Marakusi 14

Tadulakoraꞌ toIahudiꞌ moliwo ina mopapate Iesu

(Mat. 26:1-5; Luk. 22:1-2; Ioh. 11:45-53)

1Rongalo rái ina haweꞌ miꞌi Alo Posusa Paska hai Posusa Rótiꞌ to Tiꞌara Raragiꞌi.#14:1 Alo Posusa Paska hai Posusa Rótiꞌ to Tiꞌara Raragiꞌi: Posusa pambuhinaoá karakábáháꞌáraꞌ toioruraꞌ hangko i tampoꞌ Másiriꞌ hangkoia. Básá to teukiꞌ i Kahirámpuá Laluita. Tempó iti, kapalaꞌ-kapalaꞌ tadulako menómbá hai guru-guru agama tangaꞌraꞌ mampeliꞌ rárá mohakaꞌ ngkábuni Iesu bona rahuku mate. 2Rauliꞌ, “Ineeꞌ sieruꞌ tahakaꞌ i minggu mahile deꞌe, bona tiꞌara ara pohiho i oloꞌraꞌ tauna to handaꞌ.”#14:2 Raisá miꞌi tadulakoraꞌ toIahudiꞌ, ane ara pohiho, topopárentá toRoma ina mohukuheꞌ, hai babilaꞌ ina rapakanawoꞌ woꞌo Kaiapa, Tadulako Menómbá Mahile. Básá Iohane 11:50.

Hadua towawine mobubuha mina-mina to mawongi i wuáꞌna Iesu

(Mat. 26:6-13; Ioh. 12:1-8)

3I tempóna Iesu i wánuá Betania, Ia ara i támbina hadua tauna to rahangaꞌ Simoꞌ, to hangkoia kana hakiꞌ tánggáꞌ. Tangaꞌraꞌ mandeꞌ, haweꞌ miꞌi hadua towawine#14:3 Hangaꞌna towawine iti Maria, ádina Lasaru hai Marita. Básá Iohane 12:3. moánti hambuaꞌ butoloꞌ#14:3 hambuaꞌ butoloꞌ: Butoloꞌ iti rabábehi hangko i watu to bulá ba mabádáꞌ hai masuliꞌ hólóna. I lalu básá Indonesia: batu pualam. to bukeꞌ mina-mina narawastu#14:3 mina-mina narawastu: Mina-mina iti rabábehi hangko i kálándá kau. to mawongi hai masuliꞌ ntepuꞌu hólóna. Towawine iti mopiheꞌ tambólóna butoloꞌ, haneꞌi nabubuha mina-mina to mawongi iti i wuáꞌna Iesu, tandaꞌ pebiláꞌna. 4Araheꞌ bahangapa tauna ionoꞌ to tiꞌara mampokana apa to nabábehi towawine iti.#14:4 To mosalaꞌi towawine iti iamoheꞌ topeguruna Iesu, pelumbuꞌna mani Iudasiꞌ Isikarioꞌ. Básá Matiu 26:8; Iohane 12:4. Molaluitaheꞌ hadua hai hadua, rauliꞌ, “Moapa riꞌi haneꞌi mina-mina to mawongi hai masuliꞌ iti natibe mbero peá? 5Ane rápáꞌna mina-mina to mawongi iti rapobaluꞌ, hólóna hangaa-ngaa lábi hangko i tálu átuna dóiꞌ peráꞌ.#14:5 tálu átuna dóiꞌ peráꞌ: Imbaꞌna tálu átuna dóiꞌ peráꞌ hungkuꞌ hibali hai sarona hadua tauna ane mobágóꞌ hampare. Rángina miꞌi rapobaluꞌ bona dóiꞌ hólóna raweꞌiheꞌ tauna to meahiahiꞌ tueꞌraꞌ.” Onoꞌ miꞌi haneꞌi mokabukoꞌiheꞌ towawine iti.

6Agáiáná nahángáꞌáheꞌ Iesu, “Nipatodáhi peá. Moapa riꞌi haneꞌi nipakasusa laluna towawine deꞌe? To nabábehi i Kódóꞌ deꞌe, maroꞌa, 7láwiꞌ Kódóꞌ, tiꞌaraPoꞌ marue hingkakani hai kómu. Ane tauna to meahiahiꞌ, ara mani tempómi motulungiheꞌ láwiꞌ arantoheꞌ oaꞌ i oloꞌmi. 8Towawine deꞌe mobábehi apa to nabuku nabábehi. NabubuhiAꞌ hai mina-mina to mawongi, lempóna ia mopatimama ami wátáNgkuꞌ i kaꞌina ratawuNgkuꞌ. 9Bona niꞌisá: i humalele duniáꞌ, iumbá peá Ngkóráꞌ Marasa rabámbári, apa to nabábehi towawine deꞌe bateꞌna ina tekábelái hai rabuhinao oaꞌ.”

Iudasiꞌ mampobaluꞌ Iesu i ewáliNa

(Mat. 26:14-16; Luk. 22:3-6)

10I tempó iti, hadua hangko i topeguruna Iesu to hampuloꞌ hai rodua, to rahangaꞌ Iudasiꞌ Isikarioꞌ, lao i kapalaꞌ-kapalaꞌ tadulako menómbá. Tunggáiána ina mampobaluꞌ Iesu. 11Góeꞌ ntepuꞌuheꞌ mohádi apa to nauliꞌ Iudasiꞌ iti, mewaliꞌ radándiá miꞌi ina raweꞌi dóiꞌ.#14:11 Tadulakoraꞌ toIahudiꞌ mobaiari Iudasiꞌ tálu puloꞌna pepaꞌna dóiꞌ peráꞌ. Básá Matiu 26:15. Hangko ionoꞌ, Iudasiꞌ mampeliꞌ tempó to maroꞌa mohuhuꞌ Iesu i hira bona rahakaꞌ.

Iesu mandeꞌ pandeꞌ Posusa Paska hingkakani hai topeguruNaheꞌ

(Mat. 26:17-25; Luk. 22:7-14,21-23; Ioh. 13:21-30)

12I alo Popatimama Posusa Rótiꞌ to Tiꞌara Raragiꞌi,#14:12 alo Popatimama Posusa Rótiꞌ to Tiꞌara Raragiꞌi: ia miꞌi alo iba. i tempóna dimbá Paska rasambale, topeguruna Iesu mekuneꞌ i Hia, “Pueꞌ, mouláꞌ peundeꞌáMu, iumbákeꞌ ina mandeꞌ pandeꞌ Paska bona kiꞌisá kipatimama?”

13Mewaliꞌ Iesu mohuoꞌ rodua topeguruNa,#14:13 rodua topeguruNa: iamoheꞌ Peturuꞌ hai Iohane. Básá Lukasi 22:8. Nahángáꞌáheꞌ, “Laomokou i lalu kótá Ierusale.#14:13 kótá Ierusale: Mouláꞌ áturáraꞌ toIahudiꞌ, pandeꞌ Paska hangaa-ngaa raꞌandeꞌ i lalu kótá Ierusale. Básá Pohuleki 16:5-7. Ionoꞌ ina nilámbiꞌ hadua tobaleilo to moánti gumbaꞌ to moꞌóntóꞌ uwai.#14:13 Tiꞌara biásá tobaleilo mohámpá uwai. Iti bágóꞌna towawine. Meuláꞌmokou i hia. 14Ane mesuaꞌkou i lalu támbi, nihángáꞌá pueꞌ támbi iti, ‘Napekuneꞌ Guru: Ba iumbá peisáꞌAꞌ mandeꞌ pandeꞌ Posusa Paska hingkakani hai topeguruNgkuꞌheꞌ?’ 15Pueꞌ támbi iti ina motudeꞌákou hambuaꞌ lintuꞌ to mahile i wongko. Lintuꞌ iti timama miꞌi ami, hai upu-upu párewá to ina taparaluu, aramoheꞌ woꞌo. Mewaliꞌ ionoꞌ miꞌi nikádipuráꞌákeꞌ ina mandeꞌ pandeꞌ Paska.”

16Lao mpuꞌumoheꞌ topeguruNa to rodua iti, mesuaꞌheꞌ i lalu kótá. Kahaweꞌraꞌ ionoꞌ, upu-upu mewaliꞌ hintotoꞌ hai apa to nahángáꞌáheꞌ Iesu, hai mopatimamaheꞌ pandeꞌ Posusa Paska.#14:16 Áturá mokana i Posusa Paska to rungu-runguna teukiꞌ i Pesuwuꞌá 12:3-11. To raꞌandeꞌ, bauꞌ ánáꞌ dimbá, rótiꞌ to tiꞌara raragiꞌi, rampaꞌ-rampaꞌ to mapaiꞌ, rutuꞌ hai mainuheꞌ anggoroꞌ.

17Káindina, haweꞌ miꞌi Iesu hingkakani hai topeguruNa to hampuloꞌ hai rodua i lintuꞌ to rapatimama miꞌi. 18Tangaꞌraꞌ mehoda,#14:18 tangaꞌraꞌ mehoda: ToSáráeliꞌ to mandeꞌ pandeꞌ Paska to rungu-runguna hangaa-ngaa meángkáꞌheꞌ, bona timamaheꞌ pohuꞌ hangko i tampoꞌ Másiriꞌ. (Básá Pesuwuꞌá 12:11.) Hawiꞌ woꞌo meángkáꞌ ane mandeꞌheꞌ. Deꞌe-deꞌe toSáráeliꞌ peisáheꞌ mehoda, tandaꞌ karakábáháraꞌ miꞌi hangko i karapohawiꞌraꞌ. nauliꞌ Iesu, “Bona niꞌisá: hadua hangko i oloꞌmi to tapohingkakaniá mandeꞌ deꞌe-deꞌe, ina mohuhuꞌAꞌ i ewálingkuꞌ.”

19Karahádina topeguruNa laluitaNa, masusa laluraꞌ, hai mekuneꞌmoheꞌ hadua-hadua i Iesu, rauliꞌ, “Tiꞌara woa paꞌi kódóꞌ to Nutunggái, Pueꞌ?”

20Nahániki Iesu, “To ina mohuhuꞌAꞌ i ewálingkuꞌ, ia miꞌi hadua hangko i oloꞌmi to hampuloꞌ hai rodua deꞌe to motubuká rótiꞌ hingkakani hai Kódóꞌ i hambuaꞌ taboꞌ.#14:20 Biásá toIahudiꞌ mopakeꞌheꞌ hambuaꞌ mangku to mahile, hai upu-upu tauna motubuká rótiꞌ ba rampaꞌ-rampaꞌ i rutuꞌ. Ane tauna mandeꞌ hingkakani noꞌonoꞌ, iti miꞌi tandaꞌ pohintuwuꞌraꞌ. Básá woꞌo Sura Petóiá 41:10. 21Ánáꞌ Mánusiá bateꞌna ina mate nodo to tepakanótó miꞌi ami i lalu Sura Magasaꞌ.#14:21 tepakanótó miꞌi ami i lalu Sura Magasaꞌ: Básá to teukiꞌ i wóiꞌ Marakusi 9:12-13. Agáiáná ina rumihi karahukuna tauna to mohuhuꞌAꞌ i ewálingkuꞌ. Rángina miꞌi tauna iti tiꞌara rapoánáka.”

Iesu mogáláꞌ-gáláꞌ rótiꞌ hai anggoroꞌ i topeguruNa

(Mat. 26:26-29; Luk. 22:15-20; 1 Kor. 11:23-25)

22Tangaꞌraꞌ Iesu hai topeguruNa mandeꞌ pandeꞌ Posusa Paska, Iesu moala miꞌi rótiꞌ haneꞌi mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti hai Nagáláꞌ-gáláꞌáheꞌ, haneꞌi Nauliꞌ, “Deꞌe miꞌi wátáNgkuꞌ. Niala miꞌi hai niandeꞌ.”

23Roo onoꞌ, Ia moala miꞌi painuá anggoroꞌ, mekakae i Pueꞌ Ala, haneꞌi Nahuhuꞌáheꞌ topeguruNa. Upu-upuheꞌ mainu hangko i mangku iti. 24I tempó iti, Iesu mohángáꞌáheꞌ, “Anggoroꞌ deꞌe mampopotandaꞌ waheꞌKuꞌ to ina mabubu i kamateNgkuꞌ.#14:24 Básá Iesaia 53:12. WaheꞌKuꞌ deꞌe mopakaróhó podándi to woꞌu to ina napaꞌara Pueꞌ Ala, bona moliu waheꞌKuꞌ, handaꞌ tauna peisá mohintuwuꞌ hai Pueꞌ Ala.#14:24 Básá Ieremia 31:31-34; 32:38-41; Ieheskie 36:26-27. 25Bona niꞌisá: mantepuꞌu deꞌe-deꞌe, tiꞌara piꞌi ina Kuinu anggoroꞌ, duuꞌKuꞌ ina mainu anggoroꞌ to woꞌu i lalu popárentána UmáNgkuꞌ.”

26Roo onoꞌ, monaniheꞌ nani petóiá.#14:26 nani petóiá: Biásá Sura Petóiá 113-114 raponani hangko tiꞌara maniheꞌ mandeꞌ pandeꞌ Posusa Paska, hai Sura Petóiá 115-118 raponani i kahópóꞌána Posusa Paska, upuheꞌ mandeꞌ. Karooraꞌ monani, pohuꞌmoheꞌ hangko i kótá lao i Buluꞌ Saitu.

Iesu mampolaluita pesápuákana Peturuꞌ

(Mat. 26:31-35; Luk. 22:31-34; Ioh. 13:36-38)

27Tangaꞌraꞌ molumao lao i Buluꞌ Saitu, Iesu molaluita miꞌi i topeguruNa, Nauliꞌ, “Kómu upu-upu ina mopálehiAꞌ, láwiꞌ teukiꞌ miꞌi i lalu Ngkóráꞌna Pueꞌ Ala node:

‘Ina Kupapate topoewu,

álána dimbáNa mahawuꞌ.’ (Sakaria 13:7)

28Agáiáná i katueꞌKuꞌ huleꞌ, ina moioruAꞌ lao i tampoꞌ Galilea, hai ina Kupegiákou ionoꞌ.”

29Nauliꞌ Peturuꞌ, “Pueꞌ, kehapiꞌ upu-upu tauna mopálehiKoꞌ, agáiáná kódóꞌ tiꞌara!”

30Nauliꞌ Iesu, “Peturuꞌ, toꞌu ntepuꞌu to Kuhángáꞌáꞌákoꞌ: káindi deꞌe, hangko tiꞌara mani motuturuꞌuá manuꞌ karongkánina, tálu miꞌi kánina nusápuákaꞌAꞌ.”

31Agáiáná hangkani mani napakaróhó Peturuꞌ laluitana nauliꞌ, “Kehapiꞌaꞌ mate hingkakani hai Io, tiꞌara mpuꞌu ina kusápuáka kakuisáMu!” Noꞌonoꞌ woꞌo laluitaraꞌ topeguruNa to ntániꞌna.

Iesu mekakae i Gesemani

(Mat. 26:36-46; Luk. 22:39-46)

32Roo onoꞌ, Iesu hai topeguruNa haweꞌheꞌ i hinoe to rahangaꞌ Gesemani.#14:32 Gesemani - lempóna: “popieꞌá lana”. Hinoe Gesemani ara i hambalina Buluꞌ Saitu. Ionoꞌ Iesu mohángáꞌáheꞌ topeguruNa, “Mehodamokou ieneꞌ, ina laoAꞌ hampaiꞌ mekakae.” 33Agáiáná Peturuꞌ, Iakobu hai Iohane Naꞌántiheꞌ bona meuláꞌ i Hia. I tempó iti, maꞌángkárá ntepuꞌu pehádiNa, onoꞌ miꞌi haneꞌi moridiꞌ miꞌi. 34Nahángáꞌáheꞌ, “Masusa ntepuꞌu laluNgkuꞌ, nodoAꞌ to ina mate. Ieneꞌmokou sieruꞌ hai maingáꞌ-ingáꞌkou. Ineeꞌkou letaꞌ!”

35Roo onoꞌ, Iesu lao kakaraoꞌ hantóiꞌ, haneꞌi mopalumbá mekakae.#14:35 mopalumbá mekakae: Ane toIahudiꞌ mekakae, biásáheꞌ meángkáꞌ hai moángkáꞌ taeraꞌ. Iesu mopalumbá ánti kamapárina laluNa. I lalu pekakaeNa, membiáꞌ bona ane peisái, tiꞌara ina molámbiꞌ kapári iti, 36Nauliꞌ, “UmáNgkuꞌ! Tiꞌara ara to tiꞌara Nubuku Nubábehi. Ane peisái, Nupakaraoꞌ kapári to ina morampeAꞌ deꞌe,#14:36 Nupakaraoꞌ wongKódóꞌá kapári to ina morampeAꞌ deꞌe - I lalu básá Iunani: Nupatodáhi mangku deꞌe mokaraohiAꞌ. Laluita “mangku” molempónga “apa to tahampei”. agáiáná tiꞌara peundeꞌáNgkuꞌ to mewaliꞌ, ngkáliꞌna riꞌi peundeꞌáMu Umaꞌ.”

37Roo onoꞌ, mesuleꞌ miꞌi Iesu lao i topeguruNa to tálu. Nahumbaheꞌ tangaꞌraꞌ letaꞌ. Nauliꞌ i Peturuꞌ, “Simoꞌ! Ba letaꞌ pekoꞌ paꞌi? Tiꞌara paꞌi nubuku mamporángáꞌAꞌ, kehapiꞌ hajaa peá? 38Kómu upu-upu, maingáꞌ-ingáꞌkou hai mekakaekou, bona nibuku moewaꞌ pekeloꞌ to ina morampekou. I lalumi niundeꞌ ntepuꞌu mobábehi to maroꞌa, agáiáná wátámi maledeꞌ haneꞌi tiꞌara nibuku.”

39Roo onoꞌ, Iesu lao wopiꞌi huleꞌ mekakae. PekakaeNa iti hibali hai pekakaeNa to rungu-runguna. 40KarooNa mekakae, Ia mesuleꞌ wopiꞌi lao i topeguruNa. Naita letaꞌ wopaheꞌ ánti kamalelueraꞌ. Naruaꞌheꞌ Iesu, agáiáná tiꞌara raisá apa to hangaa-ngaa rauliꞌ.

41Mewaliꞌ lao wopiꞌi Iesu mekakae i katáluna kánina, hai roo onoꞌ, mesuleꞌ wopiꞌi i topeguruNa, Nahángáꞌáheꞌ, “Letaꞌ manikou paꞌi? Gáná miꞌi! Haweꞌ miꞌi tempóna Ánáꞌ Mánusiá ina rasápuáka hai rahuhuꞌ i taeraꞌ tauna to kadake. 42Mearómokou! Laomokeꞌ! Peita! Tauna to ina mohuhuꞌAꞌ i ewálingkuꞌ haweꞌ miꞌi!”

Iesu rahakaꞌ hai topeguruNa melangkaheꞌ

(Mat. 26:47-56; Luk. 22:47-53; Ioh. 18:1-11)

43Tangaꞌna mani Iesu molaluita, haweꞌ miꞌi Iudasiꞌ, hadua hangko i topeguruNa to hampuloꞌ hai rodua, hingkakani hai handaꞌ tauna to moánti pihoꞌ hai pebóbáꞌ. Tauna iti rapohawaꞌáheꞌ kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna bona laoheꞌ mohakaꞌ Iesu. 44Nahángáꞌámoheꞌ ami Iudasiꞌ tandaꞌ bona raisá kaumbánaNa Iesu, nauliꞌ, “Heáná to kuángki, onoꞌ miꞌi tauna to nipeliꞌ. Nihakaꞌ haneꞌi niánti. Nikámpái ntepuꞌu.” 45Mewaliꞌ, i kahaweꞌraꞌ ionoꞌ, lao miꞌi Iudasiꞌ mampohidupaꞌá Iesu, nauliꞌ, “Guru!” haneꞌi naꞌángki. 46Mewaliꞌ rahakaꞌ mpuꞌu miꞌi iti Iesu. 47Hangko ionoꞌ, hadua tauna to meángkáꞌ hungkuꞌ i Iesu mobutuꞌ pihoꞌna motárási hawiꞌna Tadulako Menómbá Mahile.#14:47 Peturuꞌ to motárási talinga (básá Iohane 18:10). Hangaꞌna hawiꞌna tadulako menómbá Mahile iti, Málákusi (básá Iohane 18:10). Kana peá talingana haneꞌi mawehángi.

48Nauliꞌ Iesu i tauna to mohakaꞌ, “Moapa riꞌi haneꞌi maiAꞌ nihakaꞌ moántikou pihoꞌ hai pebóbáꞌ? Ba niuliꞌ ripaꞌi tauna to kadakeAꞌ noeneꞌ? 49Alo-alona araꞌAꞌ hingkakani hai kómu i Támbina Pueꞌ Ala mepaturoꞌ. Moapa riꞌi haneꞌi tiꞌaraꞌAꞌ nihakaꞌ i tempó iti? Agáiáná upu-upu deꞌe hangaa-ngaa mewaliꞌ, bona tebukeki apa to teukiꞌ i lalu Sura Magasaꞌ.”#14:49 Básá Sura Petóiá gáláꞌna ka-22; 118:22; Iesaia gáláꞌna ka-53.

50Roo onoꞌ, upu-upu topeguruNa melangkaheꞌ mopálehi Iesu.#14:50 upu-upu topeguruNa melangkaheꞌ mopálehi Iesu: Iti to nahángáꞌámoheꞌ ami Iesu. Básá wátiꞌna ka-27.

51I tempó iti, ara woꞌo hadua ánáꞌntomoane#14:51 hadua ánáꞌntomoane: Babilaꞌ iti Marakusi haduduána, to moukiꞌ sura deꞌe. to meuláꞌ i Iesu. Ánáꞌntomoane iti tiꞌara mewaruꞌ, mokómóki peá wátána hai báná. Karahakaꞌna, 52ia molosu kómóꞌna iti haneꞌi melangka menggelá.

Iesu i lindoꞌna Topepáresáꞌ Mahile Agama Iahudiꞌ#14:52 Topepáresáꞌ Mahile Agama Iahudiꞌ - I lalu básá Indonesia: Mahkama Agama. Básá to teukiꞌ i Kahirámpuá Laluita.

(Mat. 26:57-68; Luk. 22:54-55,63-71; Ioh. 18:12-14,19-24)

53Hangko ionoꞌ, Iesu raꞌánti miꞌi lao i támbina Tadulako Menómbá Mahile.#14:53 Iesu raꞌánti sieruꞌ i lindoꞌna Hanasa, to rapopendáulu miꞌi mewaliꞌ Tadulako Menómbá Mahile, haneꞌi raꞌánti lao i lindoꞌraꞌ Kaiapa Tadulako Menómbá Mahile tempó onoꞌ hai totosaeraꞌ toIahudiꞌ to ntániꞌna. Básá Iohane 18:12-14,19-24. Ionoꞌ, upu-upu kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna hirámpumoheꞌ. 54Peturuꞌ meuláꞌ ngkaraoꞌ duuꞌna haweꞌ i tangabaa támbina Tadulako Menómbá Mahile. Ionoꞌ, ia mehoda menene hingkakani hai topekámpái.

55I tempó iti, kapalaꞌ-kapalaꞌ tadulako menómbá hai upu-upu Topepáresáꞌ Mahile mampeliꞌmoheꞌ sabiꞌ to ina mopakanótó kamasalaꞌna Iesu, bona peisá rahuku mate,#14:55 Mouláꞌ áturáraꞌ toIahudiꞌ, hangaa-ngaa ara rodua sabiꞌ to hibali posabikiraꞌ bona tauna peisá rahuku mate. Básá Poimbaꞌ 35:30; Pohuleki 17:6; 19:15. agáiáná tiꞌara ralámbiꞌ salaꞌNa. 56Handaꞌ ntepuꞌu sabiꞌ to mosalaꞌi, agáiáná tongawaꞌ miꞌi dongkoꞌraꞌ peá láwiꞌ montaniꞌ-ntaniꞌ laluitaraꞌ.#14:56 Mouláꞌ áturáraꞌ toIahudiꞌ, sabiꞌ dongkoꞌ hangaa-ngaa molámbiꞌ pehuku to ina raweꞌi tauna to rasalaꞌi. Básá Pohuleki 19:16-21. 57Araheꞌ bahangapa tauna to meángkáꞌ mewaliꞌ sabiꞌ dongkoꞌ, rauliꞌ, 58“Tauna deꞌe, kihádi manguliꞌ node: ‘Ina Kugero Támbina Pueꞌ Ala#14:58 Ina Kugero Támbina Pueꞌ Ala: Mouláꞌ topopárentá toRoma, tauna to mopakarugiꞌ támbi penómbáꞌá hangaa-ngaa rahuku mate. Agáiáná tiꞌara iti to nauliꞌ Iesu. Básá Iohane 2:19-20. to rabábehi tauna, hai i lalu tálu alona ina Kuaró huleꞌ to ntániꞌna, to tiꞌara rabábehi tae tauna.’ ”#14:58 to tiꞌara rabábehi tae tauna - Lempóna: ina nabábehi Pueꞌ Ala. Moliu laluita iti, Iesu mopangákuꞌ kaꞌIana Pueꞌ Ala ba Huoꞌána Pueꞌ Ala. 59Agáiáná i karaposabikiraꞌ iti, tiꞌara woꞌo hibali polaluitaraꞌ.

60Meángkáꞌ miꞌi Tadulako Menómbá Mahile i lindoꞌraꞌ upu-upu tadulako, mekuneꞌ i Iesu, “Tiꞌaraheꞌ paꞌi Nuhániki to mosalaꞌiKoꞌ iti?” 61Agáiáná Iesu tiꞌara mehániꞌ, mogalo hampákáꞌ laluita.#14:61 Básá Iesaia 53:7. Hangkani mani Tadulako Menómbá Mahile mekuneꞌ i Hia, “Ba Io mpuꞌui Datu Topehómpóꞌ, Ánáꞌna Pueꞌ Ala to hintotoꞌ ratóiá?”

62Nahániki Iesu, “Toꞌu. Kódóꞌ miꞌi deꞌe.#14:62 Kódóꞌ miꞌi deꞌe: Mouláꞌ bahangapa tauna to mapánde ntepuꞌu motasere Ngkóráꞌna Pueꞌ, Iesu mokábelái hangaꞌna Pueꞌ Ala, YHWH, to molempónga Kódóꞌ miꞌi deꞌe. (Básá Pesuwuꞌá 3:14.) Iti woꞌo hampákáꞌ rárá manguliꞌ “Ió.” Ina niꞌita Ánáꞌ Mánusiá mehoda tándáꞌ i kuánána Pueꞌ Ala to Makuasaꞌ, hai ina niꞌita woꞌo mendáulu mai hangko i surugáꞌ napótóꞌ gawu.”

63Kanahádina Tadulako Menómbá Mahile apa to nauliꞌ Iesu, ia mohepaꞌ miꞌi baduna ánti kamabukoꞌna#14:63 Mouláꞌ Paturoꞌna Musa, Tadulako Menómbá Mahile tiꞌara peisá mohepaꞌ baduna. Básá Áturá Menómbá 21:10. haneꞌi nauliꞌ, “Tiꞌara piꞌi mobunduꞌ ara sabiꞌ! 64Nihádi miꞌi polaluitaNa to mopahibali wátáNa hai Pueꞌ Ala. Mewaliꞌ noumbá miꞌi pobutusimi?”

Upu-upuraꞌ manguliꞌ, “Masalaꞌ ntepuꞌu! Hangaa-ngaa rahuku mate!”#14:64 Mouláꞌ áturáraꞌ toIahudiꞌ, tauna to mopakóiꞌ Pueꞌ Ala hangaa-ngaa rahuku mate. Básá Áturá Menómbá 24:16.

65Hangko ionoꞌ, araheꞌ to motinuduhi, araheꞌ woꞌo to mampopowadi-wadi: rapiriꞌ mátáNa haneꞌi ratampedaꞌ, rahángáꞌá, “Ee, nabiꞌ! Ane toꞌu-toꞌu Io toMásehi, Nuꞌuliꞌ ba heánái to motampedaꞌKoꞌ!”#14:65 raháláꞌ mátáNa haneꞌi rapapahái: To rabábehi iti ia miꞌi pampehukáꞌ ba toꞌu-toꞌu tauna iti Datu Topehómpóꞌ ba tiꞌara. Pampehukáꞌ deꞌe mentóáꞌ hangko i Iesaia 11:3 to manguliꞌ, “Tiꞌara hai petótóiá mata ina Nabutusi.” Mogalo riꞌi topekámpái motampedaꞌ woꞌo Iesu.

Peturuꞌ mosápuáka peuláꞌna i Iesu

(Mat. 26:69-75; Luk. 22:56-62; Ioh. 18:15-18,25-27)

66I tempóna mani Peturuꞌ i tangabaa, haweꞌ miꞌi hadua towawine to mobágóꞌ i támbina Tadulako Menómbá Mahile. 67Kamoitána Peturuꞌ menene, lao napelenggeꞌ haneꞌi nahángáꞌá, “Io woꞌo hadua rángána Iesu toNasare doꞌo.”#14:67 Hawiꞌ iti mopakóiꞌ Iesu. Tauna hangko i Nasare biásá rarekeꞌ tauna to tepaibókóka ba to i buluꞌ. Básá Iohane 1:46.

68Agáiáná nasápuáka Peturuꞌ, nauliꞌ, “Tiꞌara kuisá apa to nuꞌuliꞌ!” Hangko ionoꞌ melimbá miꞌi lao hungkuꞌ i babaꞌá. [Motuturuꞌuá manuꞌ.]#14:68 Laluita iti teukiꞌ i bahangapa sura to raukiꞌ huleꞌ ioru, agáiáná tiꞌara teukiꞌ i to raukiꞌ huleꞌ i bókóꞌ.

69Towawine iti moita wopiꞌi Peturuꞌ, hai mohángáꞌáheꞌ tauna to ara ionoꞌ, “Ia deꞌe to hingkakani hai Iesu.” 70Agáiáná Peturuꞌ mesápuáka wopiꞌi.

Tiꞌara marue hangko ionoꞌ,#14:70 Tiꞌara marue hangko ionoꞌ: rekeꞌ-rekeꞌna hajaa (básá Lukasi 22:59). tauna to meángkáꞌ ionoꞌ mohángáꞌá woꞌo, “Io mpuꞌu rángáNa, láwiꞌ io woꞌo toGalileakoꞌ!”

71Mokambo miꞌi Peturuꞌ, nauliꞌ, “Mate-mateaꞌ. Tiꞌara mpuꞌu kuisá tauna to niuliꞌ iti!” 72I tempó iti, motuturuꞌuá miꞌi manuꞌ karongkánina. Nabuhinao miꞌi Peturuꞌ laluitana Iesu to manguliꞌ, “Hangko tiꞌara mani motuturuꞌuá manuꞌ karongkánina, tálu miꞌi kánimu mosápuákaꞌAꞌ.”#14:72 Básá to nauliꞌ Iesu (wátiꞌna ka-30). Onoꞌ miꞌi haneꞌi Peturuꞌ menggoli teriaꞌ.

Currently Selected:

Marakusi 14: NTBEP

Highlight

Copy