MARKUS 15

Ruma Isa d̄i tando Pilatus

(Mat. 27:1-2, 11-14, Luk. 23:1-5, Yah. 18:28-38)

1Aimasid̄i-sid̄i poda, sara'a mahkama Agama lu'u rau dou-dou mana'ekai imam, dou-dou mana'ekai Yahudi ro guru-guru agama mafaka roci-rocina. Ndante b̄a siad̄oho Ruma Isa, sawa'u b̄a ede wa'ana Sia ro d̄onggona d̄i Pilatus. 2Sod̄i b̄a Pilatus d̄i Ruma Isa, ”Sab̄ua poda Nggomi sangaji dou Yahudi?”

”Ndedeku nggahi b̄a ndaimu,” cambe b̄a Ruma Isa.

3Dou-dou mana'ekai imam mbotoku nggahina d̄i b̄ab̄u ra lo'okaina Ruma Isa. 4Edempara Pilatus sod̄i walina d̄i Ruma Isa, ”Sab̄ua wati ne'emu cambe b̄a Nggomi? Tiopu mboto poda b̄ab̄u ra lo'o ranggahi b̄a siad̄oho d̄i ru'u b̄a Nggomi?”

5Pala Ruma Isa wati cambena kone sampu'u, ndad̄ina Pilatus mbora akana.

Ruma Isa b̄ab̄u kai hukuma made

(Mat. 27:15-26, Luk. 23:13-25, Yah. 18:39–19:16)

6D̄isanikina Aruraja Paskah, rabiasakai Pilatus nahoriku sab̄ua dou rabui ma ncihi ncao rakad̄ale b̄a dou mamboto. 7D̄i ade uma bui, ade weki dou-dou mabaronta marahade dou wakatu ngango ra ngora, wara sab̄ua dou mangara la Barabas. 8Mboto dou makab̄oro weki narahoku d̄i Pilatus loakud̄u sia hori weana sab̄ua dou rabui b̄une ranginakai. 9Sod̄i b̄a Pilatus d̄i siad̄oho, ”Sab̄ua mane'e nggomid̄oho, nahu mahori weamu sangaji dou Yahudi ede d̄i ru'u nggomid̄oho?” 10B̄ara Pilatus nab̄adeku b̄a one dou-dou mana'ekai imam d̄onggokaina Ruma Isa d̄i sia b̄ara hiana adena.

11Pala dou-dou mana'ekai imam sad̄u'una dou mamboto loakud̄u rahona d̄i Pilatus hori wea la Barabas d̄i ru'u b̄a siad̄oho. 12Ndad̄i nggahi wali Pilatus d̄i dou mamboto ede, ”Nggara ndedesi, auku d̄i pab̄ua karawi b̄a nahu d̄i dou rapehe b̄a nggomid̄oho kai sangaji dou Yahudi ede?”

13Kanggica siad̄oho, ”Salipu Sia!”

14”Pala auku rawi-Na ma'iha ra madab̄ae?” sod̄i b̄a Pilatus.

Edempara siad̄oho kanggicana ma'ipi na'e wali, ”Salipu Sia!”

15Pilatus nane'eku kasana wea ade dou mamboto ede, edempara hori b̄a sia la Barabas d̄i ru'u siad̄oho. Ndad̄i kau b̄a sia dou cambo Ruma Isa, edempara d̄onggona Ruma Isa ru'u d̄i salib.

Tentara-tentara masungge-sungge Ruma Isa

(Mat. 27:27-31, Yah. 19:2-3)

16Ruma Isa wa'a b̄a tentara-tentara aka kanto pangadila d̄i asi gubernu. Edempara samenana tentara ou kab̄oro weki. 17Edempara kakani kai b̄a siad̄oho d̄i Ruma Isa jumba keta, ro ndawina songko sangaji kai sanga-sanga rui, sawa'u b̄a ede tohona ese wawo tuta Ruma Isa. 18Sawa'u b̄a ede mbeina salam b̄a siad̄oho d̄i Sia, ”Io Sangaji dou Yahudi!” nggahi siad̄oho. 19B̄oe b̄a siad̄oho tuta Ruma Isa kai tiki, edempara katufena Sia ro nemba ra sujuna d̄i tando Ruma Isa. 20Sawa'u b̄a kampa'a-mpa'akaina Ruma Isa, siad̄oho runcuna jumba keta ede, edempara kakani mbalikaina kani ndai-Na. Sawa'u b̄a ede Sia wa'a kalosa ru'u d̄i salib.

Ruma Isa d̄isalib

(Mat. 27:32-44, Luk. 23:26-43, Yah. 19:17-27)

21 # Rm. 16:13 D̄iwoha ncai pakasa b̄a siad̄oho sab̄ua dou kau tundu wea haju salib Ruma Isa. Dou ede ncihi ncao b̄oupu ramaina rad̄i desa ne'e lao aka kota. (Ngarana la Simon, dou Kirene – ama la Aleksander ro la Rufus.) 22Ruma Isa lao wa'a aka sab̄ua hid̄i ngarana Golgota, aona ”Hid̄i Rangka”. 23Ta ede siad̄oho ne'ena mbei d̄i Ruma Isa anggo ma campo lab̄o d̄upa, pala Ruma Isa wati ne'ena nono anggo ede. 24#Mzm. 22:19 Sawa'u b̄a ede salib b̄a siad̄oho Sia, ro cengga-cenggana kani ra lombo Ruma Isa kai undina d̄i katantukaina ru'u cua-cua ndaina. 25Salibkai Ruma Isa ede wakatu aimasid̄i b̄oe ciwi. 26Ta ese salib-Na ratau tunti mab̄oha b̄ab̄u ra lo'o d̄i ru'u b̄a Ruma Isa, eded̄u: ”Sangaji Dou Yahudi”. 27Masama-sama lab̄o Ruma Isa salib rau b̄a siad̄oho d̄ua dou parampo; sab̄ua dou tawela wana-Na ro sab̄ua dou wali tawela ku'i-Na. [28#Yes. 53:12 Kai ndedena ndad̄ira au ratunti ade Alkitab; eded̄u: ”Sia rawi'ikai b̄a dou eded̄u dou-dou madab̄ae.”]

29 # Mzm. 22:8, 109:25, Mrk. 14:58, Yah. 2:19 Dou-dou ma lampa sai ta ede nawiri-wiriku tutana ro kasungge-sunggena Ruma Isa. Nggahi siad̄oho, ”Oe, Nggomi ma ne'e d̄umba Bait Allah ro mane'e tu'u mbaliku ade tolu nai. 30Wajo londora rad̄i salib ede ro kasalamara weki ndai-Mu!”

31Ndede rauja dou-dou mana'ekai imam ro guru-guru agama kasungge-sunggena Ruma Isa. Siad̄oho nggahina d̄i sab̄ua lab̄o sab̄ua dou, ”Sia nakasalamaku dou makalai, pala weki ndai-Na wati loana kasalama! 32Nggara podasi Sia sangaji Israel, Sangaji Mambei salama, tahora ake Sia londona d̄i salib ede, loakud̄u eda ra'imbi b̄a nami d̄i Sia!”

Dou-dou rasalib sama lab̄o Ruma Isa ede rau kasungge-sunggena Ruma Isa.

Madena Ruma Isa

(Mat. 27:45-56, Luk. 23:44-49, Yah. 19:28-30)

33Wunga mbolo ninu, tolu jam ntoina sara'a dana ra rasa ede ndad̄i rindi. 34#Mzm. 22:2 Ro wakatu b̄oe tolu aimambia, Ruma Isa kanggicana kai eli ma na'e, ”Eloi, Eloi, lama sabakhtani?” ede aona, ”Io Ruma Hatalla-Ku, Io Ruma Hatalla-Ku, b̄ab̄auku Ita tu'u wi'ikai-Mu Mada?”

35Pila-pila dou mawara ta ede ringana eli kanggica ede, ro nggahina, ”Kade'epu, Sia ouna la Elia!” 36#Mzm. 69:22 Sab̄ua dou d̄i ade weki siad̄oho roci-roci lao wehana wunta taka, edempara d̄etana d̄i ade anggo ngonco. Edempara wunta taka ede cakina d̄i sumpu satako haju, edempara d̄etana d̄i wiwi Ruma Isa, ro nggahina, ”Ngena, mai ndai tatioku sab̄ua la Elia namai kalondoku Sia d̄i salib ede.”

37Edempara Ruma Isa kanggicana, ro madena.

38 # Kel. 26:31-33 Satampa ratero d̄i ade Bait Allah ncipa d̄ua tampu'u ta ese malalo awana. 39Perwira ma kid̄i d̄i tando salib ede, edana b̄uneku madena Ruma Isa. Nggahi Perwira ede, ”Poda romo Dou ake Ana Ruma Hatalla!”

40 # Luk. 8:2-3 Ta ede wara rau pila-pila dou siwe ma wunga ntanda sando'ona sara'ana ede. D̄i ade wekina ede wara la Salome, la Maria Magdalena, ro la Maria ina la Yakub to'i ro la Yoses. 41Siad̄oho eded̄u dou-dou siwe ma b̄atu ra mabantu Ruma Isa aipu Sia warana d̄i Galilea. Ro mboto rau dou-dou siwe makalai ta ede marawa'u mai aka Yerusalem sama-sama lab̄o Ruma Isa.

Umbu kai Ruma Isa

(Mat. 27:57-61, Luk. 23:50-56, Yah. 19:38-42)

42-43Tampu'ura ngad̄i ai wakatu mai la Yusuf dou Arimatea. Sia anggota Mahkama Agama ma d̄i lia ra horoma. Sia rau wunga ngenana wakatu Karaja'an Allah. Ainaina ede ainaina D̄isadiakai (eded̄u ainaina sawatipu b̄a ainaina Sabat). B̄ara ndedena la Yusuf kai disana mai satandona d̄i Pilatus ro rahona timba Ruma Isa. 44Pilatus mbora akana ringa b̄a one Ruma Isa nawa'ura made. Ndad̄i kau b̄a sia dou ou mana'ekai tentara ro sod̄ina d̄i sia sab̄ua Isa wa'ura ntoi madena. 45Sawa'u b̄a ringana rangoa b̄a perwira ede, Pilatus kauna la Yusuf weha timba Ruma Isa. 46Edempara la Yusuf welina salolo kaena linen ma'alu ro sawa'u b̄a kalondona timba Ruma Isa, salolo b̄a sia kai kaena ede. Sawa'u b̄a ede karu b̄a sia timba ede d̄i ade sab̄ua rade ra ndawi ade doro wadu. Sawa'u b̄a ede kiru b̄a sia sab̄ua wadu na'e d̄i b̄ontokai ncai rade ede. 47Wunga ede la Maria Magdalena ro la Maria ina la Yoses natio kab̄aeku tab̄era karukai timba Ruma Isa.

Currently Selected:

MARKUS 15: LAIBHP

Highlight

Copy