MATIUS 11

1Yesus danun faro manfamyan samfur seser risuru Ḇyesi kwar raimnai ibur moḇ ani fa ḇyuk farkarkor ma ḇyaryas Ankankinem Beḇye ro mnu-mnu sena.

Yesus ma Yohanes Ḇemasi

11:2-19

(Luk. 7:18-35)

2Ro bui Yohanes imnaf fararur Kristus ifrurna, 3inja iwan manfamyan ḇyesi fa sifuken faro I, ḇo soḇo: “Auso nari ḇeramayake, roḇa nari nkowaf snono ḇese?”

4Yesus kyarem faro si: “Mkora, ma mkokofen faro Yohanes rosai mkomnaf ma mkomam na: 5#Yes. 35:5-6, 61:1 snonkaku ḇepraf sya smam, manis sya simbran, ḇeduf pado sya seḇefasren, ḇepro sya simnaf, ḇemar sya siḇer si, ma faro snonkaku ḇesaḇarar sya ankankinem ḇeḇye ya ḇyeḇeḇaryas faro si. 6Ma aski isya faro snonkaku ḇefafayaf Ayaḇa sya.”

7Yohanes manfamyan ḇyesi sibur kwar, Yesus irandak dawawos faro kawasa ḇeḇor ansi ro Yohanes: “Fainda rosai mkora ḇe sup ḇeḇeursḇa? Fa mkomam amboḇer wam ya iyowmura-muma? Roḇa rosaiso mkora kuker ya? 8Fa mkomam snonkaku ḇefmar sansun ḇepyum? Snonkaku ḇefmar sansun ḇepyum moḇ sedi isya ro rum wairek-wairek. 9Inja fainda rosai mkora kuker ya? Mkomam nabike? Kaku, ma Yakofen faro mko, mḇoi isyadi ro nabi. 10#Mal. 3:1 Snar fas-fas isya kyur i:

Mame, Yawan wawan Ayedi fa pyon au,

ikada nari fyasos nyan Bedi ro ḇarpon Bedi.

11Yakofen faro mko: Kaku ḇeri rofandu snonkaku bin sya saḇen si oso ḇanim ikḇawes fa iba syadi Yohanes Ḇemasi, ḇape ḇebaḇa syadi ro Ḇaḇesasoser Boiyaswa ikada iba syadi Yohanes. 12#Luk. 16:16 Rofyor Yohanes Ḇemasi ikḇawes isof knikine, Ḇaḇesasoser Boiyaswa ḇyeḇesrewma snonkaku ḇesrew isya ssewar fa siḇriwark i. 13Snar nabisya kam ma Refo Yahudi sḇardi isof Yohanes ikḇawes 14#Mal. 4:5; Mat. 17:10-13; Mrk. 9:11-13 ma – rofyor mkomarisen mkonai – ikada Elia nari ḇeramumanya irya. 15Mansei ḇeḇeknaram iḇye imnaf!

16Kuker rosai Yaḇuki kyarai syos baboine? Sikada simnisbos romawa fnak ḇekain ro pasar ma ḇeyor faro min sesi: 17Nkowuf sonker faro mko, ḇape mkomas ḇa, Nkokanes kankanes-saneso, ḇape mkomandakḇa. 18Snar Yohanes ryama, ima dananḇa, madinemba, ma sikofen: Rurḇemaḇak siswoḇer i. 19Ḇarpur wer Rumkun Snonkaku ya ryama, Ikada danan ma dinem, ma sikofen: Mkomame, I snonkaku ḇeyandafdaferma ḇeyinemuk, bati ro snon ḇeyor som ma snonkaku ḇesasar. Ḇape Allah fawawi Ḇyena nfasna napnapes ro fararur ḇyena.”

Yesus ryakrok mnu-mnu ono

11:20-24

(Luk. 10:13-15)

20Raimnai Yesus ryakrok mnu-mnu ḇembror ḇa, snar ro moḇ anna Yesus ifrur aḇyair kanandor nabor kaku, ḇo ikofen: 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 “Ne, Korazim nari rwo! Ne, Betsaida nari rwo! Snar rofyor ro Tirus ma Sidon aḇyair-aḇyair kanandor ḇeḇesya kwar ro fandu mko, nakḇesya ro diwa sikada simbror fyoro kwar ma smandak. 22Ḇape Yakofen faro mko: Ro ras mankara ya, mnu Tirus ma Sidon nari kandera-suna nmanan syadi ro kandera mkoḇena. 23#Kej. 19:24-28; Yes. 14:13-15 Ma au ne, Kapernaum, inja nari beḇekanow isof ro nankike? Roḇa, nari beḇesabu isofro munaibui! Snar rofyor aḇyair kanandor ro fandu mko nakrarirya ro Sodom kada, nari mnu ani isya kyain kaker isof ras ine. 24#Mat. 10:15; Luk. 10:12 Ḇape Yakofen faro mko: Ro ras mankaraya, Sodom sya kandera sena nari nmanan syadi ro kandera mkoḇena.”

Ḇeḇeknam koreri wos dafdif Ḇyena

11:25-30

(Luk. 10:21-22)

25Ro fafisu ani Yesus isandik ma ikofen: “Yakofen kasumasa faro Au, Mami, Manseren nanki ma supswan, snar nakam wayokef na bur snonkaku ḇefawi nananem, ḇape ḇasna faro snonkaku waworek. 26O Mami, snar raririrya marisen Bedi.

27 # Yoh. 1:18, 3:35, 10:15 Nakam neḇeḇuk kwar faro Aya ro Kma Yedi ma snonkaku oso ḇa myam ḇaḇir Romawa ya derer Kma ya, ma snonkaku oso ḇa myam ḇaḇir Kma ya derer Romawa ya ma snonkaku Romawa ya imarisen fyasnai faro si.

28Mkoramuma faro Aya, mkokam ḇemor ma ḇembrus ma ḇeḇekandera, nari Yaḇuk mananai faro mko. 29#Yer. 6:16 Mkoḇar kamnam Ayedi ma mkofarkor ro Aya, snar Aya yamyaren asuser ma sneri ikaki ḇa ma rur mkoḇesi nari sisma kananon. 30Snar kamnam Ayedi ifrur marisen ma kamnam Ayedi myanan.”

Currently Selected:

MATIUS 11: LAIBHW

Highlight

Copy