TEALIAN 15
15
Mian Bisa Naperjanjian tukon Abram
1Lapa doiya, Abram mantalima pokita tukon lengele ko Temeneno mobantil doi yana, “Inai momatakut, Abram, Yaku naikon lindungiyo ikoo luwedoi susaan, tukon mobeena doikoo tambo mobabasal.”
2-3Bai Abram bantile, “Temeneno Moinakatandak Tuuno, Temeneno aki mubeenggu pau. Komian naikon haakiyo dakubuat tongo Eliezer, kuata moluwedoi Damsyik. Jadi oila konatotuuk ko Temeneno mobeena tambo doiyaku?”
4Doibundu Abram lengele ko Temeneno mobantil koidan doi yana, “Bolikon muata naikon komo teali haakiyo, bai mupau malaneno susuungo.” 5#Rm. 4:18; Ibr. 11:12 Ko Temeneno babayo Abram tobuat maka bantile doi yana, “Mbalenge kotimbu, tukon soba aite kobituwon-bituwon pauno; ikoo naikon komu katulunan pokakana kobituwon-bituwon paunodoo kona kadaang.”
6 #
Rm. 4:3; Gal. 3:6; Yak. 2:23 Abram mangangga doi Temeneno, tukon tobikon doiya Temeneno talimayo yana buno mian mosanaanggene konoano.
7Doibundu Temeneno bantile koidan doi yana, “Yakumo ko Temeneno, molapamo andane ikoo tobuat luwedoi lipu Ur Babilonia, tuuk mobeekene nabuta nia doikoo teali koomu.”
8Bai Abram mansadai, “Oh Temeneno Moinakatandak Tuuno, bulaando daku moolaan toiyo baikon butadoo teali yaku kotumbuno?”
9Ko Temeneno timbiliyo, “Mangalamo tuuk Yaku meeng kosaapi molukono, meeng kombembe molukono tukon meeng kombembe langgilo, suwe-suwele kona umur tolu kotaun, tukon koidan meeng kotomisi sapatau tukon meeng kotomisi lapatiing.” 10Maka Abram alayo doiyayon-iyayonoo tuuk Mian Bisa. Sapi, mbembe, tukon dombadoo suwe-suwele binata teali lua, tukon kombele-mbelengo bininggakon pinosasalaanggon doi lua kodadalo lalomo. Bai dotomisi-tomisidoo aki nabinata. 11Tomisi-tomisi pakaan bunutoo sakeiyo dosailoo, bai Abram siikayo.
12 #
Ayb. 4:13, 14 Salataa kooloyo tambuuno sopok, Abram moolo tomboosokon sosinggot yana nemiiyo momatakut tuuno. 13#Tob. 1:1-14; Kis. R. 7:6 Ko Temeneno bantile doi yana, “Neneeke, komu katulunan naikon teali mian lubat-lubaton doi lipu bailon; yanila naikon teali ata imbali tukon naikon sinakisaa sangkap kosakato kotaun konakalumbit. 14#Tob. 12:40-41; Kis. R. 7:7 Bai kobangsa mokubaiyo ata domu katulunanno naikon Kuukume tukon doi tempo komu katulunan natinggalano dolipudoo, yanila naikon babayo badaang konabuat. 15Ikoo susuumu naikon malaat umur motatandak; ikoo naikon mate tukon tanaang, maka kinibul. 16Lapa sangkap kokatulunan, komupau tumbu naikon abali naimbaa, sabab Yaku aki Kusiikayo ko Amori miano kalu akiyon yanila nabuno doiya kona Kulokisan tobikon palaluu inukum.”
17Salataa oloyo popokoo, sosinggot lubat komeeng kopoolu motibolungan tukon ponsona mokait, maka lolo doi antara sailoo pato-patolo. 18#Kis. R. 7:5 Doiya kotempono ko Temeneno kubaiyo kona perjanjian tukon Abram. Temeneno bantile, “Yaku paladandi naikon mobeekene doi mukatulunan sasaibino nabutania tambuun luwedoi sipat lipu Mesir polong doi Efrat Paisunobatango, 19tongusokon kai koidan ko Keni miano nabuta, Kenas, Kadmon, 20Het, Feris, Refaim, 21Amori, Kanaan, Girgasi tukon Yebus.”
Currently Selected:
TEALIAN 15: LAIBGZ
Highlight
Share
Copy
Want to have your highlights saved across all your devices? Sign up or sign in
