TEALIAN 13
13
Abram tukon Lot poalaas
1Abram tinggale ko Mesir tukon taus kosinalaano doi lembet, kona pinakituu doi taalikon lalom ko Kanaan tukon konaboloki polainggene sasaibino komo daano doi yana, tukon Lot koidan malaing. 2Abram kaasa tuuno; yana daano konadomba, mbembe, sapi, koidan perak tukon mosoni. 3Maka yana taus luwedoi meeng kotampat doi tampat bailon, kosinalaano doi Betel. Yana polong doi lipu napokalalatanan ko Betel tukon Ai doi tampat karamat doi loolukoo yana momokubai sandung 4tukon mokubai mezbah. Idoo yana sosubaiyo ko Temeneno.
5Lot koidan daano kona kaluargaa tukon ata-ata maka domba, mbembe tukon sapi. 6Sabab butadoo idoo aki nabadaang kobulung padang tuuk napai dungoliyo luaila, sabab konapoo iyayon todudul badaang. 7Maka tealimo kopodangaanian antara Abram napadagai iyayon tukon Lot napadagai iyayon. (Doi tempodoo ko Kanaan miano tukon Feris miano daano modungoliyo butadoo.)
8Abram bantile doi Lot, “Kitania montolutus, aki namonondok kalu mumian tukon kumian sidutu podangaani. 9Tobikon doiya kona monondokan nda poalaas. Piliyomo nabutania taalikon inaando komu inias. Kalu ikoo taus taalikon naiya, yaku naikon taus taalikon doi bailon.”
10 #
Tea. 2:10
Lot mbalenge potikunggon tukon kitayo baikon posaapon ko Yordan Pepelakono, polong doi kota Zoar badaang kopaisuno, bunomo Temeneno Naasi kai buno Mesir butano. (Bunomo kondondoongo doi naakiyonan ko Temeneno namanase kokota-kota Sodom tukon Gomora.) 11Doibundu Lot piliyo sasaibino ko Yordan Pepelakono, maka taus taalikon doi tolopot. Bunomokai doiya domianoo molua napoalaasan. 12Abram tataap dungol doi lipu Kanaan, bai Lot mokubai sandung doi kota-kota doi peakoo polong loolani ko Sodom. 13Dokota Sodomoo tumbuno doiyamo mian-mian mokulokis tuuno tukon baladosa doi Temeneno.
Abram biyol doi Hebron
14Salataa Lot taus, ko Temeneno bantile doi Abram, “Luwedoi mutampat kokondonganoo, mbalenge mono-monondok doi sasaibino komu mbinaleng; 15#Kis. R. 7:5 Yaku naikon beekene doikoo tukon doi mukatulunan sasaibino kolipu domukinitadoo sulano nateali mupusaka sidutu posidutukon. 16Yaku naikon beena ikoo katulunan mobadaang tuuno, sampe akiyo mau meeng komian momoola aite yanila. Bunomo lakon komian aki namoola aite koambata doi buta, bunomo koidan komu katulunan aki naikon namoola inait. 17Diabudodoo dadange sasaibino nabutania, sabab Yaku naikon beekene doikoo.” 18Lapa doiya Abram biyele konasandung maka tataap dungol loolani kokayung-kayung karamat tampat kaledaan doi Mamre loolani ko Hebron, tukon idoo yana kekendenge ko balabaan tuuk Temeneno.
Currently Selected:
TEALIAN 13: LAIBGZ
Highlight
Share
Copy
Want to have your highlights saved across all your devices? Sign up or sign in