LUKAS 13

Nggara watisi toba rad̄i dosa-dosa, pea ma'iha leliku

1D̄iwakatu ede dou caritana d̄i Ruma Isa mab̄oha pila-pila dou Galilea rahade b̄a Pilatus, wakatu siad̄oho wunga d̄onggo ra mbeina koroba d̄i Ruma Hatalla. 2Cambe b̄a Ruma Isa mab̄oha carita ede, nggahi Ruma Isa ”B̄ara dou-dou Galilea ede rahade b̄une ede, kacai b̄a nggomid̄oho ede bukutina siad̄oho mancewi dosa ntewi kaisi lab̄o sara'ana dou Galilea ma kalai? 3Sama sakali wati! Pala kawarapu: nggara nggomid̄oho watisi pakimu cara morimu madab̄ae ro mai satandomu d̄i Ruma Hatalla, nggomid̄oho sara'ana d̄imamade rau, b̄une siad̄oho. 4B̄une rauku lab̄o sampuru waru dou ma made d̄i Siloam, wakatu mbo'o pita b̄a uma mad̄ese? Kacai b̄a nggomid̄oho ede katadana siad̄oho nancewi mboto dosana ntewi kaisi lab̄o dou-dou makalai ma ngge'e d̄i Yerusalem? 5Sama sakali wati! Nahu manggahi sakali wali: Nggomid̄oho nggara watisi pakimu rawi madab̄ae ro mai satandomu d̄i Ruma Hatalla, nggomid̄oho sara'ana d̄imamade rau b̄une siad̄oho.”

Conto ra ibara fu'u ara ma wati mbua

6Sawa'u b̄a ede Ruma Isa carita rauna conto ra ibara ake, ”Wara sab̄ua dou mantau fu'u ara d̄i nggaro anggona. D̄i sab̄ua ainaina sia lao ngupana wua d̄i fu'u haju ede, pala wati rakana eda kone sab̄ua rau. 7Ndad̄i, nggahi sia d̄i dou matonggu nggarona, ’Tiopu, wa'ura tolu mba'a nahu maiku ta ake d̄i ngupakaiku wua ara d̄i fu'u ara ake, pala wati rakaku eda kone sab̄ua rau. Natahopu b̄o'omu fu'u haju ede! Sia nakampoimpa ngaha ra nono ade dana!’ 8Pala cambe b̄a dou mataki tonggu nggaro ede, ’Pa, co'opu sia morina samba'a wali. Mada d̄imamaco hekona dana ro tauku pupu. 9Kombisi sia nambua d̄i mba'a satando. Pala nggara watisi, loa kau b̄a Ita b̄o'o fu'u haju ede.’ ”

Ruma Isa katahona sab̄ua dou siwe mambuku d̄i ainaina Sabat

10D̄i sab̄ua ainaina Sabat, Ruma Isa mangoa ra tei d̄i sab̄ua uma sambeakai. 11Ta ede wara sab̄ua dou siwe ma wa'ura sampuru waru mba'a supu, b̄ara wara roh seta d̄i ade sarumbuna. Dou siwe ede nambuku ro wati loana kid̄i kampende. 12Wakatu eda b̄a Ruma Isa sia, nggahi Ruma Isa d̄i sia, ”Ina, ita wa'ura hori weki rad̄i supumu!” 13Edempara Ruma Isa tohona rima-Na ese wawo dou siwe ede, ro wakatu ede lalo sia kid̄i mpendena edempara sia roi ra wadina Ruma Hatalla.

14 # Kel. 20:9-10, Ul. 5:13-14 Dou mana'ekai uma sambea ede mbanina, b̄ara Ruma Isa katahona dou wakatu ainaina Sabat, b̄ara ndedena sia nggahina d̄i dou-dou, ”Wara ini nai d̄i karawikai; maipu d̄i ainaina ede d̄i kataho weakai supumu, aina d̄i ainaina Sabat!”

15Cambe b̄a Ruma, ”Nggomid̄oho ake maca'u coro-coro! D̄i ainaina Sabat samenana dou nahoriku capi atao keledaina rad̄i kandana ro wa'a kalosana d̄i mbeikaina nono. 16Ta ake wara sab̄ua dou siwe londo ra mai la Ibrahim, ma wa'ura sampuru waru mba'a ntoina d̄iki b̄a Ibilis. Sab̄ua sia wati loa d̄ihori wea rad̄i ade rad̄ikikai ede d̄i ainaina Sabat?” 17Cambe b̄a Ruma Isa ede nakandad̄iku dou-dou ma musu Ruma Isa maja poda; pala sara'ana dou-dou makalaina nasana adena eda sara'a ma b̄isa ra guna rakarawi b̄a Ruma Isa.

Conto ra ibara isi sawi

(Mat. 13:31-32, Mrk. 4:30-32)

18Sod̄i b̄a Ruma Isa, ”Karaja'an Allah, b̄uneku ka'ada'ana? Kai auku loa d̄intewikai b̄a Nahu? 19Ka'ada'ana b̄une conto ra ibara ake. Sanggini isi sawi ra weha b̄a sab̄ua dou edempara nggud̄ana d̄i nggarona. Isi ede woko edempara ndad̄i fu'u haju, ro nasi-nasi ndawina sob̄u d̄i sanga-sanga fu'u haju ede.”

Conto ra ibara b̄uha

(Mat. 13:33)

20Sod̄i b̄a Ruma Isa sakali wali, ”Karaja'an Allah, kai auku d̄i kantewikai b̄a Nahu ka'ada'ana? 21Ka'ada'ana b̄une b̄uha raweha b̄a dou siwe edempara ncambu lab̄ona kai upa mpuru lite mub̄u, sampe howo sara'ana.”

Tad̄a ncai ma tuka

(Mat. 7:13-14, 21-23)

22D̄i ade lampa ra laokaina lao aka Yerusalem, Ruma Isa lampa saina d̄i kota-kota ro kampo-kampo ro ngoa ra tei salahona. 23Edempara wara dou masod̄i d̄i Sia, ”Pa, sab̄ua sato'impa dou d̄i kasalama?”

Cambe b̄a Ruma Isa, 24#Mat. 7:13-14 ”Usahapu lu'u kai tad̄a ncai ma tuka. B̄ara kawarapu! Mboto dou mane'e lu'u pala wati loana. 25Wakatu b̄ola dou mantau uma, ro kab̄una tad̄a ncaina, nggomid̄oho kid̄i ta ari lua ro tampu'umu toke-toke tad̄a ro nggahimu, ’Ruma, tahengga to'ipu tad̄a d̄i ru'u b̄a madad̄oho!’ Ruma ede d̄imacambena, ’Nahu wati b̄adeku nggomid̄oho ramaimu tab̄e!’ 26#Mat. 7:22-23 Nggomid̄oho d̄imacambe, ’Madad̄oho wa'ura ngaha ra nono samamu lab̄o Ita, ro Ita wa'ura ngoa ra tei raumu d̄i ncai-ncai kota madad̄oho!’ 27#Mzm. 6:9 Pala Ruma ede d̄imanggahi walina, ’Nahu wati b̄adeku nggomid̄oho ratab̄ena. Lao pesopu wekimu ta ake, nggomid̄oho makarawi ma dab̄ae!’ 28#Mat. 22:13, 25:30 #Mat. 8:11-12 Wakatu eda b̄a nggomid̄oho la Ibrahim, la Ishak, ro la Yakub ro sara'ana nabi makad̄ihi ade d̄i ade Karaja'an Allah, nggomid̄oho d̄imanangi ro ncoki ra susa iumu b̄ara ndai nggomid̄oho d̄ib̄aka kalosa! 29Dou-dou d̄imamai ele mai ro mai d̄imai, mai d̄amai ro mai d̄omaina, ro d̄imakad̄ihi ade d̄i ade Karaja'an Allah. 30#Mat. 19:30, 20:16, Mrk. 10:31 Sapodakaina, wara dou macumpukaina d̄imandad̄i dou masarambakaina, ro wara dou masarambakaina d̄imandad̄i dou macumpukaina.”

Ruma Isa kasi adena d̄i Yerusalem

(Mat. 23:37-39)

31D̄iwakatu ede wa'u, wara pila-pila dou Farisi maina d̄i Ruma Isa ro nggahina, ”Aina ngge'emu ta ake! Laopu d̄i hid̄i makalai, b̄ara Herodes mane'e hade Ita.”

32Cambe b̄a Ruma Isa, ”Laopu ro ngoapu d̄i dou ma wati wara onena ede, ’Ainaina ake ro naisi Nahu mab̄aka kalosa roh seta ro kataho dou masupu, pala d̄i ainaina katolukaina, Nahu d̄imakanggorina karawi-Ku.’ 33Kone ade ndedena Nahu pab̄uaku lampa ra lao wali d̄i ainaina ake, naisi ro d̄id̄isi, b̄ara wati tahona sab̄ua dou nabi d̄i hade ari mai b̄a Yerusalem.

34Yerusalem, Yerusalem! Nabi-nabi hade b̄a nggomi! Dou-dou ra nggadu b̄a Ruma Hatalla b̄ale b̄a nggomi kai wadu sampe madena! Wa'ura pila-pila kali Nahu ne'eku pohu sara'ana doumu b̄une ina janga mahoru ana-anana tapita kaletena, pala nggomi wati ngawamu! 35#Mzm. 118:26 B̄ara ndedena Ruma Hatalla wati d̄ende ra wa'a walina nggomi. D̄i b̄ademu, tampu'u ake nggomi wati d̄ima'eda Nahu wali, sampe nggahi nggomi, ’Taho Ra Ntai Sia ma mai kai ngara Ruma.’ ”

Currently Selected:

LUKAS 13: LAIBHP

Highlight

Copy