MARKUS 16

Yesus abali tubo

(Mat. 28:1-8; Luk. 24:1-12; Yoh. 20:1-10)

1Salataa kooloyo Tadean toliiso, Maria Magdalena, Maria Yakobus tinano tukon Salome ampakon mongoli rampa-rampa sulano natuluwo Yesus bajano. 2Dodowasoono tuuno salataa kooloyo sumbot, doi oloyo tumbeno doi minggudoo, yanila ampakon doi kibuloo. 3-4Doi loloon tangano yanila pobantikon meeng tukon bailon, “Indee kai komo moola tomboniiyo kita moliate dobatudoo potutupi dokibuloo buango?” Sabab do batudoo babasal tuuno. Bai sodo napolong idoo yanila kitayo do batudoo lapamo ngginolinggon. 5Maka yanila usok doi kibuloo lalomo. Doi lalomo tapikon bakalinga, yanila kitayo komeeng kopamuda mo pakeyo kona jubah momoute daano moosulang, tukon yanila ngginggim.

6Do pamudadoo bantile, “Inai matakut! Yaku toiyo komuyu umboliiyo Yesus Nasaret miano mo lapamo sinempanggon. Yana akiyono nimbaa, Yana abalimo tubo! Kitayomo naimbaamo yanila naabosano Yana. 7#Mat. 26:32; Mrk. 14:28 Doiya budodoo poampakono, popitoikene naiya bilita nia doi napololaing-pololaing, tongusokon Petrus. Pobantile, ‘Yana ampakon mantailukiyo komuyu doi Galilea. Imbali komuyu kitayo Yana, buno mo lapamo binotiikon doikoo.’ ”

8Maka yanila sumbot doi kibuloo tukon obulen sabab ngginggim tukon matakut. Yanila aki nabantil oi-oila doi inde-indee komiano, sabab matakut.

NAPUPUSAN MARKUS NAKARANGAN MOLOLOI TULISAN LOOLUK

Yesus okitakene kobutongo doi Maria Magdalena

(Mat. 28:9-10; Yoh. 20:11-18)

[ 9Salataa Yesus tubo doi matean, dodowasoono doi Minggu oloyono, Yana tumbe-tumbeno okitakene kobutongo doi Maria Magdalena. (Doi Mariadoo biasamo Yesus kaluare kopitu kokuasa ibiliis.) 10Maka Maria Magdalena ampakon babotilanggene domo tealidoo doi Yesus tula-tulano, mo daano susa tukon kokiil. 11Bai salataa yanila lengele baikon Yesus motubomo, tukon baikon Maria lapamo kitayo Yana yanila aki namaangga.

Yesus okitakene kobutongo doi lua komian mopolaing

(Luk. 24:13-35)

12Lapa doiya Yesus okitakene kobutongo doi lua komian napololaing tukon ndondoong bailon. Doiya teali salataa do mianoo moluaila daano moompokoniiyo komeeng kokampung. 13Jadi yanila abali maka babotilanggene do langgedoo doi bai-bailonggon. Bai yanila aki namaangga.

Yesus okitakene kobutongo doi napololaing-pololaing

(Mat. 28:16-20; Luk. 24:36-49; Yoh. 20:19-23; Kis. R. 1:6-8)

14Doibundu, Yesus okitakene kobutongo doi mosongulodoo meeng kona pololaing, salataa yanila daano mokaan. Yana anuukene yanila kurang kona iman tukon todudul matikas konoano tobikon aki namaangga doi mianoo mo lapamo kitayo susuungo baikon Yesus motubomo. 15#Kis. R. 1:8 Maka Yesus bantile doi yanila, “Poampakono doi posaapon kodunia tukon pobabotilanggene do Bilitadoo Monondok moluwedoi Mian Bisa doi sasaibino kobanggapi. 16Komian mo aki namaangga naikon inukum. Bai komian mo maangga tukon sinau paisu salani, naikon salamat. 17Salaku bukutii baikon yanila maangga, do mianoo naikon moola siikayo koibiliis tobikon sambu-Nggu; yanila naikon basilingan doi silingan-silingan lalomo yanila mo aki natingoniiyo. 18Kalu yanila mataani binda kai monginum lasum, yanila aki namalaat silaka. Kalu yanila binggakene kolimano doi mian-mian mo seselon bunggono, do mianoo naikon tangalin.”

Yesus biningkat doi surgaa

(Luk. 24:50-53; Kis. R. 1:9-11)

19 # Kis. R. 1:9-11 Salataa Yesus pobasalitai tukon yanila, Yana biningkato doi surgaa. Indaa Yana maparenta polaing tukon Mian Bisa. 20Maka Kona pololaing-pololaing ampakon babilitakene dobilitadoo moluwedoi Mian Bisa doi yayaa. Tukon Temeneno turut balimang polaing-laing yanila tukon okitakene lolo doi mominasaindinggon baikon donapoo bilitadoo bisa.]

NAPUPUSAN KOTULISAN LOOLUK BAILON

[ 9Boi-boinedoo ampakon doi Petrus tukon tula-tulano, maka salitayo tukon paupalus sasaibino komo lapamo binontiikon doi yanila doi pomudadoo. 10Lapa doiya, Yesus susuungo lolo doi Napololaing-pololaing mopelenggene doi tolopot doi talise dobilita doomo moliyous tukon motataap tentang kasalamatan mo akiyo kona pupusan.]

Currently Selected:

MARKUS 16: LAIBGZ

Highlight

Copy