YAHYA 17

Ruma Isa do'a weana d̄i ru'u b̄a anamorid̄oho-Na

1Sawa'u b̄a nggahi ndedena, Ruma Isa d̄ongana ese langi ro nggahina, ”Ama, ake wa'ura raka wakatuna. Kad̄ese ra kantasapu Ana-Mu, loakud̄u Ana-Mu makad̄ese ra kantasa rauna Ama. 2Ama wa'ura mbeita kuasa d̄i samenana ela manusia d̄i Ana, loakud̄u Sia mbeina mori masapodakaina ro ma'ederahid̄i d̄i samenana dou rambei b̄a Ama d̄i Sia. 3Akeku mori masapodakaina ro ma'ederahid̄i; loakud̄u dou mapata Ama, sab̄uampa Ruma Hatalla ma poda, ro mapata Ruma Isa Al Masih ranggadu b̄a Ama. 4Mada wa'ura kad̄ese ra kantasaku Ama ese wawo dunia ake kai kanggoriku karawi rakau kai b̄a Ama d̄i Mada. 5Ama! Kad̄ese ra kantasa to'ipu Mada ake d̄i Ama, kai kad̄ese ra kantasa rakantau b̄a Mada sama lab̄o Ama sawatipu kandad̄i dunia ake.

6Mada wa'ura kapata weaku Ama d̄i dou-dou rad̄i dunia ake rawa'u mbei b̄a Ama d̄i Mada. Siad̄oho eded̄u ntau Ama, ro Ama wa'ura mbeita siad̄oho d̄i Mada. Siad̄oho wa'ura b̄atuna nggahi ra eli Ama. 7Ake siad̄oho wa'ura b̄ade b̄a one sara'a rambei b̄a Ama d̄i Mada ramaina ta Ama. 8Wa'ura karongga b̄a Mada d̄i siad̄oho nggahi ra eli Ama rambei b̄a Ama d̄i Mada; ro siad̄oho wa'ura tarimana. Siad̄oho nab̄adeku b̄a one Mada poda-poda ramaiku ta Ama ro siad̄oho imbi b̄a one Ama ma ranggadu Mada.

9Mada do'aku d̄i ru'u b̄a siad̄oho. Mada wati do'aku d̄i ru'u b̄a dunia malaisi d̄i ru'u b̄a dou-dou ma wa'ura mbei b̄a Ama d̄i Mada, b̄ara siad̄oho eded̄u ntau Ama. 10Samenana ntau Mada eded̄u ntau Ama rau; ro samenana ntau Ama eded̄u ntau Mada rau. Mada d̄i kad̄ese ra kantasa d̄i woha siad̄oho. 11Ake Mada mai d̄i Ama. Mada wati ngge'e waliku d̄i dunia; pala siad̄oho wara d̄i dunia. Ama ma raso! Jagapu siad̄oho kai kuasa ngara Ama, eded̄u ngara ma rawa'u mbei b̄a Ama d̄i Mada – loakud̄u siad̄oho ndad̄i sab̄ua, sama b̄une Ama lab̄o Mada rau sab̄ua. 12#Mzm. 41:10, Yah. 13:18 Wakatu mbuipu Mada sama lab̄o siad̄oho, Mada wa'ura jagaku siad̄oho kai kuasa ngara Ama – ngara rambei b̄a Ama d̄i Mada. Mada wa'ura jagaku siad̄oho lab̄o wati kone sab̄ua dou rau d̄i ade weki siad̄oho mamoda, selasi sia pab̄ua d̄imamoda romo; loakud̄u ndad̄ira au ratunti ade Alkitab. 13Ake Mada maiku d̄i Ama. Sara'ana ake nggahi b̄a Mada wakatu Mada mbuipu d̄i dunia; loakud̄u siad̄oho iu podana neo ade Mada. 14Mada wa'ura karonggaku d̄i siad̄oho nggahi ra eli Ama, ro dunia madaca'u siad̄oho, b̄ara siad̄oho laina ntau dunia, sama b̄une Mada laina ntau dunia. 15Mada wati rahoku loakud̄u Ama maweha siad̄oho d̄i ade dunia ake, pala raho b̄a Mada loakud̄u Ama majagana siad̄oho rad̄i La Madab̄ae. 16Sama b̄une Mada laina ntau dunia, siad̄oho rau laina ntau dunia. 17Kandad̄i to'ipu siad̄oho ntau rakalai b̄a Ama kai ncai lampa rawi mapoda; nggahi ra eli Ama edeku lampa rawi mapoda. 18B̄une Ama mawa'ura nggadu Mada d̄i dunia, ndede rauja Mada manggadu siad̄oho d̄i dunia. 19D̄iru'u pentikai b̄a siad̄oho, Mada mad̄onggo weki kai ntau rakalai Ama, loakud̄u siad̄oho rau mandad̄i ntau rakalai Ama kai ncai lampa rawi mapoda.

20Laina d̄i ru'u b̄a siad̄oho mpoa Mada do'aku. Mada do'a d̄iru'u b̄a dou-dou ma imbi d̄i Mada b̄a nuntu ra nggahi b̄a siad̄oho ake. 21Mada maraho nemba Ama, loakud̄u siad̄oho sara'ana mandad̄i sab̄ua, b̄une Ama masab̄ua lab̄o Mada, ro Mada lab̄o Ama. Raho-raho to'impa siad̄oho ndad̄i sab̄uana lab̄o Ndaita loakud̄u dunia imbina b̄a one Ama ma ranggadu Mada. 22Mada wa'ura mbeiku siad̄oho d̄ese ra ntasa rambei b̄a Ama d̄i Mada, loakud̄u siad̄oho ndad̄i sab̄uana, sama b̄une Ndaita masab̄ua rau; 23Mada lab̄o siad̄oho, ro Ama lab̄o Mada; loakud̄u siad̄oho poda-poda sab̄uana. Ndad̄i dunia d̄imab̄ade b̄a one Ama ma ranggadu Mada, ro b̄a one Ama mameci ra ca'u siad̄oho b̄une Ama mameci ra ca'u Mada.

24Ama, Mada ne'eku loakud̄u siad̄oho, rambei b̄a Ama d̄i Mada, wara sama lab̄ona Mada d̄i hid̄i warakai Mada, loakud̄u siad̄oho edana d̄ese ra ntasa Mada; eded̄u d̄ese ra ntasa rambei b̄a Ama d̄i Mada, b̄ara Ama mameci ra ca'u Mada sawatipu kandad̄i dunia ake. 25Ama ma adi! Dunia wati patana Ama, pala Mada kapata Ama; ro dou-dou ake nab̄adeku b̄a one Ama ma ranggadu Mada. 26Mada wa'ura katadaku ngara Ama d̄i siad̄oho; ro Mada kakarawi ncau b̄une ede, loakud̄u meci ra ca'u Ama d̄i Mada nangge'empa d̄i ade siad̄oho lab̄o Mada masab̄ua lab̄o siad̄oho.”

Currently Selected:

YAHYA 17: LAIBHP

Highlight

Copy