Matiu 17

Peawaꞌna Iesu tongawaꞌ i wongko buluꞌ

(Mrk. 9:2-13; Luk. 9:28-36)

1Ini alona hangko ionoꞌ, Iesu moánti Peturuꞌ, Iakobu, hai Iohane ádina, mempanaiꞌheꞌ lao i wongko buluꞌ to mapángkáꞌ.#17:1 buluꞌ to mapángkáꞌ: Tiꞌara piꞌi taisá buluꞌ apa to natunggái ieneꞌ. Babilaꞌ buluꞌ Heremo, to rekeꞌ-rekeꞌna hampuloꞌ hai hahioꞌ kilómete hangko i kótá Kaisarea Pilipi. (Básá Marakusi 8:27.) Buluꞌ iti 2750 mete lábi kamapángkáꞌna. 2Tangaꞌraꞌ ionoꞌ, tebáliki miꞌi lenggeꞌna Iesu mewaliꞌ meawaꞌ.#17:2 lenggeꞌna Iesu mewaliꞌ meawaꞌ: To raita topeguruna Iesu, peawaꞌ hai kamakuasaꞌ to ara i Hia hangko tiꞌara mani mopálehi surugáꞌ mai i duniáꞌ mewaliꞌ tauna (básá Iohane 17:5; Pilipi 2:6-7), hai to Naꞌala huleꞌ i pesuleꞌNa lao i surugáꞌ (básá Pilipi 2:9). LindoꞌNa mewangkaꞌ nodo alo, hai waruꞌNa mengkilaꞌ. 3Hangkaꞌ-hangkaꞌ perái topeguruNa moitaheꞌ rodua nabiꞌ molaluita hai Iesu. Nabiꞌ to rodua iti ia miꞌi Musa hai Eliá.#17:3 Musa hai Eliá: Musa mosulewátái áturána Pueꞌ Ala, hai Eliá mosulewátái suraraꞌ nabiꞌ-nabiꞌ. 4Hangko ionoꞌ, Peturuꞌ mohángáꞌá Iesu, “Pueꞌ, maroꞌa ntepuꞌu kihádi kitaꞌ arakeꞌ ieneꞌ! Ane Nuꞌundeꞌi Pueꞌ, ina kubábehi tálu wuaꞌna bambaruꞌ ieneꞌ: hambuaꞌ i Hio Pueꞌ, hambuaꞌ i Musa, hai hambuaꞌ woꞌo i Eliá.”

5Tangaꞌna mani Peturuꞌ molaluita, iaperái napótóꞌheꞌ gawu to mewangkaꞌ,#17:5 Gawu ia miꞌi tandaꞌ kaꞌárána Pueꞌ Ala i oloꞌraꞌ tauna. Básá Pesuwuꞌá 13:21-22; 16:10; 19:9; 24:15-18; 34:5; 40:34-38; Rárá Penómbá 16:2; 1 Datu-datu 8:10-11; Sura Petóiá 97:2. hai hangko i lalu gawu iti rahádi miꞌi wambaꞌna Pueꞌ Ala to manguliꞌ, “Deꞌe miꞌi ÁnáꞌKuꞌ to Kupokaꞌahiꞌ hai Kupokagóeꞌ. Nipehádingi miꞌi laluitaNa!”#17:5 Básá to teukiꞌ i wóiꞌ Matiu 3:17.

6Karahádina topeguruNa wambaꞌna Pueꞌ Ala iti, malááꞌmoheꞌ, haneꞌi liliuheꞌ mopalumbá. 7Agáiáná Iesu lao mohungkuki hai Nakamaꞌheꞌ, haneꞌi Nahángáꞌáheꞌ, “Pearó, ineeꞌkou malááꞌ!” 8Rapeita riꞌi, Iesu perái haduduáNa.

9Pendáuluraꞌ hangko i wongko buluꞌ iti, nahángáꞌáheꞌ Iesu, “Ineeꞌ sieruꞌ niuliꞌ-uliꞌ i heáná peá apa to niꞌita ininá hangko tiꞌara mani Ánáꞌ Mánusiá rapatueꞌ huleꞌ hangko i kapate.”

10Mekuneꞌheꞌ topeguruNa, rauliꞌ, “Wuliangkaiꞌ. Mouláꞌ paturoꞌraꞌ guru agama, nabiꞌ Eliá hangaa-ngaa haweꞌ ioru, hangko haweꞌ riꞌi Datu Topehómpóꞌ.#17:10 Básá Maleaki 3:1; 4:5-6. Noumbá riꞌi haneꞌi noꞌonoꞌ?”

11Nahániki Iesu, “Toꞌu to rapaturoꞌákou. Eliá hangaa-ngaa haweꞌ ioru, láwiꞌ ia to mopatimama upu-upuna. 12Hai Kuhángáꞌákou: haweꞌ mpuꞌu miꞌi Eliá, agáiáná tiꞌara raisá tauna kaheánána. Ia rapopeahiahiꞌ mouláꞌ peundeꞌáraꞌ. Noꞌonoꞌ woꞌo Ánáꞌ Mánusiá ina rapopeahiahiꞌ mouláꞌ peundeꞌáraꞌ.” 13Tempó onoꞌ, hangko raisá riꞌi topeguruNa lempóna laluitana Iesu ininá: to rapándiriꞌ nodo nabiꞌ Eliá ia miꞌi Iohane Toperiu.

Iesu mopakauriꞌ ánángkóiꞌ to napesuaꞌi setáꞌ

(Mrk. 9:14-29; Luk. 9:37-43)

14I pendáuluraꞌ Iesu hai topeguruNa to tálu iti hangko i buluꞌ, mampohidupaꞌáheꞌ tauna to handaꞌ. Ara hadua tobaleilo to lao molingkudu i bitina Iesu, nauliꞌ, 15“Pueꞌ, Nupokaꞌahiꞌ woia ánáꞌkuꞌ tobaleilo. Ia kana hakiꞌ mate mataꞌ, hai ane haweꞌ wopiꞌi hakiꞌna, paka malimpu. Hangkani-hangkani madungká i api, hangkani-hangkani woꞌo madungká i lalu uwai. 16Kuánti miꞌi i topeguruMu, agáiáná tiꞌara rabuku rapakauriꞌ.”

17Nauliꞌ Iesu, “Noumbárakou noeneꞌ? Moapa riꞌi haneꞌi tiꞌara manikou mepoinálái? Nisápuáka mani peundeꞌána Pueꞌ Ala! Hangapa mani kamaruena ina hingkakaniAꞌ hai kómu? Hangapa mani kamaruena hangaa-ngaa sabaraꞌAꞌ i kómu hangko mepoináláirakou? Ánti mai ánángkóiꞌ iti!”

18Raꞌánti mpuꞌu miꞌi ánángkóiꞌ iti i Iesu. Hangko ionoꞌ, Nakámbáróá mpuꞌu miꞌi iti setáꞌ to mopakasusa ánángkóiꞌ iti. Mesuwuꞌ mpuꞌu miꞌi setáꞌ iti, haneꞌi kásáliu mauriꞌ ánángkóiꞌ iti.

19Tiꞌara marue hangko ionoꞌ, tempóna Iesu haduduáNa, laomoheꞌ topeguruNa mekuneꞌ i Hia, “Guru, moapa riꞌi haneꞌi tiꞌara kibuku mampopesuwuꞌ setáꞌ iti?”

20Nahániki Iesu, “Onoꞌ miꞌi, láwiꞌ makuraꞌ mani pepoináláimi. Toꞌu to Kuꞌuliꞌ, hai Kuhángáꞌákou: kehapiꞌ pepoináláimi nodo peá kamahilena lihu duiꞌá, peisákou mopárentá buluꞌ deꞌe, ‘Ee, buluꞌ! Melimbámokoꞌ hangko i hindeꞌe!’ hai buluꞌ deꞌe bateꞌna ina melimbá. Nibuku nibábehi ane mepoináláikou. [ 21Agáiáná ane niundeꞌ mampopesuwuꞌ setáꞌ to noꞌonoꞌ, hangaa-ngaa mekakaekou hai mopuasaꞌ.]”#17:21 I lalu surana Matiu básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ.

Bágóꞌna Iesu to kahópóꞌána i tampoꞌ Galilea (17:22–18:35)

Iesu mampolaluita wopiꞌi kaꞌina mateNa

(Mrk. 9:30-32; Luk. 9:43-45)

22I tempóna Iesu hai topeguruNa hirámpu i tampoꞌ Galilea, Nahángáꞌáheꞌ, “Ánáꞌ Mánusiá ina rapehuhuꞌá i taeraꞌ tauna. 23Ina rapapate, agáiáná i katáluna alona ina tueꞌ huleꞌ.” Karahádina peá laluitaNa iti, masusa ntepuꞌu laluraꞌ.

Pobaiari ásele to rapakeꞌ mokádipurá Támbina Pueꞌ Ala

24Kahaweꞌraꞌ Iesu hai topeguruNaheꞌ i wánuá Kapenau, haweꞌ miꞌi hadua to mampesingaraꞌi ásele to rapakeꞌ mokádipurá Támbina Pueꞌ Ala.#17:24 ásele to rapakeꞌ mokádipurá Támbina Pueꞌ Ala: Hampare-hampare, upu-upu tobaleilo to tinuwuꞌna rompuloꞌ miꞌi parena lábi hangaa-ngaa mobaiariheꞌ ásele Támbina Pueꞌ Ala. Ásele iti rompepaꞌ dóiꞌ peráꞌ drakma (básá Iunani) ba dirham (básá Indonesia). Imbaꞌna hibali hai sarona hadua tauna ane mobágóꞌ rongalo. Básá Pesuwuꞌá 30:13-16; 2 Tuntukáná Datu 24:9-14. Napekuneꞌ i Peturuꞌ, “Ba mobaiariꞌi woꞌo ásele Támbina Pueꞌ Ala iti Gurumi, ba tiꞌara?”

25Nahániki Peturuꞌ, “Hangaa-ngaa Nabaiari!”

Hangko ionoꞌ, mesuleꞌ miꞌi Simoꞌ Peturuꞌ lao i támbi to rakatoroꞌi. I kahaweꞌna ionoꞌ, tiꞌara mani nampakaꞌ molaluita, ioru miꞌi Iesu mekuneꞌ, “Simoꞌ, noumbá polámbiꞌmu? Hangko i heáná datu-datu i duniáꞌ ina moróróꞌ ásele, hangko i taunáraꞌ haduduáraꞌ ba hangko i tauna i tampoꞌ to nakuasaꞌi?”

26Nahániki Peturuꞌ, “Hangaa-ngaa moróróꞌheꞌ ásele hangko tauna i tampoꞌ to rakuasaꞌi.”

Nauliꞌ Iesu, “Ane noꞌonoꞌi, tiꞌarakeꞌ paraluu mobaiari. 27Agáiáná kehapiꞌ noꞌonoꞌ, maroꞌa mani ane mobaiarikeꞌ, bodana kóiꞌ inaoraꞌ i kitaꞌ. Mewaliꞌ, laomokoꞌ mopeká i rano Galilea. Bouꞌ to kana pekámu rungu-runguna, nubengká ngángána. Ionoꞌ ina nupohumbai dóiꞌ bona iti nupakeꞌ mobaiari áselentaꞌ rodua.”

Currently Selected:

Matiu 17: NTBEP

Highlight

Copy