluh dua kalak matè itinggang palas-palas i gembar Siloam? Idokdok kènè ngo belgahen dosana ulang pada kalak simerrian i Jerusalem? 5Oda ngo, tapi èngèt kènè mo, mula oda mertobat kènè, matè ma ngo kènè bagè kalak idi.”
Codiin terrèngèt kayu ara siso merbuah
6Enggo kessa i, isukutken Jesus mo codiin taba kalak idi: “Lot mo kayu ara ibas pekken sada kalak. Idahi sidasa i mo kayuara i menulusi buahna, tapi singkabuah poda jumpasa. 7Nai idokken mo taba tukang pekken, ‘Tengen mo enggo tellu tahun dekkahna dakdak roh aku misènda naing memmuat buah kayuara idi, tapi singkabuah poda lot. Kernana i, tabah kènè mo batangna idi. Man kadè mo i pegelluhen mula sia-sia sambing ngo!’ 8Tapi ialoi tukang pekken idi mo, ‘Tuan, belli mo lebbè nggelluh isidi kayuara idi giamken sitahun nai, asa kukurak lebbè kuliling merparik janah kupupuki. 9Tah bakunè nggèut ia merbuah tahun siroh. Tapi ukum oda bagidi, nai ipè asa ipasulak Tuan i lako menabah.’ ”
Ipemalum Jesus sada kalak daberru tupung ari Sabat
10Ibagasen sidari, tupung ari Sabat, mengajar mo Jesus i bages perguruun. 11Lot mo isidi sada daberru enggo sipuluh ualuh tahun dekkahna mersakit kumarna iiani tendi jahat ia. 12Iidah Jesus kessa daberru i, idilo mo, “O nangè, malum mo iakap kono sakitmu idi!” 13Nai iampèken mo tanganNa mi daberru i, nai mènter ndorok mo cènder daberru i gejapkenna i janah ipoji mo Dèbata.
14 #
2 Ms. 20:9-10; 5 Ms. 5:13-14 Mellaga mo pengendeng bages perguruun i kumarna ipemalum Jesus sisakiten tupung ari Sabat. Nina mo taba jelma nisidi, “Lot ngo ennem ari bekkasta mengula; sidekkah ennem ari i mo kènè roh mertambar, ulang tupung ari Sabat!”
15Ialoi Tuhan i mo pengendeng bages perguruun i, “Èo, kènè perbuah ringadar! Otang karina ngo kè paluahken lembu barang pè kalodè tikan ari Sabat janah mengiring mi ruar lako pesoburken. 16Bagèndari pè, isèn lot daberru pemparen si Abraham enggo sipuluh ualuh tahun dekkahna ièkèti Sibolis. Oda ngo ndorok iosari èkètna idi tikan ari Sabat?” 17Gabè termèla mo simengalo rana Jesus idi. Tapi ukum sidèbanna idi lolo ngo mengidah karina kellengangen nibakin Jesus idi.
Codiin terrèngèt buah arum
(Mat. 13:31-32; Mrk. 4:30-32)
18Nai idokken Jesus mo, “Tosè mi kadè mo Kerajaen Dèbata janah mi kadè mo codinna Kubakin? 19Codi ngo idi bagè buah arum, ibuat sada kalak menuanken mi jumana. Turah mo i janah ndeppur mbellen bagè kayu, nai merrasar mo manuk-manuk simerkabangen ibas dahan-dahanna.”
Codiin terrèngèt ragi
(Mat. 13:33)
20Idokken Jesus nola ma, “Mi kadè mo ndia kucodiken Kerajaen Dèbata? 21Codi ngo Kerajaen Dèbata bagè ragi sinicampurken mi empat puluh sellup nditak, nai igaru-garu mo idi sampè kambang.”
Pèntu sempit
(Mat. 7:13-14, 21-23)
22Lako laus mi Jerusalem, idalani Jesus mo kuta-kuta dekket sosor ninganna mengajari. 23Nai lot mo kalak mengkuso tabaSa, “Guru, cituk ngo kessa jelma ipaluah ndia?”
Ialoi Jesus mo, 24#Mat. 7:13-14 “Kennah usahaken kènè mo mbengket arap pèntu sempit. Kudokken mo bai ndènè: Mbuè ngo kalak merrusaha naing masuk arap pèntu i, tapi oda ndorok. 25Ai mula ndungo kessa sidasa bages idi igerruk mo pèntu i. Nai cènder mo kènè i ruar, jadi mulai mo ituktuki kènè, ninganna mendiloken, ‘Tuan, buka mo pèntu èn, asa mbengket kami!’ Nai ialoi Tuan i mo, ‘Oda kubettoh tah idikè nai roh ndènè.’ 26#Mat. 7:22-23 Nai idokken kènè mo, ‘Enggo rebbak mangan mènum kènè dekket kami, janah enggo ma ngo mengajari kènè i dalan mi kuta nami!’ 27#Ps. 6:9 Tapi idokken Tuan i nola mo, ‘Oda kubettoh barang idikè nai kènè roh. Laus mo kènè isèn nai, kènè simengulaken kejahaten!’ 28#Mat. 22:13, 25:30 Asa, sinderrang iidah kènè kessa si Abraham, si Isak dekket si Jakob bak karinana nabi-nabi mersennang-sennang i Kerajaen Dèbata, gabè tangis mo kènè janah susah kalohon kumarna iusir kènè i sidi nai! #Mat. 8:11-12 29Keppèken merrohen mo kalak i kebincaren nai dekket i kesunduten nai, i utara nai bak i selatan nai, asa mersennang-sennang i Kerajaen Dèbata. 30#Mat. 19:30, 20:16; Mrk. 10:31 Situhunna lot ngo kalak perpodi kin gabè perlebbè, janah perlebbè kin gabè perpodi.”
Kelleng atè Jesus midah Jerusalem
(Mat. 23:37-39)
31Tikanna idi ma, lot mo roh kalak Parisè mendahi Jesus, nina mo, “Laus mo kono isèn nai mi bekkas sidèban, ai naing ibunuh si Herodes ngo Kono.”
32Ialoi Jesus mo, “Laus mo kono bagahken mo taba jelma siso merguna i, ‘Ari èn dekket baremben, pemalumken sisakiten ngo Aku, tapi i ari petelluken, isidi mo mendungi ulanKu.’ 33Ukum ari èn, baremben dekket kaduan, kennah Kuterusken ngo perdalanenKu, ai kennah i Jerusalem ngo nabi ibunuh.
34Jerusalem, Jerusalem! Nabi-nabi ibunuh kono janah ibentiri kono dekket batu, sinipasulak mendahi kono sampè matè! Enggo nggati naing kukeruduk pengisimidi bagè pengkeruduk inang manuk mi terruh kabengna, tapi oda uè kono! 35#Ps. 118:26 Èngèt mo, gabè tading mo bagesmu i janah melongo. Kudokken mo bamu, mulai bagèndari oda idahèn ndènè nè Aku, mèma idokken kènè, ‘Nipasu-pasu mo siroh merkitè gerar ni Tuhan i.’ ”
Currently Selected:
Lukas 13: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
