LUKAS 15

Jimba ma moda

(Mat. 18:12-14)

1 # Luk. 5:29-30 D̄isab̄ua ainaina, mboto dou mataki tagi bea ro dou-dou ra wi'ikai wati taho b̄a ela dou, mai kade'ena nuntu ra nggahi Ruma Isa. 2Dou-dou Farisi ro guru-guru agama tampu'ura bada red̄e. Nggahi siad̄oho, ”Ci, dou ake natarima aoku dou ma'iha ro nanaha ngaha samaku lab̄o siad̄oho!” 3B̄ara ndedena Ruma Isa caritana d̄i siad̄oho conto ra ibara ake,

4”Misampara sab̄ua dou d̄i ade weki nggomid̄oho wara ntaumu saratu mbua jimba, edempara moda sab̄ua – auku d̄i karawi b̄a sia? Pasti sia natu'u wi'iku jimba ma ciwimpuru ciwi mbua ede d̄i so mpori, ro nalao ngupaku ma moda ede sarakakaina. 5Ro nggara raka edasi b̄a sia jimbana ede, sia naneo poda adena ndad̄i tundu b̄a sia jimbana ede, 6edempara wa'a kadulana. Sawa'u b̄a ede sia ouna lengad̄ohona ro dou-dou d̄ikompe ra peina, ro nggahina, ’Mai ndaita kad̄ihiku ade. Jimbaku ma moda wa'ura eda mbaliku!’ 7Ndede rauku d̄i saroga wara kad̄ihi ade ma ncewi na'e b̄ara sab̄ua dou madosa ma toba, ntewi kaisi ro d̄i ade ciwimpuru ciwi dou ma wa'ura taho ro wati paraluna tobana.”

Piti ma moda

8”Atao misampara sab̄ua dou siwe mantau sampuru mbua piti salaka, edempara moda sab̄ua – auku d̄i karawi b̄a sia? Sia naka'aku ilo ro nacafiku umana ro nangupaku tab̄e-b̄e sampe sarakakaina pitina ede. 9Wakatu raka eda mbali b̄a sia pitina ede, sia ouna lengad̄ohona ro dou-dou d̄ikompe ra peina, edempara nggahina, ’Nahu neo poda adeku wa'ura eda mbaliku pitiku ma moda. Mai ndai takad̄ihiku ade!’ 10Ndede rau mala'eka Ruma Hatalla neo adena nggara warasi sab̄ua dou madab̄ae matoba rad̄i dosa-dosana. Imbipu!”

Ana ma moda

11Nggahi wali Ruma Isa, ”Waraku sab̄ua dou ama ma ntau d̄ua dou ana mone. 12Ma cumpukaina nggahina d̄i sia, ’Ama, tambei to'ipu d̄i mada wunga ake ru'uku d̄i ade ntau ra wara ndaita.’ Edempara mbeikai b̄a amana ntau ra wara ede kai cengga d̄ua lab̄o sa'ena. 13Pila-pila nai sawa'u b̄a ede ana macumpukaina ede landana pasaka ru'una ede edempara laona aka dana ra rasa ma d̄o'o. Ta aka sia balanja ka'ihana piti kai mori mbocu ra mawu. 14Wakatu cumpu sara'a pitina, ndad̄ira d̄i dana ra rasa ede sarahid̄o ma ipi poda, ndad̄ina sia tampu'ura ncoki morina. 15Edempara sia laona karawi d̄i sab̄ua dou d̄i ade rasa ede, ma kauna sia lao aka omana matonggu wawina. 16Sia na'ipi podaku hid̄ona ndad̄ina ne'eku isi lokona kai ngaha ra nono rangaha wawi-wawi ede. Konena sia nawancuku hid̄ona, wati kone sab̄ua dou mambeina ngaha ra nono d̄i sia. 17Cumpukaina sia kawarana weki ro nggahina, ’Dou-dou ma karawi d̄i amaku naremba poda ngaha ra nonona, ro nahu ta ake ne'empara made sarahid̄o! 18Nahu d̄imalao aka amaku, ro kanggahi d̄i sia: Ama, mada wa'ura dosa d̄i Ruma Hatalla ro d̄i Ita. 19Watira patu walina mada ake d̄i pehekai ana Ita. Wi'ikaipu mada ake dou makarawi ngaha gaji d̄i Ita.’ 20Edempara lao sia dula aka uma amana.

Mbuipu d̄o'o lab̄o umana, sia wa'ura eda b̄a amana. Kai kasi ade poda b̄a amana rai weha aona sia, edempara pohu ra ngilu b̄a amana. 21’Ama,’ nggahi anana ede, ’mada wa'ura dosa d̄i Ruma Hatalla ro d̄i Ita. Watira patu walina mada d̄i pehekai ana Ita.’ 22Pala ou b̄a amana adad̄ohona ro nggahina, ’Roci! Wehapu kani ra lombo ma ncewi ntika, ro kakanikaipu sia. Kakani weapu sinci d̄i kangge rimana, ro sapatu d̄i ed̄ina. 23Sawa'u b̄a ede wehapu ana capi ma mpore ro sambelepu. Ndai d̄imangaha ndiha ro kad̄ihi ade. 24B̄ara anaku ake wa'ura made, ake wa'ura mori mbali; sia wa'ura moda, ake wa'ura raka eda mbali.’ Edempara siad̄oho tampu'una ngaha ndiha.

25Wunga mbuipu ade ndiha ede, ana ma sarambakaina wara d̄i oma. Wakatu dula sia ro d̄enimpara lab̄o umana, sia ringana eli musik ro dou-dou matari. 26Sia ouna sab̄ua dou ada d̄i ade weki adad̄ohona, edempara sod̄i b̄a sia, ’Wara au mandad̄i d̄i uma?’ 27Cambe b̄a adana ede, ’Arimu wa'ura mai mbali! Ro Amamu wa'ura kauna sambele ana capi ma mpore, b̄ara sia wa'ura raka mbalina anana ade ka'ada'ana salama!’

28Ana ma sasa'ekaina ede nambani podaku ndad̄i sia wati ngawana lu'u ade uma. Edempara losa amana ro siwina sia kau lu'u. 29Pala nggahi sia, ’Pila-pila mba'a ntoina mada karawi kapodaku ade d̄i ru'u Ita. Watipu iuku mada dangawa rakaukai b̄a Ita. Ro au rambei b̄a Ita d̄i mada? Kone sab̄ua mbe'e rau watipu iuku mbei b̄a Ita d̄i ngaha ndihakaiku lab̄o lengad̄ohoku! 30Ana Ita ede wa'ura kampoina ntau ra wara Ita lab̄o dou-dou siwe masunda, pala wakatu sia dulana, sambele b̄a Ita ana capi ma mpore d̄i ru'u b̄a sia!’ 31’Anaku,’ cambe b̄a amana, ’nggomi mawara ncau ta ake lab̄o nahu. Samenana ntau nahu eded̄u ntau nggomi rau. 32Pala ndai pab̄uaku ngaha ndiha ro kad̄ihi ade, b̄ara arimu wa'ura made, pala ake wa'ura mori mbali; sia wa'ura moda, pala ake wa'ura eda mbali.’ ”

Currently Selected:

LUKAS 15: LAIBHP

Highlight

Copy