MARKUS 6

Ruma Isa tula ao b̄a dou d̄i Nazaret

(Mat. 13:53-58, Luk. 4:16-30)

1Rad̄i hid̄i ede, Ruma Isa dula sama-sama lab̄o anamorid̄oho-Na lao aka kampo ra mporo ndai-Na. 2D̄i'ainaina Sabat Sia tampu'u ngoa ra teina d̄i uma sambea. Wara mboto dou ta ede. Wakatu dou-dou ede ringana ngoa ra tei Ruma Isa, siad̄oho nawancuku mbora akana. Nggahi siad̄oho, ”Ratab̄ena Dou ake rakakaina sara'ana ede? Hikima mab̄une pahu ma wara d̄i weki-Na? B̄uneku Sia loakaina karawi lampa rawi mab̄isa ra guna? 3Sab̄ua laina Sia akesi ma panggita haju? Ana la Maria, sa'e la Yakub, la Yoses, la Yudas ro la Simon? Io, amancawa-amancawa rau-Na wara ma midi ta ake rau.” B̄ara ndedena siad̄oho tulakaina Sia.

4 # Yah. 4:44 Edempara Ruma Isa nggahina d̄i siad̄oho, ”Sab̄ua dou manabi d̄i lia ra horoma tab̄e-b̄e, selasi d̄ikampo ra mporo ndaina, ro d̄i ade woha cina ra angina ro iwa ra wekina.”

5D̄ihid̄i ede Ruma Isa wati loana ndawi lampa rawi mab̄isa ra guna kone sab̄ua, selasi katahona pila-pila dou masupu kai tohona rima-Na ese wawo doud̄oho ede. 6Sia mbora akana b̄a da'imbi b̄a siad̄oho.

Ruma Isa nggaduna sampuru d̄ua dou anamori-Na

(Mat. 10:5-15, Luk. 9:1-6)

Edempara Ruma Isa laona d̄i rasa-rasa d̄ikompe ra pei ede, ro ngoa ra teina. 7Ou b̄a Sia sampuru d̄ua dou anamori-Na, edempara nggadu d̄ua-d̄uana siad̄oho ro mbeina kuasa d̄i siad̄oho d̄i ru'u b̄aka kalosakaina roh-roh seta. 8#Luk. 10:4-11 Sia mbeina ngoa ra tei ake d̄i ru'u b̄a siad̄oho, ”Aina wa'amu au-au ade lampa ra laokaimu, selasi tiki. Aina wa'amu ngaha ra nono atao kad̄ud̄u sadeka, atao piti rau. 9Kanipu sapatu, pala aina wa'amu d̄ua ndo'o b̄aju.” 10Sia nggahi rauna, ”Nggara nggomid̄oho malu'usi d̄i ade sab̄ua uma, ngge'epu ta ede sampe nggomid̄oho tu'u wi'imu kota ede. 11#Kis. 13:51 Pala nggara nggomid̄oho ronggamu d̄i sab̄ua hid̄i, ro dou-dou ta ede wati ne'ena tarima rakade'e nggahi nggomid̄oho, tu'u wi'ipu hid̄i ede. Ro furapu kalub̄u d̄i ed̄imu d̄imakawarana siad̄oho!”.

12Edempara sampuru d̄ua anamori Ruma Isa ede laona. Siad̄oho lao ngoa ra kahabana b̄a one manusia pab̄uaku tobana rad̄i dosa-dosana. 13#Yak. 5:14 Anamori Ruma Isa ede b̄aka kalosana mboto roh seta, osakaina mina zaitun d̄i dou masupu ro katahona siad̄oho.

Madena la Yahya Mataki kandeu karaso dou

(Mat. 14:1-12, Luk. 9:7-9)

14 # Mat. 16:14, Mrk. 8:28, Luk. 9:19 Haba-haba mab̄oha sara'a mandad̄i ede rongga rau d̄i sangaji Herodes, b̄ara ngara Ruma Isa nawa'ura mbou tab̄e-b̄e. Wara dou ma nggahi, ”Yahya Mataki kandeu karaso dou nawa'ura mori mbali! B̄ara ndedena Sia ntaukaina kuasa d̄imakarawi mab̄isa ra guna ede.”

15Pala dou-dou makalai manggahi, ”Sia Elia.”

Wara rau ma nggahi, ”Sia nabi, b̄une sab̄ua dou ade weki nabi jamana ma'ulu.”

16Wakatu Herodes ringana ede, nggahi sia, ”Pasti ake la Yahya Mataki kandeu karaso dou ma ntoina wa'ura kau b̄a nahu fati kakori tutana. Ake sia nawa'ura mori mbali!”

17 # Luk. 3:19-20 B̄ara sawatipu b̄a ede Herodes wa'ura kauna dou wa'u ra leto la Yahya, ro kalu'una d̄i ade uma bui. Herodes karawi ndedekaina b̄ara la Herodias, wei ari ndaina, eded̄u la Filipus. B̄ara Herodes nawa'ura nikana lab̄o la Herodias, 18ro mab̄oha lampa rawi ede wa'ura ntuwu rojo b̄a la Yahya d̄i Herodes b̄une ake, ”Wati loamu nika lab̄o wei ari ndaimu ede!”

19B̄ara ndedena la Herodias wi'ina d̄i ade d̄i la Yahya ro nane'eku hade la Yahya, pala sia wati loana karawi lampa rawi ede, b̄ara tapa b̄a Herodes. 20B̄ara la Herodes nawa'ura kau dou jaga kataho salamakai la Yahya d̄i uma bui, b̄ara sia nadahu d̄i la Yahya. Sia nab̄adeku la Yahya sab̄ua dou ma taho ranggadu b̄a Ruma Hatalla. Ro poda nggara nuntusi la Yahya, Herodes naca'u ringa rau, konena sia ndad̄i darura poda adena b̄ara ringana ede.

21Cumpukaina la Herodias rakana wakatu mataho d̄i ainaina ndiha rawarakai Herodes. Aipu ede Herodes ndawina ndiha d̄i ru'u samenana dou mana'e b̄ora d̄i karaja'ana, perwira-perwira ro dou-dou mana'ekai ela ra dou Galilea. 22Ade ndiha ede ana sampela siwe la Herodias matari, ro tarina ede nawancuku kasana wea ade Herodes ro dou-dou mamai ede. Edempara Herodes nggahina d̄i ana dou sampela ede, ”Au ne'e nggomi, rahompa. Nahu d̄imambeina d̄i ru'u nggomi!” 23Edempara Herodes sakena d̄i ana dou sampela ede kai sumpa. Nggahi Herodes, ”Au-au raraho b̄a nggomi nahu d̄imambeimu, kone sab̄inci karaja'anku!”

24Edempara ana dou siwe sampela ede losa sod̄ina inana, ”Ina, auku mataho d̄i pab̄ua raho b̄a mada?”

Cambe b̄a inana, ”Rahopu tuta la Yahya Mataki kandeu karaso dou.”

25Ana dou siwe sampela ede roci mai mbalina d̄i Herodes ro nggahina, ”Mada karaho tuta la Yahya Mataki kandeu karaso dou d̄i mbeimu mada wakatu ake wa'u ese wawo tare!”

26Ringana raho ede nawancuku ncoki ade Herodes. Pala sia wati loana tula raraho ede b̄ara sia nawa'ura sumpa d̄i tando dou-dou mamai ede. 27Ndad̄i sia parenta lalona sab̄ua dou majaga weha tuta la Yahya Mataki kandeu karaso dou. Ndad̄i tentara ede laona aka uma bui, edempara fati kakorina tuta la Yahya. 28Edempara sia wa'ana tuta ede ese wawo tare ro mbeina d̄i dou sampela ede. Ro dou sampela ede mbeina inana. 29Wakatu anamori-anamori la Yahya ringana lampa rawi ede, siad̄oho lao wehana timba la Yahya, edempara umbuna.

Ruma Isa mbeina ngaha lima riwu dou

(Mat. 14:13-21, Luk. 9:10-17, Yah. 6:1-14)

30Rasu-rasu ranggadu b̄a Ruma Isa ede edempara mbali walina, ro kab̄orona weki lab̄o Ruma Isa. Siad̄oho ngoana d̄i Ruma Isa sara'a rawa'u karawi ro tei b̄a siad̄oho. 31Mboto poda dou ma lao ra mai, ndad̄ina ngaha rau wati wara wakatu d̄i ru'u b̄a Ruma Isa ro anamorid̄oho-Na. B̄ara ndedena Ruma Isa nggahina d̄i anamorid̄oho-Na, ”Maira ndai talaoku d̄i hid̄i ma lingi, tab̄e d̄i loakai kalai weki ndai ro nggomid̄oho maloa sanawa samporo.” 32Edempara lao siad̄oho kai sampa aka hid̄i ma lingi.

33Pala mboto dou mawa'ura eda siad̄oho matu'u wi'i hid̄i ede, ro nab̄adeku tab̄e lao kai siad̄oho. Ndad̄i, rad̄i samenana kota d̄i dana ra rasa ede, dou-dou narai-raiku takengge ndano loakud̄u rongga ulu sawatipu rongga Ruma Isa ro anamorid̄oho-Na. 34#Bil. 27:17, 1Raj. 22:17, 2Taw. 18:16, Yeh. 34:5, Za. 10:2, Mat. 9:36 Wakatu Ruma Isa londona d̄i sampa, Sia edana mboto dou. Sia kasi adena d̄i doud̄oho ede, b̄ara siad̄oho b̄une jimba wati wara ma'ompukaina. Edempara Sia tampu'u ngoa ra teina mboto lampa rawi d̄i siad̄oho. 35Wakatu wa'ura mbia ai, anamori Ruma Isa nggahina d̄i Sia, ”Nad̄enira ngad̄i ai ro hid̄i ake nad̄o'o lab̄o rasa. 36Ncewi tahopu kau lao dou-dou ake Pa, loakud̄u siad̄oho naloa weli d̄i ngaha ra nonona d̄i rasa-rasa ro kampo-kampo d̄i kompe ra pei ake.”

37Pala Cambe b̄a Ruma Isa, ”Nggomid̄oho d̄imambeina ngaha ra nono siad̄oho.”

”Sab̄ua madad̄oho pab̄ua lao weli roti maco'i d̄ua ratu piti salaka d̄imbeikai ngaha ru'u dou-dou ake?” ndede nggahi anamori-anamori Ruma Isa ede.

38Edempara sod̄i b̄a Ruma Isa, ”Sab̄une roti mawara d̄i nggomid̄oho? Lao tiojapu.”

Sawa'u b̄a lao tio b̄a siad̄oho, nggahi siad̄oho, ”Wara lima mbua roti ro d̄ua tembe uta rau.”

39Edempara kau b̄a Ruma Isa doho sara'a dou ede doho kalompo-kalompo d̄i mpori ma moro. 40Dou-dou ede doho katahona, nakalompo-kalompo. Wara ma saratu dou sakalompo, ro wara rau ma lima mpuru dou sakalompo. 41Edempara weha b̄a Ruma Isa lima mbua roti ro uta d̄ua tembe ede, edempara d̄ongana langi ro rentana tarima kasi d̄i Ruma Hatalla. Sawa'u b̄a ede tob̄e-tob̄e b̄a Sia roti ede kai rima-Na ro mbeina d̄i anamorid̄oho-Na ru'u d̄i cengga-cengga d̄i dou mamboto ede. Ro uta d̄ua tembe ede d̄i cengga-cengga rau d̄i siad̄oho sara'ana. 42Siad̄oho ngahana sampe mbocuna. 43Sawa'u b̄a ede ngaha ra nono mancewi ede kab̄oro b̄a anamori-anamori Ruma Isa – sara'ana wara sampuru d̄ua wonca b̄ini. 44Dou mone ma ngaha roti ede wara kira-kira lima riwu dou.

Ruma Isa lampana ese wawo oi

(Mat. 14:22-33, Yah. 6:16-21)

45Sawa'u b̄a ede Ruma Isa kau lalona anamorid̄oho-Na lao ulu kai sampa aka Betsaida ipa b̄ae b̄a ndano, b̄ara Sia makau wa'una dou mamboto ede dula. 46Sawa'u b̄a co'ona dou mamboto ede, Ruma Isa lao sambeana aka doro to'i. 47Wakatu wa'ura ngad̄i ai, sampa anamori Ruma Isa wa'ura wara ade woha ndano. Pala Ruma Isa mbuipu ta ari lua. 48Eda b̄a Sia anamorid̄oho-Na, nahompaku karawe sampa ede b̄ara angi matapa ra tule sampa. B̄ara ndedena, kira-kira hela b̄oe tolu ro b̄oe ini aimasid̄i, Sia maina d̄isiad̄oho lampana ese wawo oi. Ro Sia lampa ntuwuna b̄une-b̄une mane'e kalalo siad̄oho. 49Wakatu eda b̄a siad̄oho b̄a one Sia malampa ese wawo oi, kacai b̄a siad̄oho Sia henca, 50ndad̄ina siad̄oho kanggica b̄a dahuna. B̄ara siad̄oho sara'ana edana Sia ro siad̄oho nawancuku wed̄ina.

Pala Ruma Isa nggahi lalona d̄i siad̄oho, ”Midira! Nahu Isa. Aina dahu!” 51Edempara Sia ne'ena d̄i sampa siad̄oho, ro angi rau denggana. Anamori Ruma Isa nawancuku mbora akana. 52Lampa rawi mab̄isa ra guna kai lima roti ede watipu loa ka'ao b̄a siad̄oho. Nancokiku d̄i loa ka'ao b̄a siad̄oho.

Ruma Isa katahona dou-dou masupu d̄i Genesaret

(Mat. 14:34-36)

53Wakatu ronggana ipa b̄ae b̄a ndano, siad̄oho lab̄una d̄ikengge ndano Genesaret. 54Wakatu losa siad̄oho ade sampa eda b̄a dou-dou b̄a one ma mai ede Ruma Isa. 55Edempara siad̄oho narai tab̄e-b̄e d̄i sara'a dana ra rasa ede, ro tampu'ura wa'ana dou-dou masupu ese wawo dipi d̄i Ruma Isa. Nggara ringa b̄a siad̄oho b̄a one Ruma Isa wara d̄isab̄ua hid̄i, siad̄oho nawa'aku dou-dou ma supu ta aka. 56Tab̄e-b̄e rau maikai Ruma Isa – nataho d̄i kampo, d̄i kota atao d̄i desa-desa – dou-dou ngge'empa maina ta ede ro nawi'iku dou-dou masupu b̄a siad̄oho d̄i lapanga. Edempara naraho podaku b̄a siad̄oho loakud̄u dou-dou masupu ede kau to'ina tudu jumba Ruma Isa, kone b̄a sumpu mpoana. Sara'a ma ratuduna, nandad̄i taho.

Currently Selected:

MARKUS 6: LAIBHP

Highlight

Copy