MARKUS 14

Yesus nainokoliian

(Mat. 26:1-5; Luk. 22:1-2; Yoh. 11:45-53)

1 # Tob. 12:1-27 Lua kooloyo koidan Oloyo Paskah tukon Lamekanano ko Roti Moakiyo ko Ragino. Imam-imam kapalano tukon guru-guru agama daano moumbolii loloon sulano nalakoyo Yesus tukon aki natotoi, tukon sulano nainakate Yana. 2“Bai inai nda kubaiyo doiya doi lamean tempono,” yanila bantile, “sabab naaki nateali koponggimakonan.”

Yesus kinundongiikon kolisison mobabangi

(Mat. 26:6-13; Yoh. 12:1-8)

3 # Luk. 7:37-38 Sambuno Yesus daano doi Betania, doi Simon nabonua doi lolukoo moseselon kokulito mo minatakuton, meeng koboine lubat doi Yana. Yana makanggi meeng kobotol pualam koantoko lisison mobabangi mo maaling, kinubai doi wangi anggolo. Singgatoo Yesus daano moosulang kaan, do boinedoo pasayo do botoloo maka kundongiikene do lisison babangi doi Yesus oluno. 4Bubula komian mo daano idoo teali nggimal tukon bantile meeng tukon doi bailon, “Oila kona totuuk do lisisonnoo mobabangi modinadaat? 5Do lisisonnoo moola binalukon tukon lobian koolino tolu kosakato kodoy suasa, tukon kodoyno bineekon doi mian motalalais!” Maka yanila nggimoliiyo do boinedoo.

6Bai Yesus bantile, “Sodiiyomo yana! Bulaando komuyu mokubaiyo susa yana? Yana kubaiyo komeeng komonondokan tukon tanggaal doi Yaku. 7#Kua. 15:11 Mian motalalais sidutu daano doi komuyudoo. Sampa-sampa kotempo kalu komuyu yase, komuyu moola tulunge yanila. Bai Yaku aki nasidutu polaing-laing komuyu. 8Boine nia lapamo lakukanggene komo moola yana lakukanggene. Yana lapamo masadiakene Yaku lisison mobabangi motuuk doi Kukinibulan mau naakiyoon nalaate kotempono. 9Poanggayomo! Doi posaapon kodunia, naando ko Bilita Monondokoo moluwedoi Mian Bisa binabotilanggon, boinedoo nakokubai binasalitakon koidan teali tondoon doi yana.”

Yudas yase Yesus nalinoilokis

(Mat. 26:14-16; Luk. 22:3-6)

10Maka Yudas Iskariot, meeng komian doi songulodoo lua Yesus napololaing, ampakon doi imam-imam kapalano tukon namakisuut moloilokise Yesus doi yanila. 11Yanila sanaang tuuno molengele doi Yudas namakisuutoo, tukon janjiyo naikon mobeena doy doi Yudas. Maka doi Yudas koidan tambuuno moumbolii kasampatan sulano naloilokise Yesus.

Yesus kaane kokinaan Paskah tukon Napololaing-pololaing

(Mat. 26:17-25; Luk. 22:7-14, 21-23; Yoh. 13:21-30)

12Doi oloyo tumbeno doi Lamekanano ko Roti Moakiyo ko Ragino – doitempo komian namokolotan domba Paskah – pololaing-pololaing Yesus mansadai doi Yana, “Naando kai Tama naiyasano kami mosadiayo kokinaan Paskah motuuk doi Tama?”

13Maka Yesus sumboliiyo kolua komian doi yanila, “Poampakon doi kota, indaa meeng komala-malane mo daano makanggi meeng koselekan moono paisu, naikon pososuung tukon komuyu. Polainge yana 14doi bonua yana mo usokiyo tukon bontiikene doi bonuadoo tumbuno, ‘Tama Guru mansadai, naando kona tampat Yana tukon Napololaing-pololaing naikon konapo makaanan kinaan Paskah.’ 15Do mianoo naikon tudoikene doikoo komeeng koruangan doi babo mo babasal. Do ruanganoo lapamo inatur, cukup tukon pakakaso doi lalom. Sadiayomo sasaibino indaa tuuk doi kita.”

16Maka Yesus napololaing luailadoo ampakono doi kota. Imbali yanila laate sasaibino bisa bunomo do Yesus nabantilanodoo. Maka yaniladoo masadiakene kokinaan Paskah.

17Popookoo, Yesus lubat tukon domo songulodoo lua Kona pololaing. 18#Sad. 41:9 Tukon yanila daano moosulang kaan, Yesus bantile, “Pondongoliiyo: meeng komian doi antara komuyu, diabudodoo nia mo kaan pososinggat Yaku naikon komo loilokise Yaku.”

19Molongol doiya, Yesus napololaing-pololaing teali poloon tuuno. Maka memeeng komian tambuun mansadai doi Yesus, “Tantu bolikon yaku Tama naminakisuuti?”

20Yesus timbiliyo, “Yana meeng komian doi komuyudoo mo songulo lua nia, mo kaan meeng kopinggan tukon Yaku. 21Takainomo Manusia na Pau naikon mate pokakana komo totulis doi Kitab Moliyous lalomo. Bai bukan maen kona silakaan domianoo mo kulokisanggene ko Manusia na Pau! Kona monondokan tadukai domianoo kalu yana aki nasinuung!”

Temeneno na Lamean

(Mat. 26:26-30; Luk. 22:14-20; 1Kor. 11:23-25)

22Salataa yanila daano mokaan, Yesus mangala roti tukon sambeang doi Mian Bisa. Doibundu Yana bisi-bisiliyo do rotidoo tukon lima-No, maka beekene doi Napololaing-pololaing maka Yana bantile, “Alayomo tukon kaanemo, naiyamo kobuto-Nggu.”

23Lapa doiya Yana mangala meeng kogalaas koanggur. Yana sambeang doi Mian Bisa, maka beekene do galaasoo doi Napololaing-pololaing. Doibundu yanila sasaibino monginum do angguroo. 24#Tob. 24:8; Yer. 31:31-34 Lapa doiya Yesus bantile, “Naiyamo kosaunggu mo sahkanggene ko Mian Bisa naperjanjian, sau mo kinundang motuuk doi mian badaang. 25Poanggayomo: Yaku akimo naikon kumonginum naiya anggur nia koidan, polong doi singgatoo Yaku monginum anggur boolu polaing komuyu doi Tama-Nggu na Dunia Boolu.”

26Doibundu yanila manyanyikene komeeng konyanyian nggaalano ko Temeneno. Tukon sambuno lapa doiya yanila ampakon doi Zaitun Bunggulo.

Patantukon naikon Petrus moakiyenggene Yesus

(Mat. 26:31-35; Luk. 22:31-34; Yoh. 13:36-38)

27 # Zak. 13:7 Doibundu Yesus bantil doi yanila, “Komuyu sasaibino dampas mootinggale Yaku. Sabab doi Kitab Moliyous lalomo totulis, ‘Mian Bisa naikon akateyo kona pototooli, tukon kona domba tambuno meeng malapaaso.’ 28#Mat. 28:16 Bai salataa Yaku inotuboi koidan, Yaku ampakono matailukiyo komuyu doi Galilea.”

29“Aki,” Petrus timbiliyo, “sodiiyomo yanila sasaibino naotinggale Tama, yaku tutuu aki.”

30“Neneeke,” Yesus bantile, “napopook nia koidan, akiyoon komanuk nakokuuwa lua luunggon, ikoo tolumo luunggon muakiyenggene Yaku.”

31Petrus timbiliyo tukon togaas, “Sodiiyomo yaku sio kumate posinggat-singgat tukon Tama, tutuu yaku aki naikon kubantile baikon yaku aki kutingoniiyo Tama!”

Tukon pololaing-pololaing bailon bantile buno doiya.

Yesus sambeang doi Getsemani

(Mat. 26:36-46; Luk. 22:39-46)

32Yanila polong doi meeng kotampat kosambuno Getsemani, tukon Yesus bantile doi napololaing-pololaing, “Osulang dimbaa Yaku daano moampakon sambeang.”

33Maka Yesus tobiyo Petrus, Yakobus, tukon Yohanes ampakon polaing-laing tukon Yana. Yana tambuun nemiiyo poloon tukon susa. 34“Noanggu poloon tuuno,” Yesus bantile doi yanila, “Kurasayo buno Yaku yase tongo mate. Dungolo dimbaa tukon pobadagai!”

35Yesus ampakon lobian odoon soisik maka totuku doi buta tukon sambeang. Doi sambeyangoo lalomo Yana kabiyo kalu moola Yana mau naaki natoupiyo kona susaanoo. 36“Tama, oh Tama,” konabantilano, “akiyo komeeng moaki nateali doi Tama. Binggatemo nasusaan nia doi Yaku. Tolongo inai moloingiyo Daku mongiasan bai tolongo Tama namongiasan.”

37Lapamo doiya Yesus abali tukon laate kona pololaing-pololaing daano momoolo. Yana bantile doi Petrus, “Simon, ikoo kai moolomo? Tolongo meeng kojaam, ikoo aki nateali bada-badagai?” 38Maka Yesus bantile doi yanila, “Pobada-badagai, tukon posambeang sulano naaki potoupiyo kocobaan. Takainomo komu roh yase kubaiyo komo kana, bai komuyu aki posanggupe sabab kobanggapi nasipatoo mantalamuyuk.”

39Kokoidan Yesus ampakon sambeang tukon mabantil bantilan-bantilan mo pokakana. 40Lapamo doiya Yana abali koidan doi napololaing-pololaing tukon laate yanila daano koidan momoolo, sabab yanila pipiito tuuno. Maka yanila akimo napotoiyo oila komo sio napo bantile doi Yesus.

41Salataa Yesus abali doi yanila doi kotoluno luunggon, yana bantile, “Daano kai komuyu momoolo tukon tatade? Sukupo! Polongo kotempono Manusia na Pau nasinalakanggonan doi mian mobaladosa limano. 42Pobanguno, maimo nda ampakon. Kitayo! Komian mo kulokisanggene Yaku lapamo lubat!”

Yesus linako

(Mat. 26:47-56; Luk. 22:47-53; Yoh. 18:3-12)

43Daano Yesus mobasilingan, lubato Yudas, meeng komian doi mosongulodoo lua Kona pololaing-pololaing. Polaing-laing tukon Yana badaang komian molubat mo makanggi sabel tukon tompide. Imam-imam kapalano, guru-guru agama tukon katua-katua Yahudi sumboliiyo yanila. 44Yudas lapamo tantukanggene komeeng kotanda doi yanila. “Mian yaku mo umayo,” Yana bantile doi yanila, “Yanamo komiano. Lakoyo Yana tukon boboiyo Yana tukon podagaiyo tutuuno.”

45Doiya singgat Yudas lubat, yana banggadudul ampakon doi Yesus tukon bantile, “Tama Guru!” doibundu yana umayo Yesus. 46Maka do mianoo mo lubat mopolaing-laing tukon Yudas lakoyo Yesus tukon boboiyo Yana. 47Bai daano komeeng komian mo daano idoo bubute kona sabel tukon tabase doi imam babasal naata polong botol kotolingaino sembeleng. 48Maka Yesus bantile doi yanila, “Kai naiya Yaku nia lokis, tobikon komuyu lubat makanggi sabel tukon tompide sulano polakoyo Yaku? 49#Luk. 19:47, 21:37 Sasamba kooloyo Yaku mongotunggul doi Temeneno Na Bonua doi salaamuyu, tukon komuyu aki polakoyo Yaku. Bai takainomo sio nabuno doiya, sulano natealimo oila komo lapamo totulis doi Kitab Moliyous lalomo.”

50Sasaibino kona pololaing dampas otinggale Yesus.

51Meeng kopamuda, mo tolongo mapake meeng kotoik patolo sulano nabungusiyo kobutongo, mololaing Yesus. Komian yase lakoyo yana, 52bai yana liate dona toikoo maka obulen tukon balalau.

Yesus doi Pangadilan Agama salaano

(Mat. 26:57-68; Luk. 22:54-55, 63-71; Yoh. 18:13-14, 19-24)

53Yesus binaba doi imam babasal nabonua. Imbali sasaibino koimam kapalano, katua Yahudi, guru agama daano pototongi. 54Petrus lolainge Yesus doi naodoonan polong usok doi imam babasal nabonua basaleano. Imbali yana osulang kotolonosiiyo kobutongo balolanikon doi aung pototongi tukon padagai-padagai. 55Imam-imam kapalano tukon sasaibino ko Pangadilan Agama berusaha namalaatene bukutii-bukutii mo inasalakon Yesus sulano namoola inotuwongikon koukuman mate. Bai yanila aki namalaat meeng kobukutiino. 56Badaang kosakisii mo inuang sulano namebee kesaksian mokala motuuk doi Yesus, bai yanila nabantilan aki napololoi meeng tukon bailon.

57Maka bubula kosakisii mokokondong tukon mebee bantilan mokala nia tentang Yesus, 58#Yoh. 2:19 “Kami lengele naiya mian nia bantile, ‘Yaku naikon lubange naiya Mian Bisa nia Nabonua motongo banggapi komo kubaiyo, tukon salataa tolu kooloyo, Yaku naikon bangune kobailon mo bolikon banggapi komo kubaiyo.’ ” 59Bai domianoo nasilingan aki napokokonoi meeng tukon bailon.

60Maka imam babasal kokondong doi yanila sasaibino salaano tukon mansadai doi Yesus, “Bulaando kai Ikoo moaki mutimbiliyo natuduhan-tuduhan nia mo bineekon doi-Koo?”

61Bai Yesus aki nabiyok. Yana aki namotimbili. Maka doimam babasaloo mansadai koidan doi Yana, “Kai Ikoomo ko Tomundo Pasalamat, Mian Bisa Napau Moliyous?”

62 # Dan. 7:13 “Yakumo nia,” Yesus timbiliyo, “tukon komuyu sasaibino naikon kitayo ko Manusia na Pau moosulang taalikon bakalinga doi Mian Bisa Mobabasal Konakuasa tukon lubat luwedoi bunom lalomo doi timbu!”

63Maka doimam babasaloo sia-siake kona kalambi tukon bantile, “Akimo napalaluu sakisii! 64#Basam. 24:1 Komuyu lapamo lengele kona bantilan-bantilan mo kulokisanggene ko Mian Bisa. Diabudodoo oilamo komu putusan?”

Yanila sasaibino putusiyo baikon komo sala Yesus, tukon sio nainukum mate.

65Maka bubula komian tambuuno motupeiyo Yesus, tukon yanila kukupe komatano tukon bobokiiyo Yana, maka bantile, “Coba bantile, indee komo bobokiikon?” Padagai-padagaidoo koidan moloingi momatapi Yesus.

Petrus akiyenggene Yesus

(Mat. 26:69-75; Luk. 22:56-62; Yoh. 18:15-18, 25-27)

66Daanoon Petrus modaano doi basaleanoo, daano komeeng kopeleleani boine doi imam babasal lubat imbali. 67Salataa kitayo Petrus molalange kobutongo kolaniyo koaung, yana palaatikanggene mono-monondok Petrus duduso tukon bantile, “Bolikon kai ikoo koidan komo polaing-laing Yesus do Nasaretoo miano?”

68Bai Petrus akiyenggene. “Aki kutoiyo tukon akiku mangalatikene oila komu minakisuuti,” konabantilano doi peleleanidoo. Maka Petrus ampakono doi imam babasal nabonuadoo tataapono. [Doiya kosinggatoo, komanuk kokuuwamo.]

69Peleleani boinedoo kitayo Petrus koidan, tukon bantile doi mianoo idoo, “Yana takainomo daano komeeng komian doi yanila!” 70Bai Petrus akiyenggene koidan.

Aki namalumbit doibundu, domianoo idoo bantile koidan doi Petrus, “Akimo namoola inakiyonggon koidan takainomo ikoo meeng komian doi yanila, sabab ikoo luwedoi Galilea!”

71Maka Petrus tambuuno mobato-batotopi tukon bantile, “Aki kutingoniiyo do mianoo komuyu mo makisuutiyo!”

72Doiya kosinggatoo komanuk luamo luunggon nakokuuwa. Tukon Petrus tandayomo baikon Yesus molapamo bantile doi yana, “Akiyoon komanuk nakokuuwa koluano luunggon, ikoo tolumo luunggon muakiyenggene Yaku.” Maka Petrus kokiil yodi-yodi.

Currently Selected:

MARKUS 14: LAIBGZ

Highlight

Copy