LUKAS 7
7
Ruma Isa katahona ada sab̄ua dou perwira Roma
(Mat. 8:5-13)
1Sawa'u b̄a nggori nggahi ra nuntu-Na lampa rawi ede d̄i dou mamboto, Ruma Isa laona aka Kapernaum. 2Ta ede wara perwira Roma ma ntau ada ma'ipi podaku d̄i mecina. Adana ede nasupuku ro nane'era made. 3Wakatu perwira ede ringana mab̄oha Ruma Isa, sia kauna pila-pila dou mana'ekaina dou Yahudi lao raka Sia d̄imaraho loakud̄u Sia maina ro kataho adana. 4Wakatu ronggara aka Ruma Isa, dou-dou ede raho nembana loakud̄u Sia bantuna perwira ede. ”Perwira ake patu d̄ibantu b̄a Ita,” nggahi siad̄oho d̄i Ruma Isa, 5b̄ara sia nawancuku meci ra ca'una bangsa ndaita ro wa'ura katu'una uma d̄i sambeakai madad̄oho.”
6Edempara Ruma Isa lao sama-samana lab̄o siad̄oho. Wakatu Ruma Isa ne'empara rongga d̄i uma ede, perwira ede kauna lengad̄ohona lao raka Sia d̄i ne'ena ngoa, ”Ita aina kasusa weki laomu aka uma mada. Mada wati patuna d̄imatarima ao Ita d̄i uma mada. 7B̄ara ndedena ndai mada wati disaku mai satando d̄i Ita. Ndad̄i takau to'ipu d̄iloakaina ada mada ndad̄i taho. 8B̄ara mada rau oko d̄iparenta dou ese mai b̄a mada ro awa mai b̄a mada wara rauja tentara-tentara ma pab̄uaku okona d̄i parenta mada. Nggara kausi b̄a mada d̄i tentara, ’Lao!’ sia rau nalaoku; ro nggahisi b̄a mada d̄imakalaina, ’Maipu ta ake!’ sia namaiku. Ro kausi b̄a mada ada mada, ’Karawipu ake!’ sia rau nakarawiku.”
9Ruma Isa namidi adena ringa ede. Sia tambarina ro nggahina d̄i dou mamboto ma wunga lampa b̄atu-Na, ”Heba poda dou ake. Kone d̄i ade woha dou Israel watipu raka eda b̄a Nahu imbi mad̄ei b̄une ake!”
10Wakatu dou rakakai ede dula mbali aka uma perwira ede, adana ede wa'ura taho.
Ruma Isa kamori mbalina ana, b̄a dou siwe mbaru mboha
11Wati ntoina sawa'u b̄a ede, Ruma Isa laona aka kota Nain. Anamorid̄oho-Na ro dou mboto lao sama lab̄o Sia. 12Wakatu Ruma Isa rongga aka tad̄a lawa kota, dou-dou mawunga lao otona dou mamade ari mai b̄a kota. Ma made eded̄u ana dou mone, anana makese weki b̄a dou siwe mbaru mboha. Mboto dou kota ma'otona ina ede. 13Wakatu eda b̄a Ruma Isa dou siwe mbaru mboha ede, Sia kasi adena d̄i sia, edempara nggahina, ”Aina nangimu, Ina!” 14Edempara Ruma Isa lao d̄enina d̄i dou mamade ratundu ede ro d̄amana. Edempara dou-dou matundu ede midina. Nggahi Ruma Isa, ”Oe ana mone, Nahu makau nggomi tu'u!” 15Ana dou mone ma wa'ura made ede, tu'u dohona ro tampu'ura nuntu ra nggahina. Edempara d̄onggo mbei b̄a Ruma Isa ana dou mone ede d̄i inana.
16Sara'ana dou dahu ro tampu'ura roi ra wadina Ruma Hatalla. Nggahi siad̄oho, ”Sab̄ua dou nabi ma na'e wa'ura mai d̄i ade woha ndaita! Ruma Hatalla wa'ura mai d̄imakasalama ela-Na!”
17Haba mab̄oha Ruma Isa ake wa'ura mbou d̄i sara'a Yudea ro d̄i dana ra rasa d̄ikompe ra peina.
Dou rakakai b̄a la Yahya Mataki kandeu karaso dou
(Mat. 11:2-19)
18Anamori la Yahya mangoa d̄i la Yahya sara'a mandad̄i ede. Edempara la Yahya ouna d̄ua dou anamorina. 19Edempara kauna siad̄oho lao d̄i Ruma Isa ro sod̄i, ”Sab̄ua Ita d̄imamai b̄une rasake b̄a Ruma Hatalla, atao pab̄uaku madad̄oho ngena dou makalai?”
20D̄ua dou anamori la Yahya ede laona d̄i Ruma Isa ro nggahina santab̄eta ”Yahya Mataki kandeu karaso dou makau madad̄oho sod̄i d̄i Ita, sab̄ua Ita dou d̄imamai rasake b̄a Ruma Hatalla, atao pab̄uaku madad̄oho ngena dou makalai?”
21Wakatu ede, Ruma Isa katahona mboto dou, ro b̄aka kalosana mboto roh seta ro kandad̄ina dou mambuda loa eda. 22#Yes. 35:5-6, 61:1 Ndad̄i cambe b̄a Ruma Isa, ”Lao dula mbalipu d̄i la Yahya ro ngoapu au raringa ro ra'eda b̄a nggomid̄oho: dou mambuda naloa eda, dou mamade b̄inci naloa lampa, dou ma supu ncola nataho, dou mampinga naringa, dou mamade namori mbali, ro Haba Mataho ma ramai ta Ruma Hatalla d̄ingoa ra kahaba d̄i dou-dou mancoki mori. 23Taho ra ntika d̄i ru'u b̄a dou ma wati wara alasa d̄idaca'ukaina Nahu.”
24Sawa'u b̄a lao dou-dou rakakai b̄a la Yahya ede, Ruma Isa tampu'u nuntu ra nggahi-Na d̄i dou mamboto mab̄oha la Yahya, nggahi-Na, ”Nggomid̄oho laomu d̄i so sarae, auku lao tiomu? Sab̄ua salela mpori ra'ewu b̄a angi? 25Nggomid̄oho laomu auku lao tiomu? Sab̄ua dou-dou ma ntika kaniro? Dou-dou ma ntika kani ro ma caru mori nangge'e d̄i asi! 26Ndad̄i, nggomid̄oho losamu auku lao tiomu? D̄imatio sab̄ua dou nabi? Ncihi, mala ncewi ese mai b̄a nabi. 27#Mal. 3:1 B̄ara la Yahya edeku aona ranggahi d̄i ade ayat Alkitab ake,
’Akeku dou ranggadu b̄a Nahu,’ nggahi Ruma Hatalla,
Nahu d̄imanggadu ulu sia ntewi kaisi Nggomi,
loakud̄u sia d̄imahengga ulu ncai d̄i ru'u b̄a Nggomi!’ ”
28”D̄ikawaramu,” nggahi Ruma Isa wali, ”d̄i dunia ake watipu warana dou ma ncewi na'e ntewi kaisi la Yahya Mataki kandeu karaso dou. Pala dou ma to'i poda d̄i ade weki ela Karaja'an Allah, nancewi na'e ntewi kaisi la Yahya Mataki kandeu karaso dou.”
29 #
Mat. 21:32, Luk. 3:12 Sara'ana dou – lu'u rau dou-dou mataki tagi bea – maringana Ruma Isa manggahi lampa rawi ede; siad̄oho edeku dou-dou mawa'ura to'a rakaukai b̄a Ruma Hatalla ro ngawana d̄ikandeu karaso b̄a la Yahya. 30Pala dou-dou Farisi ro guru-guru agama wati ngawana tarima rania b̄a Ruma Hatalla d̄i ru'u ndai siad̄oho. Siad̄oho wati ngawana d̄ikandeu karaso b̄a la Yahya.
31Edempara Ruma Isa nuntu ra nggahi walina, nggahi-Na, ”Kai auku d̄intewikai b̄a Nahu dou-dou jamana ake? B̄une auku siad̄oho ede? 32Siad̄oho b̄une d̄ambe-d̄ambe to'i ma doho d̄i amba; sakalompo dou manggahi nggao d̄imakalaina, ’Nami marawa rawa d̄i kad̄ihi kai ade d̄iru'u b̄a nggomid̄oho, pala nggomid̄oho wati ngawamu tari! Nami rawamu rawa d̄incokikai b̄a ade nggomid̄oho, ro nggomid̄oho wati nangimu!’ 33La Yahya Mataki kandeu karaso dou maina – sia puasana ro wati nonona anggo – ro nggahi nggomid̄oho, ’Sia ralu'ukai b̄a seta!’ 34Ana Manusia maina – Sia ngaha ra nonona – edempara nggahi nggomid̄oho, ”Tiopu dou aka! Na'e ngahana, naca'u mawu, lenga dou mataki tagi bea ro lenga dou madosa.’ 35Kone ade ndedekaina, timba ra lemba Ruma Hatalla wa'ura wara pahuna d̄i ade sara'ana dou ma tarimana.”
Ruma Isa d̄i uma la Simon
36Sab̄ua dou Farisi, mangara la Simon, ma'unda Ruma Isa mai ngaha d̄i umana. Ruma Isa lao aka umana ro doho ngahana. 37#Mat. 26:7, Mrk. 14:3, Yah. 12:3 D̄i kota ede wara rauja sab̄ua dou siwe ma mori b̄ini b̄a dosa. Wakatu ringa b̄a sia b̄a one Ruma Isa wunga ngahana d̄i uma dou Farisi ede, sia mai wa'ana sab̄ua boto marmar mawara isi mina mengi. 38Sia kid̄ina d̄ikontu Ruma Isa kompe ed̄i-Na ro nangi b̄ecana ed̄i Ruma Isa kai oi madana. Edempara ed̄i Ruma Isa osa kamangona kai honggona edempara ngiluna ro luakaina mina mengi. 39Wakatu dou Farisi ma ra'unda Ruma Isa edana lampa rawi ede, nggahi sia d̄ei adena, ”Nggarasi dou ake nabi, tantu nab̄adeku b̄a Sia cou dou siwe ede ma tudu Sia, ro b̄a one dou siwe ede mori b̄ini b̄a dosa!”
40Edempara nggahi Ruma Isa d̄i la Simon, ”Simon, wara d̄i ne'e nggahi b̄a Nahu d̄i nggomi.”
”Io, Pa Guru, ”cambe b̄a la Simon, ”tanggahira.”
41Nggahi Ruma Isa, ”Wara d̄ua dou ma nconggo d̄i dou ma mbeina sepe piti. Ma sab̄ua dou manconggo lima ratu piti salaka, ro sab̄ua dou wali lima mpuru piti salaka. 42D̄uana ede, wati wa'una cola nconggona ede, edempara nconggo siad̄oho ede fura kampoina. Ya, couku d̄i ade weki d̄uana ede d̄imancewi meci ra ca'u d̄i dou ma rambeina sepe piti ede?”
43”Nggahi madasi dou ma ipi mboto rafura weana nconggo edeku!” cambe b̄a la Simon.
”Nggahimu ede ncihi,” cambe b̄a Ruma Isa. 44Edempara Ruma Isa tiona dou siwe ede ro nggahi-Na d̄i la Simon, ”Nggomi ma'edaku dou siwe ake? Nahu maiku d̄i uma nggomi, ro nggomi wati sadia weamu Nahu oi d̄ikarasokai ed̄i-Ku; pala dou siwe ake wa'ura karasona ed̄i Nahu kai oi madana, ro osa kamangona kai honggona. 45Nggomi wati ngilu aomu Nahu, pala dou siwe ake wati dengga-denggana ngiluna ed̄i Nahu ratampu'u Nahu maiku ta ake. 46Nggomi wati luamu mina d̄i tuta Nahu, pala dou siwe ake wa'ura luana mina mengi d̄i ed̄i Nahu. 47Poda-poda: meci ra ca'una ma na'e ede tanda b̄a one dosana ma mboto wa'ura kangampu wea! Nggara dou d̄ikangampu wea sato'i, sia d̄imameci ra ca'u sato'i rau.”
48Edempara nggahi Ruma Isa d̄i dou siwe ede, ”Dosa-dosamu wa'ura kangampu wea.”
49Dou-dou makalai ma doho ngaha sama lab̄o Ruma Isa tampu'u nuntu ra nggahi d̄i weki ndaid̄ohona, ”Couku dou ake sampe loana kangampu wea dosa dou?”
50Pala nggahi Ruma Isa d̄i dou siwe ede, ”B̄ara nggomi imbimu d̄i Nahu, nggomi d̄ikasalama. Laora kai taho ademu!”
Currently Selected:
LUKAS 7: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
