LUKAS 10
10
Yesus utuse kopitu kolono kona pololaing
1Lapa doiya Temeneno molilik pitu kolono kopololaing koidan, maka bintekene yanila lua-lua komian polaing mantailukiyo Yana doi meeng-meeng kokota tukon lipu Yana mo lubotiiyo. 2#Mat. 9:37-38 “Hasil naikon mo pinupui badaang,” konabantilano doi yanila, “bai kopolimang sulano nabapupui tongo soisik. Tobikon doiya, kabiyo doi asidoo tumbuno sulano namakapatu polimang sulano napupuiyo kona langge sinakakon hasilo. 3#Mat. 10:16 Yo, poluwemo! Yaku bintekene komuyu buno domba doi asu lobo tanga-tangano. 4#Mat. 10:7-14; Mrk. 6:8-11; Luk. 9:3-5 Inai momakanggi dombet kai pundi sadakaah, kai sapatu. Inai motade doi loloon tangano sulano mu mebee salam doi meeng komian koidan. 5Kalu komuyu usok doi meeng kobonua, bontiikene loolukon, ‘Boliisi namonondok nabonua nia lalomo.’ 6Kalu idoo daano komian mo yase dame, domu salam podameanoo naikon tataap doi yana; kalu aki, abalinggene domu salam podameanoo. 7#1Kor. 9:14; 1Tim. 5:18 Dungolo doi meeng kobonua tolong. Talimayomo oila komo bineekon koimbaa doikoo, sabab komian mo balimang daano konahaak mantalima tambono. Inai mobiyol-biyol doi meeng kobonua doi bonua bailon. 8Kalu komuyu lubat doi meeng kokota tukon imbali komuyu tinalima tukon monondok, pokaanemo oilamo komo sinadiakon idoo doi komuyu. 9Aline komian mo seselon doi kotadoo, tukon babotilanggene doi mian idoo, ‘Ko Mian Bisa mosobit naikon atambuune kona bapamarentaan buno Tomundo doi komuyu.’ 10#Kis. R. 13:51 Bai kalu komuyu lubat doi meeng kokota tukon idoo komuyu aki potinalima, potobuat doi loloon tukon pobantile, 11‘Oode kopo kota ambatano mo lambot doi ainggami, kami tipasene buno poingotii doikoo. Bai potoiyo baikon loolanimo kotempono ko Mian Bisa atambuune kona maparentaan buno Tomundo doi komuyu tanga-tangano!’ 12#Tea. 19:24-28; Mat. 10:15, 11:24 Neneeke doi Oloyo Nakiamatan, ko Sodom miano naikon muda ko Mian Bisa naompuniano maka baino mian doi kotadoo!”
Kota-kota mo aki namaangga
(Mat. 11:20-24)
13 #
Yes. 23:1-18; Yeh. 26:1–28:26; Yl. 3:4-8; Am. 1:9-10; Zak. 9:2-4 “Silakamo komuyu, Korazim! Tukon silakamo komuyu, Betsaida! Kalu andeno kolangge-langge minasaindinggon mo kinubai doi komuyudoo tanga-tangano lapamo kinubai doi kota Tirus tukon Sidon, tantu kona mian imbali malumbito kona badodoloonan doi yanila nalalim-lalim, tukon mapake kopakean susaan maka mangabos abu doi yanila oluno bungkono. 14Doi Oloyo Nakiamatan ko Tirus tukon Sidon miano naikon lobian muda ko Mian Bisa naompuniyo kalu baino komuyu. 15#Yes. 14:13-15 Tukon komuyu, Kapernaum! Komuyu pikikene, komuyu naikon inakatandak polong doi surgaa? Aki! Tongo komuyu naikon sinakukon doi neraka!”
16 #
Mat. 10:40; Mrk. 9:37; Luk. 9:48; Yoh. 13:20 Maka Yesus bantil doi Napololaing-pololaing, “Komian mo lengele komuyu, longoliyo Yaku. Mian mo tolake komuyu, tolake Yaku. Tukon mian mo tolake Yaku, koidan tolake Yana mo bintekene Yaku.”
Naabalian kopitu kolono kopololaing
17Pitu kolono do pololaingoo abali tukon laba-laba tuuno. “Temeneno,” yanila bantile, “ibiliisoo loingiyo kami kalu kami parentayo yanila tukon Temeneno sambuno!”
18Yesus timbiliyo, “Yaku kitayo ko Ibiliis otuwong luwedoi timbu pokakana kodidip. 19#Sad. 91:13 Potoiyo! Komuyu lapamo kubeena kuasa sulano komuyu moola tudange kobinda tukon manda sopit tukon lotoiyo sasaibino komusuh nabukuanan, akiyo kolangge meeng mo moola silakayo komuyu. 20Mau kai nabuno doiya inai polaba-laba sabab doibiliisoo loingiyomo komuyu. Tadukai komuyu laba-laba sabab kosambumuyu totuliso doi surgaa.”
Yesus laba
(Mat. 11:25-27, 13:16-17)
21Doiya kosinggatoo koidan, Yesus laba sabab ko Mian Bisa Na Roh kuasaiyomo. Yesus bantile, “Tama, Temeneno komo kuasaiyo kotimbu tukon buta! Yaku bakinatauwan doi-Koo sabab sasaibino doiya Ikoo lasiakanggene doi mian mo pandoi tukon mopandoi tuuno, bai Ikoo tudoikene doi mian-mian mo aki napandoi. Doiyamo komo sanaanggene Tama noano.
22 #
Yoh. 3:35, 10:15 Sasaibino kolangge lapamo Tama salakanggene doi Yaku. Akiyo komeeng komian motingoniiyo do Paudoo, tongo Tama. Akiyo koidan komo tingoniiyo Tama tongo do Paudoo; tukon mian doi indee komiano do Paudoo moyase ontingoniikene ko Tama.”
23Maka Yesus mbaleng doi napololaing-pololaing, doibundu bantile doi yanila basusuunganggon, “Pountungo komuyu sabab lapamo komuyu kitayo diabudodoo nia. 24Sabab neneeke: Badaang konabi tukon tomundo mo yase kitayo komo komuyu kitayo diabudodoo nia bai yanila aki nakitayo. Yanila yase molongol komo komuyu lengele diabudodoo nia, bai yanila aki nalengele.”
Andean Samaria miano mo monondok konoano
25 #
Mat. 22:35-40; Mrk. 12:28-34 Doibundu meeng koguru agama lubat sulano nadinggalayo Yesus. Yana mansadai, “Tama Guru, yaku oila daku kinubai sulano moola mantalima tuboan mobisa tukon posidutukon?”
26Yesus timbiliyo, “Oila komo totulis doi Kitab Moliyous lalomo? Bulaando komu palaat tentang do langgedoo?”
27 #
Basam. 19:18; Kua. 6:5 Do mianoo timbiliyo, “ ‘Seseange komu Temeneno Mian Bisa tukon totubo konoamu, tukon sasaibino kobutomu, tukon sasaibino komu bukuanan, tukon sasaibino komu pikilan,’ tukon ‘Seseange kotulamu pokakana ikoo seange kobutomu susuumu.’ ”
28 #
Basam. 18:5
“Mupotimbilidoo bisa,” Yesus bantile, “Lakukanggene doiya, maka ikoo naikon tubo.”
29Bai do guru agamadoo yase mobisakene kobutongo. Yana mansadai, “Indee do tulanggudoo?”
30Yesus timbiliyo, “Daano komeeng komala-malane lengget doi Yerusalem ampakon doi Yerikho. Doi loloon tangano yana pondikuk lobosiyo, linambas sasaibino kona langge, maka binobokii kabi namate, maka inotinggal tongokoolo doi loloon tukon kona pakol babasal. 31Pokokonoi meeng koimam ampakon doi loloonoo. Sambuno yana kitayo do mianoo, yana lilit doi loloon sembeleng, maka ampakon banggadudul. 32Bunomo lakon koidan tukon meeng ko Lewi miano mo ampakon idoo; salataa yana kitayo do mianoo yana lolaniyo sulano napalatikanggene. Bai mau doi yanadoo lilit doi loloon sembeleng, maka ampakon banggadudul. 33#2Tund. 28:15 Bai doibundu meeng ko Samaria miano mo daano ampakon, alokon koidan idoo. Salataa yana kitayo do mianoo, konoano susa sabab naseangano. 34Maka yana kolaniyo do mianoo maka kumesio kona pakol-pakol tukon anggur maka yana pakuliyo tukon lisison, doibundu yana tomboliiyo do pakol-pakolodoo. Lapa doiya yana alakite domianoo doi naadalan susuungo maka babayo doi meeng kobonua tukon pakuliyo. 35Modoakon kooloyo yana mangala lua kodoy perak tukon beekene doi bonuadoo tumbuno maka bantile, ‘Po pakuliyomo yana, tukon kalu daano kopebealo bailon, maka kubeyale, kalu yaku abali dimbaa.’ ”
36Doibundu Yesus oppusiyomo kona salitadoo tukon pasadai nia, “Doi mianoo motolu inaando kai, monurut mupalaat, komo teali tulano do mianoo mo rinampok?”
37Guru agamadoo mo sinadai timbiliyo, “Domianoo mo lapamo tulungiyo do mianoo.”
“Nah poampakono tukon pokubaiyo buno doiya koidan!” Yesus bantile.
Yesus lubotiiyo Marta tukon Maria
38 #
Yoh. 11:1
Doibundu Yesus tukon napololaing-pololaing banggadudulkenemo kona poampakonan maka polong doi meeng kodesa. Idoo meeng koboine, kosambuno Marta, uange Yana doi nabonua. 39Marta daano koutuso moluko kosambuno Maria. Maria nia osulang kolaniyo Yesus mondongolii Yesus naotunggul-otunggul. 40Bai Marta pasokon tuuno tukon balimang doi nabonua lalomo. Yana ampakon doi Yesus tukon bantile, “Temeneno, oilakai Temeneno aki mupopusinggon Maria mobatadikene yaku kubalimang susuunggu? Sumboliiyo yana natomboniiyo yaku!”
41“Marta, Marta!” Temeneno timbiliyo. “Ikoo molilikene tukon paso-pasokon mopikikene naiya tukon doiya; 42banggokai komo ponting tongo meeng. Tukon Maria lapamo lilike komo monondok, mo aki naikon nainala doi yana.”
Currently Selected:
LUKAS 10: LAIBGZ
Highlight
Share
Copy
Want to have your highlights saved across all your devices? Sign up or sign in
