MATIUS 8
8
Ruma Isa katahona sab̄ua dou ma supu ncola
(Mrk. 1:40-45, Luk. 5:12-16)
1Ruma Isa londona rad̄i doro to'i, ro mboto dou mab̄atu Sia. 2Aipu wakatu ede mai lalo sab̄ua dou ma supu ncola. Sia mai sujuna d̄itando Ruma Isa, edempara nggahina, ”Pa, nggara ngawasi Ita, Ita maloaku kataho supu mada.”
3D̄ama b̄a Ruma Isa dou ede ro nggahina, ”Nahu ngawa. Tahora nggomi!” Wakatu ede wa'u mbora supu dou ede. 4#Im. 14:1-32 Edempara nggahi Ruma Isa d̄i dou ede, ”Kawarapu! Aina nuntumu d̄i cou-cou rau. Pala laopu aka imam, ro rahopu d̄i imam ede d̄imakatantuna b̄a one nggomi mawa'ura taho. Sawa'u b̄a ede lao d̄onggo ra mbeipu koroba raparenta b̄a la Musa, d̄i bukutikaimu d̄i dou-dou b̄a one nggomi mawa'ura poda-poda taho.”
Ruma Isa katahona ada sab̄ua dou perwira Roma
(Luk. 7:1-10)
5Wakatu Ruma Isa lu'una aka Kapernaum, sab̄ua dou perwira Roma mai rakana Sia, ro rahona bantu d̄i Sia. 6”Pa,” nggahi perwira ede, ”ada mada nasupuku aka uma. Sia nasupu made b̄inci nawancuku ncoki iuna ro namarumpa d̄i hid̄i marukaina.”
7Nggahi Ruma Isa, ”Nahu d̄imalao katahona sia.”
8”Edera Pa,” cambe b̄a perwira ede, ”Mada wati patuna tarima Ita d̄i uma la mada. Ita parentampa. Peare ada la mada ede nataho. 9B̄ara la mada rau pab̄uaku b̄atu d̄iparenta dou ese mai b̄a la mada. Ro awa mai b̄a la mada wara rau prajuri-prajuri ma pab̄ua b̄atu parenta la mada. Nggara la mada makau sab̄ua dou prajuri, ’Lao!’ sia nalao. Nggahisi b̄a la mada d̄imakalaina, ’Maipu ta ake!’ sia namai rauku; ro kausi b̄a la mada ada la mada, ’Ndawipu ake!’ sia pasti nandawiku.”
10Wakatu Ruma Isa ringana au ranggahi perwira ede, Sia nawancuku midi adena. Edempara Sia nggahina d̄i dou-dou ma wunga b̄atu Sia, ”Ede heba dou ake. Kone d̄i ade weki dou Israel watipu edaku dou ma'ipi imbi b̄une ake! 11#Luk. 13:29 Poda! Mboto dou d̄imamai ele mai ro mamai d̄i mai d̄imakad̄ihi ade sama-sama lab̄o la Ibrahim, la Ishak, ro la Yakub d̄i ade Karaja'an Saroga.
12 #
Mat. 22:13, 25:30, Luk. 13:28 Sapodakaina dou-dou ma pab̄ua ndad̄i anggota Karaja'an Saroga d̄ikalosa paki ari lua d̄i hid̄i marindi ncaki. Ta ede siad̄oho d̄imanangi ro d̄imasusa ra ncoki iu.” 13Edempara Ruma Isa nggahina d̄i perwira ede, ”Dulara, au ra'imbi b̄a nggomi ede d̄imandad̄i.”
Ro wunga ede lalo adana ede tahona.
Ruma Isa katahona supu mboto dou
(Mrk. 1:29-34, Luk. 4:38-41)
14Ruma Isa laona aka uma la Petrus. Ta ede Sia edana riana siwe la Petrus mawunga hengge sari'i d̄i hid̄i marukaina. 15D̄ama wea b̄a Ruma Isa rimana, edempara mbora henggena. Ina ede tu'u kab̄ua weana ngaha ra nono d̄i ru'u b̄a Ruma Isa.
16D̄i wakatu tampu'ura mbia ai, dou mawa'a mboto dou ma lu'ukai b̄a roh seta d̄i Ruma Isa. Ro kai sampu'u nggahimpa, Ruma Isa b̄aka kalosana roh-roh seta ede, ro kataho rauna sara'a dou ma supu. 17#Yes. 53:4 Ruma Isa karawina sara'ana ede, ro kai ede ndad̄ira au ranggahi b̄a Nabi Yesaya, eded̄u, ”Sia matangguna susa ra ncoki ndaita ro makatahona supu ndaita.”
Dou-dou ma ne'e ndad̄i ana mori Ruma Isa
(Luk. 9:57-62)
18Wara mboto poda dou d̄i kompe ra pei Ruma Isa. Wakatu eda b̄a Ruma Isa siad̄oho sara'ana, Sia kauna ana morid̄oho-Na lao ipa b̄ae b̄a ndano. 19Edempara sab̄ua dou guru agama mai rakana Ruma Isa ro nggahina, ”Pa guru, mada kane'e b̄atu Ita tab̄era laokai Ita!”
20Cambe b̄a Ruma Isa, ”Lako doro nantau karombo, nasi nantau sob̄u, pala Ana Manusia wati ntauna hid̄i d̄i sanawakaina.”
21Edempara sab̄ua dou anamori-Na makalai manggahi, ”Pa, mbei to'ipu iji mada dula wa'u d̄ima'umbu ama mada.”
22Pala cambe b̄a Ruma Isa, ”B̄atupu Nahu, co'opu dou mamade na'umbu mpa ndaina dou mamade.”
Ruma Isa kadenggana angi na'e
(Mrk. 4:35-41, Luk. 8:22-25)
23Ruma Isa ne'ena d̄i sampa ro anamorid̄oho-Na lao sama lab̄o Sia. 24Wed̄i lalompa mai angi mana'e poda d̄i ndano ede ndad̄ina sampa b̄oe b̄a balumba. Wakatu ede Ruma Isa wunga maruna. 25Edempara anamorid̄oho-Na maina d̄i Sia ro rod̄una Sia, ”Pa! Bantu! Ihara ndaita!” nggahi siad̄oho.
26”B̄ab̄auku nggomid̄oho dahukaimu?” nggahi Ruma Isa. ”Nggomid̄oho kura imbimu d̄i Nahu!” Sawa'u b̄a ede Ruma Isa tu'u kid̄ina ro ficana angi ra ndano ede. Edempara ndano ndad̄i midi poda.
27Anamori-anamori Ruma Isa mbora mena akana. Nggahi siad̄oho, ”Dou auku Sia ake, sampe angi ra balumba rau nab̄atuku parenta-Na!”
Ruma Isa katahona d̄ua dou ma ralu'ukai b̄a roh seta
(Mrk. 5:1-20, Luk. 8:26-39)
28Ruma Isa ronggana ipa b̄ae b̄a ndano d̄i dana ra rasa Gadara. Ta aka d̄ua dou ma lu'ukai b̄a roh seta mai rakana Sia. D̄ua dou ede nawancuku mbanina, ndad̄ina wati wara kone sab̄ua dou madisa lampa sai ta ede. 29Siad̄oho losana d̄i karombo-karombo rade ro kanggicana, ”Ana Ruma Hatalla, d̄i kab̄unemu nami b̄a Nggomi? Sab̄ua Nggomi mane'era kancoki nami kone watipu raka wakatuna?”
30Wati d̄o'ona lab̄o hid̄i ede, wara wawi mamboto poda mawunga ngupa ngaha. 31Roh-roh seta ede rahona d̄i Ruma Isa, ”Nggara Nggomi makausi losa nami d̄i ade dou ake, kaupu nami lu'u d̄i ade wawi-wawi ede.”
32”Lao!” Nggahi Ruma Isa. Roh-roh seta ede losana rad̄i dou d̄uana ede, edempara lu'una d̄ei wawi-wawi. Ro wawi-wawi ede rau lao raina ro babuna rad̄i kengge dembi ro lu'una ade ndano, edempara made mimina.
33Dou-dou matonggu wawi ede lao raina aka kota, ro ngoakaina samenana mandad̄i ede, ro au ma ndad̄i d̄i dou d̄uana ma ralu'ukai b̄a roh seta ede. 34Ndad̄i sara'a dou d̄i kota ede lao rakana Ruma Isa. Wakatu eda b̄a siad̄oho Ruma Isa, siad̄oho raho poda-podana d̄i Ruma Isa loakud̄u Ruma Isa tu'u wi'ina dana ra rasa siad̄oho.
Currently Selected:
MATIUS 8: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
