MARKUS 13
13
Ruma Isa nuntu ra nggahina mab̄oha ndumbana Bait Allah
(Mat. 24:1-2, Luk. 21:5-6)
1Wakatu Ruma Isa tu'u wi'ina Bait Allah, sab̄ua dou ade weki anamorid̄oho-Na manggahi, ”Guru, tatiopu uma-uma ratu'u ede, tio kab̄aepu wadu-waduna. Nawancuku ntikana!”
2Cambe b̄a Ruma Isa, ”Nggomi ma'edaku uma-uma ratu'u ma na'e ede? Wati wara kone sab̄ua wadu rau rad̄i uma-uma ratu'u ede d̄i mangge'e sadundu weki d̄i hid̄ina. Sara'ana d̄i d̄umba.”
Susa ra darura ade ro kancoki b̄a dou
(Mat. 24:3-14, Luk. 21:7-19)
3Sawa'u b̄a ede Ruma Isa laona aka Doro to'i Zaitun, ro dohona d̄i hid̄i ma ncao tando lab̄o Bait Allah. Edempara la Petrus, la Yakub, la Yahya, ro la Andreas maina d̄i Sia d̄i nuntu ra nggahikaina kai cara weki lab̄o Sia. 4”Pa, tangoa to'ipu d̄i madad̄oho,” nggahi siad̄oho d̄i Sia, ”b̄une aiku samenana ede d̄imandad̄i? Ro auku tanda-tandana makatadana b̄a one wa'ura raka wakatuna?”
5”Aina kabaremu,” cambe b̄a Ruma Isa, ”aina sampe nggomid̄oho b̄ohakai b̄a tipu. 6Mboto dou d̄imamai kai ngara Nahu ro nanggahi, ’Nahuku Sia!’ edempara tipuna mboto dou. 7Nggara nggomid̄oho maringasi eli ncao ra tub̄a ro haba lewa ra laka, aina dahumu. Lampa rawi-lampa rawi ede pab̄ua ndad̄i, pala ede laina aona b̄a one wa'ura raka wakatuna kiama. 8Bangsa ma sab̄ua d̄imalewa lab̄o bangsa ma kalai. Negara ma sab̄ua d̄imadei negara ma kalai. Tab̄e-b̄e wara epu ro bahaya sarahid̄o. Sara'ana ede ampodena tampu'ukaina, b̄une santika pili d̄i iu b̄a dou siwe ma ne'e nggana.
9 #
Mat. 10:17-20, Luk. 12:11-12 Nggomid̄oho aina kabare, b̄ara nggomid̄oho d̄i wa'u ra leto b̄a dou ro narandaku aka mahkama-mahkama. Nggomid̄oho d̄ib̄oe d̄i uma-uma sambea. Nggomid̄oho d̄iwa'a satando aka dou-dou mana'ekaina ro d̄i sangaji-sangaji b̄ara nggomid̄oho anamori Nahu. Ro edeku wakatuna d̄i ru'u b̄a nggomid̄oho d̄imbeikaimu sakasi mab̄oha Nahu d̄i siad̄oho. 10Haba Mataho ma ramai ta Ruma Hatalla ede musti d̄i kambou wa'u d̄i samenana bangsa. 11Ro nggara nggomid̄oho d̄i wa'u ra leto b̄a dou ro d̄i wa'a aka kanto pangadila, aina darura ademu mab̄oha auku d̄i pab̄ua nggahi b̄a nggomid̄oho. Nggara nawa'usi rakara wakatuna d̄i nuntu ra nggahikaimu, nggahipu au rangoana d̄i nggomi ade wakatuna. B̄ara nggahi ra eli rarenta b̄a nggomid̄oho ede laina nggahi ra eli ndaimu, malaisi ma ramai ta Roh Allah. 12Dou nakaihaku ari ra sa'e ndaina d̄i hade. Ede rau d̄imandad̄i d̄i weki ama lab̄o anana. Ana-anana d̄ima'ao ina ra amana, ro nad̄onggoku dou matua ede d̄i hade. 13#Mat. 10:22 Nggomid̄oho d̄i daca'u b̄a samenana dou b̄ara nggomid̄oho anamori Nahu. Pala dou ma wa'u taha sampe cumpukaina, d̄i kasalamana.”
Lampa rawi ma'iha ra dab̄ae d̄imakalelina
(Mat. 24:15-28, Luk. 21:20-24)
14 #
Dan. 9:27, 11:31, 12:11 ”Nggomid̄oho d̄ima'eda ’Lampa rawi ma'iha ra madab̄ae d̄i Makalelina’ kid̄ina d̄i hid̄i rakantakai d̄i ru'una. (Catata d̄i ru'u b̄a dou mabaca: Tio kab̄aepu auku aona!) D̄i wakatu ede dou ma wara aka Yudea pab̄uaku raina aka doro-doro. 15#Luk. 17:31 Dou ma wara ese wawo b̄utu uma aina londo ralu'u d̄i ade uma d̄i wehakaina au-au. 16Dou ma wara aka oma aina mbali d̄i wehakaina jumbana. 17Nawancuku samangina ainaina-ainaina ede ru'u b̄a dou siwe ma wunga na'e loko ro ina ma mbuipu susu anana! 18Do'apu loakud̄u lampa rawi ede aina ndad̄i wunga oru ura. 19#Dan. 12:1, Why. 7:14 D̄i ainaina-ainaina ma samangi ede d̄imawara susa ra darura ma watipu parana ndad̄i, ratampu'u aipu kandad̄i b̄a Ruma Hatalla dunia sampe ake, ro wati rau d̄imandad̄i wali. 20Watisi kaporo b̄a Ruma Hatalla wakatu ede, ndad̄i wati wara kone sab̄ua dou rau masalama. Pala b̄ara ela-Na, Ruma Hatalla kaporona wakatu ede.
21D̄iwakatu ede nggara nawarasi sab̄ua dou manggahi d̄i nggomid̄oho, ’Tiopu, Sangaji Mambei salama ede wara ta ake!’ atao ’Tiopu, Sia wara ta aka!’ – aina imbimu d̄i dou ede. 22B̄ara dou-dou mambei salama palasu ro nabi-nabi palasu d̄imamai. Siad̄oho nakarawiku lampa rawi maheba poda ro lampa rawi-lampa rawi mab̄isa ra guna d̄i tipukaina nggara loasi, ela Ruma Hatalla rau. 23Ndad̄i, aina kabare! Sara'ana ede wa'ura ngoa b̄a Nahu d̄i nggomid̄oho sawatipu lampa rawi ede ndad̄ina.”
Maina Ana Manusia
(Mat. 24:29-31, Luk. 21:25-28)
24 #
Yes. 13:10, Yeh. 32:7, Yl. 2:10, 31, 3:15, Why. 6:12 ”Sawa'u b̄a jamana susa ra darura ede, liro d̄imarindi, ro wura watid̄u taroa walina. 25#Yes. 34:4, Yl. 2:10, Why. 6:13 Ntara-ntara d̄imamab̄u mai ese mai ta langi, ro makuasa ese langi d̄imandad̄i mbari mbura. 26#Dan. 7:13, Why. 1:7 D̄iwakatu ede Ana Manusia d̄i edamu maina ade apu kai kuasa mana'e ro mad̄ese ra ntasa. 27Sia d̄imanggadu mala'eka-mala'eka kab̄oro ela ra kad̄ale-Na d̄i upa mbua wela dana, tampu'u d̄i sumpu-sumpu dana sampe aka sumpu-sumpu langi.”
Tana'o rad̄i fu'u ara
(Mat. 24:32-35, Luk. 21:29-33)
28”Wehapu tana'o rad̄i fu'u ara. Nggara sanga-sanga mpidana jao ra mapu, ro natampu'ura ngoduna, nggomid̄oho mab̄adeku b̄a one oru mpana nawa'ura d̄eni. 29Ndede rau nggara edasi b̄a nggomid̄oho lampa rawi-lampa rawi ede ndad̄ina, nggomid̄oho mab̄adeku b̄a one wakatuna nawa'ura d̄eni poda. 30D̄ib̄ademu! Sara'a mandad̄i ake d̄imandad̄i sawatipu b̄a dou-dou ma mori wakatu ake made sara'ana. 31Langi ro dana d̄imambora, pala nggahi ra eli Nahu ngge'empa santoi-ntoina.”
Wati wara kone sab̄ua dou mab̄ade ainaina ra wakatuna
(Mat. 24:36-44)
32 #
Mat. 24:36
”Konena ndede, wati kone sab̄ua dou rau b̄ade b̄une aiku ainaina atao wakatuna. Mala'eka-mala'eka aka saroga wati ro Ana rau wati b̄adena, selasi Ama mpoampa ma b̄ade. 33Ndad̄i, nggomid̄oho pab̄uapu jaga-jagamu ro aina kabare, b̄ara nggomid̄oho wati b̄ademu b̄une aiku wakatuna. 34#Luk. 12:36-38 Ka'ada'ana ibara sab̄ua dou ma tu'u wi'i umana edempara laona d̄i hid̄i mad̄o'o. Kau b̄a sia adad̄ohona d̄ima'uru umana, ro mbeina taki ra puta siad̄oho cua-cua ndaina. D̄i dou majaga ncai, ngoa wi'i b̄a sia loakud̄u jaga katahona. 35B̄ara ndedena nggomid̄oho pab̄uapu jaga-jaga, b̄ara nggomid̄oho wati b̄ademu b̄une aiku dou ma ntau uma ede mai mbalina – kombisi aimambia, kombisi samana'e ai, kombisi aimasubu, atao kombi wakatu wontu liro. 36Nggara sia namai sadekasi, ai to'ina sampe sia edana nggomid̄oho wunga marumu. 37Au ranggahi b̄a Nahu ake d̄i ru'u b̄a nggomid̄oho, Nahu ma nggahi rau d̄i ru'u b̄a samenana dou: jaga-jagapu!”
Currently Selected:
MARKUS 13: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
