1 Musa 34
34
Si Dina irampok
1Tikan sidari, laus mo si Dina berru si Jakob dekket si Lea mendahi barang piga-piga kalak daberru Kanaan. 2Tikan idah si Sikhem anak si Hemor kalak Hewi imo raja i suak i kessa mo si Dina, mèter iluaken mo ia janah irampok. 3Tapi ngkelleng kalohon ngo atèna midah si Dina, janah itulus ngo dalan asa ngkelleng ma atè si Dina midahsa. 4Idokken si Sikhem mo taba bapana, “Kupido bamu pa, usahaken mo asa uè bangku simerbaju i. Sèkel ngo aku kabin dekketsa.”
5Terbertik ngo bai si Jakob, enggo icèdai berruna i, tapi kumerna i jampalen ngo dukak-dukakna menjaga pinakanna, oda terbakinsa maing barang kadè pè, kum madèng balik kalak i.
6Nai roh mo si Hemor, bapa si Sikhem mendahi si Jakob lako merarih dekketsa. 7Sinderrang bagidi tupung mo balik dukak-dukak si Jakob i jampalen nai. Idengkoh kessa mo simasa i, tersengget ngo kalak i janah melaga. Ai kumernaken irampok si Sikhem berru si Jakob enggo mo ihina kalak Israel. 8Idokken si Hemor mo taba si Jakob, “Ngkelleng ngo atè anakku si Sikhem midah berrumu i; jadi kupido bamu asa ijinken mo jejap anakku dekket berrumu i. 9Sibaing mo arih, asa ndorok mersibuaten bangsamu dekket bangsangku. 10Nai merkitè bagidi kènè pè ndorok mo merian rebbak dekket kami i ladang èn; barang i dikè sambing roh gèut ndènè. Janah ndorok ma mo kènè mertiga-tiga janah memiliki harta.”
11Nai idokken si Sikhem mo taba bapa si Dina dekket taba turang-turangna i, “Kupido bai ndènè, asa nemmuken uèi kènè pengidoenku èn, uè ngo aku merèken barang kadè sambing ipido kènè bangku nai. 12Dokken kènè mo bakunè adatna sinaing bakinen nami bai ndènè, asal mo ipaduè kènè kabin kami.”
13Kumernaken enggo sanga irampok si Sikhem turang kalak i si Dina i, gabè iluapi dukak-dukak si Jakob mo si Sikhem dekket bapana si Hemor i. 14Nina kalak i mo taba kalak i sidua, “Mèla ngo kami pejahèken turang nami taba kalak siso mertakkil. 15Ndorok ngo kuuèi kami nidokken ndènè i tapi kennah bagè kami ngo kènè, imo kennah mertakkil. 16Enggo kessa i kuuèi kami pè pengidoen ndènè i, imo ndorok mersibuaten. Nai gabè merian mo kami i tengah-tengah ndènè janah gabè sada bangsa dekket kènè. 17Tapi mula oda kènè uè bagè nidokken nami i, janah oda uè kènè mertakkil, kualengi kami mo turang nami i nai laus mo kami i sèn nai.”
18Patut ngo nidokken kalak i dok atè si Sikhem dekket si Hemor, 19janah uè ngo ndor si Sikhem mengulaken sarat-sarat i karina, kumarna ngkelleng atèna midah si Dina. Ukum ibas karina kaka-anggina si Sikhem mo siterdokkensa ranana.
20Kessa i laus mo si Hemor dekket si Sikhem mi bekkas perarihen imo i pèntu pengkeruhen, mengerana mo kalak i taba pengisi kuta i, bagèen, 21“Supan-supanta ngo kalak Israel i. Jadi sipadiat mo kalak i merian i ladangta èn rebbak dekket kita, janah bèbas ia barang mikè lemmo atèna. Mbellang ngo ladangta èn, siat ngo bang kalak i pè. Nai ndorok mo kita muat berru kalak i, janah kalak i pè ndorok ma mo muat berrunta. 22Tapi lot ngo saratna asa uè kalak i merian rebbak kita dekket asa gabè sada bangsa dekket kita, imo: karina daholi banta nai kennah mersittak ngo bage kalaki. 23Ujungna sikali èn karina pinakan dekket harta kalak i gabè milikta. Jadi siuèi mo pengidoen kalak i asa tong merian rebbak kita kalak i.” 24Karina pengisi kuta simerpulung i sidi mengoangken sinidokken si Hemor dekket si Sikhem, nai karina mo daholi simbelgah ni kuta i itakkil.
25Enggo kessa tellu ari nai nola, tikan ncio dèng iakap daholi-daholi simertakkil i, roh mo mi kuta sipsip dua kalak turang si Dina simergerar si Simeon dekket si Lewi enggo tagak merpeddang. Nai ibunuh kalak i mo karina daholi ni sidi, 26dekket ngo si Hemor bak si Sikhem. Nai ialengi kalak i mo si Dina i bages si Sikhem nai janah iembah mo laus i sidi nai. 27Enggo kessa pul iragèken, irampasi dukak-dukak si Jakob sidèbanna i mo harta kuta i bagè mahan bèla, kumernaken irampok turang kalak i. 28Iarak kalak i mo kambing, biri-biri, lembu, kalodè, dekket kadè dèng silotna i kuta dekket i jampalen pè. 29Iapus kalak i ngo karina barang simaharga, itaban mo karina daberru dekket anak-anak, janah irampasi mo karina pengisi bages i kuta i.
30Nai idokken si Jakob mo taba si Simeon dekket si Lewi, “Menusahi aku ngo kè. Bagèndari karina kalak Kanaan dekket kalak Feris dekket karina pengisi ladang èn mergogo atè mo midah aku. Kita oda piga, tah bakunè mersada taki kalak i mengalo janah menjuhap aku iragèken mo karina kita sisimpangaen.”
31Tapi ialoi kalak i mo, “Oda tertengen-tengen kami turang nami ibaing bagè kalak sibabijalang.”
Currently Selected:
1 Musa 34: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
