Matiu 4
4
Iesu nakeloꞌ Datu Tokadake
(Mrk. 1:12-13; Luk. 4:1-13)
1Roo onoꞌ, Iesu naꞌánti Inaona Pueꞌ Ala lao i pádá loriꞌ bona nakeloꞌ Datu Tokadake. 2Ionoꞌ, Iesu mopuasaꞌ iba puloꞌna alona hai iba puloꞌna wengina kamaruena,#4:2 Iba puloꞌna alona hai iba puloꞌna wengina: Ina rabuhinao toIahudiꞌ tempóna toioruraꞌ menggoli-nggoli i pádá loriꞌ iba puloꞌna parena kamaruena, hai Pueꞌ Ala mampampeitai laluraꞌ ionoꞌ. (Básá Pohuleki 8:2-3.) onoꞌ haneꞌi Iesu marimi ntepuꞌu. 3I tempó iti, haweꞌ Datu Tokadake mokeloꞌ Iesu, nauliꞌ, “Ánti kaꞌIona Ánáꞌna Pueꞌ Ala, Nuhuoꞌ miꞌi watu deꞌe mewaliꞌ rótiꞌ!”#4:3 Ane Iesu mobábehi rótiꞌ haduduáNa, lempóna: tiꞌara mampoinálái pekádipurána Pueꞌ Ala i Hia.
4Agáiáná nahániki Iesu, “I lalu Sura Magasaꞌ ara to teukiꞌ node: ‘Tiꞌara peá pandeꞌ to mopatueꞌ tauna, agáiáná to raparaluu ia miꞌi mopailalu ntepuꞌukeꞌ ngkóráꞌna Pueꞌ Ala.’ ”#4:4 Básá Pohuleki 8:3.
5Roo onoꞌ, Datu Tokadake moánti Iesu lao i Ierusale, kótá to magasaꞌ, hai napopeángkáꞌ i wumbu Támbina Pueꞌ Ala, 6nauliꞌ, “Ánti kaꞌIona Ánáꞌna Pueꞌ Ala, mengkanawoꞌmoKoꞌ hangko i hindeꞌe! TiꞌaraKoꞌ ina moapa-apa, láwiꞌ ara teukiꞌ i lalu Sura Magasaꞌ to manguliꞌ node:
‘Pueꞌ Ala ina mohuoꞌheꞌ malaꞌekaNa mokámpáiKoꞌ bona tiꞌarakoꞌ hurewuꞌ.
Ina rahángkóbáKoꞌ bona bituMu tiꞌara ina tóá i watu.’ ” (Sura Petóiá 91:11-12)
7Agáiáná nahániki Iesu, “Teukiꞌ woꞌo i lalu Sura Magasaꞌ: ‘Ineeꞌkoꞌ mampehukáꞌ Pueꞌ Ala, Pueꞌmu.’ ”#4:7 Básá Pohuleki 6:16. Básá woꞌo Pesuwuꞌá 17:1-7.
8Roo onoꞌ, Datu Tokadake moánti wopiꞌi Iesu lao i wongko buluꞌ to mapángkáꞌ ntepuꞌu, hai natudeꞌá upu-upu tampoꞌ i duniáꞌ hai peawaꞌraꞌ kadatuá iti, 9nauliꞌ, “Ane molingkuduKoꞌ menómbá i kódóꞌ, upu-upu deꞌe ina kuweꞌiKoꞌ.”#4:9 Datu Tokadake mokeloꞌ Iesu bona mewaliꞌ datu moliu rárá to magampaꞌ, tiꞌara moliu kamateNa i kau mombehape.
10Agáiáná nahániki Iesu, “Pohuꞌmokoꞌ! Teukiꞌ miꞌi i lalu Sura Magasaꞌ node: ‘Hangaa-ngaa mengkoruꞌkoꞌ i Pueꞌ Ala, Pueꞌmu, láwiꞌ Ia peá to hintotoꞌ nupenómbái.’ ” 11Roo onoꞌ, pohuꞌ miꞌi Datu Tokadake mopálehi Iesu, hai haweꞌmoheꞌ malaꞌeka mokádipurá Iesu.#4:11 Iti hibali hai tempóna Pueꞌ Ala mokádipurá toSáráeliꞌ i pádá loriꞌ, hai mampopandeꞌ woꞌo nabiꞌ Eliá. Básá 1 Datu-datu 19:5-8.
Bágóꞌna Iesu i tampoꞌ Galilea (4:12–16:12)
Iesu mantepuꞌu mobágóꞌ i Galilea
(Mrk. 1:14-15; Luk. 4:14-15)
12Tiꞌara marue hangko ionoꞌ, Iohane Toperiu rahakaꞌ hai ratarungku.#4:12 Básá Matiu 14:3-12. Kanahádina Iesu bámbári iti, pohuꞌ miꞌi mesuleꞌ lao i wánuá Nasare i tampoꞌ Galilea. 13Roo onoꞌ, Ia pohuꞌ hangko i wánuá Nasare lao toroꞌ i wánuá Kapenau. Kapenau iti wánuá to i wiwi rano Galilea, i tampoꞌraꞌ toSebulo hai toNatali. 14{Iesu moánti Ngkóráꞌna Pueꞌ i tauna to toroꞌ ionoꞌ,} bona tebukeki laluita to napahaweꞌ nabiꞌ Iesaia hangkoia to manguliꞌ node:
15“Tampoꞌraꞌ toSebulo hai toNatali
to hungkuꞌ i rano Galilea,
ara tándáꞌ i hambali uwai Iarade.
Tampoꞌ iti ia miꞌi Galilea to rakatoroꞌi handaꞌ tauna to tiꞌara toIahudiꞌ.
16Tauna to ionoꞌ, toroꞌheꞌ i lalu kakáindiána,
láwiꞌ katueꞌraꞌ nodoheꞌ tomate ánti dósáraꞌ.
Agáiáná deꞌe-deꞌe moitamoheꞌ pewangkaꞌ to mahile,
láwiꞌ mesupaꞌ miꞌi Hadua
to ina moánti katehómpóꞌ
i tauna to tiꞌara mani moisá Pueꞌ Ala.” (Iesaia 9:1-2)
17Mewaliꞌ i pesuleꞌna Iesu i tampoꞌ Galilea, Ia mantepuꞌu mopahaweꞌ Ngkóráꞌna Pueꞌ, Nauliꞌ, “Menosoꞌmokou hangko i dósámi, haweꞌ miꞌi tempóna Pueꞌ Ala ina mopatongawaꞌ popárentáNa i duniáꞌ.”
Iesu mokióꞌ topeguruNa to rungu-runguna
(Mrk. 1:16-20; Luk. 5:1-11)
18Tangaꞌna Iesu molumao i wiwi rano Galilea, Ia moita rodua topohalalu, hangaꞌraꞌ Simoꞌ (to rauliꞌ woꞌo Peturuꞌ)#4:18 Iesu to mohangaꞌ Simoꞌ ‘Peturuꞌ’. Básá Iohane 1:42. hai Andaria ádina. I tempó iti, tangaꞌraꞌ modálá i rano, láwiꞌ iti miꞌi bágóꞌraꞌ. 19Nahángáꞌáheꞌ Iesu, “Maimokou! Meuláꞌkou i Kódóꞌ! Mantepuꞌu deꞌe-deꞌe, tiꞌara piꞌi bouꞌ to nipeliꞌ, agáiáná tauna riꞌi {bona mewaliꞌheꞌ woꞌo topeuláꞌKuꞌ}.”#4:19 I lalu básá Iunani: mampopewaliꞌkou topodálá tauna. 20Mantepuꞌu alo iti, mopálehi mpuꞌumoheꞌ bágóꞌraꞌ, hai meuláꞌmoheꞌ i Iesu.
21Iesu mopaliliu polumaoNa, moita wopiꞌi rodua topohalalu, iamoheꞌ Iakobu hai Iohane ádina, ánáꞌna Sebedeu. Tempó iti, tangaꞌraꞌ mopakaroꞌangi dáláraꞌ i lalu duanga hai umáraꞌ. Nakióꞌheꞌ woꞌo Iesu bona meuláꞌheꞌ i Hia, 22mewaliꞌ rapálehi mpuꞌu miꞌi duangaraꞌ hai umáraꞌ, haneꞌi meuláꞌheꞌ woꞌo i Iesu.
Iesu mopaturoꞌ hai mopakauriꞌ handaꞌ tauna
(Luk. 6:17-19)
23Iesu molumao i humalele tampoꞌ Galilea hai mepaturoꞌ i handaꞌ támbi penómbáꞌá. Ia mopahaweꞌ Ngkóráꞌ Marasa mokana popárentána Pueꞌ Ala, hai mopakauriꞌheꞌ woꞌo upu-upu tauna to tiꞌara ralalu. 24Apa to Nabábehi iti tebámbári i upu-upu wánuá i tampoꞌ Siria, álána handaꞌ tauna to mampoinao lao mampohidupaꞌá Iesu. Tauna iti moántiheꞌ rángáraꞌ ba halaluraꞌ to mantódihá handaꞌ pákáꞌna hakiꞌ hai kapári. Araheꞌ woꞌo to napesuaꞌi setáꞌ, to mohakiꞌ mate mataꞌ, hai to paluꞌ. Upu-upuheꞌ iti napakauriꞌ Iesu. 25I tempó iti, handaꞌ ntepuꞌu tauna to meuláꞌ-uláꞌ oaꞌ i Hia: araheꞌ to hangko i tampoꞌ Galilea, hangko i Dekapoli,#4:25 Dekapoli - lempóna: hampuloꞌ kótá. Kahandaꞌáraꞌ tauna ionoꞌ tiꞌaraheꞌ toIahudiꞌ. hangko i tampoꞌ Iudá tepasuaꞌ hangko i kótá Ierusale, hai araheꞌ woꞌo to hangko i hambali uwai Iarade.
Currently Selected:
Matiu 4: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.