Yohanes 3
3
Yesus Nikodemusfar ge nasowena.
1Angtane bosna Nikodemus jeiba anggwabura Yahudimanaiserem jem sanbakam. Jei taterisi angtane safna Farisimana gam onsobili. 2Jei Yesusminibe gwinem jela. Ane jei Yesus ga bala, “Guru, ai amesma towaswena Aamei gurusam, ane Uwa Sanbagiri Jei Aamei Is baftana. Ai jes gemerserem amsama towaswena, aam temawer afa Uwa Sanbagiri Jei angtanefar jam ge gweyana, jei bwembwema jam eyebiyen Aamei Ijes eyebilirim.”
3Yesus ga aa tamawola, “Ai enggam isa bunarsusfer bala, afa angtane gamjon jam suruyono, angtane jeiserem jei jam etamweyan angtane Uwa Sanbagiri jem gwonap nwinirim, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe.”
4Nikodemus jei Yesus ga tenebana, “Fomfoma angtane gamjon jam surufe afa jei mes unggwanswenaram? Bunarsus, jei jam kaweyan enem tane golabe, ane gamjon ga gam surnu!”
5Yesus ga tamawola, “Ai enggam isa bunarsusfer bala, angtane afa jam suruyon fonawer, ane Mafnana Uwa Sanbagirminiwer, angtane jeiserem jei jam etamweyan angtane Uwa Sanbagiri Jem gwonap nwinirim, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe. 6Iye uwa nemna jei tifni seyafter nemna ga nes jei gangge gerna, jengga Mafnana Uwa Sanbagirmana Jei mafnana nemnaiserem ga nes Jei gam gerna. 7Aamei ipsam bitbitwenaram taterisi Ai Ajes bilirim enggalaiserem, ‘Aamei seyafter gamjon isa surnu.’ 8Bwona gam fonsobana aa jewer gam gunurum. Tere igam sarimbene, jengga aamei teisyena fwer gane jelbana, ane fwer gane sofobana. Jes gemerserem aaiserem jegme gemer, aamei teisyena fom igam surnu Mafnana Uwa Sanbagirminiwer.”
9Nikodemus ga tenebana, “Jeiserem ga fomfom se etamwena?”
10Yesus jei ga tamawola, “Aamke guru sanbagiriserem Israelminibe, ke jes? Gam jega bafa aamei aaiserem ijam towaswebiyen? 11Ai isa bunarsusfer bala, taterisi Ai Ajes towaswebilirim Ai ga Ajes nasbili, ane Ai Ajes domolaram ga isa Ajes bilipmini ibe. Jengga taterisi Amnaiserem, aamei ijam taabiyen. 12Ai taterisi Ajes nasbilirim ogiri aaiserem jem temawer, aamei taterisi jeiserem ijam taabiyen. Gam jega afa Ai taterisi taman waaken-girem temawer jam isAs nasibenerem, taterisi jeiserem ga fomfom is taabili? 13Angtane afa fas jam tauyan taman waaken-giribe, jengga Ai Tane Angtanemana Ajei iretyaram taman waaken-giriwer. 14Ane aaiserem enggam mesam tulisul Taterisi Uwa Sanbagirmanaiserem jebe, Nabi Musa dwisgiribe jei awasa aa gemer ge taunaram tini bubwalnaiserem jebe. Aaiserem jegme ga gemer, angtane jei Ai Tane Angtanemana As gemer sene taufa ti salibibe, 15jega angtane seyafter Ams tebalaiserem jei waakenfer gwelaiserem jamer abak-abaksus ga sene domola.
16Uwa Sanbagiri Jei angtane ogirip aaiserem uskambarsus nesiktababili, ane jega jem temawer Jemna Tane daamfennaiserem Jei aa jes damtanaram, Jei jebe ga Jes gaarmini. Jei Tane Jemna jebe ga Jes gaarmini, jega angtane seyafter Jes tebalaiserem, jei jam teryen, jengga waakenfer gwelaiserem jamer abak-abaksus ga sene domola. 17Uwa Sanbagiri Jei Tanna Jemna enggalf Jam baftayan ogiri aaiserem jebe angtane gam tamtamtababif, jengga enggalf Jei angtane ogiri aaiserem jep aa jei ge nwinbenerem ga jes waakentababisini Tane Jemna aa jes eyebilirim jeme. 18Angtane Jes tebalaiserem, Uwa Sanbagiri Jei angtane jeiserem Jam tamtamtababiyen. Jengga angtane Jei jam tebayanaiserem, Uwa Sanbagiri angtane jeiserem se tamtamtababili, aam temawer angtane jeiserem jei Tane Uwa Sanbagirmana jam ne tebayan.
19Aaiserem ga enggam: Uwa Sanbagiri enggam gunu angtane afwer waakena ane afwer kapka. Nafa Yesusmana mes forobatya ogiribe, jengga angtane jei gwins ne bili ane etam-etama kapka jes ne bili, nafa jam bilyen, aam temawer jei aa jes ne eyebilirim jei kapka. 20Angtane kapka aa jei gane eyebilirim, jei nafa baif gane gwebili. Ane nafap jam ge jalbiyen, aam temawer jei baif naawena etam-etam kapka jemna nafap jam ge sokoipmitife. 21Jengga angtane aa jei gane onsobilirim taterisi bunarsusfer Uwa Sanbagiri aa jes gam bilirim, angtane jeiserem ga nafap gangge jalbili, jega angtane nafsi enggam gane damtabif jei aa jes ne eyebilirim, jei Uwa Sanbagirfar daamfennaber ne eyebili.”
Yohanes Pembaptis jei Yesusem temawer nasowena.
22Jes jepserem taban, Yesus ane ai angtane Jei ajeya tikwebaatinennerem ai ona Yudeyaminip ga aya sofwa. Ai jep aya nwinirim minggunu unggwanferyan, ane jep ga angtane nafsi ga aya baptistababili. 23-24Jes galapserem Yohanes Pembaptis bwiyip nalefe jam ne gaataanteyan. Jei mese angtanes baptistababili taman Ainon je, bijauyan kota Salimminiwer, aam temawer fona jewer unggwanfersus. Angtane jemnip ga aa ge forobuwetya, ane jei ga aa baptistababili.
25Angtane Yohanes aa jei ne tikwebaatinennerem jepga aa ge towaiwebili angtane Yahudimana daamfennaiserem jebar jam ge doksobafe. Jei ga aa ge doksobana osiri jelemanaiserem jem temawer, osiri anggwabura Yahudimana jena aa gam ne wirsowenaram. 26Jei Yohanesminip ga aa ge sofobili, ane ga aa ge gubili, “Guru, Angtane Fona Yordan jimwer gwanan iJebar ge nasowenantam, aamei iner ap gwanan as ijes destabaamisintim, Jei ga namwer angtane jam baptistababili, ane angtane seyafter ga Jemnip ge sofobuwena.”
27Yohanes ga aa tamawola, “Angtane awelna jam domolyan, jengga Uwa Sanbagiri Jener gam gulbana jebe. 28Aamei iner imsa sarbili ai agam gunurum, ‘Ai Mesiasyan. Ai nabala ams baftatna Jemniwer.’ 29Anggwana wini jeiserem aa jei gularam, wini jeiserem ga jemna. Anggwana jeiserem jem afelna ga jep fina jei aa jes nasbilirim ga jes saribaasini, ane ini jemna saaser-saaserfer ga folbana. Jes gemerserem, afa angtane unggwanfer Yesusminip jam gangge sofobilirim, ini aman mesna ase saaser-saasersusfer gam folbana. 30Angtane unggwanfer gwanan ams ne onsobanant, ane angtane bastowaifer ga Jes ne onsobanant. Jengga namwer aas jepserem angtane unggwanfersus ga Jes sene onsobana, ane angtane bastowaifer jei ams ne onsobana.”
31Angtane bolawer aa Jei iretyaram, Jei angtane seyafter gemerserem jem Sanbakfe ga Jei se nwini. Ane angtane ogiriwer foryalaiserem jei ga ogirmana, ane jei ga taterisi ogirmanaiserem ga jes ne nasbabili. Jengga Jei taman waaken-giriwer aa Jei iretyaram angtane seyafter gemerserem jem Sanbakfe Jei se nwini. 32Jei taterisi fwater jes domolaiserem ane jes sarbiliserem ga Jei se nasbabili, jengga angtane afa fas taterisi Jei aa jes nasbabilirim jei ne taayibefe. 33Angtane taterisi Jemna aa jei ne taayibenerem, jei enggam ge gubili, sya Uwa Sanbagiri Jeiba bunaram. 34Angtane Uwa Sanbagiri aa jes baftatnaram, taterisi Uwa Sanbagirmana Jei nasbinennefe, aam temawer Uwa Sanbagiri Jei Mafnana Jelemana Jep gulbana jamer buguf. 35Uwa Sanbagiri ga Tane Jelemana Jam nesiktene, ane baabeta Jelemana seyafter gemerserem mes gulbana Jebe. 36Angtane Tane Uwa Sanbagirmana Jei aa jei gam tebanaram, jei ga waakenfer gwelaiserem jamer abak-abaksus ga jei gam domola. Jengga angtane Tane Uwa Sanbagirmana jes saribeyeneiserem, jei waakenfer gwelaiserem jamer abak-abaksus jei jam domolyan, aam temawer Uwa Sanbagiri angtane jeiserem gam nasbana jamer abak-abaksus.
Currently Selected:
Yohanes 3: LAIBKL
Highlight
Share
Copy
Want to have your highlights saved across all your devices? Sign up or sign in
