TEALIAN 34
34
Dina napinorkosa
1Daano kooloyo meeng, Dina Yakub tukon Lea napau moluko duutiyo bubula koboine Kanaan. 2Salataa Sikhem, Hemor napau Hewi miano moteali tomundo doi lipudoo kitayo Dina, yana obulenggene boinedoo, maka yana palakosayo. 3Bai yana kilayo tuuno doi Dina, tobikon tuwong kona yasano yana tukon kakaate sulano boinedoo nayase yana koidan. 4Sikhem bantile doi tamano, “Yaku kabiyo Tama nakakaate molaate boinedoo buat yaku. Yaku yase pokila.”
5Yakub lengele baikon kona pau lapamo pinorkosa, bai sabab kona pau-pau daano modagaiyo koiyayon doi padang, yanila aki namoola mangala tindakan oioila kalu yanila akiyon namule.
6Hemor, Sikhem tamano, lubat doi Yakub mobalunding tukon yana. 7Kana kotempono Yakub napau-paudoo namulean doi padang. Lengele dolanggedoo, yanila busak kobukuno tukon nggimal tuuno. Sabab tukon perkosayo Yakub napaudoo, Sikhem lapamo sosiboliiyo sasaibino ko Israel miano. 8Hemor kabiyo doi Yakub, “Daku pau Sikhem yasemo doi Utus napau; yaku kabiyo sulano Utus pataikene daku pau nakilayo yana. 9Maimo nda mokubai pomeenggonan baikon Utus nabangsa tukon mai bangsa pokila. 10Maka Utus-utus moola dungol pototongi kami nai tano nia; yaando Utus nainiyas. Utus-utus moolamo badagang tukon motooli buat.”
11Doibundu Sikhem bantile doi Dina tamano tukon utus-utuso langgongo, “Daanokene daku kakabinia, maka yaku naikon beekene oila komo kumuyu yase. 12Bantilemo oila kopalaseengo komuyu poinias, tukon tantukanggenemo komosoni osowaanan. Yaku naikon beekene oila komuyu nakinabi, siokai komuyu pataikene yaku kilayo boinedoo.”
13Sabab Sikhem perkosayomo yanila utuso pioto Dina, Yakub napau-pau bakala-kala doi Sikhem tukon Hemor tamano. 14Yanila bantile doi mianoo molua, “Ikami mammaa pataikene koutusonggami pioto moosowaan tukon mian moaki nabasunat. 15Ikami tolongo moola satujuiyo domu kakabidoo tukon meeng kosalat, doiyamo: Komuyu sio poteali buno kami, koalatino sasaibino komala-malane doi komuyu taikon sio nasinunat. 16Lapa doiya kami naikon satujuiyo komu usul kaliangano osowaanan sampulan. Ikami naikon tataapo doi koo tukon teali meeng kobangsa tukon ikoo. 17Bai kalu komuyu aki naiyase mantalima komai sarat-sarat, tukon aki naiyase sinunat, kami naikon abali alayo boinedoo tukon taus.”
18Hemor tukon Sikhem anggene dosarat-saratoo pantas, 19tukon Sikhem mosobit masadia modaanokene dosaratoo sabab yana yase Dina. Doi antara sasaibino kona montolutusan Sikhem komo taangga tuuno.
20Doibundu Hemor tukon Sikhem taus doi tampat pososuungan doi kotadoo tataapono, tukon basilingan doi kotadoo tumbunoila, buno naiya, 21“Israel mianodoo ndasobato. Jadi sodiikenemo yanila nadungol nai tano nia polaing kita tukon bebas taus doiyayaa yanila naiyasano. Tano nia sukup bebelan buat yaniladoo. Kita moolamo osowaan tukon yanila naboi-boine, tukon yanila moolamo osowaan tukon nda boi-boine. 22Bai mian badaangoo tolongo yase dungol polaing kita tukon teali meeng kobangsa tukon kita tukon meeng kosalat doiyamo: Sasaibino komala-malane doi antara kita sio nasinunat buno yanila. 23Naapa sasaibino yanila naiyayon tambuno tukon sasaibino yanila nabuat teali kita kotumbuno. Jadi maimo nda satujuiyo yanila nakakabi sulano yanila dungol polaing tukon kita.” 24Sasaibino dokotadoo tumbuno mopototongidoo satujuiyo Hemor tukon Sikhem nausul, maka sasaibino komian mala-malane motabokon doi kotadoo sinunat.
25Tolu kooloyo molapa, salataa domala-malanedoo daano mosokiti sabab nasinunatan, lua Yakub napau doiyamo Dina utuso langgongo kosambuno Simeon tukon Lewi, yanila alayo kona sabel, maka aki nabiyok-biyok usok doi kotadoo lalomo. Doibundu yanila akateyo sasaibino komala-malane idoo, 26tongusokon kai Hemor tukon Sikhem. Maka yanila alayo Dina doi Sikhem nabonua tukon taus. 27Lapamo mangakate, Yakub napau-pau kobailon lambekemo dokotadoo salaku posoboli nggimalan sabab yanila utuso pioto lapamo pinorkosa. 28Yanila alayo kombembe, domba, saapi, keledai tambuno, tukon sasaibino modaano doi kotadoo lalomo tukon doi padang. 29Yanila alayo sasaibino kobarang modaano koanggano, sasaibino koboine tukon pau-pau motinaan tukon lambase sasaibino kobonua antoko doi kotadoo.
30Yakub bantile doi Simeon tukon Lewi, “Komuyu kabaiyo susa yaku. Diabudodoo Kanaan miano tukon Felis miano tukon sasaibino komo dungoliyo natano nia naikon mesikitene yaku. Konda mian-mian aki namadaang; kalu modungoliyodoo sasaibino pomeenggon lawane tukon lobosiyo yaku, sasaibino konda solipuan naikon linopu.”
31Bai yanila timbiliyo, “Kami aki namoola sodiikene koutusonggami pioto nakinabai buno palacur.”
Currently Selected:
TEALIAN 34: LAIBGZ
Highlight
Share
Copy
Want to have your highlights saved across all your devices? Sign up or sign in
