1 Musa 5
5
Pemparen si Adam
(1 Kron. 1:1-4)
1 #
1 Ms. 1:27-28
En mo cundut pemparen si Adam. (Tikan ihanaken Dèbata jelma i, ijadiken ngo kalak i bagè Dèbata sendiri. 2#Mat. 19:4; Mrk. 10:6 Anak laki dekket daberru ngo kalak i itempa. Ipasu-pasu mo kalak i janah “Jelma” ngo kalak i idokken). 3Tikan merumur 130 tahun si Adam, tubuh mo anakna tosè bagèsa, ibaing mo gerarna si Set. 4Kessa i nggelluh dèng ngo si Adam 800 tahun nai janah mertubuhen dèng ngo dukak-dukakna. 5Matè ia tikan merumur 930 tahun.
6Merumur 105 tahun si Set, lot mo anakna gerarna si Enos. 7Kessa i nggelluh dèng ngo ia 807 tahun nai janah mertubuhen ngo dukak-dukakna dèng ma. 8Matè mo ia tikan merumur 912 tahun.
9Tikan merumur 90 tahun si Enos, lot mo anakna gerarna si Kenan. 10Kessa i nggelluh dèng ngo si Enos 815 tahun nai janah lot dèng ngo dukak-dukakna sidèban. 11Matè mo ia tikan merumur 905 tahun.
12Tikan merumur 70 tahun si Kenan, lot mo anakna gerarna si Mahalaleel. 13Nggelluh dèng ngo si Kenan 840 tahun nai janah lot dèng ngo dukak-dukakna sidèban. 14Matè mo ia tikan merumur 910 tahun.
15Tikan merumur 65 tahun si Mahalaleel, lot mo anakna mergerar si Jared. 16Kessai nggelluh dèng ngo si Mahalaleel 830 tahun nai janah lot dèng ngo dukak-dukakna sidèban. 17Matè mo ia tikan merumur 895 tahun.
18Tikan merumur 162 tahun si Jared, lot mo anakna mergerar si Henokh. 19Kessai nggelluh dèng ngo si Jared 800 tahun nai, janah lot dèng ngo dukakna sidèban. 20Matè mo ia tikan merumur 962 tahun.
21Tikan merumur 65 tahun si Henokh lot mo anakna mergerar si Metusala. 22Kessai mersaor dekket Dèbata ngo si Henokh sidekkah 300 tahun. Lot dèng ma ngo dukak-dukakna sidèban 23janah merumur mo ia 365 tahun. 24#Heb. 11:5; Jud. 14 Kerna mersaor dekket Dèbata ngo si Henokh, mersep mo ia kerna ialeng Dèbata.
25Tikan merumur 187 tahun si Metusala, lot mo anakna mergerar si Lamekh. 26Kessai nggelluh dèng ngo si Metusala 782 tahun nai janah lot dèng ngo dukak-dukakna sidèban. 27Matè mo ia tikan merumur 969 tahun.
28Tikan merumur 182 tahun si Lamekh, lot mo dukakna daholi. 29Nina si Lamekh mo, “Ukum anak èn penahangken ulaenta tikan siula tanoh sinisumpahi Dèbata.” Kumernaken i igerari si Lamekh mo anakna i si Noak. 30Kessai nggelluh dèng ngo si Lamekh 595 tahun nai. Lot dèng ngo dukak-dukakna sidèban 31janah matè mo ia tikan merumur 777 tahun.
32Kessa merumur 500 tahun si Noak, lot mo anakna imo si Sem, si Jafet dekket si Ham.
Currently Selected:
1 Musa 5: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
